Kemm Hu Sabiħ.

Kemm hu sabiħ li jkollok il-jum kollu,

Biex tista’ ddur u timraħ f’oqsma kbar,

Ta dan il-wileġ fejn m’hemm xejn xi jżommok

Jew jimbuttak biex terġa’ lura d-dar.

Mal-qtar tax-xita, r-raxx tal-baħar mielaħ

F’għajnejja l-beraq ta’ kull ħsieb spuntat,

Li jrid jimmarkara u min fejn jagħaddi jqanqal

Sa minn għeruqu,s-sewwa pprogrammat.

Kemm hu sabiħ mingħajr appuntamenti

Il-ħajja saret qisha teatrin

M’hemm ħadd iżomm il-qlib tal-ilma ġieri

Nistħajjlek tgħidli: qum! għax sar il-ħin.

Alfred Grech

31/01/2017

111.

Xħin nibda’ nemmen li dil-ħajja bandla

Bejn dak li lest li nagħmel b’qalbi kollha

U dak li ma rridtx nagħmel iżda jkolli

Għajnejja ngħalaq, nagħmlu kontra qalbi.

Xħin nibda nara l-ġenn li hawn madwari

Kullħadd mifxul isegwi l-alla tiegħu

U dak li kont emmint il-bieraħ sfratta

u nqaleb ta’ taħt fuq għaliex kif jgħidu

l-istorja għad mill-ġdid tinkiteb terġa.

U dak li ħsibt li kien s-sewwa aħħari

Kien biss tagħlim qadim skond il-burdata

Fix-xena li tispikka kienet dari.

Xħin noqgħod ħiemed ngħarrex hawn madwari . . .

Nitħajjar nibda’ nfittex ħolm band’oħra.

Alfred Grech

30/01/2017

Sensazzjoni.

Fittixt li naqbad is-sensazzjinijiet mgħoddija

Iżda issa jien ukoll sirt tal-imgħoddi

U għalhekk fallejt.

Is-sensazzjonijiet inbidlu fin-nostalġija.

Ix-xemx li tfeġġ minn bejn is-sħab

Iddawwal dawn l-inħawi. Jien inħossni

Li qiegħed fuq il-palk għad-dawl tar-rifleturi

Bil-ħarsa ta’kullħadd imsammra fuqi.

Ma nara xejn ħlief ċpar, iċ-ċpar tal-ajru tiela’

Bejn sema u art u sema u baħar ma jibqa’ xejn jingħażel.

Imbagħad, fil-kjaroskur ta’ temp ma jafx x’irid taf tidher il-qawsalla.

Hemm min ukoll ried irikkibni,

’Mma jiena ppreferejt li nħoss is-sensazzjoni.

Alfred Grech

29/01/2017

110.

“When we don’t know where life is taking us we are never lost”. -  Paulo Coelho, “The Spy” p.68.

Int mara ta’ bla wiċċ u ta’ bla sura,

Li taf xi nħoss, li taf xewqati taqta’,

Xi prezz kont lesta tħallas biex jien ngħidlek

Li jiena tiegħek biss, li m’hemmx ħadd ieħor?

Int li kont lesta toqgħod hawn tistenna

Eternita’ biex tara fejn trid tasal,

Xi prezz kont lesta tħallas biex tkun ċerta

Li jien ma ninbidilx? Li dak li wiegħedtek

Kien l-eliżir li jagħmel il-mirakli?

Xi prezz hu tajjeb? Ebda prezz ma ħaqqni!

Hu biss il-jien li jrid isib il-milja tiegħu

Għax waħdu ma joqgħodx f’dina l-eżistenza

Tax-xejn u l-baħħ, mal-unita’ li jiena

Ma baqgħalix lil min nindirizzaha.

Alfred Grech

28/01/2017

Irrid Nintilef.

Irrid nintilef f’dawk l-ispazji alluċinanti ta’ negozji strabiljanti

Niċċassa lejn xebbiet u nisa veri

Li jinfdu l-ħġieġ bil ħars għarwien t’għajnejhom.

Irrid nintilef fid-desert ta’ li ma nafx

Kull xħin niltaqa’ miegħek u ma nafx x’ser nibda ngħidlek

Ja mara ta’ sbuħija eterna.

