Jien Noqgħod il-Bogħod Minnek.

Jien noqgħod il-bogħod minnek

mhux għax ma nħobbokx inkella reġa’ bdieli,

Iżda għaliex irrid nibqa’ nviżibbli sa nsir

saħansitra mmortali għal dak li jgħidu n-nies,

Għaliex fil-ħabi tiegħi inti tibqa’ sħaba

u qatt ma tinżel fl-art

bħalma jagħmlu l-anġli tas-smewwiet,

sħaba bajda tgħatti x-xemx u tisfida

l-isplendur tagħha.

Hemm xemx illuminanti li ma tidhirx

u lanqas tixfrex ir-raġġi tagħha.

U hemm alla tas-skiet, tal-immanenza,

li bħal kompożitur tal-melodija

ried jibqa’ mhux magħruf.

Jien irrid inkun dak il-poeta

li niktiblek dawn il-versi

li ma jgħoddu xejn u xejn ma jfissru

biex int fil-baħħ tax-xejna u l-inviżibbli

tiġbor il-ħjut li lilna jagħtu

l-inkwadratura li tixirqilna,

Noqgħod il bogħod minnek

sabiex imqar f’din id-distanza

u f’dan is-skiet etern ta’ din il-ħemda

tintebaħ kemm jien stramb inkella

insibu l-mod kif nerġgħu nirxuxtaw

din l-imħabba kbira

il bogħod mill-għajjat tal-folla

il-bogħod mis-simulazzjoni

u l-ħafna tagħlim fieragħ ta’ kif

għandna nagħmlu, x’għandna naħsbu

x’għandna ngħidu u kif għandna nġibu ruħna

xħin inkunu ma xulxin

Alfred Grech

11/02/2019

Kull Meta Nqum Filgħodu.

Kull meta nqum fil-għodu

Nintefa’ nħares lejn l-iskrin

Ma jkunx għaliex xi darba kont kurjuż

Jew ridt nitgħallem ngħodd mill-ġdid,

Iżda, sabiex nimblokka l-ħsieb

U nibqa’ bla ma naħseb.

Għaliex kull ħsieb tellief,

Kull mistoqsija kapriċċjuża,

U kull skuża velenuża

Hi fiergħa u ma tikkonvinċix

Iġiegħek biss biex

Ta kulljum tkompli tixrob il-velenu.

Insib li ta’ kull darba nidħaq qiegħed bija nnifsi

Ma jiswa’ xejn li nibqa’ nrambal din il-blata

U  nagħmel parodija minn xenarju

Għaliex kull profezija li għamilt

Qiegħeda sseħħ bil-ftit il-ftit

Isseħħ qiegħda ta’ kull jum

U tkompli sseħħ għal kemm il-darba mqar għal dejjem.

Imqar jekk fl-aħħar tiġi tgħidli

Li hemm int isserraħ fuqi.

Alfred Grech

11/02/2019

Jekk Mhemmx Toroq.

Jekk m’hemmx toroq minn fejn tgħaddi

toħloq waħda tkun xi tkun,

jekk jintfiehem lanqas tista’

ibqa’ ġwejjed bħal beċċun.

Jekk tistaqsi u ħadd ma jwieġeb

għajnejk tista’ tgħolli ‘l-fuq

Iżda s-sema l-isfel tħares

ma taqlax, u xejn ma dduq.

Jekk iddur id-dinja kollha

li qed tfittex ma ssibux,

u qatt taħseb l-għad tiltaqa’

ma ħabib jekki ma tixbħux,

Kull ma jiswa’ s-setgħa mqita

tal-poter li ma jaħfirx,

tibqa’ tikber id-distanza

ta’ min jista’ u ma jidhirx.

Jekk trid tfittex triq għal-ġenna

fuq is-sħab fejn ma titlax

ġewwa l-qlub tan-nies tad-dinja

żgur li ma tippenetrax.

Alfred Grech

10/02/2019

Xi Tgħidli Jekk Nitolbok.

Xi tgħidli jekk nitolbok biex nissellef

xi ftit mill-għaġna li sawwritek

il-mod li bih titħarrek

w il pass u l-bixra tiegħek

biex nerġa nittama fis-sbuħija?

Xi tgħidli jekk nibda’ nistaqsi lili nnifsi

għaliex ġejt infittxek

għaliex ma bqajtx fejn kont

iddur u tagħqad dawra mejt

għax xejn ma hu ta fejda?

Int biss il-ħila għandek

li tlaqqa mal-mejtin

il ħajjin ta- din id-dinja

il-ħżiena mat-tajbin

f’ġidizzju universali.

