F’Jum Sant Ivo.

Jien dak li nerġa’ niġi nfittex

dir-roqgħa art fis-skiet u l-ħemda

fejn jikber il-ħaxix u x-xemx għad tasal

il-bogħod mit-tinġiż tal-arja

fejn ma nismax il ħsejjes  tar-rombli jqarrmċu tal-magni.

Għiduli fejn hu dan l-imkien?

Jien inkun l-aħħar wieħed li nitbekka

il-ħerba ta Ġerusalemm

f’din l-art ħanina li tnixxi l-ħalib u l-għasel

li tfarrket mill-barbari maltin

sabiex minn dan il-bini kollu li jinbena

m’għadx jibqa imqar ġebla fuq oħra.

Imbagħad ma jiswa’ xejn

li bħal groqqa għad trid tiġi

u terġa’ tiġbor il-flieles tagħħa.

Imbagħad għad niġi hawn

xħin ninżel minn ġos-sħab

u nimraħ f’dad-deżert uman

ta’ bla qalb u ta’ bla ruħ

il-ħabs li ħolqu l-istess maltin minn jeddhom,

ma’ dawk li s-sewwa jaħarbuħ

u jgħixu ġol-bużżieqa tas-sapun

tal-ekonomija dejjem tikber

għajjiena le xebgħana

mitluqina għalina nfusna

għax ma baqax fejn għad nimirħu

għajr l-oqsam artifiċjali

tal-iskrin u tat-tastiera.

Alfred Grech

17/12/2018

 

Lethe.

Biex dħalna f’din nixxiegħa

mal-bżieżaq qed itiru,

jew raxx ta’ mewġ il-baħar

jinfaqgħu malli jsiru.

Biex dħalna f’fin ix-xmara,

u mxejna mal-kurrent,

nixobu l-istess l-ilma.

jew  nirtu s-sentimenti.

U kbirna u ssaħħaħna,

u sirna rġiel u nisa

ftit, ftit, immaturajna

u ġrejna wkoll fil-wisa.’

U sirna bla ma nafu,

dak kollu li llum aħna,

fuq bastiment vaganti

li rkibna bla ma ntbaħna.

Alfred Grech

15/12/2018.

144.

Nimxuha din it-triq mingħajr ma nħarsu

Lejn kull naħħa u bl-għamad fuq għajnejna

Għaliex kull fejn se tħares hemm medusa

Bil-vleġġa tagħha ssamrek u ssir ġebel.

Minn dan il-wied tad-dmugħ irridu ngħaddu

Mingħajr werrej li juri fejn trid tasal,

Għaliex sal-lum kull min it-trieq uriena

Għallatna, jew daħħalna ġewwa żenqa.

Irridu nitilgħuha din it-telgħa;

Telgħin mingħajr sejħiet traxxendentali

Mingżajr l-ispirazzjoni ta’ xi anġlu

Inkella qaddisin jipproteġuna.

Għax bqajna ma nafux sal-lum fejn huma

Il-mogħodijiet li jwasslu għat-tnissija.

Avvent.

Illum terraqt it-toroq dojoq tiegħek

ja belt mimlija tifkiriet taċ-ċokon tiegħi,

tal-innoċenza li taf biss -sewwa ħieni

fil-miġja tal-milied u fid-dlam tax-xitwa.

Illum imxejt fit-toroq dojoq tal-mandraġġi

fejn hemm ihufu l-anġli tal-imgħoddi,

 il qalb ittrapjantata fl-iskeletri

qawmien mill-ġdid, avvent is-sena kollha.

is-seħer li jien rajt f’għajnejn ħaddieħor.

Izda xejn mhu jiġri

stupefatt mid-dawl ipetpet

tal-kwiekeb imdendla mat-twieqi

u tat-toroq battala mill-imħabba

lejn xulxin taħt il-mantell

tal-iħirsa tal-imgħoddi.