Fil-kjaroskur ta’ dak li rrid, ta’ li ma rridx,

Xħin ngħidlek għall darb’oħra kemm inħobbok.

Irrid nintilef fl-oċean bla qiegħ u bla konfini,

Ta ruh li għad trid tinfed is-siparju,

U tmiss it-tufijiet inkandexxenti ta’ li ma kienx

Jew ta’ li seta’,

Tiela’ u nieżel ma kull mewġa ritmika

Tan-nifs ta’ sidrek

Mal-bandla ta’ li rrid u li ma rridx.

Ħa noqgħod hawn bi kwieti u waħdi nilħaq

L-għarfien aħħari.

Fil-baħar ta’ bla tmiem ta’ din l-imħabba

Inħossni negħereq.

Irrid nintilef f’dan il-bnazzi li jinfirex f’ħarstek ċara

Fil-ħlewwa tal-ilwien ta’ kull qawsalla

Li tilma’ fuq ħaddejk.

M’hemm xejn ħażin li nkunu t-tnejn senswali

Imqar jekk hemm ħaddieħor qed jarana.

Alfred Grech.

27/01/206

Opportunity Knocks Once.

Xi minn daqqiet il-biża,

Xi minn daqqiet il-ġenn,

Tiskappa minn quddiemek

U ħadd għalik ma jħenn.

Ukoll tkun il-kburija

Biex l-opportunita’

Tal-ħolma ta’ ħajjitna

Tlifniha għall-kumdita’.

Għaliex ma tkunx qed tafda

Lix-xorti u t-talent,

Tiġik ix-xoqqa f’moxta,

Tintelaq mal-kurrent.

Għax tkun l-intuwizzjoni

Ma tieħu qatt raġun,

M’hemmx lok għall-attenzjoni

Li tibdel kull staġun.

Għax Alla mhux jaqbadna

U jġorrna mill-idejn

Lejn xi destinazzjoni,

Jurina biss minn fejn.

Imm’aħna rridu naħtfu

U nkunu bħal strument,

Li jiġi għall-għarrieda,

F’kull waqt u f’kull mument.

Alfred Grech

26/01/2017

Indifferenza.

Imqarr li naf li jien twelidt taħt kewkba feġġa,

Fi żmien ħażin u xejn ma jista’ jsir

Biex dan jissewwa.

Imqarr li għall-li ġej hemm min jiftakar

Li jien ma kontx il-vittma ta’ li ġara

‘Mma kelli l-ħila noħroġ minn dal-jasar

Li fih jinsab kullħadd u nħallas prezzu.

Kull meta nwieġeb “iva” għal din is-sejjħa

Ma nafx jiniex żbaljat jew viżjonarju

Għax ruħi qisha sit arkeoloġiku

Fejn jinżlu jħaffru.

U jekk tistaqsi bdiltx il-ħsieb, it-ton, l-istrateġija,

Jien nibqa’ ma nweġibx.

Jien naf li kont ilsir tat-trasparenza,

Passjoni, tqanqiliet jew entużjażmu,

Mistħija, qtiegħ il-qalb ukoll kburija,

Ta’ tradimenti, dwejjaq u rġulija.

Imm’ issa nerġa’ mmur nintefa’

Fix-xmara tifkiriet li tiġri b’lura.

It-tifkiriet imbagħad li jirxuxtaw

Xitana qalil – l-indifferenza.

Alfred Grech.

25/01/2017.

XV.

Xħin jibda l-ħin jistrieħ u jorqod miegħu,

Sigħat il-jum, it-toqol kollu jaqa’

Gelgul fuq moħħ l-invel li jitlef tiegħu,

U kull merżuq inin tad-dawl li baqa’.

Xħin kollox dawra mejt idur l-għawġ jikxef,

U l-għejja f’ruħħek taħkem u d-dalm jaqa’,

Għakemm tkun trid, tħoss f’qalbek li qed titlef,

Ir-rieda li tqum terġa’ minn kull waqgħa.

Xħin swied il-qalb u d-dwejjaq ta’ madwarek,

Tmaqdir in-nies feriek mingħajr ma smajtu,

Fuq xtajta ’l-bogħod u minsi sibt li ġarrek,

Dak il-kurrent li dari qatt ma fdajtu.

