Nagħlqu L-Bieb.

U nagħlqu l-bieb għal dan ir-repertorju

ta’ taqlibiet ta’ dak li nħass tassew biex jibqgħu biss  

l-effervexxenza ta’ ragħwa u bżiezeq jibbrillaw

u jfaqqgħu f’wiċċċ it-tazzi tax-xampanja.

Irridu nibqgħu għaddejjin f’dal-vjaġġ bla ritmu

sakemm insibu l-oasi li jmiss

jew l-istazzjon tal-ferrovija

u ngħoddsu t-tnejn mill-ġdid fil-baħar tal misteri

biex niġbru l-frott li jixirqilna.

Int oqgħod hawn stenieni fuq dil-blata

għax jien għad niġi ħdejk bil-qabda l-kbira,

Jien nerġa’ nduq tingiż is-sensazzjoni

u int tnewwili l-platt taz-zalza taħraq.

Għalina jista’ jinżel għal darb’oħra

tas-sena li għaddiet separju ieħor

biex fuq il-friex tal ferħ u s-sagrifiċċju

nindifnu mal katarvri ta’ ħajjitna.

Alfred Grech

31/12/2017

Ċpar.

Il-lejla waqa’ ċ-ċpar tad-dnub bejnietna,

Xħin tistedinni bdejt biex nidħol aktar

Il-ġewwa qalb il ħmura ta’ fl-għaxija,

Fejn hemm il qtigh in-nifs tal-għera t’għada.

Int xtaqtni wkoll nintilef fil-misteri

U d-dubbji li tħallili r-rima tiegħek,

Duħħan li jġorr ir-riħa tal-passsjoni

Duħħan l-irdum fit-tarf ta’ xifer minsi.

Ma jiġri xejn jekk nidħol għal darb’oħra

fix-xejn tas-sensazzjoni u l-irtubija.

Il-molla li tikkarga ragħad u beraq

Hi terremot lilhinn mix-xefaq tiegħi.

Kull meta tgħid li mqar trid tisma’ leħni

Inħossni tiela’ l-fuq u nieżek l-isfel

fl-intensit’ tiddennes fiċ-ċpar tiegħek.

Alfred Grech

29/12/2017

Joħolmu L-Ippopotami.

Joħolmu l-ippopotami u jinżlu jirgħu l-anġli

F’din l-għadira t’ilma qiegħed

Fejn int u jien noqgħodu nirriflettu

X-xbieha antika taghna stess

U nitpaxxew b’dak li naraw

Inkella bli jgħidulna dawk li jindukrawna.

Bħal ward ilellexqrib it-tarf

Mnejn jgħaddi l-ilma rifreskanti

Noqgħodu nishru f’dan il-wied tat-tempji

U mbagħad nitħassru lilna nfusna jew nitħassbu

Fuq il-misteri katalogati.

Bħal kewkba inti tpetpet u lanqas trid titħarrek.

Xi minn daqqiet ibillu griżmejhom iċ-ċentawri

Li jitfaċċaw mill-boskijiet mudlama

Biex jagħllmuna kif infiequ

Mill-weġgħa ta’ kulljum,

Inkella nagħarfu ngħixu biha

U b’hekk insiru għorrief inkella mitoloġiċi

Wisq iktar milli aħna.

U xorta waħda jitfaċċaw il-kukkudrilli

Lesti jibilgħu il-ħrejjef li jħarrfu dawk tas-setgħa

U għax aħna mansi fi drawwietna u f-dak li nemmnu

Jiċċirkundawna biex nidħlu aħna wkoll fil-merħla tagħhom.

Wara dawk il-par għajnejn u l-par xofftejn

Mhemm xejn, hemm univers mistur.

Jien ridt inkun bħal warda li tiċċassa

Imsammar maż-żegliga li tiżżegleg

kull meta lejja tersaq

b’xufftejk imbexxqa.

Alfred Grech

28/12/2017

135.

Ħajjartek biex flimkien inkebbsu l-fjamma.

Int għedtli li hawnhekk kullħadd ikebbes

In-nar tiegħu. Il-ksieħ jiffriża kollox,

U jmewwet it-tamiet ta’ bosk iħaddar.

Illum erġajt ilmaħt ix-xbieha tiegħek

U deherli li sirt isbaħ minn kif nafek,

Minn meta mort staħbejt fiċ-ċpar tal-għada,

Bdejt tgħib qalb id-duħħan ta’ li staqsejtni.

