Mhemm Xejn.

Mhemm xejn sfurzat f’dan kollu,

Int taf li d-dinja tagħna

Titwessa’ kemm irridu

Sakemm  il-ħolma  tibqa’ twelled

Fuq sħab ta’ mingħajr pis.

Imqar jekk dritta mhix it-triq

U fiha nżul u tlajja

l-għanja tagħna tibqa’ għaddejja

sakemm għad ninqabdu

fit-traffiku ġġammjat.

Nibdew ngħidu r-rużarju

Biex jgħaddi l-ħin.

Jekk qiegħda tfittex xi miraklu

Ħares ftit ġewwa fik

U ħabbat il-ħabbata

Ta’ qalbek.

Hemm rokna f’tarf id-dinja

Il-bogħod mil-għajn tan-nies

Hemmhekk toħlom kemm trid.

Alfred Grech

22/08/2019