Għaliex Daħħaltu Lili.

Għaliex daħħaltu lili

fil-kredu hawn bla bżonn?

jien noqgħod xtaqt bi kwieti

u ngħaqqad mhux il ponn.

Għal xhiex nivvota tridu?

Jien m’għandi x’naqsam xejn

ma dak li tħarrfu u tigdbu

tistaqsunix għalfejn.

Jien ridt bi kwieti noqgħod,

Għarib u ftit għal ġenb,

fidil ta’ dawn l-inħawi

u mhux xitan bla denb.

Jien ċert li dak li għandi

xi ngħid qatt mhu se jgħodd.

Għalfejn tistaqsu mela?

Kull toqba rrid insodd!

Intom li tafu ħafna,

u tafu tippriedkaw,

ħalluni ftit bi kwieti

u l’hawn qatt tissugraw.

Intom in-nies tal-midja

li tiġi b’xi survey,

jew dawk tal-istatist’ka

li tbassru x’inhu ġej.

Intom in-nies tal-liġi

jew int politikant,

li tafu x’għandkom tagħmlu

sibt ruħħi ġo x’irkant?

Intom li tafu ħafna

u tafu t-tweġibiet

li tafu kif naħsibha

ħalluni ftit bil-kwiet.

Alfred Grech

09/05/2018.

U Issa.

U issa ġejt hawnhekk f’nofs dan l-istorbju

biex mingħalija nderri qalb il-folla

tassew li qiegħed hawn mhux għax ridt jiena

iżda għax emmint fi ħniena kbira

li mhix tas-soltu.

Għax bejn il-ħafna dagħa jew il-foħrija,

m’hemm xejn, m’hemmx vers li jaqsam,

u dak li qiegħed nara hawn quddiemi

mhux dak li int kont wiegħedtni.

Nista’ wkoll noqgħod undur u nimxi l-mixja

tal-ħabel issikkat għax mingħalija

għadni dak l-ekwilibrista li rnexxielu

jasal s’hawn.

Iżda mbagħad jekk tistaqsini x’sejjer nagħmel

inwieġbek li ġo fija

ma jibqa’ ebda sens ta’ ħajja.

Bħalkieku jiena naf x’inhu

s-sens tal-ħajja!

Nista’ wkoll nimmira noqgħod

lejn xefaq id-destin

u ngħod is-sħab u t-tajr tal-ajru

u nqis ruħi ta’ miskin.

Alfred Grech

08/05/2018

U Hekk Hemm Raġel Ieħor Qed Jinħaraq.

Jien ma ngħidlekx ġo liema sqaq daħħaltni

sibilla tar-riħ fuq u l-uragani.

ma liema kantuniera se ddawwarni

biex nerġa nsibni għal darb’oħra f’manikomju.

Int issa sirt ukoll daqs l-ossessjoni

tal-jien li jaf jirreċ’ta l-illużżjoni

għax ismek jista’ jkun dak ta’ divina

u hekk hemm raġel ieħor qed jinħaraq,

jokkonsma l-melħ u r-rmied tal-krematorju,

f’konflagrazzjoni ta’ xewqat u s-sensazzjoni

misjuq u mgħammad minn kull xorta ta’ passjoni

bla lġiem jew rażan biex jinsa’ lilu nnifsu.

Bħal kieku xejn m’hemm aktar.

Għaliex min qatt matul il-ħajja tiegħu

ma ġietu mqarr fil-ħsieb t-tentazzjoni

li jittradixxi.

Alfred Grech

06/05/2018

Ma Niftakarx.

Ma niftakarx jekk ġejtx il-bieraħ

Stennejtek tiġi għal żmien twil.

Ma nafx jekk qattx għamiltx xi wegħda

Ismek imċappas ma kullimkien.

Issa li x-xitwa għaddiet u l-ajru bbnazza

Irrid insib mil-ġdid is-sema safi,

Il-wegħda taż-żernieq ma xfar kull ħnejja,

U l-ħmura ta’ filgħodu fuq ħaddejk.

It-tnejn li aħna ma nafux minn fuqna x’għadda,

Inkell żgur li għada jkun divers.

Minkejja l-ħsejjes kollha

Minkejja d-dlamijiet

Tagħllimna kif nitlaqgħu

Minkejja kull drawwiet.

U dak li kien iżommna

Ma kienx xi ħmar il-lejl

Biss kienet l-emozzjoni

Jew ħolma ta’ bla kejl.

Alfred Grech

05/05/2018

Int  Tista’ lanqas Tiġi.

Int tista’ lanqas tiġi

mingħajr ma biss tkun tlaqt,

U terġa’ tiġi lura,

b’hekk hawn tkun ħin bla waqt.

U xejn ma jkun jimporta,

jekk tmur u ma tiġix

Jekk tgħaddi minn quddiemi

u qisek ma tafnix.

U xejn ma jkun jimporta

fejn timraħ jew fejn tmur,

Jekk naf li terġa’ lura

Għax taf li hawn fi żgur.

U xejn ma jkun jimporta

u nibqa’ nistenniek

xħin tiġi, ninsa’ kollox,

Nistenna fuq ix-xwiek.

Għax qatt ma tiġi lura

jekk ma tkunx taf it-triq,

int tlaqt bla taf fejn sejjra

f’ġejjieni tant mixtieq.

U jekk se terġa’ lura

bħal meta tmur mnejn ġejt,

Għax qatt ma tista’ tinsa’

il-bejta li ħallejt.

Alfred Grech

04/05/2018

GHax Battal Dak Kollu Li Qed Jgidu.

Hemm offiżi li għandhom minn tal-blugħa,

oħrajn li huma biss ħela ta’ ħin.

Aħna li nivvjaġġjaw fuq sħab l-eklissi t’għada

inqanqlu ġewwa l-ikħal tas-smewwiet

Il-votiġini ta’ dinja msensla  tfittex il baħħ tan-numri

u n-nar tal-ġifġifogu biex tinsa’ l-ħsara u l-moħqrija

li toħloq bis-sistemi tas- sriebet nemel

li qatt ma draw jistaqsu.

Lanqas jagħmlu ebda sens

l-uċuħ li jidhru fuq il-paġni ta’ rivisti jleqqu

bil-varniċ tal-attaparsi biex jagħmlu l-bżar fl-għajnejn

lil min hu mdorri jibla’ kollox

għax battal dak kollu li qed jgħidu.

Alfred Grech

03/05/2018

Kont Int l-Ispudorata.

Kont int l-ispudorata

kull xħin ħallejtni nogħla fuq spallejk

biex nara ħafa l-bogħod

fejn ħadd ma kien ra qabli.

Bħal meta tlajt il-ħajt ta’ lejl

jiżżerzaq fuq il-ġilda bajda tiegħek.

Qarsa l-imħabba tiegħek

u bil-velenu kull wegħeda li tagħmilli.

Imqar jekk jerġa jaqa’ s-skiet

fuq xefaq xfar għajnejk

man-nifs tal-għodwa l-ġdida

imelles għal darb’oħra

r-ruħ li tħobb il ward li għadu jiftaħ.

Int tibqa ta’ kull darba żżommni mqajjem

bil-ħsibijiet ta’ tradiment jittewbu l-kwiekeb ġodda

fuq sema kapriċċjus.

Alfred Grech

02/05/2018