Sant Ivo 2019.

Diffiċli toħroġ minn dal-ħmar il-lejl

U terġa’ għal għonq it-triq mingħajr tbenġila

Il-ħerba kbira wara t-terrimot

U l-pjazez iffullati.

Il-bini ġġarraf u t-toroq imblukkati

Bil-letarġija li ddoqq il-ħornijiet

Tal-vetturi ġġamjati.

Diffiċli toħroġ minn ġo dal-isqaq

Id-dħaħen qed irossu

Il-bini għoli li għattielna x-xemx

Bed’issa biex jiltewa.

Issa hawn l-inkwinament

Ta’ min eżilja ruħu

F’isem dil-bużżieqa li tintefaħ

U t-tpartit tal-wirt qaddis

Mal-bliet u rħulna fejn nitħalltu

Fis spazji miftuħin, ġo msieraħ aċċessibbli

Fejn jieħdu ħsieb it-tfal l-kbar

U l-ħwienet freneżija.

Għax hawn il-ġmiel, għax hawn il-flus

Għerqna fl-affkuwenza..

Diffiċli toħroġ minn dal-ħmar il-lejl.

Alfred Grech

17/12/2019

M’hemm xej stidjat.

M’hemm xejn studjat

U jista’ jkun li kollox tar mar-riħ

U jista’ jkun li kollox simulat

U l-ħolm li ħlomnal bih.

Jekk tħares lura hemm biss ix-xefaq.

M’hemmx ebda paradimmi

M’hemm ebda pjan divin

Hemm biss pajjiż imfarrak

Bl-irdieħ ta’ ħafna snin.

Il-katavri ta’ dawk li ma stembħux

U dawk li jġu lura.

Hemm biss konflitt

F’kull min biswit

U gradi spritwali

Kanċelli tal-ħadid.

Minflok isaltan id-duħħan

Is-sħab tas-sema mqit,

Mhemm xejn, hemm dagħa

Kliem faħxi f’dat-tiċrit.

Alfred Grech

16/12/2019

Moloch.

X’għadek tistenna

kif  għadek hawn?

Żmienek iss’għadda

tidħak mhux b’dawn.

Kemm qed tistona

fost dan l-uġiħ

trid tibqa’ mdendel

tperper nar-riħ.

Trid tibqa’ mdendel

ma dan l-għanqbut

man-nasba ’l-kbira

u x-xbiek meħjut.

Trid tibqa’ mdendel

ma dan l-għanqbut

fil-ħmieġ tas-setgħa

u l-ħalf misħut.

Kemm se ddum tnewwaħ

ġej bit-tkarkir,

kullħadd intebaħ

fallejt bil-kbir.

Aqbad u itlaq

iss’itlaq fis,

tistrieħ u sserraħ

lil dal-pajjiż.

Alfred Grech

15/12/2019.

Għaliex Triduhom Jisktu?

Għaliex triduhom jisktu?

Min jista’ jżomm il-ġgajta?

Jekk jinxef għad ilsienhom

Il-blat jirbombja l-għajta.

Għaliex triduhom jisktu?

Jekk tafu kontra s-sewwa

Ma tiswa’ l-ebda saħħa

U lanqas ebda dnewwa.

Għaliex triduhom jiskru?

L-ingassa qed tissikka

Għalxejn dan it-teatru

U l-manuvrar tal-klikka.

Is-sewwa għad-dawl jinħareġ

U lura minn fejn ġejna

Ftit ftit il-moħbi nkixef

U jidher ċar f’għajnejna.

Alfrd Grech

11/12/2019.

Dawk Ġew.

Dawk ġew

Ħadulna d-dawl

Kull sens ta’ direzzjoni

Hawn baqa’ biss id-dlam, id-dell

Hawn biss deżolazzjoni.

Dawk ġew u ħadu t-tmun f’idejhom

Tal-mirkeb f’nofs il-ħalel

U lanqas jafu fejn sejrin

Mill-kwiekeb għall-istalel.

Kaptana mingħajr boxxla

Jgħidulek: ejja magħna!

U issa għattew ix-xemx

U dallmu l-ġranet taghħna.

Alfred Grech

10/12/2019

U din Bħal Ħolma Kerha.

U din bħal ħolma kerha

bħal ħmar il-lejl li jagħti

li kull min jiġi wara

u jiret il wirt ta’ min idejħ iċappas

bil-ħmieġ, bit-tajn. bid-demm

u jkollu jġorr it-toqol li mhux tiegħu

iżda li minħabba li d-dnub li ma jorqodx

iżur u jibqa’ jżur  għal kemm

il-ġenerazzjoni.

U dan bħal laqam li titwieled bih

ma tagħżlux int li xejn ma taf

kif ġejt ġo dil-familja

u kif u għala għandek iġġor

dan l-għelm li qed ikiddek

u jixlik quddiem kulħadd.

Alfred Grech

09/12/2019.

Tebgħa.

Lady Macbeth: Out, damned spot! Out, I say!—One, two. Why, then, ’tis time to do ’t. Hell is murky!—Fie, my lord, fie! A soldier, and afeard? What need we fear who knows it, when none can call our power to account? . . . (Macbeth Att 5, xena 1)

Lanqas l-ilma kollu tal-oċean ma jkun biżżejjed

biex tnaddaf dik it-tebgħa

u għalxejn idejk taħsilhom

u tgħaddi n-nies biż-żmien

bit-teatrini u d-daħliet trijonfali

għax is-sokor biss għall-boloħ

u l-aljenazzjoni għall-ippassjonat

u għal min ma jridx jemmen dak li jara.

L-ebda gabirjola mhu sa tħassar

id-dnub li ma jorqodx.

Int tista’ tibqa’ tżfen

iż-żfin tal-ħallelin

iżda kun af li qed fix-xifer,

pass ieħor u daqshekk,

u karti x’tilgħab ma fadalx.

F’kull żmien jitwieldu l-boloħ

fil-jasar tal-allat

u l-gwejjda qatt ma ntebħu

b’dak kollu li serqulhom.

Alfred Grech

Festa tal-Kunċizzjoni

08/12/.2019