M’hemmx Bżonn Aktar Tas-Sema.

U kien hemm Zeus li beda jinbgħat il-beraq u s-sajjetti

u aħna na ltwejniex

u tlabniek li tibgħat l-ispirtu tiegħek biex huma jinħalqu

u inti ġġedded il-wiċċ tal-art bħalma l-ġiganti

tat-towercranes u tal-buldozers

u l-barunijiet tal kapital miġmugħ

tal-kapital misluf

tal-kapital efimeru

qiegħdein ibiddlu l-wiċċ ta’ dawn il-gżejjer.

U magħhom jiggranfaw

dawk ta’ mingħajr spina dorsali.

il-gwejjda li qatt ma raw flus f’ħajjithom.

inkella dawk li jsejjħu lilhom infushom il-gwardjani

tal-wirt u l-patrimonju ta’ ħaddieħor

u magħhom dawk li jmexxu u jikkmandaw mingħajr mandat

bħal majunetti misjuqin mill-ispag ta’ min hu

tassew bla sinsla.

Imqar jien l-ispettatur il-ħati

tal-vini mblukkati

li jħallat id-demma mal-għaraq ta ġbin dawk li batew

u ġew qabilna li tawna dak li għandna bqajt hawn

nibni jien ukoll il-kastelli tar-ramel

fuq din ix-xtajta solitarja

nikkunsidrahom tilgħin, jinbnew wieħed wara l-ieħor

il grattaċjeli tal-blugħa u tal-frugħa u tal-isfidi

bħal dik is-siġra ta’ mitt sular.

U jien noqgħod hawn inħares lejhom

bħal min iħares lejn xi ħaġa li ħarġet minn xi ħrafa

inkella xi tiżjina li hi barra minn lokha

bħallikieku kien xi taraġ jew axxensur

li jwasslu lejna is-sema.

Intant inħares lejn il bini li hu tiela’

li qed joqrob lejn is-sema, qisu li wara dan is-siment

u dan il-ġebel kollu

lanqas hemm bżonn aktar tas-sema

Alfred Grech

16.02.2019

F’Jum Il-Maħbubin.

Jista’ jkun ukoll li ridt iżomma tixgħel

Il-fjamma li kienu xegħelu l-verġni  vestali

Mit-tempju tal-allat fuq l-għolja ta’ olimpu,

U jista’ jkun ukoll li kienet hemm minn dejjem

Tirrifletti x-xemx mistħajjla

U bis-sħana illużorja kont inħossni li qed qribek.

U kienet illużorja wkoll ix-xrara li kont tkebbes

sabiex iżomni ħaj imqar jum ieħor.

Iżda llum, f’jum il-maħbubin ridt nagħmel bħal-ħaddieħor

Ridt nagħmel kapriċċija u nikiblek poeżija

U nistiednek fi ġnien l-Għeden

It-tnejn li aħna Inħarsu f’għajnejn xulxin

U bit-tbissima nistħajjlu t-tnejn li aħna

Li għadna verġni

Li għadna minghajr tebgħa

Inkella li kull dnub li qatt għamilna issa nħafer

U li din it-tferira li tgħaddi minn ġox-xewka ta’ daharna

Iġġiegħelna nħobbu lil xulxin

U hekk inkunu sibna stil ġdid ta’ ħajja

l-istil tagħna tal-ħolm li t-tnejn noħolmu

ittrapjantat minn dak li dak li qiegħed jiġri.

Alfred Grech

14/02/2019

Int Ma Titkellem Qatt.

Ma Nafx  jiniex infisser ruħi sew

Imm’int ġejt hawn tbiddilli r-rima

F’għajnejk ilmaħt il-leħħa

Li għanda minn tal-beraq.

Ma nafx kif qed inħossni

Inħossni rrid nisfida

Iżd’int mintix biss sfida għalija

Lanqas  xi annimal domestikat

Li nħobb ninbex inkella nitpġaxxa

Bil-fattizzi tiegħu.

Int ma titkellem qatt

Iżda jiena nħossok

U naf li f’idejn skultur famuż

It-tafal jiehħu lewn sbuħitek.

Alfred Grech

14 ta’ Frar 2019

Giorno di San Valentino.

Għax Emmint f’din Malta Ġdida.

Għax jien emmint f’din Malta ġdida
Li reġgħet irxuxtat min qalb l-eklissi
Xhin il-Maltin bi ħġarhom marru fil-
Kamra jivvutaw
u ġiet bħal mewġa ġdida u kbira
Issa mingħalina lħaqna l-qofol tal-aqwa żmien
Ġiet mewġa għolja wisq, l-ogħla waħda
Li għollietna mas-seba’ smewwiet,
li firditna mil-imgħoddi mbikkem tagħna.

Għax jien emmint fil-fewġa l-ġdida
Li bdiet tonfħilna min-naħħa tal-punent,
Bil-ħsieb li issa stajna naqdfu f’baħar wieħed
baħar l-indafa
Inkella nsibu n-niċċa kollha deheb u fidda
bħal dik tal-qaddisin.

Iżda bil-ftit il-ftit nintebħu bdejna,
li dan ma kien il-kolp qawwi xejn
ma kienx il-kolp li saqna
Lejn il-mergħat iħaddru inkella lil hinn min nzul ix- xemx,
Iżda dan kien dawra mejt
Din kient biss valanqa
ma kienet mewġa xejn
U bħal kull valanga
Tiġi biex tirkeb u teqred u tiknes magħha
u tħalli biss il-ħerba fejn tkun għaddiet.

