Ħmistax t’Awwissu.

U x’nagħmlu xħin niltaqgħu jiena u int

jekk mhux inħarsu fiss f’għajnejn xulxin?

Int issa taf ukoll li nista’ ngħix mingħajrek

u inti taf ukoll li ġewwa fik innifsek

hemm itambru t-tnabar tas-sewwa.

Kemm konna disillużi

kull meta nitilgħu t-taraġ tal-belt

biex inħejju r-ritwali li ta’ kull sena

li kienu jġibuna f’sikkitna!

Fis-sħana tinkalja dan ir-ritwal jitwettaq ta’ kull sena

f’dal jum tal- għid il kbir, l-Għid tal-Assunta

u aħna konna nagħmlu bħall-oħrajn

li obdew drawwiet il-qedem

li magħhom hu marbut il ħlas tar-raba

ma kull ħlas ieħor.

Nitilgħu it-taraġ bil-qtigħ tan-nifs,

biex nilħqu dak li qatt ma tista’ tilħaq

fost il ħsejjes tal-marċi bla ritmu

tal-baned stunati li jridu jirxuxtaw mill-ġdid

twemmin li ilu mejjet.

Mhux biss, iżda d-delirju tas-sħana

x-xorb u d-droga jtennu litanija

tal-erwieħ li salvaw, tal-oraklu

u ta’dawk li telgħu fis-smewwiet

f’dan il-jum tassew qaddis.

Għax kollox jgħodd għat-telfien tal-moħħ

sabiex taljena ’l-folla

fis-sakra tal-bużżieqa taż-żmien

u biex ninsew ukoll li ngħixu hawn qiegħdin

u bħalissa.

U x’nagħmlu xħin niltaqgħu jiena u int?

Alfred Grech

15/08/2019