Dawn Baqgħu Jippumpjaw.

Dawn baqgħu jippumpjaw

u baqgħu hekk irewwħu,

l-ekonomija tikber,

u b’ħafna nċens ifewwħu.

U kollox kien ftaħir

biex aħna lkoll nemmnuhom

għasfur jiftaħar b’rixu

minflok inżebilħuhom.

U kollox kien ftaħir

għamlulna l-bżar f’għajnejna,

għax bħal bużżieqa din

u nerġgħu minn fejn bdejna.

Biex issa ara x’ġara

din f’daqqa bdiet tixpakka

u xorta baqgħu jgħidu

l-iskuża kienet fjakka.

Jekk qabel kien hemm dubbju

kemm twassal din il-ħlieqa

illum quddiem għajnejna

infaqet il-bużżieqa.

Dawn baqgħu jippumpjaw

rieduha tibqa’ tkattar

din l-art fejn lanqas hawn

fejn tista’ biss titmattar.

Alfred Grech

21/08/2019