Kull Xħin Inħares Lejk.

Kull xħin inħares lejk fil-forma seduċenti

Infittex biss it-trasfigurazzjoni t’elf ħsieb

Bħal barbaġanni kollha għassa

Għax int taqrali moħħi.

Hemm nies li taħbat magħhom

Għax għażla ma jkunx hemm,

Oħrajn li għaddejjin fuq il-bankina

Għax posthom qatt ma kien fil-karreġġjata.

Oħrajn ta’ħafna għażliet

Li trid bil-fors tiżbalja,

Bħan-nies li bla ma taf għaliex trid taħbat magħhom

Għaliex spiċċaw l-għażliet.

Aħjar immut bil-għatx għal qatra

Jekk x’tixrob hemm il-kalċi li toffrili,

Għaliex jekk nidra ngħix bil-għatx

Għad nista’ ngħix għal dejjem.

L-għatx li qed ngħix fih hu biss

l-abbiss mudlam li fih irrid niddendel,

biex b’hekk inkejjel it-telf tiegħi

mingħajr il-paraguni.

U mbagħad, xħin għad immiss il-qiegħ

Insib li l-qiegħ mank biss kien hemm

Għax kollox sar efimeru, simulat u seduċenti.

Jien ngħix dawn il-waqtiet biex ngħanni

Biex ninbex lili nnifsi u ninbex lix-xemx għaddejja.

Għax issa ġie xi jgħidli li fl-imbix

Hemm it-tweġiba ta’ kull misteru

Inkella l-passatemp ta’ dak li jista’ jkun

Bla biss jissarraf.

Int tilaq u tħallini

U jibqa’ biss it-tifkiriet, il-ħsieb u t-tama li għad tiġi,

Jien nibqa’ hawnhekk migħajr ma nirrisondi

Ċ-ċellulari li jivvibra.

Alfred Grech

05/06/2018.

X’Inbidel?

X’imbidel?

imbidlu dawk l-għajnejn li bihom kont inħares.

Inbidlu n-nies li magħhom kont nagħmila,

li lanqas dawn ma kienu qatt biċ-ċiera li tingħaraf

Imbidlet ix-xintilla li kienet tikkargani

biex kull sbieħ il-jum inqum iħares lejn x-xema tixxabbat.

Inbidlet il-ħerqa li biha kont imdorri nagħannqek

u d-dinja ta’ madwari.

Inbidlet kemm il-darba l-fehma

bħalma n-nies tinbidel ta’ kuljum u f’daqqa waħda

bħal meta jitla’ l-ajru.

Inbidel it-tajjeb u l-ħażin u dak li nifhmu bihom,

u kollox ta’ taħt fuq biex lanqas biss jingħaraf għadu.

Jinbidlu ż-żmininiet, , ,

Tinbidel Int . . .

Ninbidel jien , , ,

U x’ma nbidilx?

Ma jinbidilx il bahh ta’ wara l-kwinti,

li minnu ta’ sikwit x’ħin niġi f’tiegħi

inħobb nittawwal,

Alfred Grech

03/08/2018

Kont Qrib Tiegħek.

Kont qrib tiegħek u tbissimtli,

ma kontx naf li għadu tiegħi.

U xħin lura nerġa’ f’dari

irrid ngħix miegħi innifsi.

Kont sabiħa u seduċenti,

ma kontx naf li lsien ta’ lifa:

Kont saħħartni bi sbuħitek

intbaħt x’int malli ftaħt ħalqek.

Ħarist lejja b’simpatija

sibt, minn wara kont tilgħabni.

Tawwalt idi biex neħilsek

u int weġibt b’daqqiet ta’ ħarta.

Xejn ma jiswa’ l-kliem bħal xmara,

it-tżjin u kif tpoġġiha,

għax bqajt nagħaqad dawra waħdi

f’dan il-limbu tat-tpattija.

Tkun kretin jekk tibda’ temmen

fit-tjubgija ta’ kull ħlejjqa.

Hemm dagħbien li jirrispondi

biss għall-ħażen tal-abbissi,

u fil-wiċċ tal-ilma qiegħed

boċoċ t’arja trasluċenti.

U għahekk ħallini ngħixha

din l-efimera illużżjoni,

b’dan il-mod ħallini naħseb

li qed ngħix aħjar il-ħajja.

Ilsna ġodda trid tagħllimni

sabiex ngħix  mingħajr ma nbati.

Alfred Grech

03/-6/2018

U Jiena Noqgħod Hawn Irrid.

U jiena noqgħd hawn irrid

biex nemmen li dit-tbatija kollha,

żeblieħ u qtigħ il-qalb u kull ħsara oħra,

huma meħtieġa sabiex iseħħ is-salvazzjoni.

