Jinqabdu Jgħidu l-Ħmerijiet.

Jinqabdu jgħidu l-ħmeijiet

u lanqas xejn ma ġara,

ma jixbaħ xejn lil-verita’

u m’għandu xejn mis-sewwa.

Bil-qassisin jimmolestaw

għax tagħhom hija s-saltna

lit-tfal iż-żgħar u kull ma jmur

jinkixfu aktar skandli.

Bla biża’ xejn għax approvat

dal bini qed ifixkel

kull pjanta studjat jew strutturat

u kontra kull raġuni.

tal-kapijiet li jitneħħew

minħabba li jitfixklu,

tal-vittma li titħallas trid

għal kull vendikazzjoni,

ta’ niex m’għandhomx fejn jistkennew

inkella tal-vettura

parkeġġ ma ssibx, mhemmx x’tagħmel taf

u ħadd ma jrid jitkellem.

Taf l’issa dan għonq ta’ flixkun

Ma tafx minn fejn se tgħaddi

Nitkellmu biss waqt xi diskors

ta’ ġurnalista brava

li mxiet fit-tul ma waqfet qatt

u saret kummissarju.

Għax arroganti dal-poter

ser nimxu bi protesta,

u mixja mxejt favur il-ħaqq

imqar favur is-sewwa,

għax xejn minn dan ma kien tassew

aħbarijiet mirquma.

Alfred Grech

09/10/2018

138.

Int jista’ jkun ukoll li reġa bdielek,

Jew ridt narak mill-ġdid biex nerġa nġedded

It-tifkiriet li jisfidaw kull sens ta’ storja

U nerġew nirxuxtaw vulkan li raqad.

Int lanqas terġa tħares fiss f’għajnejjja

Filwaqt l’għafastli jdejja bħal fi tnalja,

Tbissimt u qatt ma ċħadtha l-mistoqsija

Quddiemna t-tnejn mingħajr ma staqsejniha.

Imbagħad ma nafx għaliex mintix tintebaħ

Li dak li għadu jorbtok ma ħaddieħor

Mhu xejn għajr sens ta’ lealta’ jew ħtija

Lejn min għalik eroj kien waqt l-isfida.

U għalhekk nerħilek jien il-ħabel kollu

Biex tibda tidwi l-baħħ li hemm ġo fija.

Alfred Grech

08/10/2018

Surtek

Surtek Imnaqqxa ġewwa fija

il kliem jitilfu kull tifsira

biżżejjed daqqa t’għajn biex nemmen,

tislima, biex ninfed id-dell tiegħek.

Alfred Grech

07/10/2018

Ejja Hawnhekk.

Ejja hawnhekk bil-qiegħada ħdejja

fuq kantun taħt diż-żebbuġa

nitbekkew agħar mill-ilsiera

hawn maġembna l-ilmijiet tax-xmajjar tax-xtut tagħna

ix-xtut ta’ Babilonja.

Nitbekkew l-iżverġnar ta’ dawn il-gżejjer

lil dan il-ġens mistifkat

traxxinat f’dil-mixja alluċinanti

lil dal-poplu lluppjat mhedi jgħasses

il-lussu efimeru ta’ tiġieġa tbid

il-bajd tad-deheb.

Ejja hawnhekk  ħa nibdew nagħmlu

bħax xadini, la naraw u la isimgħu, xejn ma nghidu

biex nixxabbtu u niskalaw il-grattaċjeli

jew nixxabbtu mal-ħitan tal-muta eterna

jew mas-siġar li jitqaċċtu

biex inwesgħu aktar toroq jew biex nibdu torri iehor

jew biex nagħmlu aktar wisa’ lil vetturi

li jiżdiedu ta’ kulljum,  jimblukkaw, jiġġammajaw

mas-sewwieqa kkundannati li qed jisħtu kull mument

li qed jobsqu telf ta’ sabar fil-blasfemi tas-sedil.

Ejja nagħmluha ta’ bankiera u nislifu l-flus bl-addoċċ

sabiex nibdu Malta ġdida jew nisselfu

biex noħolqu arja oħra ta’ progress u ta’ suq ħieles

jew kummerċ bl-immunita’

bil-munita diġitali

bl-osessjoni jew tellieqa biex inbiegħu

arja ta’ fuq il-bjut jew duħħan ta’ fuq il pjanti

spazju ġdid, spazju virtwali. . . .

Inti li bħali toħlom il-kwiekeb

u l-qamar li jongħos iċċassat

fuq sema mnikket għax darbuħ il krejnijiet.

Alfred Grech

05/10/2018

LXVI

U xħin is-seħer mar erġajna ltqajna.

Għax sirna bħall-oħrajn bilkemm nitħamlu

U ġrejna ħafna għalxejn, fejn konna bqajna

Inħarsu lejn xulxin, ma nafx x’ser nagħmlu.

Jien kont saħħar għalik u int għalija

Kont kewkba fis-smewwiet, li terħi x-xuxa,

Jien tlift is-seħer, inti tlif id-dija,

Fi qlubna t-tnejn m’għadniex fil fond minquxa.

Jien kont ir-riħ għalik, int kont il-baħar,

It-tnejn qanqalna riefnu u ġejna f’tagħna

U x’ġara mbagħad jien ftit li xejn niftakar,

Int xbajt iddur u jiena w’qaft mill-għana.

Imm’issa qagħad ir-riħ u l-ajru tbiegħed

U r-riħa bdiet tinxtamma tal-ilma qiegħed.

Alfred Grech

14/06/2013

Titjira Fl-Infinit.

Mixja oħra din tal-moħħ,

titjira fl-infinit,

bil-friefet ġol-istonku.

Il-ħin ilissen il-waqtiet

imnaqqxa fil-granit

senswalita’ li tidher

f’għajnejn ħaddieħor.

Jien xtaqt li nkun għalik

dak l’inti qatt ma tinsa,

u inti għażilt lili

għax jien għalik

dak kollu li baqgħalek.

Jekk għad niltaqgħu

fil-ħajja li għad tiġi

nitbissmu lil xulxin

mingħajr ma naf il-għala.

Alfred Grech.

02/10/2018

Għaliex Le!.

Tiġi, tiġi waħedha u għall-għarrieda

u ma tiġix xħin tkun imdejjaq

u tibqa’ biex tħabbatlek fuq it-tieqa

daqqiet ta’ armonija ċelestjali

u inti tkompli mal-battuti

ittektek fuq tastiera inkella tikteb

bli jiġi f‘idejk.

U xħin tneħħilek  l-għamad minn għajjha

tgħidlek: Int mintix is-sieħeb tiegħi,

u int tweġibha:  mhux int sejjaħtli!

U hi tgħidlek li ma tafx.

Imbagħad tħarsilha fiss f’għajnejja

u tgħidilha: Ejja nkomplu,

u hi twieġbek: Għaliex le!.

Alfred Grech

01/10.2019