M’Hemm Xejn.

M’hemm xejn f’dan l-isjwallur ta’ ħajja

għajr dak li ntennu ta’ kull darba

dak li għalxejn fittixna ’l-bieraħ,

fit tfittxija għal-passi li ħaduna

xi darba fil-ġnien tal-Għeden.

M’hemm xejn fit-tranżizzjoni evanexxenti

li minna rridu għad nisiltu

id-dehera tas-sabiħ

biex tara mbagħad jinfaqa’ f’wiċċek

dak li mhux għal dejjem,

bħal-bieżaq tas-sapun itiru fl-arja

imbagħad issibi li l-ħajt li miegħu ixxabbatt

ma kienx jeżisti.

Alfred Grech

12.-9/2018

137.

X’jispara qisu vleġġa hsieb ix-xewqa

Filwaqt li qiegħed hawn fuq mejda waħdi,

Quddiemi nies għaddejja qishom f’ħolma

U jaħbtu ma xulxin fuq dil-bankina,

U inti mintix hawn iżżommli jdejja.

Int missek qiegħda fl-għajn ta’ min iħares

Inkella hawnhekk biex miegħi tista’ tishar.

Tkun int is-sieħba tiegħi tal-konkwista

Daqs trankwillant il-ħsieb li qiegħda ħdejja

Niżżeffen bla ma naf fuq il mewġ il-benna.

Aħjar li mintix hawn għaliex inkella

Ġo moħħi tibda tgeġweġ it-tfittxija

Biex lilek nagħmlek ħienja bla nintebaħ

Li hienja int kif int imqar mingħajri.

Alfred Grech

11/09/2018

Le Tħallinix Hawn Waħdi.

Le tħallinix hawn waħdi

nistagħad għal ħut tal-qiegħ,

Jien dejjem ngħum f-wiċċ l-ilma

u nfittex ftit mistrieħ.

F’dal-baħar tal-enimmi,

qed naqdef imm’għalxejn

bejn Xilla u bejn Karibdi

u t-tort hu tagħna t-tnejn.

Le tħallinix nistaqsi

f’dal-baħar tal-inkwiet,

serpenti velenużi

f'burraxka li għaddiet.

Le tħallinix hawn waħdi,

fuq ħabel dritt stirat,

Miniex ekwilibrista

u lanqas ispirat.

Din hija sensazzjoni,

li magħha niggranfaw,

filwaqt li nsibu ruħna

fis-sqaq fejn tant spiċċaw.

Alfred Grech

01/09/2018

Dil-Mewġa Trid Tobromna.

Dil-mewġa trid tobromna u mbagħad titfagħna

Fejn għad nitagħllmu nsawwtu lilna nfusna

F’infern sabiex nitgħallmu kemm nifilħu

Mingħajr ma nċedu fraka għas- sens tal-ħajja.

L-oħrajn idoqqu baqgħu landi vojta

U miegħi tgħaddi wieqfa labranzetta

Min-nofs tas-swali kbar illuminati

Bil-linef tat-taħwid u l-arroganza

Bir-rifletturi jnaqqxu l-injoranza,

Imwieżna b’kannizzata ta’ wiċċ b’ieħor

Fejn id-distanzi l-għadhom jifirduna

Jizdiedu ta’ kuljum fost dawk preżenti.

Inti titbissem it-tbissima bierda,

Bħax-xemx li ma ssaħħanx f’nofs ta’ nhar xitwi,

Tissemma fil-battal bis-sabar kollu

Bla ħeġġa biex ma tmurx iż-żlieġa tobrox

Li żżomm unita d-dinjita’ prekarja.

Alfred Grech

06/09/2018

Ninħbew Qiegħdin Mill- Ħars.

Ninħbew qiegħdin minn hars il-għajn

ninħbew fi ħdan din l-immanenza,

trasfigurati b’dak li rridu naħbu

u tnejn nistqarru lil xulxin li qed niftiehmu.

Int tinsa’ li xi darba kont għallimtni

li minnek jien ma nista’ naħbi xejn:

fuq wiċċek jien kont naqra

iktar milli nikteb stajt volumi.

Int tħares lejja bħal min jinsa,

Inti li taf tkun dak kollu li kulħadd iridek,

bħal meta teħel fi griżmejk xi  xewka

jew tibqa’ nieżel ġo l-abbiss tad-dalma

Ta’ spiera mħaffra bid-dnubiet  ta’ dari

tiggranfa għalxejn. . .   ħitan jiżolqu,

u bla ma nżajt il ħwejjeġ stajt nintebaħ bl-għera ta’ ruħħek.

U ntbaħna mbagħad ukoll m’aħniex weħidna

u li m’aħniex naqraw is-sinjali

ta’ żminijietna.

04/02018

Redenzjoni.

Int sabiħa l-aktar

xħin tinfetaħ qisek warda

u tħalli l-qtar tan-nida jiġru

fuq xfar il-petali

bħall-għaraq fuq għajnejk.

U ma jgħaddix jum ieħor bla ma r-riħ

tat-tentazzjoni jistampali fuq ħaddejja

it-timbru ta’ xuftejk.

Jien nibqa’ hawnhekk

nonfoħ il-bżieaq tas-sapun

u ndoq vjolin ta’ ġrad li ntesa’

sakemm għad tiġi terġa’ int

 fuq dak  il karru tan-duħħan. . .

U hemm insib il-fidwa.

Alfred Grech

02/09/2018

INT U INT BISS.

Inti li tisfidani ma kull nifs li nieħu

mingħajr ma biss qatt tlissen kelma

u jien irrid inkejjel bil-kumpass  ċ-ċirku

li tagħmel ta’ kull darba

xħin tgħaddi qrib mingħajr ma tħares.

Irrid wkoll nistaqsi lili nnifsi

jekk jaqbillix nintilef

fl-immensita’ tal-ġenn li int tgħidilha imħabba

inkella noqgħod  kwiet fis-solitudni mnearrba

niddetta s-sokor ta- dinja oħra

fejn mhemmx ix-xibka ta- kulljum u mhemmx l-għanqbuta

li sibtni ta’ kull darba imxeblek ġewwa fiha.

Għalik nagħmilha l-qabża ġol-abbis mudlam

minn fuq ix-xfar misnun tal-amneija

u nerġa ngħix imqar għal ftit waqtiet dik l-illużżjoni

li inti u inti biss tagħmilni tista’

ferħan għal dejjem

Alfred Grech

29/08/2018