L-ebda leħen ma jwassal is-seħer

inkella jwieġeb għas-sejħa ġewwinija

għajr dak li jqanqal it-tifkira tal-imgħoddi

jew l-ħsejjes ta’l-ispots pubbliċitarji

ifixklu l-għanjiet tal-Milied.

Hawnhekk it-toroq fit-tellieqa ma xulxin

bħan nisa f’xi konkors ta’ sbuħija

min minnhom jiddandan l-aktar

min minnhom jiġi l-ewwel.

Alfred Grech

12/12/2018

Għax Jiġri ta’ Kull Darba.

Għax jiġri ta’ kull darba

Nistaqsi lili stess:

Għaliex jien fejn kont għadni

Bla nagħmel ftit progress.

Għaliex inħabbat wiċċi

Ma sitwazzjonijiet

Li drabi oħra fihom

Sibt ruħi b’ħafna kwiet.

U d-dwejjaq kbar jaqbduni

Inħoss li ma mxejt xejn

Hawnhekk kont drabi ohra

Dort dawra mejt, għalfejn?

U nerġa’ fejn kont qabel

Għax għadni ma tgħallimtx

Dak li ma rridx nitgħallem

U moħħi ma ħaddimtx.

Alfred Grech

12/12/2018

Fis-Saltna tas-Sireni.

Hemmhekk fejn is-serafini

Jgħajjtu u jwieġbu lil xulxin:

Qaddis, qaddis, qaddis hu l-Mulej ta' l-eżerċti.

L-art kollha mimlija bil-glorja tiegħu."

U bl-għajjat tagħhom is-sisien ta' l-għetiebi

Theżżu, u t-tempju ntela’ bid-duħħan.

Hemmekk fejn idoqqu t-trumbetti tal-progress

Il-kerubin bix-xabla tan-nirien

Biex ma jħallux lil min jidħol

Fil-ġnien tal-Għeden.

Hemmekk fejn mhemmx post għal min hu bħalna.

Hemmhekk sieħbi tibda l-mixja

Twila li twassal għal imkien

Li twassal għall-eklissi

Ta’ xemx li għadda żmienha.

Hemmhekk fejn tara l-qtajja tal-anġli u tal-arkanġli

Tal-ġilda sewda u xagħarhom isfar.

Jien għad inkun miflok Orfew

Iben alla żgħir mingħajr il-lira

Bit-tweġibiet glorjużi ta’ ħsejjes melodjużi.

F’din l-art ħelwa l-omm li tagħtna isimha

Bla tebgħa u bla dnubiet

Żverġnata għalxejn u għal kemm il-darba

Fis-saltna tal-iżvilupp u tas-sireni.

Alfrerd Grech

11/12/2018

Saturnalia.

Bħal meta nhar ta’ ħadd mad-daqq tat-tnabar

Jinġabru f’xi ħażin bex jgħiu tagħhom,

U l-kbir jiftaħar b’rixu u li m’hawnx bħala

l-ekononija tagħna, għax dejjem tikber.

Bħal meta Hesperos isir Lucifru

Il-kewkba ta’ filgħodu tiġi żżurna,

Fuq l-għolja tal-allat il-fjakkolata

Inċapċpu u ngħollu jdejjna lejn is-sema.

Dan hu tbexbix ta' żmien qatt ma kien bħalu,

Dak tal-ħabbar idoqq fil-bieb tal-ġenna,

Taħt patroċinju kewki ta’ xemx ġdida

Jingħaqad ma li hemm purifikati.

Jien nirkeb żiemel ġdid jew dahar ta’ barri,

Nistenna li xi darba għad iċedi

Bħal meta fuq it-tron imil Saturnu

Bix-xettru falz tax-xemx u l-qamar.

Jien għd inkun ma dawk li qatgħu qalbhom

Kewkba oħra li waqgħet u saret elf mitt biċċa.

Alfred Grech

10/12/2018