Naiad.

Bħal kalamita’ nħossok, tiġbed bla ma terħi.

Jien qed narak, naqrak daqskemm kont ħajja

daqs meta kont titkellem b’leħen bħal għoli

sibilla mqadda li għeddejtu żmienek

titgħajjar, timbex, tħammeġ u tiżvina,

Ukoll jekk jien ma nafx minn fejn int qiegħeda

tilmaħni u taqra mqar sal-ħsieb ta’ moħħi,  

jien qed narak u miegħek qed nitkellem

u inti lanqas tista’ twieġeb lura

għaliex tar-rand il fwieħa li kont terħi

taret mal-irwiefen,

Trab issa sirt, duħħan minn ġoċ-ċumnija.

Kliemek jirbombja daqs tambur fil-beraħ

trehid li m’għadu jħalli l-ebda rima

int lanqas tista tlissen kelma waħda

u l-ebda għarbiel ma jesgħa l-frugħa tiegħek

daqskemm kull sillaba alfabetika li setgħet

ittenni ismek.

U jiena bqajt hawnhekk sabiex intenni

dak l’innu fgat ta’ min iħossu ħieles.

Alfred Grech

05/01/2018

Ħolm.

Talinqas naf li l-ħolm evanexxenti

Għalkemm hu realta’ li mmis b’idejja

Tal-midja spurja u mhux bil-fors temminha

Għax qatt ma taf għal-xhiex u min fejn  ġejja.

Alfred Grech

04/02/2018

Fil-Baħħ Ta’ kull Misteru.

M’hemm xejn li jreġġek lura

Għal dak il baħħ u x-xejn,

Is-skiet sar jostor kollox

Trid tinfed, imma mnejn?

Ġejt  hawn biex tisma’ leħni

Stgħaġibt xħin sibt is-skiet

Għax leħni tar mar-rwiefen

U mar mat-tifkiriet.

Das skiet u x-xejn ta’ kollox

Ġo ċella bl-umdita’

Dan hu biss simulakru

Fid-dlam, fl-oskurita’.

Int għad tifhimha bħali

Is-skiet mhux se jsalvak

Is-skiet ibiddlek aktar

Fil-baħar tal-opak.

Xħin bdejna t-tnejn nitkellmu

Għax bqajna ma ftehmniex

U sibna li kull kelma

Għalina ma tiswiex,

Jien bqajt nissemma lilek

Xi ngħid ma baqgħalix,

Int tisma’ u int titkellem

Tweġiba ma kellix.

Fil-baħħ ta’ kull misteru,

Hemm biss it-trufijiet,

L-assurdita’ tal-ħajja

U l-ġrajja li għaddiet.

Alfred Grech

02/01/2018

Nagħlqu L-Bieb.

U nagħlqu l-bieb għal dan ir-repertorju

ta’ taqlibiet ta’ dak li nħass tassew biex jibqgħu biss  

l-effervexxenza ta’ ragħwa u bżiezeq jibbrillaw

u jfaqqgħu f’wiċċċ it-tazzi tax-xampanja.

Irridu nibqgħu għaddejjin f’dal-vjaġġ bla ritmu

sakemm insibu l-oasi li jmiss

jew l-istazzjon tal-ferrovija

u ngħoddsu t-tnejn mill-ġdid fil-baħar tal misteri

biex niġbru l-frott li jixirqilna.

Int oqgħod hawn stenieni fuq dil-blata

għax jien għad niġi ħdejk bil-qabda l-kbira,

Jien nerġa’ nduq tingiż is-sensazzjoni

u int tnewwili l-platt taz-zalza taħraq.

Għalina jista’ jinżel għal darb’oħra

tas-sena li għaddiet separju ieħor

biex fuq il-friex tal ferħ u s-sagrifiċċju

nindifnu mal katarvri ta’ ħajjitna.

Alfred Grech

31/12/2017

Ċpar.

Il-lejla waqa’ ċ-ċpar tad-dnub bejnietna,

Xħin tistedinni bdejt biex nidħol aktar

Il-ġewwa qalb il ħmura ta’ fl-għaxija,

Fejn hemm il qtigh in-nifs tal-għera t’għada.

Int xtaqtni wkoll nintilef fil-misteri

U d-dubbji li tħallili r-rima tiegħek,

Duħħan li jġorr ir-riħa tal-passsjoni

Duħħan l-irdum fit-tarf ta’ xifer minsi.

Ma jiġri xejn jekk nidħol għal darb’oħra

fix-xejn tas-sensazzjoni u l-irtubija.

Il-molla li tikkarga ragħad u beraq

Hi terremot lilhinn mix-xefaq tiegħi.

Kull meta tgħid li mqar trid tisma’ leħni

Inħossni tiela’ l-fuq u nieżek l-isfel

fl-intensit’ tiddennes fiċ-ċpar tiegħek.

Alfred Grech

29/12/2017

Joħolmu L-Ippopotami.

Joħolmu l-ippopotami u jinżlu jirgħu l-anġli

F’din l-għadira t’ilma qiegħed

Fejn int u jien noqgħodu nirriflettu

X-xbieha antika taghna stess

U nitpaxxew b’dak li naraw

Inkella bli jgħidulna dawk li jindukrawna.

Bħal ward ilellexqrib it-tarf

Mnejn jgħaddi l-ilma rifreskanti

Noqgħodu nishru f’dan il-wied tat-tempji

U mbagħad nitħassru lilna nfusna jew nitħassbu

Fuq il-misteri katalogati.

Bħal kewkba inti tpetpet u lanqas trid titħarrek.

Xi minn daqqiet ibillu griżmejhom iċ-ċentawri

Li jitfaċċaw mill-boskijiet mudlama

Biex jagħllmuna kif infiequ

Mill-weġgħa ta’ kulljum,

Inkella nagħarfu ngħixu biha

U b’hekk insiru għorrief inkella mitoloġiċi

Wisq iktar milli aħna.

U xorta waħda jitfaċċaw il-kukkudrilli

Lesti jibilgħu il-ħrejjef li jħarrfu dawk tas-setgħa

U għax aħna mansi fi drawwietna u f-dak li nemmnu

Jiċċirkundawna biex nidħlu aħna wkoll fil-merħla tagħhom.

Wara dawk il-par għajnejn u l-par xofftejn

Mhemm xejn, hemm univers mistur.

Jien ridt inkun bħal warda li tiċċassa

Imsammar maż-żegliga li tiżżegleg

kull meta lejja tersaq

b’xufftejk imbexxqa.

Alfred Grech

28/12/2017

135.

Ħajjartek biex flimkien inkebbsu l-fjamma.

Int għedtli li hawnhekk kullħadd ikebbes

In-nar tiegħu. Il-ksieħ jiffriża kollox,

U jmewwet it-tamiet ta’ bosk iħaddar.

Illum erġajt ilmaħt ix-xbieha tiegħek

U deherli li sirt isbaħ minn kif nafek,

Minn meta mort staħbejt fiċ-ċpar tal-għada,

Bdejt tgħib qalb id-duħħan ta’ li staqsejtni.

Kont għedt jien raġel stramb u jien ħassejtni

Qed negħereq fid-dagħbien li hemm fil-mera.

Imbagħad ġejt wiċċ imb’wiċċ mal-fehema tiegħek,

U sibt il-qiegħ, sibt qiegħ fond aktar minnu.

Fil-bogħod li hemm bejnietna x’seta’ nbidel?

Hux int, inkella l-mod kif bdejt inħares.

Alfred Grech

27/12/2017