Int Kont ‘l-Fuq Mill-Ħin.

Int kont ’l-fuq mil-ħin kont hemm minn dejjem,

Kull meta d-dellijiet jitwalu aktar,

Kull meta l-jiem jiqsaru u jibda jwerżaq

Il-werżieq. Kont il bogħod, ftit il-bogħod aktar.

Imm’int minn dejjem kont fil-ġuf tax-xewqa

U jiena ngħodd il ħoss ta’ kull tektika.

Ma jagħraf ebda żmien in-nuqqas tiegħek.

Mhux dak li jien ninħtieġ kien qed ikiddni

Li jkiddni kien il-bogħod li hemm bejnietna.

Kun af li l-istennija hi agħar mill-firda,

Bħal meta l-minutiera tibda teħel

l-għajnejn ifittxu dak li tkun tistenna

Iż- żmien ma jieqaf qatt jew jgħaddi jiġri

int biss trid timla’ l-baħħ tal-eżistenza

għax in-nuqqas bħal ħin li jirrikorri.

Alfred Grech

14/05/2019

 

Is-Sensi Jikkargaw.

Is-sensi jikkargaw ma l-għodwa t-tajba,

fis-sejjħa ta’ jum ġdid biex tista’ tħares

lejk stess fil-mera bħalma solitarju

il-qamar jikkontempla lilu nnifsu

u jaħbi wara daharu id-dlam imtenni.

Fil-ħsejjes ta’ filgħodu hemm is-sejjħa

ta’ x’jaf il-bniedem jagħmel bla ma jaħseb,

fis-skiet tal-ħerqa li xi ħaġa jħalli

warajh biex jiftakruh li jiġu wara

u jibdel wiċċ id-dinja u jħarbatha,

u jżid l-iskart, in-nugrufun u l-entropija.

Ix-xita traxxax għad issir dulluvju,

id-dinja tfur u tgħereq taħt wiċċ l-ilma

u kliemna jkun bħal min il-karti jbexkel

tal-logħob li ta’ kuljum ilkoll nilgħabu.

Imbagħad inneħħu wkoll minn fuqna l-għata

u nidħlu għarwenin fis-saltna t’Alla

is-saltna tas-smewwiet, il-ħaqq u s-sewwa.

Adam li b’xewqtu ħabb għall-ewwel darba

sinċier mingħajr ma jaf dak li qed jaħbi.

Alfred Grech

13/05/2019

Nispiċċaw Fejn.

Meta kont imgeżwer ġewwa l-fidda

Kont ħiereġ mit-tajjar

U kollox kien ileqq.

Meta kont ninġarr mal-bqija tal-kurrenti

Bdejt nara lil kulħadd iħabrek

Għamilt bħal Dioġene

Bdejt inrabal il-kartell.

Illum li l-karell irrumblat

Għal kemm il-darba

Għax tond u dawra mejt idur

u jerġa’ lura għal li kien

Nistaqsi: kien hemm għalfejn

Dal ġiri kollu?

Aħna li lanqas nafu fejn sejrin

Nispiċċaw fejn?

Alfred Grech

11/05/2019

U t-Tgnejn Li Aħna Bdejna Ngħumu.

Imqar waqajti fl-abbiss u r-riħa differenti

Ħassejt l-irwieħ taż-żiffa għaddejja

Kull pass magħmul ħażin

Pass falz; x’għamilt b’idejja?

L-iħirsa jbeżżgħuni

Is-solitudni tiekol minni.

Jien ridt inkebbes nar li jlellex

U qatt ma ħlomt x’ser jiġri minni.

Fil-kefen tad-dlam

Immiss b’idejja l-għarfien tiegħek

Ngħum f’wiċċ tal-ilma ġieri

Mal-petali li waqgħu

Iżda qatt ma nogħdos sew

Għalkemm għodosna kemm il-darba

Biex nillargaw lilhinn

Minn dak li qiegħed jiġri.

Qed ngħumu fl-ilma fond

Fejn ma tegħereqx biss jekk tibla’ l-ilma.

Tegħeq biss ‘kk ma żżomx fil-wiċċ. . .

U t-tnejn li aħna bdejna ngħumu.

Alfred Grech

10/05/2019.

 

Sans Papiers*

Aħna li ġejjin mill-bogħod bla ma ninagħrfu

Mill- mogħdijiet il-qodma

Uċuħ mingħajr fattizzi,

Uħud ta’ mingħajr isem,

Li naqbzu fuqkom bħalma jaqbu l-ħallelin inkiss inkiss  . . .

Nitolbukom saqaf fuq rasna biex il kera jibqa’ jogħla.

Aħna l-barranin bla passaporti

Mingħajr il-karta tal-identita’

Nixxabbtu mal-kanċelli tal-palazzi tagħkom

Nnitolbu ażil.

Aħna eluf fit-truf ta’ xtutkom

Ta’ kull tagħlim, ta’ kull kulur, u kull ilsien

Ġejna biex nieħdu s-sura tagħkom jew nibdluha

Ġejna bl-għeluf u dalwaqt insiru elef t’għeluf

U saħansitra bil-miljuni,

Irridu nsiru l-kotra fuq din l-art mibjgħa

Għal tletin biċċa.

Aħna ġejna hawnhekk ħafjin, bla dar u mingħajr għaxja ta’ lejla

Ġejna hawnhekk nitkarrbu x-xogħol

Tal-isfruttar

Tal- jasar il-ġdid

Sabiex l-imperi jkomplu jikbru.

Aħna ninsabu hawn fostkom

Fil-qalba tagħkom u ma ntbaħtux

Għax tliftu sehemkom, l-għarfien ta’ min intom,

Tliftu qalbkom, tliftu wiċċkom,

U sirtu intom issa ma tingħarfux.

Hawnhekk qiegħdin

Fil-bibien tal-ibliet tagħkom

Fl-ibliet tal-gżira tagħkom

Fil-gżira tal-belt tagħkom.

Għaliex id-dinja nqalbet

Sirna aħna nikkmandaw ir-ritmi l-ġodda

U intom spettaturi ndifferenti

Biex tixhdu li tisimgħu u taraw.

Aħna l-barranin tal-gżira tagħkom

Il-barranin bla dokumenti

Aħna l-irġiel u n-sia ta’ bla saqaf

Iċ-ċorma tat-triqat

Nitolbu l-ażil.

Alfred Grech.

09/05/2019

*Immudellata fuq il-lirika “Sans Papeirs” mill musical “Notre Dame De Paris”.

Se Sono Qui.

Se sono matto

E’ perche’ non so vivere.

Se sto facendo questo

E’ perche’ non so fare altro.

Se mi vede come un diverso

E’ prche’ la consuetudine

E la mediocrita’ mi annoiano.

E se son qui accanto at te

E’ perche’ non c’e’

un altro posto al mondo.

Alfred Grech

07/05/2019

Ġejt Hawnhekk.

Ġejt hawnhekk nistenna l-poeżija,

U issa li poeżija ma ġietx

Sirt int il-muża.

Ġejt hawn infittex ftit  mistrieħ

Infittex ftit aljenazzjoni

Iżd’issa li ġejt int

Kun int it-tentazzjoni.

Int sabiħa fuq is-sbieħ u l-ferħ hu sehmek

Bħal merżuq dawl fid-dlam tal-ġrajja

Bħal xaqq ta’ tama’ l-miġja tiegħek.

LI kieku naf li kont tfittixni

Kont nistaħba.

Alfred Grech.

06/05/2019.