Tumultus.

Tumultus il vulcan

li jrid ineħħi minn fuq l-istonku

u jitfewwaq il-ħsara kollha

li jkun għamel

ma jkunx jaf fejn hu l-invell

u jwitti kollox.

Mingħajr il-kuntrasti ta’ fuq l-istonku

it-terrimot ma jriegħedx

u tara li nibqgħu fejn konna.

Int imxi r-ritmi tiegħek

biex tasal fejn trid tasal

imqar izzappap.

Dan hu l-pellegrinaġġ li nagħmel jien

biex forsi nisma’ leħnek

f’din il kwareisma.

Alfred Grech

14/04/2019

Ilkoll Ikkundannati.

Ilkoll ikkundannati

jitfugħlna ftit tal-beraq

inkella frak tal-kwiekeb

u nikkunvinċu ruħna

li sirna lluminati.

Jitfgħulna ftit tal-loppju

biex nibqgħu aljenati

fil-ferħ ta’ ftit mumenti

bħal meta lit-tallab titfagħlu

l-buqxiex

tkun qed tittardja biss

id-delużjoni.

Iżda jekk noħodha bil-mod

nimxiha kollha t-triq

u nasal sal quċċata mingħajr toqol.

U nibqa’ niġi hawn

nistħajjel s-skiet

ġo dad-deżert virtwali.

Imbagħad biex nasal żgur sa ħdejk

naqtagħha fil qasir   u nieħu t-triq li taqta’ għad-dritt

it-triq tas-sensazzjoni.

Alfred Grech

14/04/2019

 

Imqarr Jekk Kull Ma Bnejt.

Imqarr jekk kull ma bnejt

jibda jaqa’ biċċiet madwari

irrid nibqa’ nemmen fik.

Minn kull waqt li jgħaddi

irrid nislet il-qalba tiegħu.

Bħal petali mar-riħ

it-tqanqiliet tal-ħajja

kull meta nħarbex dawn il vrus

immiss l-arterja principali.

Kurrenti ma jaqtgħux

kurrenti ġo xuxlin

u l-mewġ ibus il-blat

u nerġa’ nibni lili nnifsi

sabiex xħin niġi ħdejk

tarani mingħajr krozzi.

Ma jimpurtax għax tlift

it-telf hu sehem il-ħajja

u l-akbar ġlieda tkun

dik kontra tiegħi stess

sakemm nitgħallem ngħix

bil ġrieħi sfiġurat

u bid-daqqiet ta’ ħarta.

Alfred Grech

12/04/2019.

Lilna.

Lilna li għexna fil-ġonna tal-Għeden

radmuna bil-bini tal-progress u fgawna

bid-dħaħen tal-vetturi u l-għabra tas-siment

faqqruna f’dak li naħsbu u dak li ngħidu

mill-bombardament li ma jaqtax

immirat biex jonġorna u jġibuna

kollha naħsbu bl-istess moħħ

u ngħidu l-istess ħwejjeġ

ta’ sillabi misselfa biex jidħlu fil-kxaxen

monotoni mfassla minn qabel.

Lilna li wasalna f’tarf ix-xifer ta’ li nafu

jgħidulna li aħna nies tal-qedem iffossilizzati

fl-oqbra tal-imgħoddi miftuħa beraħ.

Alfred Grech

11/04/2019.

Għax Emminna.

Kollox jimxi aktar bil-mod u jitkaxkar

Qabel ma tassew jitlaq.

Kollox jikirieħ qabel ma jitfarrak.

Malajr isir bla siwi qabel ma jseħħ

Imbagħad xħin tassew isir il-ħin

Tistenbaħ malajr fil-frugħa u tgħid li hi traġedja.

Kollox eħfef xħin tidraħ

U kollox jiċċara xħin issir taf

Li l-istess kruha issawwar l-istorja

U jista’ jkun li konna aħna

Li baxxejna t-tarka

Għax emminna

Li l-fejqan minn dan l-uġih

Hu li ma tħarisx

jew li nsibu skuża ġdida

Biex naħfru lilna nfusna

Alfred Grech

11/04/2019.

Issa l-Waqt.

Issa huwa l-waqt,

Waqtiet oħrajn ma jgħoddux

Ma nkunx jien

Ikun xitan jitkellem hu minfloki.

Issa tista’ tiġi u ġġorni

Tkaxkarni lilhinn miċ-ċpar

Bħalma l-wied ikaxkar

Dak kollu li jsib quddiemhu.

Issa huwa l-waqt

Għax issa naf min jien

U ma ninħtieġx il-krozzi

Jew leħen tal-oraklu

Biex jgħidli jien min jien.

Inrabbi l-ġwienaħ

U ntir il-fuq mill-bjut

Tad-djar li fihom jgħammru

In nies ta’ daqs meżżan

Tat-torrijiet ta’ ħafna ilsna

Tal-għanqbut

Tad-dud u tal-insetti

Li qed inawwru dak kollu

Li tul is-snin inbena bl-akbar għaqal.

Fejn kollox tħallat geġwiġija

U lanqas biss jingħaraf.

Issa l-waqt.

Dal waqt ma jerġax jiġi.

Alfred Grech

09/04/2019

X’Sar Minnha r-Ruħ Maltija?

Mhux billi hawn tiftaħru

Kemm żdied il-kapital

Jew kemm flus investejtu

Ma tindunawx bl-iżball.

Jew din l-ekonomija

Kemm kibret, kemm suċċess

Jekk tħarsu ftit madwarkom

Dan mhu xejn għajr rigress.

Tafux kemm qed tiftaħru,

L-oħrajn jibilgħu biss,

Il-barranin ħadulna

Dak l-għandna nkiss inkiss.

X’sar minnha r-ruħ Maltija?

Għax sirna Ewropej?

Kulħadd hawn ġej u sejjer

U mbagħad se naslu fej’?

Jitħadtu bil-miljuni

Erħilhom jiggranfaw

U biex ikomplu jħarrbtu

Jaraw x’se jivvintaw.

X’sar minnha r-ruħ Maltija

Din l-art ma tingħarafx

X’ser tħallu ’l-ta’ warajna

Għax lilha stess ma tafx.

Alfred Grecj

07/04/2019,