Il-miġra dmugħ li minn għajnejk bdiet tnixxi,

Isserħek bla ma tkun trid tisparixxi.

Alfred Grech

15-10-2011

U Jien Kont Naf Mill-Bidu Nett.

U jien kont naf mill-bidu nett li dan mhuwiex għajr jasar ieħor

Imxekkla b’liġijiet fażulli

Magħmula minn imħuħ li mingħalihom dejjem għandom fuq platt is-soluzzjoni.

Li tagħmel bħalma jagħmel qed ħaddieħor, inkella int stramb, perikoluż u suspettat.

U jien kont naf li mhux bil-ktajjen qed jorbtuna, iżda bi ħbula rqaq li ma jidhrux

Bħal marjunetti fuq il-palk mistħajjel ta’ soċjeta, kredibbli;

Ta’ xhinu tajjeb u korrett u xhinu politikament ammess f’dis-soċjeta’ ħanina

Imħażżeż b’ittri kbar fuq wiċċ il-maskri; b’lingwaġġ li huwa tagħna

Mil-merħla sakranazza

Fil-mewġa ta’ mondanita’, affluwenza u bżieżaq fl-arja.

Għax jien kont naf b’dan kollu u ażżardajt

Li noħroġ barra l-fili mqarr bl-iskuża

Tar-ribelli; imqarr bil-prezz li jrid jitħallas.

U jien kont naf li f’din il-ħajja nawżejanti tal-medjokri jew ta’ dwejjaq

Ma kien se jkolli l-ebda ħarba

Għajr is-serħan alluċinanti

Fl-anestesija.

Alfred Grech

24/01/2017

109.

Ja riħ tat-tramuntana li ġġor miegħek

Kull deni li jittieħed ma kull fewġa

Iġġiegħel lil kulħadd fis-skiet ta’rkejjen

Għas sħana tal-fuklar li n-nar jiċċassa.

Ja riħ tat-tramuntana li ġġorr miegħek

L-irwejjeħ tat-tamiet ta’ min pajjiżu

Ħallieħ warajh biex kompla fit-triftixa

Ta dak li lanqas jaf, il-ħolma tiegħu.

Ja riħ tat-tramuntana li tkellimni

B’lingwaġħġ li mhux tal-kliem jew b’xi taħżiża

Li tista’ tfissru biss din l-għanja siekta

Li tibqa’ tidwi wkoll mal-ħajja wieqfa.

Imm’int ħafif, int ħieles bl-ebda rabta’,

U  tonfoħ kull fejn trid, hekk ħabta u sabta.

Alfred Grech

23/01/2017.

108.

“And when each day is the same as the next, it’s because people fail to recognise the good things that happen in their lives every day that the sun rises” Paulo Coelho: The Alchemist p.27.

Vertiġinuża r-realta’ xħin tqum filgħodu

Tistenna l-matutin tal-ħsibijiet imxekkla,

Tiċċassa jekk tkun taf li dan jum ieħor

Bħal dawk il-jiem ta’ qabel ser jitgerbed.

Ma taħseb f’xejn, tistenna xejn li għada

Għad jista’ jkun xi ftit jew wisq jixxiebaħ;

Filgħodu tibza’ ’llum hu differenti

U tibqa’ mwaħħal hemm fl-istess binarju.

Illum ikun bħal bieraħ u ta’ qablu,

Għax ma tistenna xejn li se jinbidel,

U tidħol fir-ritwal bħal fir-rutina,

U tibda tibza’ tbiddel anki nota;

U tgħereq fil-morbosżita’ tad-dieqa

U tibda flok ingassa ssib ħannieqa.

Alfred Grech

21/01/2016

U Mbagħad Ġie Żmien.

U mbagħad ġie żmien, ma bqajtx iċċempel aktar

Għax forsi nbaħt dil-leħma fejn wasslitna,

Aktarx li ma konniex qed nistennewha:

Bufffura riħ malajr lit-tnejn qalbitna.

‘Mma llum li għadda ż-żmien u l-għajru staħba

M’għadniex inkejjlu l-ħin għad-dell fil-ġonna

Inħarsu t-tnejn li aħna lejn l-imgħoddi

Nistaqsu lil xulxin hux aħna konna.

Alfred Grech

20/01/2017

XIV.

