Meta T-Tifkiriet.   .

Meta t-tifkriet isiru bħat-tvenvin

tar-riħ li jgħaddi bejn il-fili tal-luċelettrika

imperrċa mal-arbli fit-toroq ta’ nħawi minsija

inkella bħal karozzi mrażżna mill-freni

jwerżqu l-gomom tar-roti jgħaqqdu mal-asfalt

fit-tfittxija frenetika li tirbaħ iż-żmien

jien nibda naħseb biex nerġa’ lura għal għandek

għaliex fi  ħdanek hemm ir-risq u l-hena.

Imbagħad jiġri li nħossu t-tnejn li aħna

il-ħlewwa tirfina bħal ambrosia fuq ilsienna

biex nibdew nissugraw fuq meded ġodda

f’dawk l-inħawi fejn ħadd għadu ma resaq

inkella li minnhom għad ħadd qatt ma reġa’ lura

għaliex ma nistabrux li jista’ jkun hemm xefaq

li tiħqu ma tistax

jew li lilhinn minnu

issalpa ma tistax.

Jien imbagħad insir l-għannej

li nikteb ħafna versi b’nifsi maqtugħ

għax naf li l-pinna ma tlaħħaqx mal-ġiri tal-ħsieb

u quddiem għajnejja ma jifdallix għajr l-era ta’ ġismek

ħierġa bil-mod il-mod

mill-ilma ta’ xatt il-baħar

li qatt ma żort.

Alfred Grech

16.11.2019.

Aktar ’il-Bogħod.

Hekk ridt jien għax issa sirt tifhimni

U taf li dan il-vjaġġ waħdani fis-solitudni

Ta’ min jinħall irid minn kull ilġiem

Matul il-mixja twila

Ta farfett li tgħallem ir-ritmu

Fil-bandla tad-dwejjaq u tal-ferħ

U tal-waqtiet,

Meta mqar is-sema jiddendel

U s-sħab imissu l-ponot

Tal-qċaċet tad-dwejjaq

Tal-mewġ li jobrom

Tal-oċean li juri l-qilla tiegħu

Fuq blat li jirrifletti

Id-dawl ta’ xemx qed tinki.

Fil-ponta tal-ibgħat ponta

Dejjem hemm fanal li jwennes lill-baħħara

Li juri t-triq lil min jintilef.

Lilhinn minn hekk hemm xefaq

Li jrażżan ix-xewqat

U jmejjel il-ħolm ta’ min irid imur

Aktar ’il bogħod.

Alfred Grech

16/11/19 2019.

Hela’.

Jekk toqgħod tissemma bil-għaqal

Lix-xita li tinżel bil-qliel

tistaqsi lis-skiet b’liema leħen

isefsef f’widnejk bħal ħalliel.

Dil-għanja li qatt ma titmewwet

imqanqla fi ħdan l-infinit

li jkebbes is-sema bl-orangjo

u jdellel tinqiż il-lanżit.

Tat-toroq il mixja mitlufa

fid-dell tal-ħitan tas-sejjieħ,

peprin u ħaxix li  jixxeblek

fejn jgħammar il-ħolm bil-qatiegħ.

Kien jikser il-ħemda tal-wileġ

tal-ilma l-gelgul fil wied

jindiehes mal-ħsejjes imewwtu

taħlita ta’ mrar u ta’ swied.

U ntbaħna l’għalxejn issa tlajna

dit-telgħa, ’xxabtna mas-swar

fanal li qed jifrex il-ħarsa

jindokra d-destin tal-madwar.

Hawnhekk stajt tintebaħ bil-qilla

tar-rwiefen li jħottu l-ħitan

tal-baħar li jħabbat max-xtajta

u jobrom qalil daqs xitan.

Alfred Grech.

15/11/2019

Illum Kien Biss Bħall-Bieraħ.

Kull xħin nistaqsi

jekk dan kollu kienx mistħoqq

inkella ngħid li kont imxebba

bli nara jdur madwari

kien jidher ta’ bla fejjda

biex jgħaddu l-jiem tal-bandla

ta’ bejnietna u ngħidu

illum kien biss bħal bieraħ.

Għalhekk kull jum infittxi

li nderru lill-xulxin

li nivvintaw il-ħajja

biex nidħqu bina nfusna

u naħsbu li rġajna bdejna

inkella li ma bqajniex fejn konna.

Iżda ma domniex ma ntbaħna

li issa sar il-ħin

u kellna nkomplu nimxu.. . . .

Imbagħad insejna wkoll

għal xhiex ġejna u minn fejn tlaqna.

Alfred Grech.

Sao Martinho Deo Porto

12.11.2019

Abbissali.

Abissali tkun il-waqa’ ta dawk li joħolqu

l-għamliet, it-tixbiħat, l-imitazzjoni u d-dawrien.

Bħal blokka tal-konkrit

it-terremot fuq gżira żgħira

xħin tisplodi dil-bużżieqa

tal-ekonomija dejjem tikber

fgata bin-nies, bid-dħaħen bil-qatran u bis-siment.

Imbagħad jien u inti

ninġarru mar-riħ tal-isplużżjoni

bħall-weraq tal-ħarifa.

L-għaqal tagħna jkun dak biss

li nżommu għajnejna miftuħin

biex ma jeħodniex in-ngħas tal-loppju -

il-loppju tal-kotra -

jew l-alluċinazzjoni taċ-ċittadini

li jħobbu jgħidu li jobdu l-liġi u jżommu l-ordni.

U jekk jirnexxielna mqar daqshekk

inkunu rbaħna t-taqbida

tal-gladjaturi li sabu rwieħhom

f’nofs l-arena bla ma riedu,

Inkella nagħmlu ta’ bir-ruħna

li sirna buffi f’nofs ta' ċirku

u b’hekk inderru ftit id-dwejjaq

tagħna u ta’ min qed jarana.

Alfred Grech

02.11.2019

Jien Baħar Imqalleb.

Jien baħar imqalleb

Li jbiddeil-burdati

Skond l-ajru li jitla’.

Jien baħar ta’ ħafna xtut,

Kaxxa mimlija sorpiżi

Ff’idejn mara.

Inqum filgħodu qabel jiżbaħ

Biex inqiegħed ħsibijieti fuq l-ixkaffa

U nibda ngħix il-ħajja ta’ klulljum

Imgeddes ġo qartas.

Hawnhekk trid togħdos fl-ilma mdardar

 Fejn jgħumu l-klieb il-baħar

Li jirrifletti l-kwiekeb.

Alfred Grech

02/11/2019

U Xorta Waħda

U xorta tibqa’ għaddej imqar jekk ruħħek

Intilfet f’dawn l-inħawi u f’dan il-misraħ

Qalb ħafna nies li minnhom ħadd ma jafek.

U xorta waħda tibqa’ għaddej tistaqsi

Min int ġo dan il-baħħ battal jirbombja

Sa jiżboq l-infinti marsus f’buiżżieqa.

U xorta waħda tibqa’ għaddej bil-ġwienaħ

Ta’ serafin bla lġiem u mingħajr numru

Bit-tifkiriet li jtiru mal-buffuri.

Alfred Grech

01-11-2019