Int Tista’ Tikteb Kemm Trid.

Int tista’ tikteb kemm trid

dawk mhux se jagħtu kasek

dawk aljenati fil-murtali u fit-tiżjin

fil-bandalori u l-festuni

fit-trofej u l-ġavaljuni

kemm kisfet dik u x’libset l-oħra

jew kemm tilbes issikkat.

Iżda xi ħsejjes mhumiex tal-festi

għax m’għandhom xejn minn tal-barokk

għax xi ħsejjes iqajjmu l-mejtin

u int għalxejn trid togħnos

għax dawk jibqgħu għaddejjin.

Int tista’ tikteb kemm trid

stajt kont fil-fratellanza

erfajt ukoll mill-vara

biex tnaqqas id-distanza.

Int tista tikteb kemm trid

u timla’ l-karti vojta

għax jafu kif tistagħġeb

u mhux se jagħtu kasek

jaħsbuk li kont profeta

b’xi ċirku tond ma rasek

f’deżert fejn lanqas timxi

jew leħen ma jirbombja.

Int tista’ tibqa’ tikteb

u timla’ l-paġni vojta

bit-tama l’għad xi darba

jitniżżel kull ma taħseb

fuq ologramma imċaftar

u b’hekk tirbombja l-karba

u jkunlek hekk il-mafkar.

Alfred Grech.

Festa ta’ San Kawrenz

11/08/2019

Jekk Jien Ma Nħossx Għalik.

Jekk jien ma nħossxi għalik

dak kollu li kont ngħidlek.

Jekk int inbdilt għax għadda ż-żmien,

inkella għax issa drajtek.

Jekk issa nbdilt, ma qbajtx li kont

u sibt li sirt mara oħra,

għaqqadt idejk dort dawra mejt

u qisek tlajt il ġenna.

Jien noqgħod hawn fuq dan ix-xatt

biex ngħodd iż-żmien u r-ramel

u int bħas-sħab li jġib id-dell

f’dal jum li daħal ġmielu.

Jekk issa ntbaħt li xejn mhu ġdid

u kollox kien mistħajjel.

x’qed tara hu l’għaġnuni fih

u dak li ġara wara.

Jekk inti taf. ma nfisser xejn

fin-niżġa ta’ dan kollu

biss ktibt kapitlu u rġajt ġejt hawn

Biex  ngħalaq l-episodju.

Jekk lanqas int ma tfisser xejn

għajr numru f’somma kbira,

għax dħalt u ħriġt u xħidtha tgħum

fil-baħar tal-enimmi.

Alfred Grech

11.08.2019

Int Tista’ Ma Tifhimx.

Int tista’ ma tifhimx

għaliex jien mort nistaħba

dort wara  l-kantuniera

u f’daqqa sirt l-assenti.

Int tista’ ma tifhimx

għax jien waqajt fil-muta

għax nagħmel bħal bebbuxu

u nidħol ġo qoxorti.

Int ista’ ma tifhimx

għaliex kull tant naħarbek

u rokna nsib għal ħemda

indaħħan ħolm il-pipa.

Int tista’ ma tifhimx

għax waqa’ s-skiet bejnietna

u tela’ ħajt u ntefa’ d-dawl

u niżel is-siparju.

Int tista’ ma tifhimx

għax issa tlabtek skuża

għax f’daqqa sirt profeta mnebbaħ

u ntbaħt bl-iżbalji tiegħi.

Int tista’ ma tifhimx

kif sibna t-triq għan-niżla

u ma ntbaħniex

għax ma konniex

uħud minn dawl magħżula.

Int tista’ ma tifhimx

li xħin fl-għajnejn ħarisna

missejna s-sema u l-infinit

u sibna t-triq tal-ġenna.

Dan huwa ward li jiena qtajt

mill-ġnien tas-seħer tiegħek

int ħienja tkun ma dawk l-erwieħ

li nġarru mal-kurrenti.

Jien nibqa’ hawnhekk fuq dan l-iskoll

nistenna l-fewġa ġejja

l-iskoll li m’għannaq qatt

il-baħar ta’ madwaru.

Alfred Grech

10.08.2019.

Intom li Twelidtu fil-Ħsejjes.

