Għolejt.

Għolejt fuq kull quċċata

U xorta ma rajt xejn;

U dħalt sew ġo kull rokna

Infittex imma għalxejn.

U tlajt ukoll mas-siġar

Li jistgħu jagħtu l-frott,

Ma kollha xorta waħda,

Il-frott ħażin u xott.

Staqsejt għal kemm il-darba

Hawnhekk jien għaliex ġejt,

Għalfejn dat-taħtbit kollu?

Daqshekk! Għax issa għajjejt.

U xħin int issejjaħli

Tistaqsi x’qed inħoss,

Jien lanqas naf inwieġbek

U f’qalbu nibqa’ nross.

Alfred Grech

22/08/2019