Ħassejtni Sew.

Ħassejtni sew matul il-vjaġġ

Li qatt m’għażilt għalija.

Ħassejtni sew għax sibtni fiħ

U bqajt ninġarr mal-bqija.

Għax kont bħal qoxra ma-kurrent

U sibtni wkoll ġo nassa,

Kont qed ninġarr mingħajr ma naf

Mitluf  il-wens tal-massa.

Wasalna mbagħad sa tarf l-irdum

Tispiċċa dis-sekwenza,

Ma ħafna oħrajn ma tbiegħdu qatt

U ta’ ftit esperjenza.

Nistasqu wara dan x’ikun

U l-għan ta dit-tkaxkira

Mbagħad tassew ma jibqa’ xejn

U lanqas biss tifkira.

Alfred Grech

20/04/2019

Illum Stennejtha.

Hi għada ma sabitx it-triq,

it-triq għal għandi,

Tilfitha t-triq illum imqar jekk jiena

ħaffift kemm stajt u sirt eħfef minn qabel.

Tilfitha t-triq inkella għamiltielha

itqal u itwal minn qatt qabel.

Distratt immur niġġerra wara l-friefet

l-ilwien mistħajjla seħer il-qawsalla

jew bżiezaq tas-sapun jinfaqgħu fl-arja,

għax nifs irrid, ftit nifs! inkella nifga’

biex neħles minn kull xkiel tal-klawstrofobja

mill msejjes indannati tal inġenji,

mid-dħaħen infernali tal-vetturi,

ġot-toroq u sqaqien ta’ roqgħa mħarbta,

mill-kotra aljentata li ’ssa belgħet

il-loppju tal-progress u ġid bla rażan,

tal-affluenza u l-ħatfa tal-miljuni,

ta’ ġens bla ruħ li tilef lilu nnifsu,

ta’ numru ta’ bla wiċċ u nies virtwali.

Illum stennejtha tiġi,

illum erġajt fittixt ir-ritmi tagħha

ir-ritmi tiegħi stess, ir-ritmi qodma

il-ħsejjes primordjali li jfakkruni

fil-mewġ li jaf jintona wkoll kull għanja

li tiġi u tmur, tinbidel bla ma taqta’.

Illum erġajt irbatt il-krikk

żammejt il-fren  sabiex inserraħ ftit

dil-qalb għajjiena,

biex nerġa’ nieħu n-nifs

u niġbor ftit tas-saħħa.

Illum fittixt is-skiet li xtaqet hi

għax kienet hi li qaltli

li waqt ta’ skiet hu l-waqt tagħha

u taf titfaċċa ħin bla waqt. . .

u dak il-waqt ikun għal-dejjem.

ALFRED GRECH

Il-Ġimgħa l-Kbira.

19/04/2019

146.

Imm’issa naf! xi ħaġa qed tifridna,

Mhuwiex iż-żmien u lanqas id-distanza,

Sigħat kont ngħaddi nikkuntempla lilek,

Bħal min f’lejla sajfija ta’ bla qamar

Iħares lejn il-kwiekeb u jistenna

li jara xi sinjal. isib tweġiba.

Int is-serenita’ għal min jitħawwad,

Is-skiet u l-ħemda ta’ min huwa mgħaddab,

Baħar imqalleb jien li ’l-blat isawwat,

U inti l-fanal li turi li da’qt naslu.

Issa li ma nbaħbiex li ż-żmien kien għadda,

Li l-aħħar xarabank diġa’ tlifniha,

Jien nistaqsik tassew hux hawn ridt tiġi,

Jew kienet din għalik xi avventura.

Alfred Grech

19/04/2019.

Usa Mill-Beraħ.

Usa mill-beraħ ta’ quddiemek

din is-sensazzjoni li ma tgħarafx

bejn holm u dak li hu tassew.

Imm’inti xortik tajba

għaliex b’difejk ċarratt

u għamilti iċ-ċikatriċi

li sfugrat wiċċ l-eternita,

għalkemm minn dawn l-inħawi

tidher xi ħaġa virtwali,

efimera bħan-nar li jaħraq

u ġġib fix-xejn l-aqwa ikoni

u monumenti ta’ tifkira.

Sakemm itemmu ż-żminijiet

u ngħidu li dak kien riħ

u issa kkalma.

Alfred Grech

18/04/2019,

Demgħa.

Xi jkun id-diwi ta’ ħoss l-immensita’

ta’ qatra oħra iċċaqlaq wiċċ l-eternita’

fil-firmament imdennes?

Ikunu l-imwejġiet żgħar li lanqas jidhru

tul il-wisa’ tal-infinit.

Kull demgħa li ġġelben

ma tmiss l-ebda korda

ma ttteni ebda leħen

jivvibra fis-skiet tal-armonija.

X’imkien ġo dan il baħħ hemm imħażżeż

dak kollu li ridt ngħidlek

u qatt ma sibt il-kliem.

X’imkien f’dal-baħħ

titwieled kewkba ġdida li tqawwi qalb l-għannej

li safa mutu.

Imqar jekk id-dmugħ tiegħi ma jiswa’ għalxejn

x’imkien fid-dlam tal-beraħ ta’ bla tmien

hemm int li qed tismgħani.

Id-dmugħ iġelben iqanqal terrimot

u jibgħat mewġ jitriegħed

sa ma jasal sax-xtut tiegħek.

Alfred Grech

17/04/2019

Barrikati #

Barrikati u swar għoljin issib

xħin tagħmel l-ewwel passi biex tgħeleb

l-għanqbut u d-duħħan tal-uragana

li jgħatti musbieħ il-lejl

li tkun qed tfittex.

Siparji sħaħ ta’ biża u qtigħ il-qalb

ta’ dak li aħna

jiddiżorjentawna għal-kollox

u jgħattu x-xewqat ħielsa

ta’ qlub illum imwerwra.

Jekk tistaqsini hawnhekk x’qed nagħmel

ma nafx inwieġeb,

għax bħalek ferħ ta’ ġenn

l-imħabba nisslet fiha,

fl-imħabba ma ssibx kenn.

Tgħid għad nimlew il bir bla qiegħ

li sibna x’ħin tlifna l-innoċenza?

Tgħid għad inħaddnek miegħi

u nkunu t-tnejn qalb waħda

u nibda nemmen fik

u nħares lejk

bħalkieku qed inħares ġewwa mera?

Alfred Grech

16.04.2019

#B’apoloġija lil Rużar Briffa l-awtur ta “Tfajla Toħlomx”

Notre Dame De Paris.

Titfixkel xħin tinqabad fil-qawwa tan-nirien

trid ma temminx dak li qed tara.

Titkebbeb fl-ilużżjoni ta’ kuljum

u f’ħoġor l-aljenazzjoni.

Xħin jitfarrku l-ikoni

u dak li drajna bih

jinħass il-mejt tad-diżorjentazzjoni

u ngħidu x’waħda din

dan tarf iż-żmimijiet!

Iżda l-poplu inebrijat jistenna l-miraklu

li jiġri ta’ kulljum.

Tibżax għad nibnu Ġerusalem mill-ġdid

is-sumulakru tas-simulat.

Alfred Grech,

15/04/2019.