Int Qed Titbiegħed Minni.

Int qed tibiegħed minni u sejjra fl-għada

Meta għada jista’ jkun li qatt ma jkun

Għaliex ġemmajt il-waqtiet kollha

Biex dak ikun l-aħjar wieħed.

U bqajt ma ntbaħtx

Li jiena għamilt f’qalbi

Għax l-istennijiet tiegħek

Kienu kollha lilhinn mit-territorju tiegħi

Minbarra wkoll li kienu

Kontra kull pass għaqli.

It-tidlijiet tiegħek xħin ħallejtni

Kienu bħal waqtiet ta’ fuq ix-xefaq

Taż-żernieq tal-għada

U jien ma rajt il-waqt

Li ruħi tħalli ġismi

U neħles minn kull xkiel u minn kull madmad.

Issa taf li għalkemm tiġi bħal anġlu

Bid-dawl f’idejk jew għall-għarrieda

U bla mistiedna

r-ramel taż-żmien hu kontra tagħna

u jiżloq qed bil-mod il-mod minn bejn subgħajna.

Iżd’issa li t-toroq tagħna qed jitbiegħdu

Kull ma jmur inħossni niġi f’sikkti.

Alfred Grech

18/06/2019

Ma Swejna Xejn.

Ma swejna xejn

Għalxejn subgħajna għollejna

sabiex ninghaddu

ghax baqgħu għaddejjin minn fuqna.

Aħna mewġ misjuq

miż-żiffa tal-grigal

ibus riġlejn l-irdum

u jħaddan ir-ramel tax-xtajta.

Aħna karfa misjuqa mill-buffuri

tinagħżel mit-tiben

ittir u tisparixxi.

Bħal bieżaq tal-arja ġol ilma,

Jgħumu għal ftit tal ħin

imbagħad jinfaqgħu.

Alfred Grech

16/06/2019.

Nintasab Nikkuntempla.

Nintasab nikkuntempla bla ma naħseb

quddiem dan kwadru mmakulat ta’ ħajjti

Jew nilgħab mat-tikmix u tondjaturi

tal-frilli f’dawk l-inħawi li jintlaħqu

fejn mhemmx għalfejn tixxabbat

fejn ma nafx aħniex niftehemu.

Int terġa’ ta’ kull darba tiġi tbaxxi

l-barrikati

biex mingħalik li se jkun tkun eħfef li jien nifem

u mingħalik tkun aktar affidabbli

dil-qegħeda li tqum tagħmel kull filgħodu.

Nistiednek nerġa’ jien biex għal darb’oħra

tħares sew fil-mera

Filwaqt li qatt minn moħħok ma jgħaddilek

li jista’ jkun li dan staġun u qomt riħ isfel

u r-riħ idur u jitla’ l-ajru

u illi  f’daqqa waħda spiċċa s-seħer

bħal meta ġġib pitazz u taqbad tikteb.

Alfred Grech

15/06/2019

Ħela Ta’ Ħin.

Ħela ta’ ħin għalik twerżaq u tgħajjat

poeta tad-disfatti u d-delużjoni,

u issa lanqas leħen ma fadallek,

xogħolok għamiltu u tista’ tmur tindifen.

Għalxejn titperreċ trid fl-anfiteatru

erħilhom dawk li jagħarblu l-baħħ ta’ ruħek

filwaqt li d-demm li tħalli xħin tiżvina

jitħallat max-xewqat li darba kienu

qawwija daqs id-dlamijiet li jxekklu

id-dawl li jrid kull darba jersaq lejna,

imewwet is-skiet tiegħek li kien qares.

Bħar-ramel tad-deżert jinbidel wiċċek

filwaqt li l-passi tiegħek bdew jitqalu,

insetti alluċinanti qed jiddieħku

bit-traċċi li ħallejt hemm ittimbrati.

Ġildek offrejt u ħsiebek lil ħaddieħor,

u saħansitra l-vini tiegħek nixfu

għalxejn titlajja hawnhekk u ma tridx titlaq,

għax qtajt in-nifs u lanqas m’għadek tisma.

Alfred Grech

14/06/2019

Staqsejtun x’Konna Nagħmlu.

Staqsejtuna x’konna nagħmlu

Konna nfittxu ruħna għax tlifniha

Qalb l-għabra, l-ġebel u t-terrapien

F’kull direzzjoni

Tal-bini li jiġġarraf

Apposta jew b’kumbinazzjoni.

Konna nfittxu ruħna għax tlifniha

Qalb id-duħħan u n-nugrufun

U l-velenu ppurgat ta’ min ikun

Mill-vetturi li bħan-nemel

Qed jifgaw

U t-toroq

Jikkonġestjonaw.

Konna nfittxu ruħna

Qalb it-tħarbit tal-art verġni

Tqaċċit ta’ siġar u l-konrit jitferrex

Jew nibnu torrijiet li jisfidaw

Il-barumbari tal-ħamiem li tgerrex.

Konna nfittxu ruħna gaħx tlifniha

Qalb il-folla ta’ min ġej u min u sejjer

Tal-ilsna li ma nifhmux

Bla ma nagħmlu ħafna stejjer

Tat-twemmin li ma nmagħrfux

Ta’ dak li ma jiġiniex

Ta’ dak li ma jafniex

Ta’ dak kollu li mhux taghna

Konna nfittxu ruħna għax tlifniha

Jekk għad tinstab x’imkien

Jekk terġgħu tistaqsuna x’konna nagħmlu.

Alfred Grech

14/06/2019,

Waqa’ Bini.

Waqa’ bini u xejn ma ġara,

l-aqwa li ma weġġa’ ħadd,

u mqarr jekk xi ħadd iweġġa’

Bħal kull il-bini jrid jinħatt.

Waqa’ bini u xejn ma’ ġara

Dan il-paniku għalfejn?

Fil-pajjiżi zviluppati

Jiġri dan, ma ġara xejn!.

Inċidente di percosrso

Qal dak l-għaref, ta’ bla żejt!

Tantx titmasħnu, tantx teqirdu

F’daqqa dorna dawra mejt!

Xejn teqirdu u xejn titnaffru

Dal pajjiż  niviluppawħ

U li timraħ ftit fil-beraħ

Lanqas biss nikkuntemplawħ.

Alfred Grech

13.06/2019

Int X’Għamilt B’Ħajjtek?*

Mhux bis-sagrifiċċju ta’ kull sena

Niftakrek iżda bit-tktika tal-arloġġ

Ix-xiħ li hemm inti u tiela’ t-taraġ

Għaliex għalxejn iż-żmien irid iġorrok miegħu

Iż-żmien bħal ħamla li jimbotta

Ġrajjiet u tifkiriet u lilna magħhom.

Tifkira inti tibqa’ f’moħħ min baqa’ ħaj

U jiena bħalek għad insir

U mbagħad xħin kollox spiċċa

Nistħajjlek tistaqsini:

Int x’għamilt b’ħajjtek?

U jista’ jkun li xejn ma jibqa’

X’ħin bħalek jien insir

Eternita’.

Int issa sirt sabiħa aktar minn qatt qabel

Bħas-skiet . . .

Bħas-s-sema sajfi mimli kwiekeb.

Alfred Grech

12/06/2019.

*Miktuba wara quddiesa  anniversarju fl-għeluq is-sebgħa snin mill-mewt ta’ Valerie