X’Tort Għandi?

X’tort għandi jien bħal barri naqta’ l-ktajjen

Bħaż-żingari ma nagħraf ebda rbit.

Minn żmien għal żmien infittex pjazza ġdida

Imqar jekk naf li nasal bit-taħbit.

X’tort għandi jien ma nafx fejn għandi nieqaf,

U nibqa’ ndur u nagħqad sa ma mmut,

Bħal kewkba feġġa, taqsam, tisparixxi

U nsalpa f’baħar wiesa’ ta’ bla xtut.

Għax qatt m’emmint li l-ħajja hi biss taraġ,

Li tiġbor, tgeddes, tfaddal bla mistrieħ,

Kif jafu jagħmlu biss in-nies tad-dinja

U f’daqqa ssib li kollox tar mar-riħ.

X’tort għandi jien jekk ruħi vagabonda,

U tgħanni dejjem l-għanja ta’ ba żmien

Fuq dahri hemm l-ilwien ta’ ħafna kwiekeb,

U qalbi serħ ma taf issib imkien.

Alfred Grech.

20/08/2019