Il-Baħħ Li Tħalli.

Jien nerġa’ nibda’ mnejn ħallejt xħin titlaq

Ma nafx kif ser jimtela’ l-baħħ li tħalli

Ħaddieħor sab is-sotituta u baqa’

Għaddej għax mingħalih li sab irkabtu.

Jien żgur, jekk titlaq inti l-ħin se jieqaf

Ma nafx tħallix il-baħħ, il baħħ lil jwaħħax,

Fil-baħħ is-soltu nsib jien lili nnifsi.

Għax naħrab m’hemmx għalfejn, u nieqaf niġri.

Ma nafx jekk tħallilix il-baħħ xħin titlaq.

Il-baħħ sar oċean u min għad jimla’

Dal-bir lil sar bla qiegħ.

Jiern Kont Qed Ngħix Għalik.

Jien kont qed ngħix għalik

Mingħajr ma naf fejn qegħeda,

Mingħajr ma naf liq iegħed ngħix.

Meta sejjaħtli jien ġejt

U bqajt ma sibt lil ħadd,

Aktarx li kont qed noħlom

Jew kien ir-riħ mat-tieqa.

Fejn konna t-tnejn qiegħedin ma kien hemm ħadd

Kien hemm il-baħħ.

Ħallejna lil xulxin bla ma sellimnna

U xħin hemm barra ħriġna, sirna nafu

Li hemm barra ma kienx hemm.

U xħin għaqqadna dak il-ħin ma  issa

Sibna, li ISSA qatt ma kien,

U li z-zmien kien reġa’ wasal

Sabiex nibdew mill-ġdid

Mingħajr ma nagħtu każ taż-żmien.

Idejja qiegħedthom quddiem għajnejk

U in bdejt tara lili.

Alfred Grech

06/09/2017

Għandkom Minn tat-Turisti.

Għandkom minn tat- turisti,

I ddur bla waqfien;

Ejja xi ħadd sa fejni

U nduru dawn l-għerien.

Intom li ddoqqu t-tnabar

Mhux ħlief qed taħlu l-ħin,

Tinsew għaliex qed tgħixu

Jien bħalkom il-miskin.

Megħdija taħżnu u tgeddsu

Bħan-nemel u bħad-dud,

Jiena l-ġurat li jgħanni

Kull jum għalih magħdud.

Intom li tibnu u tgħollu

U tħarbtu kullimkien

Tintebħu x’qed titilfu

Iktar ma jgħaddi  ż-żmien.

Jien nitbekka l-ħsara

Intom: ma ġara xejn;

Ittennu li tisimgħu

Titħasseb m’hemmx għalfejn.

Intom bħaġ-ġogġifogu

Għas sirtu kull kulur

Jiena tal-qawssalla nxellel

L-ilwien qalb dad-dulur.

Alfred Grech

05/09/2017

Inti Li Mort Tinħeba.

Inti li mort tinħeba wara sħaba

Li ma tgħattikx għazilt dal-post imkennen,

Għaliex intbaħt malajr l’ebda rifuġju

Ieħor ma jqanqal fik sens ta’ mistħija.

Imkien ma stajt issib fejnb tmur tinħeba

Fejn tista’ tinża’ velu wara l-ieħor

Biex tara tinogħġobx hekk, fl-għera tiegħek.

Hawnhekk biss stajt int tiġi biex titgeddes,

Għarwiena bħal sirena ta’ bla trukki,

U tidher int kif int, mingħajr il-frilli.

Jien ngħidlek int min int, u x’mhuwiex tiegħek,

U nħassar kull metafora li wrejtni

Biex tista’ tara lilek sew fil-mera.

Jien nibqa’ hawnhekk indaħħan mingħajr pipa,

U nemmen l’għad tistejqer minn din-nagħsa,

U tara dak li minnu stajt tingħaraf

Mhuwiex tassew, mhuwiex għajr id-dell tiegħek.

Alfred Grech

04/09/2017.

Għamiltli Labirint.

Għamiltli labirint hekk kif tkun dieħel

sabiex kull meta niġi nfittex lilek, inkella s-sewwa

insibni f’nofs ta’ misraħ qed jirbombja l-iskart tan-nies,

qalb folla imgerrxa qiegħda tfittex

lil min trid temmen, min jagħmel il-mirakli,

f’simulazzjoni differenti li tagħti s-saħħa

f’nofs dan il wied ta’ tmugħ u tnissi kull miserja.

Dawwartni dawra mejt b’ħitan nofs tond

mimlija bit-taħżiż,

u ridtni b’hekk inġib quddiem għajnejja

u nifhem kull misteru.

Dawwartni ċirku tond għaliex qed taħseb

li biċ-ċirkutista- tfissert l-infinit.

U jiena ntlift indur u nagħqad ġo dil-pjazza

imdawwar bix-xbiehat u bil-graffiti.

U nsejt li aktar ġewwa hemm it-tempju,

hemm il qaddis tal-qaddisin.

Għaliex illum fil-folla ntilft, intlift fil-beraħ

u mhux fil maqdes tal-qdusija.

Alfred Grech

03/09/2017

Jien Kont Mifxul.

Jien kont mifxul ma nafx x’irrid

U int urejtli x’għandi nagħmel.

Jien kont mifxul u li kont naf  kien biss li kelli nimxi

Mingħajr ma nagħmel ħsara.

U int mort tgħid li ridt tħallini ħieles

Li nagħmel dak li rrid

Imbagħad mank biss ħallejtni nagħżel.

U xorta ġietni żewġ

Għaliex dħalt waħdek f’dat-trabokk tal-bejta tiegħi

U jekk mintix tiegħi għax tassew tħobbni

Drajt toqgħod hawn għax ixxamplata

U forst id-dubbji kollha li jinbtuli

Mill- “jekk” jew “imma”

Hemm mistoqsija mistoqsija

Li minnha tnissel oħra.

Imma sakemm int għadek hawn

Ġo din il-bejta

Jien nista’ nibqa’ nemmen

Alfred Grech

02/09/2017.

U Xħin Erġajt Ġejt Lura.

U xħin erġajt ġejt lura ma sibtx lilek,

Sibt biss ir-riħ ivenven qalb is-siġar,

Sibt qamar qed jinkini bil-qrun tiegħu

U fdal tal-petali mal-art mirfusa.

Xħin bdejt niftakar fik erġajt sibt ruħi

Inċedi għal kull ħbit bla kundizzjoni

Imdawwar mill-ispazji ta’ xewqatek

Fi tnalja li tissikka ntraniġenti.

Daqskieku kont munġbell lest li jibroffa

Il-lava sħuna tagħli u tgħatti kollox,

Passjoni devastanti li trid tixgħel

Il-fjakkoli tan-nar li qed ibgħati.

Alfred Grech

01/09/2017