Ridt Neħles Minni Nnifsi.

Il-ħarsa mudlama f’għajnejk

Serqet il-ħemda ta’ dik id-dinja

Li konna drajna .

L-ilwien ilellxu f’daqaqa waħda

Tniġġsu u lanqas biss ridt naf

X’għandek xi tgħid.

F’daqqa waħda sirt naf

Li għandek x’tirrakkonta

Li ma kont tiegħi qatt

Iżda l-aktar ħsieb li qed ikiddni

Hu dak li naf x’kont qiegħda taħseb

Li taf kull pass li jmiss

U kull mossa li se nagħmel.

Imbagħad tbiddel it-tbissima fuq xofftejk

Fid-dawl tal-fanal

Li jixgħel sotteran ix-xili.

Jien xtaqt inneħħi jdejk minn fuq għajnejk

Biex nilmaħ l-allat suwed

Kull xħin tintilef

Iżda kull ma ġara kien

Li ġġarrfu ħitan is-swar

U jien għalaqt għajnejja

U nsejt li ridt neħles

Minn kull ma kelli

Ridt neħles minni nnifsi.

Alfred Grech

17/06/2020.

Issa Taf.

Għalkemm għolejna ma kull mewġa

Spiċċajta xorta waħda fuq l-iskolji.

Imqar jekk ninsabu l-bogħod tar-rifletturi

U dak kollu li hu moda

F’għajnejjna jidher biss

Dak li ħaddieħor lanqas jara.

Taf li ma tista’qatt tkun bħal ħaddieħor

U dak il-gelgul li qabel kien inixxi

Issa sar biss il-qtar

Li kull filgħodu jibtrebaħ

Mill-gravita’ ma tlugħ ix-xemx.

Issa taf għax nisma’ għanjiet

Li ħadd ma jrid jisma’

U nikteb poeżija

Li ħadd ma jrid jaqra

Hekk li fil-baħar tal-multitidni

Int sir tħobb lil min malajr jingħaraf.

Alfred Grech

15/06/2020.

Għax Kollox Attaparsi.

Lanqas il-leħen m’għadu joħroġ

Ħieles u ferrieħi

Bħal ilma ġieri li jnixxi

Fil-kanali tas-saqwi

Illum qed ngħumi ġewwa baħar imdardar

Ikkalzrati fid-dawl u fil-konkrit.

Lanqas ir-riħa tal-qronfol u tal-ġiżimin

M’għada tinxtamm

Fil-ġonna deżolati ta’ din il-plajja

Fejn jirgħu l-għasafar tal-ħtif

U jimxu l-misruqin ta’ mingħajr djar.

Xejn, kollox ilellex fl-ilwien artifiċjali

Fid-dħaħen efimerali

U fis-swied imdennes

Ta’ għamliet tridimensjonali.

Ħajjithom mhix itwal minn tal-ward

Li jiftaħ filgħodu u jagħlaq

Fin nżul ix-xemx sajfija.

Għax kollox attaparsi.

Alfred Grech

13/06/20202.

Fittixni

Fittixni f’xi żiffa li tkun għaddejja tmelles

Il-mewġ tal-baħar li m’għandiex mill-

Ħafna wegħdi tal-bnedmin

Jew f’xi twerżieqa ta’ vjolin skurdat

Jew f’xi nota nieqsa ta’ xi sinfonija

Li qatt ma nkitbet.

Jien ridt inkellmek

U ngħidlek ħafna ħwejjeġ

Iżda mbagħad bqajt waħdi nitħasseb

Fuq dak li stajt intenni.

U meta sewwasew sejjaħtli

Żlaqt fuq kull żurżieqa li żżerżaqna fuqha

U sibtni qed nitbandal fuq il-bandli

Ta’ tfulitna.

U jekk xi darba għad niltaqgħu

Issejjaħlix iżda aħseb fuq dawk il-waqtiet

Li qatt m’għaddew bejnietna.

Alfred Grech

12/06/2020

Vjaġġ Bla Mira.

Vjaġġ bla mira l-mixja tagħna

Fit-toroq battala ta’ dawn l-inħawi

F’dil-gżira li tilfet suritha

U ġismha ma jingħarafx

Għax imbiegħet fis-suq tar-regħjba maltin.

X’jagħtik is-saħħa li tiġġieled

l-assurduita’ li tisfidak

id-dwejjaq l-uġih, l-inċertezza

jekk mhux il-ħmerijiet u l-fissazzjonijiet?

Tista’ wkoll tindarab bis=-ejf tal-anġlu

F’jum il-fejqan mill-pesta

Iżda r-ruħ tistrieħ fil-waqa’

Tal-imkabbrin u dawk li jaħtfu

U fl-għabex tal-allat.

Nixtieq li kont ħrafa li ttenniha

Kull filgħaxija

Mingħajr tagħlima.

Alfred Grech.

11/06/2020.

Kull Filgħodu.

U kull filgħodu rridu nġorru l-valiġġi

Li ġarrejan l-bieraħ u t-toqol

Minflok jonqos qed jiżdied.

Kulljum nitqawwew

Bi sbieħ il-jum fulġenti

Ta’ xemx li terġa’ tqum mill-ilmijiet.

U kull fil-għodu nqumu ntennu l-istess mantra

Bir-ritornell li għada jista’ jkun aħjar

U xi minn daqqiet naħbu l-ġenb

Mudlam tal-qamar

Naħbuħ imqar minnha nfusna

U l-għaliex ma nifhmu qatt.

Tgħallimna daż-żmien kollu

Inżommu fil-wiċċ

Ninġarru mal-kurrenti

Dan ma jfissirx

Li l-ħajja ta’ min jgħixha.

U x’ħajja din?

Penelope toftoq dak li tinseġ.

Alfred Grech

08/06/2020.

Fej’ Tmur

Fej’ tmur għidli xħin titlaq ?

Ma tħalli ebda rima

Xejn ma jibqa’ minnek

U tmur mingħajr tislima.

Qatt ħsibt x’iħoss min tkun ħallejt warajk,

Id-diwi f’qiegħ l-immensita’

Il-ġerħa li tistona

Tirbombja l-baħħ mitluf fi ħdan l- eternita’?

Jien ħsibt li tibqa’ tieħu n-nifs

Imqar jekk ħadd mhu qed jarak

Għax l-arja li kont tibla’

Żgur kienet qed tifgak.

Għalhekk issa taħseb

fejn tmur se ssib tqanqila

l-infern kien qiegħed hawn

u saħħtek ħlejt ma kull taħbila.

Jien imbagħad nibqa’ għaddej

B’rasi ’l-fuq u bl-għeltijiet

Minn nofs il-misraħ tal- qaddisin

Niżfen mal-ħsibijiet.

Alfred Grech

08/06/2020.