Kull bidu f’ħolqa t-tarf idomm mibdija,

Ġrajjiet fiż-żmien kull waħda wara l-oħra.

Twelidi lanqas naf kienx jgħodd għalija

Bin id-destin, setax ikun xort’oħra.

L-għażliet tal-bidu kienet ta’ ħaddieħor,

Biex stajt jien dħalt f’dil-ġrajja kif mibdija;

Nissokta ma ħaddieħor wara l-ieħor,

Li ġara kien, aktarx  sibt jien xortija.

Kull bidu ta’ tmiem ieħor hu t-tkomplija

Sakemm il-barra joħroġ minn idejna;

Iħabbar it-tiġdid f’ħajjiet moħlija,

U lilna jerġa’ jbiddel qabel bdejna.

Kull att tal-bidu jġorr il-biża miegħu,

Tal-mhux magħruf ifittex it-triq tiegħu.

Alfred Grech

14/10/2011

Int Bħal Dawk l-Irdieden.

Int bħal dawk l-irdieden tal-ġigġifogu,

Mank tilħaq tmissek ftit, mall-ewwel titlaq,

Iddur, iddur, iddur u tarmi d-dija,

Tinħela mbagħad malajr u tibqa’ għaddejja.

Inti bħat-temp kull meta jitla’ l-ajru,

Fost beraq, ragħad, irwiefen u sajjetti.

Xħin tagħmel ħalba xita tmur u tgħaddi,

U kollox għal li kien, għax saħħtu ħela.

Alfred Grech

19/01/2017

Jien Niġi Biex Nitkellem Miegħek.

Jien niġi biex nitkellem miegħek

Biex nara kemm u fond

Dan l-oċean li fih webbiltni nsalpa,

Mingħajr ma naf fejn trid twassalni

Bid-dawl t’għajnejk, bid-daħka ta’ fuq wiċċek,

Jekk mhux fuq dak l-iskoll

Fejn darba nnawfragajna.

Jien niġi biex nitpaxxa bil-ġmiel tiegħek

Li huwa balzmu għar-ruħ itturmentata

Li huwa l-illużżjoni tal-misteri

Li ssor ġo fik, li xi waqtiet tikxifli

B’kull daqqa t’għajn jew mossa seduċenti.

Int għadek qatt ma ntbaħt li jiena

Bħal meta nkun inħares minn ġo tromba

U mingħalija lmaħt xi kewkba ġdida

Li ma tkun xejn din għajr titwiba mqansħa

Fil-ħoġor t’univers lil jisma’ kollox,

Jaqralna ħsibijietna  jperriċhomna,

Biex għad xi ħadd xi darba jagħmel wegħeda

Li tkun taħżiża li timmarka.

Alfred Grech

18/01/2017

XIII.

Aħjar serħan insib fuq ġwienaħ l-għana,

Nitkellem b’dak l-ilsien li tifhem qalbi;

Newbiet il-ħsieb fil-ġnien tal-moħħ tistagħna

Waqt li t’hemm fuq ikun qed jisma’ talbi.

Bħan-nida fuq il-ward fil-ġonna tagħna,

Li wara tlugħ ix-xemx issibha għabet,

Hekk ħsieb jitwieled, miegħu jiġi l-għana,

Waħedha r-ritmu mbagħad tkun l-għanja sabet.

Minn moħħi nqaċċat kull żarġun ta’ ħtija,

Ta’ qtigħ il-qalb, biża, ħsara, mibgħeda.

Inħawi nfittex fejn il-bogħod mill-bqija

Bil-ferħ nissorprendiha fejn tkun qiegħeda.

Min taħt tar-rebħ l-arkata tgħaddi miegħi,

Li tiżboq tal-ħelsien il-beraħ tiegħi.

Alfred Grech

09/10/2011

We Fought Together.

We fought together once

At the pass of Thermopyle,

We had no rank and file

An invisible army we were,

Opposing any foe that marched against

Our wall of courage and resolve..

We fought together once with great Achilles

In the boundless plains of Troy

We were together when the firefighters scaled

The Twin Towers,

Isengard and Barad-Dur

And the wall of ancient battlements

Against the wisdom of a nymph who was my mother.