Kont għedt jien raġel stramb u jien ħassejtni

Qed negħereq fid-dagħbien li hemm fil-mera.

Imbagħad ġejt wiċċ imb’wiċċ mal-fehema tiegħek,

U sibt il-qiegħ, sibt qiegħ fond aktar minnu.

Fil-bogħod li hemm bejnietna x’seta’ nbidel?

Hux int, inkella l-mod kif bdejt inħares.

Alfred Grech

27/12/2017

Ilni Nħossni Hekk.

Ilni ma nħossni hekk imdendel

fil-vakwum ta’ moħħ jegħereq fil kranju mdallam

fil-labirint tal-iqsar ġranet, fil-festa tad-dawl,

fit-twelid mill-ġdid tal-innoċenza

ninħela ta’ kuljum fil-logħoba eċċitanti tal-kotra,

u l-ġiri sabiex ngħix in-narrativa biex ninsa lili nnifsi.

Imma issa f’dan iż-żmien ta’ ħemda u riflessjoni

tqum weħida l-mistoqsija

għaliex bilfors irrid inkejjel is-sħab tas-sema

inkella ngħum fix-xmara tas-silenzji u tal-istorbju

noħloq il-ħrejjef tat-tfulija

u ntenni għall-darb’oħra grajjiet qodma

u nsir jien ukoll attur u wieħed mill-udjenza f’daqqa.

Did-darba ma rridx li nkun jien wieħed minnhom

li jidħqu meta jiġi min iħarref ħrara differenti

jibdew jgħadduh biż-żmien għax din hi t-tajba

u jinsew li l-ħrafa tagħhom trid titwemmen

bħal kull ħrafa oħra.

Le aħna wkoll irridu mmissu s-sema

nitilgħu fuq olimpu

inkella waqt xi xena skonsolanti

jidhrilna l-anġlu ġiegħalina

biex jagħtina l-bxara t-tajba.

Alfred Grech

26/12/2017

Jekk Jien Ma Ntikx Il-Bixra.

Jekk jien ma ntikx dil-bixra,

Ma tista’ tidher qatt

U ħsiebi jibqa’ sejjer

Ma kull ma jkun inħatt.

Int tibqa’ tgħidli u tgħidli,

U jien ma nitkellimx

Nisimgħek bil-paċenzja,

Il-kbira, għax ma nifhimx.

Jien laqnas biss baqgħali

Kliem x’ngħidlek, immutajt,

Biss noqgħod hawn nisimgħek,

Biex ma tgħidx li skartajt,

Mintix tinftiehem lanqas,

Fin-naħħa ta’ dan il-wied,

Dallamtli l-ħsieb ta’ moħħi,

Imlejtli qalbi swied.

Illum mintix tifhimni

Imm’għada aktarx li tqum

Mid-dlam tal-inkoxxjenza,

Tintebaħ bla ma ddum.

U tinsa’ n-narrattiva,

U tinsa t-tixbiħat,

Titpaxxa bla ma tindem,

Fuq l-għolja tal-allat.

Alfred Grech

26/12/2017

Kull Meta Taqa’ Fuqi.

Kull meta taqa’ fuqi,

dil ħemda filgħaxija,

inħossni qed fil-limbu,

ninġarr fl-anestesija.

Intir fuq sħaba bajda,

intir il-fuq fis-sema,

u nisma’ mewġ il-baħar

u r-ragħġwa qed jinġema’.

U  nħossha fuq ilsieni,

it-togħoma ta’ li baqa’,

u nħossni qiegħed miexi

fuq xifer bla ma naqa’.

Qed ngħix għal dil-ġurnata,

mingħajr  ma jasal għada,

u lanqas ngħodd il-bieraħ

u ninsa’ ż-żmien li għadda.

Kull meta taqa’ fuqi

Il-ħemda ta’ f’l-għaxija,

inħoss li qed ngħix issa,

qed ngħix, mija fil-mija.

Alfred Grech

24/12/2107.

Jien Nafek Fit-Tempesti.

Jien nafek fit-tempesti

Fil-ġiri ta’ kuljum,

Inkella fis-sorpriża

Li tiġi bla ma ddum.

Mil-kliem li lanqas tlissen

Kull meta missek ġejt

Kull meta tieqaf, tiskot,

U tkompli fejn ħallejt.

Sirt nafek qalb il-folla

Inkella f’nofs il-fil

Ta bejn id-dawl u d-dalma

Fil-bidu ta’ lejl tqil.