Intom li twelidtu fil-ħsejjes

ma tafux xi tfisser ħemda

intlejtu bid-duħħan

u emmintu l-gidba tagħkom.

Intom li qatt ma ħsibtu

jew ħsibtu qasir wisq

emminti li l-ġejjieni

hu tagħkom u taghkom biss

u tlaqtnu minn hawn b’idejn battala.

Intom tal-quċċata

żeblaħtu lil ħaddieħor

u ma ntbaħtux li qed tistrieħu

fuq ramel li qed jimxi.

Intom li kissirtu

d-dinja ta’ kulħadd

għereqtu fl-injoranza

tal-ħofra ċkejkna tagħkom.

U intom il-battala

ma fhimtu qatt għaliex

xi ħadd jimliekom kellu

u bqajtu tagħmlu l-ħsejjes.

Aħna bqajna nemmnu

fil qawwa tal-allat

li kienu mlewna rasna

bil-ferħ li hemm f’Elysium

iżda llum nafu

li l-allat telqu

u olimpu sfat waħeda.

Alfred Grech

09.08.2019

Trasfigurazzjoni.

Imqanqal kien il baħar

u qawwi kien ir-riħ

tal-maltempati mrammla

li qajjmu ħafna mwieġ.

Iżd’inti qatt ma tħalli

s-saltna tad-duħħan

bħas-sħab għaddejn minn fuqi

u f’daqqa uragan.

u xħin jgħaddi dan ir-riefnu

inti tiġi żżurni u tgħidli

li kienet ħolma,

ħalli l-mistħajjel jimraħ.

Jien nigdem difrejja

nistenna l-ħin għaddej

u kull minuta nħares

lejn il minutiera taqbeż.

Tgħid għad titfaċċa

għall-għarrieda

bint l-allat fuq ix-xefaq

profil ta’ għamla ġdida

biex minn issa niġġedded

fi trasfigurazzjoni?

Alfred Grech

08/08/2019.

Aħjar.

Aħjar toħlom

milli tħabrek biex tbiddel

id-dinja ta’ madwarek.

Aħjar kastelli tibni fl-arja

milli titmattar biex tilħaq għad

is-sema

għax is-sema jibqa’ hemm ma jinbideilx,

iħares l-isfel

fuq purċissjoni nemel.

L-imħabba hija l-leħen li jistordik

jirbombja ġewwa fik u qatt ma jaqta’

int għandek biss titlgħallem

tissemmagħlu.

Tterraq kemm trid

il mogħodijiet tal-fehema t-tajba

iżda r-rieda għad m’għandekx

biex tasal għad x’imkien.

Jekk għad tissokta l-mixja ssib

li tħares qed fil-bogħod

lejn l-oċeani

lejn xtajtiet ta’ mewġ il-baħar.

Jista’ jkun ukoll li tagħżel li tgħix

bil-misteri kollha tiegħek

imbagħad ejja ħdejja

jien  nistenniek lilhinn mill-oċeani

taħt qamar kwinta.

Alfred Grech.

07.08.2019.

Le, Le It-Twerżieq Mhuwiex Għalija.

Le, le, t-twerżieq mhuwiex għalija

Mhux iż-żunżana li jddakkar

jew naħla milli jniggżu.

Staħajjilthom kemm il-darba tiela’ u nieżel

ma li-imwieġ tal-vibrazzjoni

iżda t-twerżieq baqa’ jistona.

Imqar jekk jiena ridt li nikteb

xi melodija li ma fhimtx jew li ma sibtx

u bqajt imbellaħ.

U kif qatt tista’ tagħmel sinfonija

mill-kakafonija?

Imma dawk artisti kienu

komposituri, għannejja tal-ogħla fama

u min inkina rasu quddiemhom

inċensahom u firex it-tapit taħt riġlejhom

kien jaf x’qed jagħmel

u kien tal-affari tiegħu.

Iżda illum li jien inwerżaq bħalhom

u stenbaħt il-ħsejjes jistunaw

li ħarrġu minn griżmejhom

ngħid li mhux biżżejjed tkun poeta

jekk ma twelidx taħt kewkba werrċa

fl-imkien u ż-żmien taċ-ċirku mnebbaħ

Alfred Grech

06.08.2019