140

Aħna li saħansitra bħall-profeti

Bassarna dak li llum kulħadd qed jara,

Inħażżu saqaf ġdid f’kappelli qodma

Virtu’ li minnha ħarġu ħafna vizzji,

Il-qirda tas-sabiħ u dak li nafu,

Li flokom iffullaw il-mostri mxajtna;

Aħna li sibna ruħna ngħixu f’qatra

Li darba kienet ċara u traparenti

Li minnha stajt tittawwal qisek b’lenti

Tiffoka biex tiċċara li hu sewwa;

Aħna li qed nibku u qed nitniegħdu

Niftakri ż-żminijiet u nirriflettu

Dak li ma kienx, li hu, li seta’ ġara

F’dan l-olokawst ta qirda ta’ bla ħniena.

Alred Grech

05/11/2018

Spekulaturi.

Dawn huma vittmi  stess tal-ftahir taghhom

li jtajjru minn fejn jgħaddu biss duħħan

dawn huma l-marjunetti ta’ bla ħabel

li jiżfnu ż-żifna tqila b’pass kajman.

Profeti dawn li għad iridu jħabbru

ġejjieni jfewwaħ mimli ward u żgħar

iħarbtu fejn jaraw b’tifsila ġdida

mutur li jibqa’ jkisser lejl u nhar.

Dawn huma r-rispettabbli tal-vanġelu

li jgħabbu qatet tqal fuq dahar in-nies,

Ma jiswa’ xejn li ngawwdu l-pajżaġġ tagħna

Għax huma jibqgħu jagħmlu flus bla qies.

Alfred Grech

04/11/2018

L-Infinit.

Mal-gawwi li jisseqqer

u jgħasses l-ilmijiet

u jnaqqas bil-krib tiegħu

il-baħħ tas-solitudni

il-bogħod bejn mewġa’ u oħra,

hekk int u jien noqgħodu hawn nissemmgħu

għall-għana tad-denfil

mhux biex innaqqsu l-bogħod li hemm bejnietna,

Iżda, biex nifhmu aħjar l-għanjiet ta’ nżul ix-xemx

u t-tpespis minn taħt l-ilsien

tal-kwiekeb illi jdawwlu

kull lejla ta’ bla qamar.

Fid-dlam tal-lejl ma nara xejn

noħlom biss lilek

kull meta tersaq lejja

inħossni noqrob kull ma jmur

lejn l-infinit

l’aktar issa,

li drajt ngħixu ta’ kuljum.

Alfred Grech

03/11/2018.

Dan Hu Jasar.

Dan hu l-jasar li tipposa

jew tiftaħar b’ħafna lwien

l’għandek xogħol isserraħ rasek,

jew li tilbes l-aqwa lbies

ittimbrati għax jiswew.

Dan hu l-jasar ta’ min jaħseb

illi qiegħed fuq l-oħrajn

jew li għandu ħafna x’jonfoq

kemm irid u fil-kapriċċ.

Dan hu l-jasar ta’ min jaħseb

li ħaddieħor hemm għalih

jew li jemmen lil xi ħares

hekk se jżommu fuq saqajħ.

Dan hu l-jasar ta’ min b’moħħu

ma jridx jaħseb, jibla’ biss,

ta’ min lanqas jieħu nagħsa

jew li żgur ma jqumx ta spiss.

Dan hu l-jasar. . . .il-jasar tal-lum.

Alfred Grech

02/11/2108

Le Jien Miniex Imdorri.

Le jien miniex imdorri

li nkun fotografat,

Inkella noqgħod nisma’

li fuqi qed jingħad.

Imdorri niġri waħdi,

fuq xtajta jew fuq sur,

indur mal-plajja kollha

biex nara kif immur.

Nittajjar u bla ġwienaħ

jew nixref fuq xi rdum,

duħħan is-sensazzjoni

jew l-għabra ta’ kuljum.

Kull meta tiġi ħdejja

Imwieżnek fuq l-idejn,

nistaqrrlek l’int sabiħa

tistaqsinix għalfejn.

U noqgħod miegħek nilgħab

bħal meta konna żghar

il-logħob tal-innoċenti

li jderri mqar lill-kbar.

Alfred Grech

01/11/2018.

Il-Lejla Ma Ġejt Xejn.

U nibqgħu nittamaw li għad xi darba

lnsibu jiena u int l-imkien u l-waqt.

f’xi lejl ta’ skiet bla qamar u bla kwiekeb

ninfexxu nħarsu t-tnejn f’għajnejun xulxin.

Iżd’inti mhux lakemm tiftiehm miegħek,

inkella taqbdek f’wegħeda u tgħid xi trid,

fittixtek fl-isqaqien tar-raħal kollu,

jew taħt id-dawl inemnem tal-fanal.

F’dil-lejla ta’ bla kwiekeb u bla qamar,

stħajjiltek li trid tkebbes il-fuklar,

hawnhekk iltqajna t-tnejn għal-kemm il-darba,

illum id-dawl fuq wiċċek qed jisfar.

Ħassejtni bħallikieku kont xi għama

ifittex il qawsalli qalb ir-raxx,

il-lejla ma ġejt xejn u xejn ma ġara,

u bqajt ma kebbistlix imqar musbieħ.

Alfred Grech

31/10/2018

Ninxteħtu Bilqiegħda.

Ninxteħtu bilqiegħda fuq l-għatbet il-bieb miftuħ tal-inċertezzi,

ta’ xemx li qatt ma tinżel wara x-xefaq għax jiltewa

u nimxi ma xulxin f’pellegrinaġġ li jrid jgħaddina minn bieb għall-ieħor

tferfer ġwenħajtk bħall-anġli tas-smewwiet

bejn ibħra u sema li ma jiltaqgħu qatt.

Bħal l-pendlu mbagħad indur jien fuqi nnifsu biex

nurik li d-dinja tassew tonda.

Jien għad niltaqa’ miegħek  max-xatba ta’ lilhinn

għaliex il linja li tifrida hija l-linja

ta’dak li jidher u dak li ma jidhrix

isserraħ fuq l-ixfar iktar il-bogħod minn kull konfini

li jħawwad il-ġejjieni

biex jerġa’ mbagħad jistrieħ fuq xtut indifferent

bħal meta wieħed joħlom it-tifkririet inkella l-biża’

ta’ dak li jista’ jiġri.

Id-dell li nħallu jiena u int ikun id-dell rifless mal-ħitana tal-infinit

u mfisser biss bis-sillabi mislufa

minn kull kelma mistħajjla

fit-tifkiriet tal-bieraħ

u tħabbir ta’ dak li jista jiġri.

Alfred Grech

27/10/2018