Juxtaposed we were together

At the battle of Jericho

And had all the faith that brings down walls

But the blow of a trumpet had me all but  broken.

Where is all gone now? The hope

The trust, the courage

To wake up in the morning and face up

To another day.

Your phone calls do not ease

The notions of past misery

So that with all the gloom of wintry nights

I sing alone this lonely song

In the corner of old triumphs

Echoing the chasm within

The sorrow

And the depth

Of an empty universe without.

Alfred Grech

18/01/2003

Ħalliha Tnixxi l-Poeżija.

Kull meta tiġi tgħidli ma nbaxxix

Il-barrikati jien inħallik hemmhekk biex tibqa’ mħawwla

Fit-trab li fih trabbejt.

Ħalliha tnixxi l-poeżija,

Bħalma tnixxi k-għajn tal-ilma ġieri,

Trid taħrab, ma tistax minn din it-tnalja

Mill-ħerqa li tintilef fit-twissija.

Għaliex iż-żmien li nuru rwieħna dgħajjfa

Issa għadda u mar,

Xħin nibda’ nħares fiss f’għajnejk

Minsubin hawnhekk biswit xulxin fuq dal-kafe’

Bħal twieqi għal ġol-abbissi tat-telfien,

Int tibda ssir il-mera tirrifletti

Il-mewġ seren u kwiet tal-infinit

Jirbombja ġewwa fija l-matra antika

Biex bejn in nifs ta’ sidrek tiela’ u nieżel

Tiskatta l-melodija intiwittiva

Ta’ x’tista’ tkun id-dinja ta’madwari

Mingħajr il-ħlewwa tiegħek.

Imbagħad tkun taf għaliex irrid inżomm il-bogħod

Inżomm il-ħabel ta’ Żefiru, ta’rwiefen maħrubin,

L-irwiefen tal-imħabba;

Bħal meta x-xita tħedded li se traxxax,

Bħall-arja xotta ta’ deżert li jikwi

L-irwejjeaħ ta dir-ruħ li għandha nixfa

Maqsuma u frammentata qiegħeda tfittex

Dik l-id li trid tiġborha.

Issa li l-lejl daħal il-ġew

Nistaqsi lili nnifsi u ngħid: Il-għala

Ma ngħollix ħarsti ‘l-fuq minn flok  ma nħares fiss f’għajnejk?

Għaliex kull meta nħares fiss f’għajnmejk, jien nara x-xefaq?

Alfred Grech.

16/01/2016

Ejja Nidħlu f’dal-Villaġġ tar-Ruh.

Ejja nidħlu f’dal-villaġġ tar-ruħ

ta’ bla metru u ta’ bla rima,

fejn kollox desolat, mitluq fit-tidjiq tal-abbandun

ta’ min ma jista’ jsib xejn ġdid biex jinsa’ lilu nnifsu:

Fejn kollox u kullħadd hu rieqed fin-ngħas komdu tal-affluwenza.

Sakemm iqum jagħtih xi ħmar-il lejl

u jaħseb li b’hekk biss inkunu ngħixu,

fin-ngħas li sawwar dil-kuxxjenza

mill-palm ta’ jdejn min għandu l-elokwenza.

bl-istess udit imtenni ta’ kulljum fuq kull frekwenza.

F’dan il-pajżaġġ tar-ruh adoloxxenti

fejn qatt ma setgħet tikber, fejn kollox se jispiċċa

bl-istess nota, bi tnegħida,

fejn kollox hu l-istess, xejn ma jinbidel

fejn l-idejat jixjieħu wkoll u  xejn mhu ġdid u xejn ma jerġa’

jidħol il-ġew mill-passatur tal-inkoxxjenza.

Fejn kulħadd jaħseb l-hu aħjar minn kull ħadd ieħor,

iżda li fuq l-iskala lineari taż-żmien u tal-ispazju

qed jara l-għabex tiegħu fuq ix-xefaq

bħal dawk iż-żewġt ixjuħ fuq bank fil-misraħ

jisimgħu lil xulxn igorru u jgħixu fil-memorja.

U jiena nerġa’ ngħaddi ndur minn dawn it-toroq

viżitatur qadim tat-tifkiriet ta’ dawn it-toroq

ta’ dal-pajżaġġ fejn jirxuxtaw l-iħirsa

u jirrikorru l-ħsibijiet imsensla.