Inqar xħin id-dikors isir velenu

ta’ min ma jaħsibhiex.

jien  jirribatti dak li lanqas ma trid tisma’.

F’dawk il-ħinijiet insir ġurdien

sabiex nistaħba ġol-imrammi

u biex ż-żmien biż-żmien ukoll jitħabbel

u ma tifhem tibqa xejn

għaliex imqarr id-dellijiet tal-mal-ħitan

is-sura jieħdu tal-iħirsa ta’ kuljum

li jixbħuhom

li tajjeb jew ħażin twikkejna bihom.

Alfred Grech

10/02/2019

U mqar li Kieku.

U mqar li kieku lanqas ġejt għal-

laqgħa tagħna jien xorta nibqa’ kont nixtarr

id-dehera ta’ wiċċek bajdan

u l-kontorni ta’ ħaddejk

bħallkieku kont xi parrina qed tfissidni

u tgħidli: kollox sewwa.

U lanqas kont nistaqsi jekk din  kienetx din it-triq

li t-tnejn li aħna kellna nterrqu,

Għax int li ġejt mill-bogħod

għadek trid issib il bejta tiegħek.

Idejk bojod u ċari u titttrasmetti t-trasparenza

ta’ dea fulminanti.

Jien nista’ noqgħod hawn imxaħxaħ

fid-dinja li qed tarmi u nħoss li tlajt il- fuq l-ogħla quċċata.

Għajnejk jinfduli ruħi

daqs l-isqra li sabu l-vimmi tagħhom il-fuq, il fuq mis-sħab

u t-tbissima tiegħek terġa’ tniżżilni ġol-abbissi mnejn ghad irrid nirxoxta nerġa

simulakru ieħor mitluf fil-kliem u fid-diskors

tal-ħajja ta’ kulljum.

Ferħan li qed hawnhekk

it-tnejn li ahna mgedddsin fuq dawn il-metri ta’ mejda tal-kafe’

u biex tridni nghidlek

ergajt hassejt l-imbuttatura ta’ dil il-molla

daqslikieku kienet l-ewwel darba;

Ghada nerġa nċempillek

biex tghidli fejn tkun qiegheda.

Alfred Grech

09/02/2019

U Jiena Niġi Ħdejk.

U inti taf li xħin nerġa’ niġi

ħdejk nixtieq li l-lejl ikun twil

itwal minn qatt qabel

ikun twil eternita’ biex l-għada lanqas jisbaħ.

Biex għada jien ma jqumx

u inkun xhud ta’ jum ieħor wisq bħall-ieħor.

Niġi ħdejk biex bejn dirgħajk

insib is-serħ ta xemx nieżla wara x-xefaq

biex hemm tibqa’ u ma titla’ qatt u qatt aktar.

Niġi ħdejk għaliex fi ħbub għajnejk nifhem

u nixtarr it-tmien li dejjem joqrob

it-tmiem tad-dinja

fejn lanqas għandi għalfejn naħseb

x’jista’ jiġri wara.

Alfred Grech

08/02/2019

Mhemmx Għalfejn.

M’hemmx għalfejn tkun twila dit-tnehida

imqarr jekk il-ħsejjes ta’ madwarna idewwbu xi ftit

mis-senna tax-xafra li taqta’ das-silenzju

fit-talb li ma jasalx.

Tista’ jekk trid itterraq fuq ir-riflessi tal infinit

u ma tixtieqx li jerġa jisbaħ l-għada bir-rakkont tal-jum ta’qabel

iżda għad jiġi zgur u qabel tistennieħ

u ssib il-bieb li minnu tista’ tgħaddi għan-naħħa l-oħra.

Imbagħad jekk bħali trid li tgħix

f’inħawi oħra ta’ dan l-univers

fejn r-rakkonti ta’ kuljum mhumiex għajr ħrafa

dan l-univers hu kbir daqshekk li jesa’ l-ħsibijiet u x-xewqat kollha

li jista’ qatt ikollok.

Issib ukoll li kull kanċell u kull siparju li jinżel jew jingħalaq

mhuwiex għajr id-dalma li tinżel wara l-għabex

ta’ jum għajjien f’kull lejla li tistiednek tishar iżjed milli tiflaħ

biex tinsa t-triq li tkun terraqt u terġa tibda’ toħlom

ħolm ġdid fejn il-binarji tal-ferrovija li qatt ma rkibt

iwassluk lejn il-kanali primittivi li ħasbu u ssingaw l-iħirsa tal-imgħoddi

li tagħhom la baqa’ fdal u lanqas marki.

Alfred Grech

07/02/2019