Il-Jum It-Tajjeb.

Daqshekk il-ħsejjes tal-ilma jirtoghod

taż-żiffa li tigħab qalb il-friegħi

fis-skiet ta sbieħ il-jum

għax mhux l-għasafar jixtiequlna l-jum it-tajjeb

jgħannulna l-innu tal-ħolqien

iżda l-ħsejjes tal-vetturi

tal-magni trijonfanti

tal-inġenji jisfidaw ix-xemx li ghada lanqas telgħet.

L-allat imbagħad jiġu b’idejhom miftuħin

ixerrdu l-benna tal-għasel u tal-ambrosia

Kulħadd jirkeb il-vettura

fost it-tgedwid sataniku

u l-ħsejjes infernali

għax din hi l-ġemgħa tal-vetturi

tal-ħafna ġid u l-opulenza

tal-jasar tal-imħuħ bil-meżżi tax-xandir.

Fuq nett inħallu l-marjunetti

jinġibdu mill-ispag li ma jidhirx

u hawnhekk l-abbiss ta’ fejn int

mingħalik dak huwa l-ferħ tal-indifferenza

għax kull kif ma tarax id-differenza

jew is-simulat u s-simulakru.

Imma’għad irridu nagħtu kont ta’ dan

lil uliedna li għad jistħuna.

Alfred Grech

11/06/2019.

Jien Ħsibt.

Jien ħsibt li ser narak mill-ġdid tiddandan

Għalkemm minn dan jien mhu se nieħu xejn,

Għalhekk din saret ħrafa li ktibniha

U xħin spiċċajt staqsejtek dan għalfejn?

Bħat-tiben bdejt ittir mingħajr il-ġwienaħ

Ħarist f’għajnejk u għedtlek l’huma sbieħ,

Stennejtek li taqrali sejjra x-xorti

U kliemek karfa kien lil jġorr ir-riħ.

Ilbist l-armar ta’ kavallier bla żiemel,

Mingħajr korazza bqajt ma ġrali xej’,

Jekk xejn ma tgħid stennejt li ż–żmien se jieqaf

U l-ilma ġieri qatt ma taf mnejn ġej.

Alfred Grech

10/06/2019

Mur Obsor.

Mur obsor li llum hemm min qed ifakkar

martirju li kien wassal għall-ħelsien,

ħerqan li jitfa’ fuqhu jerġa’ l-madmad

ġej mnejn ġej, inkella kien ta’ min kien!

Mur obsor illi l-kilba sabiex jaħtaf

iktar minn dak li jmissu jew bill-ħaqq,

ma jintebaħx li jassar lilhu nnifsu

u lilna lkoll, ilsiera tabilħaqq.

Mur obsor illi hawn min qed jiftaħar

li għani sar u l-qabża qed tiżdied,

li mhux tassew li jieħu dak li ħaqqu

skond ħiliethu, jew messu kull ma ried.

Mur obsor li l-flus u l-affluwenza

saru l-allat u d-din ta’jasar ġdid.

Egħżeż mill-fehma, ir-rieda u l-qalb sinċiera

quddiem is-saltna u l-mors tal-ħadid.

Kif ma ntebaħx min ried lil din l-art jimla’

b’kull ġens, kull lewn, ħaddiema barranin,

bini fuq ieħor, nugrufun u ħsejjes

u qtugħ in-nifs li ġġarrab ta’ kull ħin.

Alfred Grech.

Sette Giugno 2019

Għad Ifaqqas Univers.

M’erġajtx staqsejtek biex niltaqgħu

Għax bżajt mix-xita tqattar

Fuq xfar għajnejk

Mill-ħmura tax-xemx nieżal wara l-kwinti

Mis-skiet li jista’ jaqa’

X’inhi s-sillaba li jmiss.

M’erġajtx ċempiltlek aktar

U appuntamenti m’għamilniex

Ħallejt is-skiet jiżdied bejnietna

U l-mistoqsijiet jiġġebbdu sa ma jsiru

Eternita’

Fl-etermitsa’ li hemm bejnietna

Għad ifaqqas univers.

Alfred Grech

04/06/2019.

Twerewir.

Twerwir il-waqt ta’ min imur ifittex

tħarbit il-biża wara l-kwinti

il-bnazzi tal-viżibilita’ t-tajba

misjuq minn qtiegħ il-qalb

xħin dak li tara lanqas tifhmu

u dal li tifhmu ma temminx fih

biex taqdef qalb l-iħirsa

u qalb l-enimmi u b’hekk

jinħatt il bini kollu illi bnejna

biex stajna nsibu xi tifsira.

Li ma tifhmux jibqa’ bla tifsira,

u b’hekk jitqanqal ġewwa l-moħħ

id-dubbju ta’ minn qed jgħum

ġa dan il-baħar tal-assurdita’

Alfred Grech

03/06/2019

Tnissija.

Mintix tismagħni nsejjaħlek

ismek jirbombja fil kewn tiegħi

f’din iż-żurzieqa li twassal għall-abbiss

fis-swied il-qalb li issa sar tqil iżżejjed.

Nixtieqek il-ħin kollhu

mhux bil heffa tal-ilsir

li jrid itaffi s-sensi

imma bix-xewqa ta’ min irid jimraħ

fl-istratosfera ta’ sublimita’

tal-baħħ u l-konfużjoni

fejn dari kont infittex li nkun waħdi

u jkun aħjar li waħdi nkun

xħin nghaddi mid-dlam tas-sotterran

sa nasal fix-xmara tat-tnissija.

Inkella inti tkun biss

xewq’ oħra.

Alfred Grech

02/06/2019.

Dan Hu Ġens.

Dan hu ġens illuppjat

Quddiem ir-riflessjoni tal-affluwenza

Pajjiż li ċeda l-armi lil-barrani,

Li tilef il-pofeti ġħax dawn inxtaw

Jew immutaw u ttarxu.

Dan ġens li qatel il-kuxxjenza

minn qabel din bdiet tniggżu

lil ġurnalisti u dawk li fetħu ħalqhom

li tilef artu stess u sab ruħħhu

itturfnat wara li biegħ ġidu lill-barrani,

li baqa’ ma ntebaħx li l-invażjoni saret il-parabbola

tal-priedki li ppriedkawlu,

dawk li  wassluħ fid-desert

qalb il-kurrenti adulteranti u trasluċenti

ta’ min jitlob ażil.

Jew min il-ħila l-għandi jaf iħaddem.

Dan huwa ġens li tilef dak li kellu

Ir-ruħ, il-qalb u dak li jagħmlu Malti

U baqa’ ma ntebaħx b’min qiegħed

Jagħtiħ il-ħabel.

Dan huwa ġens li seta’ qatt ma twieled

Għax għadda żmien u baqa’ qatt ma stenbaħ

Sakemm ħatfuħ l-ilpup u x-xakalli

Moħlu mitluf dal-ġens

Għax baqa’ qatt ma ħolom

Il-ħolm tal-viżjonarji

U baqa’ ankrat ma dak li seta’ sewa’

U llum tfajieħ fin-nar.

Alfred Grech

01/06/2019