Alfred Grech

15/01/2017

107.

U nerġa’ jien nistaqsi lili nnifsi,

Liem’hu dak ix-xitan li qed iġiegħelni

Nirreċta dal-kopjun xħin nasal għandek,

Xħin jien kont naf minn qabel fejn ser iwassal.

Minn meta ltqajna t-tnejn għall-ewwel darba.

Għax dal-kopjun ma kien qatt jgħodd għalina,

Imbagħad bl-iskuża antika tal-imħabba

Kont inti mgħaġġla wkoll li tidħol miegħi

F‘das-sotterran li minnu triq mhemmx lura.

Int bħali ma kontx taf min fejn ridt titlaq,

X’inhu l-effett ta’ qrara hekk spontanja,

Maqsuma bejn ħatejn, u bejn il-ħalel

U bħali kont qed tħoss il-ħabel jiġbed,

Mingħajr ma taf: il-ħabel tal-ingassa.

Alfred Grech.

15/01/201

Ħajjithom Hekk Għaddewha.

‘ Mma kif ma jintebħux

Li dan hu jasar ieħor

Filgħodu sveljarin

U ‘l-barra bħal ħaddieħor.

In-nies trid tmur għax xogħol

U taħli hekk ħajjitha

X’ser tagħmel lanqas taf

U tnin bil-mod saħħitha.

Qalulhom illi x-xogħol

Salmura jsir tal-ġisem,

Il-bpgħod minn dak li tħoss

Biex forsi tagħmel isem.

Ħajjithom ħlewha hekk

Fis-seħer tar-rutina

Ghax jaħsbu m’hemmx għalfejn

Għax saret din, duttrina.

Ħajjithom ħlewha hekk

Bla sens ta’ direzzjoni,

Għax b’kollox jaf l-Istat,

Tarax! bl-intuwizzjoni.

Mid-dar għax-xogħol, għad-dar,

Ħajjithom jekk għaddewha,

U jħarsu fil-passat

Ħajjithom kif hekk ħlewha?

U lanqas jindunaw

Li dan mhuwiex ħlief jasar,

U baqgħu ma ntebħux

U baqa’ ħadd ma basar.

Imbagħad xħin jirtiraw

Għalihom xi konkwista,

Quddiemhom hemm il-baħħ

U kollox sar bi żvista.

Alfred Grech

13/01/2017

L-Isbaħ Barka.

U mqarr li għal waqt wieħed

Intbaħt li hawn qawsalla

F’idejk kull faxx imlewwen

U b’hekk sirt temmen f’Alla.

U mqarr li bħali tfittex

Is-sewwa fl-eżistenza

Mingħajr din ix-xintilla

Tkun tgħix fil-penitenza.

Jekk tonqos xi tqanqila

Tkun  fiergħa l-ħajja tagħna,

Jekk għad xi darba tmissek

Bl-imħabba trid tistgħana.

Għalhekk kull meta tiġi

U tħares fiss f’għajnejja,

Tintebaħ min jien f’daqqa

Malajr iżżomli jdejja.

Tintebaħ li f’waqt wieħed,

Is-siwi ta’ dil-ħajja

L-imħabba li titgħallem

Iżżid bla titlajja.

Imbagħad xħin jiena nitlaq,

Mall-kallu li jitrabba,

Tgħid: Sewwa dak li qalli,

Kien baqa’ biss l-imħabba.

Biex int li bħali tfittex

F’dil-ħajja x’inhu s-sewwa

Niżżilt il-barrikati

Biex tħalli tidħol ġewwa

Il-qawwa tal-imħabba,

Intbaħt li tħalli marka.

Imqarr xħin kollox spiċċa

Tkun niżlet l-isbaħ barka.

Alfred Grech

12/01/2017.

Ghamilna Żball it-Tnejn.

“Deep down we are all the same. We make the same mistakes and walk around with the same unanswered questions” Paulo Coelho – Adultery.

Għamilna żball it-tnejn

U ħadd ma jrid jammetti

Jien ħsibt li stajt kont int

Mingħajr daqq ta’ trumbetti.

Erġajna hawnhekk it-tnejn

Nistaqsu l-mistoqsija,

It-tnejn għamilna żball

U nġorru s-sens ta’ ħtija.