Fil-ħin li jrid jiskappa

Difrejn il-jum u l-lejl,

Għarwiena, kollok dubbji

Fil-fond ta’ qiegħ bla kejl.

Hemmhekk fl-imħabba tiegħek

Hemmhekk fejn ma tarx

Hemmhekk fejn lanqas tisma

Tkun trid u ma tistax.

Alfred Grech

23/12/2017

M’hemmx Agħar Minn Din il-Kesħa.

M’hemmx agħar minn din il-kesħa,

Il-kesħa ta’ ġol-qlub,

Il-ħemda sfat mifruxa

U tolqot bil-maqlub.

M’hemmx aktar fejn tmur tista’,

Lil hinn minn dan iċ-ċint,

Għax waslet sa qiegħ ruħi

Imqar jekk ma tkunx int.

Waqajna t-tnejn fil-muta,

Inħarsu lejn xulxin,

Fil-muta ta’ bla kelma

Għarwiena w imkebbin.

Kull darba li niltaqgħu

Inħarsu lejn xulxin,

Int lili sewwa tifli

U nibqgħu għaddejjin.

Alfred Grech

22/12/2017

Eternita’.

Int bħall-eternita’ fix-xejn ta’ lejla,

Gwardjana solitarja ta’ dat-tempju,

Bdejt tfesfes is-sigrieti ġo widnejja

Fud-dlam tal-lejl kull moħba saret xempju.

Erġajna sibna abbiss ta’ sofferenza,

Eternita’ ma wiċċna tilluppjana,

Eternita’ fiż-żwieġ tax-xemx mal-baħar

Eternita’ f’kull waqt li huwa tagħna.

Alfred Grech

21/12/2017

X’Gejt Infittex f’dil-Maxtura.

X’ġejt infittex f’dil-maxtura?

Ġejt infittex ma nafx xhiex,

Ġejt infittex lit-tarbija,

Lit-tarbija ma sibtiex.

Hawn ix-xejxi, hawn il-fidda,

Hawn id-deheb u hawn l-ilwien,

Hawn id-dawl  u mhux idawwal,

Xewqat sbieħ ma kullimkien.

Ġejt infittex ħafna ħwejjeġ,

Ġejt infittex ma nafx xhiex,

Ġejt inħaffer fil-baħħ tiegħi,

Dak li jien, dak li miniex.

Li stajt kont u li baqgħali,

It-trehid tal-univers,

Biex inqabblu mal-polz tiegħi,

Insir naf kemm jien divers.

X’ġejt infittex f’dil-maxtura?

Li kont nagħmel fis ħallejt,

Ġejt hawnhekk infittex l-hena,

Jew ma nafx hawn għalfejn ġejt.

Alfred Grech

21/12/2012

Tkellimni d-Dehera Tiegħek.

Tkellimni d-dehera tiegħek

Tkellimni b’mod distint,

Il-par għajnejn li jinfdu

U kollok int kemm int.

Il-forma, t-tondjaturi

It-tul u l-wisa’ strett,

M’hemmx żejjed lanqas nieqes

Għax kollox hu perfett.

Int wild l-allat t’olimpu

U tqawwi ferħ ir-ruħ,

Int friska fl-armonija,

Qalb ġnien ta’ ward ifuħ.

Min int qatt mhu se tgħidli

Intix ħolqien il-għatx,

Inkella fissazzjoni

X’ħin ġejt għalik ma bagħattx.

Imbagħad tissorprendini

Titfaċċa minn x’imkien

Taħsadni u lanqas nibqa’

F’sensija u naf min jien.

Laqtitni d-dehera tiegħek

Għalkemm bqajt ma nafekx

Ninnamra ma sbuħitek

Imqar jekk ma nilħqekx.

Int biss is-simetrija

Tal-qalba tagħtti x-xtur

Inkella simulakru

Li jqarraq b’kull ma jmur.

U bdiltek ma kull waħda,

Naħsibha li tkun int,

Din biss hi fissazzjoni,

Ma nafx jekk iġġennintx.

Alfred Grech

20/12/2017

Avvent.

Kulħadd jistenna qiegħed

Min jaf x’inhu jistenna?

Imma jistenna,

Għax ħadd mhu qed bi kwietu.

Jien illum nistenna t-tmiem

Għax wara t-tmiem ma jibqa’ xejn.

Hu l-milja ta’ dak kollu li ġie qabel

U warajħ tistenna xejn.

Jien illum nistenna t-tmiem

Għax warajħ hemm biss il-baħħ

Il-baħħ mistur li hemm ġo fija,

Il-baħħ tal-qiegħ li huwa jien.

