Immakulata Kunċizzjoni.

Titwieled mingħajr tebgħa oriġinali

U tgħid li tista’ tifhem dal-misteru;

Bħal meta ninżel għarkubtejja u ngħidlek:

Inħobbok, iżda qiegħeda tissikkani.

Għaliex l-imħabba tfisser li nkun ħieles.

Int tgħid li tifred trid l-uġih tal-ġisem

Mir-ruħ li tħares ’l-hemm minn dak li tara.

Xħin ma jibqgħalix ħajra nfisser xewqti,

Il-waħx tax-xejn u l-baħħ f’sensija jġibni.

Xħin jaqgħu waħda, waħda l-barrikati

Tas-sens komun, ta’ dak li naf, ta’ moħħi,

Mhu se ssib xejn, ma ssib ebda avversarju.

Għax jista’ jkun ukoll li hemm il-ħtieġa

Li nħalli d-dlam ixoqq ir-ruħ biex nifhem

Kif jien m’għadnix inħoss il-ħtieġa tiegħek

Għax naf li qiegħda hemm, qed tistennieni;

Inkella tiġi miegħi kull fejn  nieħdok

Sat-tarf ta’ din it-triq li qatt ma jasal.

B’hekk stajt insib il-qiegħ tas-sabar tiegħek,

iI-qiegħ li jagħjjat ieħor idlam minnu.

Alfred Grech

08/12/2017.