Imqar. . .

Imqar kont ħarsa waħda

li rat dan l-univers,

id-dinja l’hawn madwari,

l-istorja b’mod invers.

Imqar li kont sekonda

fit-tul tal-infinit,

kont nagħżel li nkun vitmma

ta’ dad-destin imqit.

Imqar li kont bissa ħajta

fil-ħjata tat-tessut,

ta’dit-tappezzerija.

Ferħan!! Imbagħad immut.

Kont ngħid hemm pjan imfassal,

u nħossni ħafna kbir,

tar-realta’ tinkixef

kull meta l-ħin isir.

‘Mma xejn ma ġie xi jgħidli

li dan mhux daħk fil-wiċċ,

mhux ħlief simulazzjoni

li nħolqot biss b’kapri1ċċ.

Alfred Grech

06/08/2017

Mhux Ħlief Il-Ħsieb Li Jberren.

Mhux ħlief il-ħsieb li jberren,

Il-ħolm li jagħmel bik,

Mirage li qatt ma kienet

Biex tiftaħ b’hekk l-aptit.

U dik l-imħabba kollha

U l-ġibda ta’ bla qies

Tiġġerra, tiġri u taħseb,

Misjuq mit-tmun tat-nies.

Dak kollu kien mistħajjel,

Bħal velu fuq iċ-ċpar

U tara, xejn ma jibqa’

Xħin tneħħi mbagħad l-istar.

U titla’ x-xemx filgħodu,

Il-bieraħ għadda u mar

U toħroġ it-tifkira

Bħal taġen fuq in-nar.

U kollox kien bħal ħolma

U kollox għadda u miet,

Bħall moħħ li baqa’ jaħseb

U spiċċa f’baħħ ta’ skiet.

Imqar li jiġi wara,

Li jkun determinat

Minn dak li kont qed toħlom

U taħrab is-siegħat.

U kollox ġara f’daqqa,

U kollox seta’ kien

F’binarji differenti

Ma jwasslu għal imkien.

Fuq linji paralelli

Li jistgħu qatt seħħew

Kull-ġrajja mhix bħall-oħra,

Jew dawk li qatt ma bdew.

Alfred Grech

05/08/2017

Xħin Ma Nibqax Ingerger.

X’ħin ma nibqgħax ingeger

U ngħid fuq dak u dik,

Nittama lanqas inti

Ma tieħu qatt għalik.

Xħin tħares ftit madwarek

Profeta mhux magħruf

U ssib is-sens tal-ħajja

Fil-ftit taż-zmien misluf,

Mhu xejn għajr ħolma kera

Duħħan li qatt ma kien

Inkella bħal min jilgħab

U jgħaddi ftit biż-żmien.

Jien noqgħod waħdi naħseb

Jekk hux qed naħli l-ħin

Ukoll jekk din tkun ħasra

Spiċċajt  mal-mitlufin.

Alfred Grech.

04/08/2017

X’int Tagħmel Raġel Waħdek?

X’int tagħmel raġel waħdek.

Imdejjaq u ħosbien,

Imdawwar b’hafna nsetti

Ser jieklok id-dubbien.

X’int tagħmel raġel waħdek,

Mismut u tħares fiss,

Intbaħt li ż-żmien qed jagħfas

U xjaħt inkiss inkiss?

U sibt li l-għasfur għosfor

Xħin ftaħt idejk fl-imrar,

Il-bejta kienet tajjret,

l-għasfur kien tar u mar.

X’int tagħmel raġel waħdek

F’dal-lejl mudlam u mqit,

Jaqaw ser tgħodd il-kwiekeb

U tkejjel l-infinit?

Intbaħt li x’xoqqa f’moxta

Tiġik u ma terġax?

Iż-żmien trid treġġa’ lura

‘mma lura ma jerġax.

X’int tagħmel raġel waħdek

Fuq xifer dan l-irdum,

Qed taħseb x’jiġi wara

Dil-ħolma li se ddum?

Jiena l-poeta t’għada,

Nistqarr fuq dak li rajt,

Nistenna li se nara

Kitbieti fuq il-ħajt.

Jiena l-poeta t’għada,

Nixtarr u ngħożż iż-żmien,

Id-dellijiet li jgħaddu

l-ilwien ta’ kullimkien.

U nisraq mill-qawsalla,

Kull lewn li jagħmel sens,

Biex nerġa’ npinġi dinja

Tal-ħlewwa, serħ u wens.

Il-bogħod mill ġlied u l-gwerer,

Mibgħeda jew tnassis,

Il-kruha tat-tpattija,

Skonġura jew tqasqis.

Alfred Grech.

03/08/2017

Potrai Restare.

E finalmente potrai restare

Perche’ adesso lo sai

Che non c’e’ nessuna altra che puo prendere il tuo posto.

E perche’ oggi mi sento un altro

Proprio come quello che ti ha incontrata la prima volta.

Tu devi restare

Perche’le macerie che hai lasciato nella mia anima

Sono rimasti qua, dentroi di me.

E non andare piu’

Perche’ la tua assenza e’ come il vento

Che sibila nel vuoto di un cammino.

Non mi dici mai che sei andata via

Perche’ la tua ombra e’ come il crepuscolo

Che non finisce

E voglio ancora che tu mi insegni

I misteri che hai sorpassato.

Alfred Grech

02/o8/2017

U Issa Tista’ Toqgħod.

U issa tista’ toqgħod

Għax int taf daqsi li bħalek m’hawnx,

Jew għax illum inħossni differenti,

Jew inbdilt f’dak li kont iltqajt miegħu

Għall-ewwel darba.

Imissek toqgħod,

Għaliex it-tħarbit li ħallejt f’moħħi

Għadu hemm u għadni nfittex kif se nsewwi.

La titlaqx aktar,

Għaliex il-baħħ li tħalli w’rajk

Hu kbir daqs ix-xewqa tturmentata

Li nerġa nibda nkellmek u nidħaddet

Qisek għadek hawn u qatt ma tlaqt.

La tgħidlix li tlaqt u tlaqt għal dejjem

Għaliex trid tgħinni nifhem jew tfissirli

Il-misteri li rkibt fuqhom.

Alfred Grech

02/08/2017

HALLI 'L-MEJTIN JIDFNU L-MEJTIN TAGĦOM.

Halli 'l-mejtin jidfnu l-mejtin tagħhom,

Iżd’inti mur xandar is-saltna. . .

U jien xandart wkoll is-saltna

F’dawk il- wesgħat li lanqas jidwu

Imqar jekk ma kontx naf fejn qiegħeda,

Imqarr jekk ma kontx naf x’kont qed inxandar

Is-saltna fostkom u madwarkom  . . .

U jien fitixtha kullimkien u mkien ma sibtha

U lilek fittixtek kullimkien,

Imqarr li ma kontx nafek

Inkella x’qed infittex.

Jien kont fost l-imsejknin ifittxu qabar

U kont ukoll ma dawk li kkalpestaw

Il-ħajja kif jafuha.

Int kont qalb il-mejtin u u rġajt ġejt lura

U jien bqajt hawn fil-biża li nittieħed

Mill-pesta rikorrenti t’ilsna ħsiena..

Hekk, u hekk biss stajt nifhem

L-għaliex ninbidel kelli

Xħin ħallejt lil mejtin jidfnu

Il-mejtin tagħhom

Alfred Grech

01/08/2017