Tebgħa.

Lady Macbeth: Out, damned spot! Out, I say!—One, two. Why, then, ’tis time to do ’t. Hell is murky!—Fie, my lord, fie! A soldier, and afeard? What need we fear who knows it, when none can call our power to account? . . . (Macbeth Att 5, xena 1)

Lanqas l-ilma kollu tal-oċean ma jkun biżżejjed

biex tnaddaf dik it-tebgħa

u għalxejn idejk taħsilhom

u tgħaddi n-nies biż-żmien

bit-teatrini u d-daħliet trijonfali

għax is-sokor biss għall-boloħ

u l-aljenazzjoni għall-ippassjonat

u għal min ma jridx jemmen dak li jara.

L-ebda gabirjola mhu sa tħassar

id-dnub li ma jorqodx.

Int tista’ tibqa’ tżfen

iż-żfin tal-ħallelin

iżda kun af li qed fix-xifer,

pass ieħor u daqshekk,

u karti x’tilgħab ma fadalx.

F’kull żmien jitwieldu l-boloħ

fil-jasar tal-allat

u l-gwejjda qatt ma ntebħu

b’dak kollu li serqulhom.

Alfred Grech

Festa tal-Kunċizzjoni

08/12/.2019

Aħna Rridu Nemmnu

Aħna rridu nemmnu

li wara l-kantuniera

hemm xi ħaġa li tinħass,

inkella jirbaħ biss

id-dlam, ix-xejn, l-abbiss.

Fit-tama ta’ kull meta

Nitkellmu magħna nfusna

Inħossu l-ħjut jiġġebbdu

U r-riħ li jiġi jbusna.

Imbagħad irridu nemmnu

Fuq din it-triq il-wiesa’

Ninsabu taħt il-lenti

Tal-għajn li tara kollox

Biex hekk għad jiġi f’sikktu

 jiddaqqas il-miżien

Għal kulħadd u f’kull żmien.

Alfred Grech

07/12/2019.

 

Xħin Niġi Biex Nitkellem.

Xħin niġi biex nitkellem jien nitfixkel

Għaliex fil-kliem li nlissen qiegħda ruħi

Jien ngħix inħares fiss xħin tħares lejja

U t-tnejn qiegħdin nistaqsu hix it-trejqa

Li twassal sad-desert fiċ-ċpar tal-lejla.

Fuq wiċċek hemm is-sewwa qed jitbissem

Is-sewwa li trid tgħidli ta’bla frilli

F’għajnejk hemm il-parir li qatt ma ħadtu

U f’ismek jiena nqanqal kull taqbida

Mat-tajjeb, mal ħażin fil-ġid u d-deni.

Alfred Grech

06.12.2019

X’Nagħmlu Meta Joqrob Il-Milied.

X’nagħmlu meta joqrob il-Milied?

Meta qlubna jkunu mtaqqla bid-dwejjaq

U bit-toqol tal-imgħoddi?

Xħin nilmaħ lilek ngħid bejni u bejn ruħi

Int tiswa’ daqs il-poeżija

Li nsejt li kelli nikteb

Bħat trab li jtir mar-riħ

Ir-riefnu li jġorr il-weraq

Id-degħxa

Il-ħsibijiet li jirkbu dahar il-friefet

Bħaż-żnażen li jerdgħu il-ward

U mbagħad nistaqsi lili nnifsi

Dak li ridt ngħid

Mil-liema lewn minn tal-qawsalla

Tnissel?

Jonqosni sħaba kien nitla’ fuqha

U nħossni mġedded bħal qaddisin

Biex lanqas nemmen dak li ħadd ma ġarrab

U li għal ħajti kollha ttamajt fih

Jew nirkeb bastiment spazjali

U hekk lanqas int ma bqajt tarani.

Alfred Grech

04/12/2019

Ejja Nagħmlu Bħal Poeti.

Ejja nagħmlu bħal-poeti

Indoqqu l-lira u ngħannu

Filwaqt li Ruma qed tinħaraq.

Ejja nagħmlu bħal Neruni

Insibu f’min inwaħħlu.

Imm’għaliex dan kollu jrid jispiċċa

Met’għadna biss fil-bidu?

Għaliex qed jidher ċar

Li ma kiien hemm tieqa oħra

Minn fejn ngħaddu?

Għaliex ma ltqajniex qabel?

Għaliex iltqajna llum?

Hemm żmien u baħar jaqsam

U l-firxa ta’ kull jum.

Alfred Grech

03/12/20190

Lil Min Jipprova jiddefendi Dak Li Hu Indifensibbli.

(Jew Ahjar lil Minn Jipprova Jgħaddi Lin-Nies Biż-Żmien).

Int taħseb tista’ tibqa’

Jew tgħaddi n-nies biż-żmien?

Kulħadd jaf x’kont qed tagħmel

Għalik fil-qrib it-tmiem.

Dak kollu li kont tinseġ

Tar issa u sarlek suf

Għalxejn tipprova tgħawweġ

Is-sewwa hu magħruf.

Dak kollu li kont tinseġ

U tfassal qabel tlaqt

Ħsibt int li jibqa’ moħbi?

Se jkun magħruf daqwaqt.

Kun af li d-dnub jinkixef

Imqar jekk tibqa’ ddur

Xi toqba minn fejn toħroġ

Mintix se ssib, da żgur.

Tħammiġt mal-kriminali

U ħsilt idejk bid-demm

Ta’ min għawarek kixef

Trid issa titlaq ’l-hemm.

Iss’għidli b’min se tidħak

Inkella tgħaddi ż-żmien

Taf bik id-dinja kollha

Perrċuk ma kullimkien.

Alfred Grech

02/12/2019

Arawhom Ġejjin

Arawhom ġejjin

Qeghdin jikxfukom

min huma l-ħatjin?

Ma smajtuhwiex

l-għajjta tal-kotra

Jaqaw ma tiswiex?

Ikkundannawkom

Mintomx taraw

Minn wara daharkom.

Tħares fejn tħares

kollox mitmum

togħmuha qares.

Kemm intom torox

Għax ma ħrabtux

Kemm intom ħorox?

Mimlija ħtija

Dan huwa ċar

M’hemmx x’tgħid mill-bqija.

Qerq trasparenti

jaħbat m’għajnejk

jidher taħt lenti,

Li mhux magħruf

jekk tħares sewwa

se jkun mikxuf.

Alfred Grech

01/12.2019