M’għandix jien lanqas bżonn

Li jkolli lilek ħdejja,

Kont hawn u tlaqtli l’hemm

Biex nerġa’ ngħidlek: Ejja!.

Mill-liema naħħa tlaqt?

Biex issa ġejt kontrija,

Xħin konna t-tnejn flimkien

Spiċċajna t-tnejn mgħobbija.

Alfred Grech

11/01/2017

106.

Int ja poeżija vera jew mistħajjla,

Tfesfisli ġo widnejja mbagħad titlaqni,

Xi minn daqqiet insir konfessur tiegħek,

Għidli jekk qattx iltqajt ma x’ieħor bħali?

Din mhix xi narrattiva li tifhimha,

Reċtar ta’ litanija bla sekwenza,

Xħin l-orizzont jitbiegħed aktar u aktar

Minn dak li ħsiebt, mis-sħab ta’ dawn l-inħawi,

Kull meta l-ħaġa ġdida ssir rutina.

Għidli, ja poeżija, jekk dan l-għana

Li qed ngħanni jien ux biss għalija

Għaliex jew ħadd mhu jagħti kasu nkella

Dak li jisimgħu għad irid jitwieled?

Għax il-profeta mhux magħrugff’pajjiżu.

Alfred Grech

10/01/2017

Il-Bieraħ Kont Narak Tassew Sabiħa.

Il-bieraħ kont narak tassew sabiħa,

Illum m’għadnix. Sirt bħal ħaddieħor.

Il-bieraħ int għalija kont misteru

Illum m’għadekx, għax drajtek.

Il-bieraħ deherli li kont naf x’irrid mingħandek

Illum ma nafx daħalli d-dubju.

Il-bieraħ kont bdejt nemmen li kont tgħidli

Illum m’għadnix għax forsi nbdilt.

Bqajna hawnhewkk it-tnejn li aħna

Fuq xatt il-parodija,

Għax nafu li jekk nagħmlu xi pass falz

Nitilfu kollox.

Alfred Grech

09/01/2017

XII.

Dawk li twemminhom ma jinħtieġx id-difna

Iserrħu l-art mill-ġabra ta’ kull biċċa,

Tal-Ħajja u mewt, u mewt u ħajja ż-żifna

Kulħadd f’tad-dellijiet is-saltna spiċċa.

Għalhekk kull mafkar kif ukoll kull qabar,

Hu biss tifkira għal min f’dil-ħajja baqa’;

Jistrieħu dawk li llum qiegħedin fis-sabar,

Ma jiġri xejn jekk l-art u s-sema’ taqa’.

Mill-fdal, sisien tal-arkeoloġija,

Tal-eqdem żminijiet nitgħallmu l-ġrajja,

Tinbena fuqhom ħafna teorija,

B’hekk sirna nafu kif imxiet il-ħajja.

Li kieku dawk li ġew m’emmnux f’ħajja’oħra

Kitbet l-imgħddi kien ikun xort’oħra.

Alfred Grech

02/10/2011

Jekk Trid Tieqaf Tistaqsi.

Jekk trid tistaqsi tieqaf

Jekk lili ma tafnix,

Minn bejn is-sħab tittawwal,

U bqajt ma tgħarafnix.

Hekk trid issir taf lili,

Mhux trossni ġo kexxun,

U l-għelm li twaħħal fuqu,

Ikun kull kif ikun.

Miniex oġġett li tmissu,

Inkella li tpinġih,

Li tagħġnu qisu tafal

U tagħmel li trid bih.

La mmur u lanqas niġi,

La qiegħed hawn ‘qas hemm,

U tista’ tpoġġi sebgħek

U tħossni ma naf kemm.

Jien lanqas kont il-bieraħ,

U għada ma tafnix,

Jekk ftaħt għajnejk tistaqsi,

Jekk rajtni m’għaraftnix.

Lil hinn minn dak li tara,

Jew dak li jista’ jkun,

It-toqol ta’ kull ħtija

Mingħajr ma tkun mgħejjun.

Lil hinn mill-biża’ t’għada

U l-għadab tal-ħelsien,

Jekk tfittex ftit is-sewwa,

Issibni kullimkien.

Alfred Grech

06/01/2017

105.

