L-Olimpjani.

Issa li l-olimpjani spiċċawlhom il karti tal-logħob

u fadlilhom ftit mossi x’jistgħu jagħmlu

qabel jiblagħhom l-abbiss

u jinżlu jitgerrbu għal-isfel

mill-għoljet u mill qċaċet fejn kienu tant jiddandnu

għax kienu jaħsbu li ħadd ma seta’ għalihom

huma daru fuq Zeus, il-kbir Zeus

ir-re tal-allat

iben Rhea u l-qawwi Kronos

li sallum dejjem kien it-tarka tagħhom

u laqgħa għalihom bħal tfal imqarbin li kienu

u sgiċċa mill mira ta’ kull vleġġa velenuża

billi aljena lil kullħadd u lihom magħhom

bl-istejjer ta’ qabel l-irqad u bil ħrejjef l-oħra

bil-kutrumbajsi li kien imdorri jagħmel

inkella teatrini

għax hu kien attur u kien makakk

imħarreġ sew fis-sena tas-simulazzjoni.

Iżd’issa mqar il-kbir Zeus

żmienu kien għamlu u s-seħer li kien imdorri jitfa’

fuq kulħadd spiċċalu

għax trekken hu ukoll

u nqabad sewwasew ġo l-għanqbuta li kien niseġ.

U meta marru ħdejħ jistaqsuħ x’setgħu jagħmlu

Zeus il-kbir tbiegħed minnhom

u lissen kliem ma jinftiehemx

u beda jisħet il waqt u l-ħin

li hu wkoll ma spiċċax ġewwa żaqq

Kronos missieru bħall-allat ta’ qablu.

U issa wieħed wieħed bdew jitgerrbu

it-taraġ għoli tal-palazz irrestawrat

ewlieni fil quċċata fejn jista’ jidher

minn kulħadd u minn kullimkien

fuq l-għolja mqaddsa tal-allat.

Sab ruħu waħdu issa l-kbir Zeus

jiġġieled il-qilla tal-plebej u tal-bnedmin

li fis-sedqa tagħħom emmnu

u għax emmnu hassew irwieħom milgħuba.

iżd’issa qamu min-ngħas twil u tqil li kien ħakimhom

Alfred Grech

24/11/2019.

DAL-FLUS MINN FEJN ĠEJJIN?

Dal-flus minn fejn ġejjin?

Imqar mina minn taħt l-art iridu jagħmlu

mhux għan-nies, għall-kuntratturi

u biex igawwdu huma magħhom.

Fetħu jdejhom u qalu:

Hawn il-ġid.

U ħarrbtu kull ma sabu

għax id timsaħ lill-oħra

u hekk ikunu nodfa t-tnejn

Għalxejn iddoqqu t-trombi

għax l-aħħar ma wasalx

bħalissa għandi x’nagħmel

bħalissa nikkontempla

kemm hu baxx il baħar li fih qed ngħumu!

Hemm min ma jilħaqlux

ħaddieħor aljenat għaddej ġmielu

u jien indendel ridt fardal

minflok bandiera imperrċa fuq xi krejn

biex nuri l-qawwa tiegħi

kemm jien battal

u kemm naf nagħmel ħsejjes.

Nixtieq biss li xħin l-irjus itiru

ma nkunx ħdejhom.

Alfred Grech

23-11-2019.

150.

Imqar hawnhekk iż-żmien kien beda jkarkar

Saqajn mingħajr żarbun malajr jittieklu

Bħal meta għażilna t-tnejn it-telgħa ’l-wieqfa

Hemmhekk ħdejn il-fanal fuq il-quċċata

Turġien għoljin id f’id u purċisjoni

Hemmhekk ħassejnas l-fewġġa qed ixxoqqna

U swar ta’ mewġ jimbaram fuqu nnifsu.

Hemmhekk nissieltu bdejna mal-ġiganti

Nogħolew ’l-fuq mis-sħab li beda jkiddna.

Iltqajna mal-allat tal-flus minn wara l-kwinti

Jinħbew, jinxtraw, jilgħabu bil-permessi.

Hawnhekk iż-żmien għaddej bla ma jitniżżel

Hawnhekk stajt toħroġ barra l-linji stretti

U toqgħod tgħix fis-sħab tal-illużżjoni.

Alfred Grech

Sao Martinho Do Porto

09/11/2019

 

F’Għajnejk Is-Skiet Tal-Jum Jiżdied.

F’Għajnejk is-skiet tal-jum jiżdied

U d-dlam tal-lejl jitbiegħed minnu,

Buffura riħ li tnaqqaf qiegħa

Jien ħsibt li stajt immiss is-ema b’idi.

Bħal ajkla bdejt nisseqqer

U nilgħab jien mar-riħ

Iżd’int malajr urejtni kif

Bejn qatra u oħra jitkellem l-univers

U kif bejn vers u ieħor

Il-ħolm ma jaqta’ qatt.

Aktarx li fuq il-ħlewwa ta’ ħaddejk

Tintilef il-qawsalla

U d-dawl ta’ elf mitt kewkba

Li ħaddieħor lanqas jara.

Għaliex imqarr fid-dell tas-sħab

Idellel il-biża’ ta’ xi ħaġa li mhix hemm

Issib sbuħija fir-raxx tal-mewġ

U l-baħar li jinbidel f’poeżija.

Xejn aktar ma jkun fieragħ

Daqs il-ħolm li qatt ma ħlomna

Daqs il-ħajja li qatt m’għexna.

Alfred Grech

19/11/2019

You Are Inimitable.

I did not want to go back

To the days of endless toil

Running into viciois circles and striving after vanity

To see whether  I could fit

Into all the things they said I could fit into.

I wanted to come here

And finish what I started

To discover where wolves breed

And to which point the sharp edges of this precipies

Extend.

Now that I have accepted

That I can have no other god but you

The distance between us

Was needed to discover who I am.

I am like running water

You are inimitable.

Alfred Grech

18/11/2019

Dirġla.

Daqs bejjiegħ tat-toroq

li jbellagħha lil min ikun

u nsir naf għax xhiex ġejt hawn.

Il-qniepen imdendla ma xra għajnejja

idoqqu trapassar għal ħajja eterna

nistaqsi għaliex għamilt dak li għamilt

u dal-ħsieb ikiddni.

Bħal għannej li żmienhu għadda

quddiem folla għatxana għal tweġiba

quddiem udjenza stramba

li qatt ma setgħet tifhem

u ma jkun xejn jekk mhemmx il-melodija

u kliemhu għandu l-għafja tal-mewt.

Dawl tax-xemx u qtar ta’ xita

fil-mergħat u f’dawk l-għelieqi

fejn iwarrdu l-figuri tad-diskors

incidente di percorso.

Bħal kavallier li għadda żmiemhu

pastur tat-tafal jew tal-karta pesta.

Kif ser noħroġ minn dit-toqba

kif ser noħroġ minn dal-ħabs.

Il-pulmuni poeżija tielgħa u nieżla ma kull nifs.

Imqar meta xebbaħtha man-natura

xorta waħda kien hemm l-id tal-awtur.

Jien kont hemm taħt isem ieħor

taħt il-ġilda ta’ kull ma nlissen.

Raxx ta’ baħar u rgħawa tal-mewt

li jaħbat mal-blat.

Bil-fwieħ tradizzjonali u rima qadima

li għandha minn tal-ġrajja tas-snin.

Issa tista’ tiktibli eleġija

f’tarf il-midfen

hemm, fejn joqgħodu jgħannu l-għasafar.

Alfred Grech

17.11.2019