Alfred Grech

20/12/2017

Webbiltni U Ma Tiġix.

Imqarr jekk jibnu t-torrti ta’ babel

Wiċċek ma jisfreġjawħx,

Għax nerġa’ niġi hawn f’dir-roqgħa  art għammiela

Li tibqa’ tħaddar bl-għaks tal-arja mniġġsa

Biex fiha nerġa’ nħoss il-ħerqa tal-istennija.

Dan hu Milied li rrid jien ngħix

Għal dak li jrid jitfaċċa.

Hawnhekk iddur iddur madwarek

Inkella miegħek stess

U tara x-xefaq bla konfini,

Pjaneta fl-oċean tal-konswetudni.

Ninħaraq jekk webbiltni u ma tiġix

U jista’ jkun ukoll li hekk jaqbilli

Għax fl-aħħar nista’ nisma’

l-għana tal-anġli, jew leħen is-skiet.

U jekk ma tiżboħx is-siġra bi ftit dwejjaq

Il-ferħa lanqas ma jiswa’

Alfred Grech

19/12/2017

Imewweġ Il-Baħar.

Imewweġ il baħar f’għajnejk

u dik ir-ragħwa li tiżbroffa

hija l-kelma ta’ qilla ridt tgħidli.

Ir-raxx ma wiċċek jikteb sinfonija

ta’ lwien kristallizzat fuq il-qawsalla ta’ħaddejk,

imbagħad taraħ qed jiskot.

Kull meta jitla’ l-ajru jien nistaħba

sa meta terġa’ tiġi ħdejja tistaqsini:

X’ġara?

Ma jkun ġara xejn

għajr li ħin bla waqt tkun ġiet buffura

u jiena ma bqajtx aktar naf min inti.

Alfred Grech

19/12/2017

Int Bħali Donnok Tilgħab.

Int bħali donnok tilgħab

Bl-ispazji trasparenti

Fid-dawl ta’ qamar kiebi

Fuq bjut inkandexxenti.

U bħali tħoss kull wesgħa

Qed titlef il-konfini,

U moħħi jibda jgħidli

B’kull xrara li tiġini.

U nħossok li qed tara

U tħares ġewwa fija

U taf dak li qed naħseb,

Kull xewqa tiġri bija.

U nħossok qed titbiegħed

U terġa’ tiġi lura

Kull darba trid tfakkarni

Is-sens ta’ kull figura.

Is-sens tal-eżistenza,

Bħal min kien qed jistenna

Bla waqt, bla ħin, il-fehma

Bħal min irid jithenna.

Alfred Grech 18/12/2017

Il-Ħrafa li għext Jiena.

Din tiftixa għal ħaġa li mhix hemm

tqanqil ta’ dak il-ħin

bħal-logħob tan-nar ta’nhar il-festa

bl-irdieden iduri ġigġifogu

jistednuk għal kutrumbajsi ta’ ħmar il-lejl.

Din tifsila li ntraċċjajtha għall-kemm il-darba

il-molla li tiskatta l-għatx ta’ dak il-ħin

imbagħad tintreħa.

Jien ma xtaqt qatt nidħol f’dawn l-isqaqien

imm’issa li sibtuni

kxift idejja

jew nidħol fil mogħodija mballta

bil-passi tagħkom

u ta’ dawk li ġew qabilkom.

L-aħħar ħrafa li kelli nirrakkonta

kienet il-ħrafa li għext jiena.

Alfred Grech

17/12/2017.

Imissek Kont Taf.

Imissek kont taf li ma kienx hemm xaba’

Jew hena xħin jinżel is-separju

U tkun ħlejt sal-inqas qatra

Tal-ħeġġa li kellek.

Mintix kuntent bir-riżultat

U stajt minn qabel ma twebbilt

Kont tafli din hi ġrajja wisq tixxiebaħ;

Li dal-perkors kien biss ta’ dak il-ħin.

Imissek kont taf li din hi ġirja għalxejn,

Kienet immirata lejn tmiem li ma kienx hemm,

Bersall evanexxenti.

Għariba, għariba wisq din it-tagħlima,

Dis-sensazzjoni f’dan l-eklissi li xejn ma jagħtti.

Issa qalbek sewda, ballun mifquh

Ma dawk li marru jfittxi

Ikona li mhix hemm,

Issa issib rih sħun qed jonfoħ fi qlugħ mitluqa,

Biex forsi titlaq tiġri.

Alfred Grech

16/12/2017