Min jaf, min jaf jekk jibda’ jgħid il-gawwi

Li jirgħa fuq il-mewġ ta’ baħar delli;

Min jaf jekk jista’ jiftaħ ħalqu ċ-ċinju

U jgħid kif kien it-temp tal-ewwel safra.

Min jaf ix-xemx fil-kjaroskur ta’ lejla

Kif tislet minn tal-jum ix-xrar ta’ tama,

Kemm dubbji, kemm stennija u ħolm li ntefaq

Fuq dahar ix-xorti tilgħab dil-partita.

Jispiċċa kollox, kollox jerġa’ jibda’,

Fuq din il-ġostra li tissejjaħ ħajja,

Bħal meta taqa’ l-borra u d-dalma tinżel,

U għada terġa’ titla’ x-xemx timbotta,

U terġa’ tagħti spinta ’l-dil partita

Biex terġa’ ddur darb’oħra mal-arena.

Alfred Grech

05/01/2017

Għad Inqumu.

Idilliku dan ngħas li nqumu minn,

U ma jkollniex iċ-ċpar ta’ fuq għajnejna,

Ix-xkiel li bih xekkluna mbagħad liġġmuna

Bil-qtar tar-ruh li trid tisfida l-beraħ,

Bibien is-sotterran u l-ħabs tal-moffa.

Ma jkunx l-irqad li jnissi l-fewġa friska,

Il-kamla li qed tgerrem bla tintebaħ,

Ma jkunx in-ngħas li għad irid ibiegħedna

Bil-ftit il-ftit miż-żelqa li niżolqu

Ġol-kjażmu tal-abbiss li qed jimmarka

Deklin ineżorabbli fl-apataija.

Ikun biss xħin dan moħħna jatrofizza,

Ġisimna bla ma nafu li sar mummja

Li ruħna trid tistejqer u trid toħroġ

Mill-gradi u ma tistax għax l-anqas ġisem

M’għandha. Imbagħad? Imbagħad ikun tard wisq.

Alfred Grech

04/01/2017

Imm’Aħjar Ma Niltaqgħux.

Imm’aħjar ma niltaqgħux

Għaliex ninqabdu f’xi ħolma żbaljata

U jaqbdu magħana ix-xakalli

U jaqgħu l-kwiekeb mis-sema.

Ikun aħjar li t-tnejn li aħna

Nibqgħu moħbijin fil-bosk fejn hemm moħbija

Dawk tal-vista qasira

U nibqgħu mingħalina qed indommu

Il-ħajja ta’ kuljum.

Ikun aħjar li nibqgħu mitlufin

Fir-rassa ta’ dil-merħla qed tfittex

Lill-alla tal-inkredulita’,

Fejn la hemm ferħ u lanqas niket

Fejn ma nżidu xejn mal-korollarju

Ta’ ġrajja ġa mitkuba.

Mingħajr ma naqsmu xejn mid-dwejjaq ta’ xulxin

Biex għada jkollna l-premju li wegħeduna.

Għax f’din in-nassa jiena waqajt

Bħalma waqgħu dawk ta’ qabli;

Nitlaq jien, ħaddieħor floki.

Imm’aħjar ma niltaqgħux

Għaliex jekk tassew iseħħ das-seħer

Din għad tista tkun il-ħrafa.

Alfred Grech

03/01/2017

Iżda’Aħjar Li Ma Ltqajniex.

Izd’aħjar li ma ltqajniex. . .

Kelli f’moħħi li niltaqgħu

Biex turini kemm taf tilbes,

Biex turini kif tħossha mara

Meqjusa ta’ sultana.

Kelli f’moħħi li niltaqgħu

Biex tħallini nkebbes dak il-bosk li jrid jinħaraq,

Il-munzell ħuxlief

Jistenna lil min ikebbsu.

Kelli f’moħħi li niltaqgħu,

Iżda kienet tkun oħra

Minn dawk ix-xeni teatrali

Ta’ reċtar spontanju

Kull meta ma nsibux

Il-vizzju li jnessina

Il-loppju li jraqqadna

Biex naħarbu l-mistoqsija.

Kelli f’moħħi li niltaqgħu . . .

Iżd’aħjar li ma ltqajniex.

Alfred Grech

02/01/2017