U jiena noqgħd hawn irrid

 akkolta ubbidjenti

nerfa’ s-salib, inġorr ix-xema

u nimxi wara l-purċizzjoni tal-fidilii

li jobdu l-liġi u jħallsu t-taxxi

u  jemmenu bla jaraw,

sabiex inkun tassew jien ċittadin tas-saltna.

U jiena noqgħod hawn irrid

nilqa’ għall kull tħaġġir u l-vleġeġ tal fortuna,

u nemmen li dan kollu jgħin

sabiex isseħħ is-saltna.

U jiena noqgħod hawn irrid. . . .

Alfred Grech

02/06/2018.

Tiftakarnix.

Tiftakarnix dak l-anġlu ta’ bla ġwienaħ li jixxabbat mal-pilastri,

li xaba’ jistenna u bejn disfatti u dak il wiċċ ta- kull filgħaxija qed jistenna

sakemm tintefa’ x-xema biexi x-xewqa timmatura

u filgħodu lill-xulxin insellmu.

Tiftakarnix ta’ kull filgħodu ħiereġ niġri nikkumbatti l-fama odjuża

li kull darba nasal tard

u lanqas biss insib il-ħin biex insellimlek.

Ftakarni jekk trid

bħal dak l-għasfur itir u jmur il kontra

ta’ fejn tkun sejjra l-qtajja

għax qatt ma seta’ jsib il-bejta li wennsithu.

Kien hemm sbuħija affaxxinanti fil-muta tiegħek

kull mata nistaqsik xinhu li qed jdejjqek

u għalik il-kliem kien sar biss tpartit bil-waħda għal waħda.

Jien kont dejjem miexi fl-għada

waqt li llum kien biss il-wegħeda

tal-mewġ li kien iħabbat ma sidirna u ġej kontrima

mingħajr ma javża, mingħajr stedina.

Imbagħad komplejna l-vjaġġ li kien vjaġġ wieħed

il-bogħod minn xulxin u f’direzzjoni kuntrarja

fix-xewqat li qatt ma twettqu

fil-miri li qatt ma seħħu.

Tiftakarnix il-falliment ta’ loġika li qatt ma fihmt

u qatt ma ħaddant mal-bċejjeċ imxerrdin madwarna,

għax int bil-mod il-mod bdejt tisparixxi u toqrob lejn ix-xefaq

imdawwra b’ħafna ċpar li bil-mod il-mod kien beda jostrok.

Alfred Grech

01/06/2018

Jien Għadni Nistennik.

Jien għadni nistennik li tiġi

riekba ż-żiemel tal ġwienaħ bajdan

tintilef ġewwa s-sħab ta’ xi tifkira.

Stħajjilt li smajt il-għana fgat li ġej minn wara l-kwinti

imbagħad il bikja solitarja ta’ lupu mġewwaħ.

Tibqax iddur u tfittex fuq ix-xefaq

lil hinn mix xefaq hemm il-baħħ

hemm biss il-preċipizzju,

għax għad tispiċċa teħel fit-tajn t’għadira mdardra.

Il-ferħ ta’ ġenn li jtik  

ikun il-mess tal-kordi

ġewwa sidrek minn dak li ħabbek.

Lili ma ħallejtli ebda munita li tissaraf

fuq din l-art.

Forsi għad issir tad-deheb f’xi pajjjiż ieħor.

Alfred Grech

31/05/2018

Inti Li Ta’ Kull Darba.

Inti li ta’ kull darba tistaqsini,

Int ma jonqsok xejn għajr it-tmellisa

Li tħalli l-marka tagħha għal dejjem.

Int taf sew li dak li lilna t-tnejn irid jgħaqadna

Ikollu s-sens ta’ telf u sens  tal-biża,

U dak li lilna t-tnejn iżommna minn xulxin imbiegħeda

Velenu  nixorbuh kull  filgħaxija

Sabiex ninsew li għada xorta jisbaħ.

Int sirt taf bħali

Li din il-logħoba tal-imħabba

Hija wiegħda li żżomm ħajja

Fuq il-ħjut li tħit il brimba,

Hi biss akrobazija aljenanti

Biex nagħmlu bħalma jagħmel qed ħaddieħor

Biex inżomm l-fjamma ħajja.

U jiena kont ekwilibrista sa mill-bidu

Li nogħoġob lil kull naħħa tal-udjenza

Int ridt li tkun fit-tarf tal-mina u hemm se tibqa’.

Irrid inżomm idejk waqt li qed naqdef

U ħafna drabi jkun in-nuqqas tiegħek

Li jġiegħelni nimla l-baħħ fl-abbissi ta’ ruħi.

Alfred Grech

31/05/2018