Qawwija Din Il-Mewġa.

Qawwija din il-mewġa ta’ li

ma jimpurtani xejn u niġi naqa’u nqum

li tordom bir-ritmi sataniċi tagħha

dak kollu li hu sabih

li hu huwa wirt

li hu tagħna.

Oxxena hi dik l-id

li toqtol dak li hu ħaj tassew

li issa ċarrtet il-maskra minn wiċċ

min kien jipposa ta’ xi feddej

u issa mhux ħlief joqtol is-siegħat,

iż-żmien u s-siġar maqlugħa minn għeruqhom

biex mingħalih iwessa’ t-toroq li jwasslu għall eżilju.

U issa nafu li l-allat t’olimpu

ma jimpurtahomx mill-ġejjieni

tagħna l-bnedmin komuni

għax huma megħedijin iħarsu l-isfel

mill-quċċata fejn qiegħdin

lejna ċ-ċorma għarwiena tal-imġiddmin

filwaqt li huma hemm fis-sakra tal-ħtif

u l-benna tal-ambrosia.

Ma jasal qatt lejhom il-krib

id-dieqa tal-ikkalzrati

fuq din ir-roqgħa art tal-iskwallur

avvilenti u deżolanti.

Qawwija din il-mewġa

li rikbuha huma biss

li għandhom moħħ bħal tax-xadini

li jgħixu fl-opulenza u fl-affluwenza

imxaħxħa fit-tixħim u fit-tħaxxim

ta’ dak li huwa sewwa minn qaddisu.

Alfred Grech

12/08/2019.