U issa waqafna, għax għadna kif sternbaħna
U għad irridu niġuf'sensina sew
Wara dir-raqda fit-tul, ir-raqda tas-sekli.

U għad baqagħalna mhux ftit
biex tassew nintebħu x’inhu jiġri
Biex noħorġu mill-belt il-qadima
U nsibi tassew it-triq tal-ħelsien.

Alfred Grech
13/02/2019

Għad Jiġi Żmien.

Għad jiġi żmien u mhux fil-bogħod

li ma tistaqsinix aktar

jekk jiniex ġej u trid tagħmilha t’anġlu u ta xitan

biex tifhem il frażeġġ tat-taħbiriet li għandhom

minn tal qawsalla u l-frakass  li jħalli wrajħ

id-diskors ta’ nhar ta-ħadd minn fuq ir-rtadju

inkella ġo xi ħażin tal-periferija fejn min jippriedka

jippriedka għal dawk li huma kkonvertiti.

U trid tassew tkun trasparenti daqs nixxiegħa t’ilma safi

biex tifhem kliem is-serpent jitmiegħek fil-ħmieġ tal-art

li xi wħud isejjħulu l-korruzzjoni.

Mil-bqija tiġġerra qalb it-toroq ta’ dar-rħula

u dawn l-ibliet issikkati u kkalzrati bħal ħabsin inkatenati

u ffullati sa ruħ ommhom qalb l-uċuħ itturfnati

aljenati, u ċċassati li lanqas biss għadhom jingħarfu

għaliex moħħom s’hemm iwassal

u tittallab għal ftit ilma u għal ftit  beraq ta’ bla ħoss

li jirbombjaw fil fond bla qiegħ tal baħħ ma jinħafirx.

Bqajt ma sibt ebda tweġiba.

Jiena l-iblaħ tat-tarokki nippasiġġa u saħansitra

nisfen f’tarf il-preċipizzju

nittallab merżuq dawl inkella xi xintilla

ta’ ferh u ta’ tgawdija f’dan il-wied ta’ taħt l-irdum

minn dawn il-qlub imxebba fl-affluwenza,

inkella aljenazzjoni oħra ta’ did-dinja u kull ma fiha

qed iwiegħdu sabiex fl-aħħar nibda ngħid

li tassew dan hu ħelsien.

In-nies għaddejja u tibqa’ għaddejja

purċissjoni mingħajr tmiem, mingħajr lanqas taf fejn sejjra

nkella tfittex il-ħrafa tal ħoqien fil-konfini tal-Ġnien tal-Għeden

manipulati mill-mezzi tat-tagħlim u tax-xandir ta’ min ghandu l-akbar setgħa

ta’ min jiflaħ l-aktar jigdeb.

Sensazzjoni waħda baqgħali:

li żbaljajt kollox.

Alfred Grech

12/02/2019.

Jien Noqgħod il-Bogħod Minnek.

Jien noqgħod il-bogħod minnek

mhux għax ma nħobbokx inkella reġa’ bdieli,

Iżda għaliex irrid nibqa’ nviżibbli sa nsir

saħansitra mmortali għal dak li jgħidu n-nies,

Għaliex fil-ħabi tiegħi inti tibqa’ sħaba

u qatt ma tinżel fl-art

bħalma jagħmlu l-anġli tas-smewwiet,

sħaba bajda tgħatti x-xemx u tisfida

l-isplendur tagħha.

Hemm xemx illuminanti li ma tidhirx

u lanqas tixfrex ir-raġġi tagħha.

U hemm alla tas-skiet, tal-immanenza,

li bħal kompożitur tal-melodija

ried jibqa’ mhux magħruf.

Jien irrid inkun dak il-poeta

li niktiblek dawn il-versi

li ma jgħoddu xejn u xejn ma jfissru

biex int fil-baħħ tax-xejna u l-inviżibbli

tiġbor il-ħjut li lilna jagħtu

l-inkwadratura li tixirqilna,

Noqgħod il bogħod minnek

sabiex imqar f’din id-distanza

u f’dan is-skiet etern ta’ din il-ħemda

tintebaħ kemm jien stramb inkella

insibu l-mod kif nerġgħu nirxuxtaw

din l-imħabba kbira

il bogħod mill-għajjat tal-folla

il-bogħod mis-simulazzjoni

u l-ħafna tagħlim fieragħ ta’ kif

għandna nagħmlu, x’għandna naħsbu

x’għandna ngħidu u kif għandna nġibu ruħna

xħin inkunu ma xulxin

Alfred Grech

11/02/2019

Kull Meta Nqum Filgħodu.

Kull meta nqum fil-għodu

Nintefa’ nħares lejn l-iskrin

Ma jkunx għaliex xi darba kont kurjuż

Jew ridt nitgħallem ngħodd mill-ġdid,

Iżda, sabiex nimblokka l-ħsieb

U nibqa’ bla ma naħseb.

Għaliex kull ħsieb tellief,

Kull mistoqsija kapriċċjuża,

U kull skuża velenuża

Hi fiergħa u ma tikkonvinċix

Iġiegħek biss biex

Ta kulljum tkompli tixrob il-velenu.

Insib li ta’ kull darba nidħaq qiegħed bija nnifsi

Ma jiswa’ xejn li nibqa’ nrambal din il-blata

U  nagħmel parodija minn xenarju

Għaliex kull profezija li għamilt

Qiegħeda sseħħ bil-ftit il-ftit

Isseħħ qiegħda ta’ kull jum

U tkompli sseħħ għal kemm il-darba mqar għal dejjem.

Imqar jekk fl-aħħar tiġi tgħidli

Li hemm int isserraħ fuqi.

Alfred Grech

11/02/2019