DAL-FLUS MINN FEJN ĠEJJIN?

Dal-flus minn fejn ġejjin?

Imqar mina minn taħt l-art iridu jagħmlu

mhux għan-nies, għall-kuntratturi

u biex igawwdu huma magħhom.

Fetħu jdejhom u qalu:

Hawn il-ġid.

U ħarrbtu kull ma sabu

għax id timsaħ lill-oħra

u hekk ikunu nodfa t-tnejn

Għalxejn iddoqqu t-trombi

għax l-aħħar ma wasalx

bħalissa għandi x’nagħmel

bħalissa nikkontempla

kemm hu baxx il baħar li fih qed ngħumu!

Hemm min ma jilħaqlux

ħaddieħor aljenat għaddej ġmielu

u jien indendel ridt fardal

minflok bandiera imperrċa fuq xi krejn

biex nuri l-qawwa tiegħi

kemm jien battal

u kemm naf nagħmel ħsejjes.

Nixtieq biss li xħin l-irjus itiru

ma nkunx ħdejhom.

Alfred Grech

23-11-2019.

150.

Imqar hawnhekk iż-żmien kien beda jkarkar

Saqajn mingħajr żarbun malajr jittieklu

Bħal meta għażilna t-tnejn it-telgħa ’l-wieqfa

Hemmhekk ħdejn il-fanal fuq il-quċċata

Turġien għoljin id f’id u purċisjoni

Hemmhekk ħassejnas l-fewġġa qed ixxoqqna

U swar ta’ mewġ jimbaram fuqu nnifsu.

Hemmhekk nissieltu bdejna mal-ġiganti

Nogħolew ’l-fuq mis-sħab li beda jkiddna.

Iltqajna mal-allat tal-flus minn wara l-kwinti

Jinħbew, jinxtraw, jilgħabu bil-permessi.

Hawnhekk iż-żmien għaddej bla ma jitniżżel

Hawnhekk stajt toħroġ barra l-linji stretti

U toqgħod tgħix fis-sħab tal-illużżjoni.

Alfred Grech

Sao Martinho Do Porto

09/11/2019

 

F’Għajnejk Is-Skiet Tal-Jum Jiżdied.

F’Għajnejk is-skiet tal-jum jiżdied

U d-dlam tal-lejl jitbiegħed minnu,

Buffura riħ li tnaqqaf qiegħa

Jien ħsibt li stajt immiss is-ema b’idi.

Bħal ajkla bdejt nisseqqer

U nilgħab jien mar-riħ

Iżd’int malajr urejtni kif

Bejn qatra u oħra jitkellem l-univers

U kif bejn vers u ieħor

Il-ħolm ma jaqta’ qatt.

Aktarx li fuq il-ħlewwa ta’ ħaddejk

Tintilef il-qawsalla

U d-dawl ta’ elf mitt kewkba

Li ħaddieħor lanqas jara.

Għaliex imqarr fid-dell tas-sħab

Idellel il-biża’ ta’ xi ħaġa li mhix hemm

Issib sbuħija fir-raxx tal-mewġ

U l-baħar li jinbidel f’poeżija.

Xejn aktar ma jkun fieragħ

Daqs il-ħolm li qatt ma ħlomna

Daqs il-ħajja li qatt m’għexna.

Alfred Grech

19/11/2019

You Are Inimitable.

I did not want to go back

To the days of endless toil

Running into viciois circles and striving after vanity

To see whether  I could fit

Into all the things they said I could fit into.

I wanted to come here

And finish what I started

To discover where wolves breed

And to which point the sharp edges of this precipies

Extend.

Now that I have accepted

That I can have no other god but you

The distance between us

Was needed to discover who I am.

I am like running water

You are inimitable.

Alfred Grech

18/11/2019

Dirġla.

Daqs bejjiegħ tat-toroq

li jbellagħha lil min ikun

u nsir naf għax xhiex ġejt hawn.

Il-qniepen imdendla ma xra għajnejja

idoqqu trapassar għal ħajja eterna

nistaqsi għaliex għamilt dak li għamilt

u dal-ħsieb ikiddni.

Bħal għannej li żmienhu għadda

quddiem folla għatxana għal tweġiba

quddiem udjenza stramba

li qatt ma setgħet tifhem

u ma jkun xejn jekk mhemmx il-melodija

u kliemhu għandu l-għafja tal-mewt.

Dawl tax-xemx u qtar ta’ xita

fil-mergħat u f’dawk l-għelieqi

fejn iwarrdu l-figuri tad-diskors

incidente di percorso.

Bħal kavallier li għadda żmiemhu

pastur tat-tafal jew tal-karta pesta.

Kif ser noħroġ minn dit-toqba

kif ser noħroġ minn dal-ħabs.

Il-pulmuni poeżija tielgħa u nieżla ma kull nifs.

Imqar meta xebbaħtha man-natura

xorta waħda kien hemm l-id tal-awtur.

Jien kont hemm taħt isem ieħor

taħt il-ġilda ta’ kull ma nlissen.

Raxx ta’ baħar u rgħawa tal-mewt

li jaħbat mal-blat.

Bil-fwieħ tradizzjonali u rima qadima

li għandha minn tal-ġrajja tas-snin.

Issa tista’ tiktibli eleġija

f’tarf il-midfen

hemm, fejn joqgħodu jgħannu l-għasafar.

Alfred Grech

17.11.2019

Meta T-Tifkiriet.   .

Meta t-tifkriet isiru bħat-tvenvin

tar-riħ li jgħaddi bejn il-fili tal-luċelettrika

imperrċa mal-arbli fit-toroq ta’ nħawi minsija

inkella bħal karozzi mrażżna mill-freni

jwerżqu l-gomom tar-roti jgħaqqdu mal-asfalt

fit-tfittxija frenetika li tirbaħ iż-żmien

jien nibda naħseb biex nerġa’ lura għal għandek

għaliex fi  ħdanek hemm ir-risq u l-hena.

Imbagħad jiġri li nħossu t-tnejn li aħna

il-ħlewwa tirfina bħal ambrosia fuq ilsienna

biex nibdew nissugraw fuq meded ġodda

f’dawk l-inħawi fejn ħadd għadu ma resaq

inkella li minnhom għad ħadd qatt ma reġa’ lura

għaliex ma nistabrux li jista’ jkun hemm xefaq

li tiħqu ma tistax

jew li lilhinn minnu

issalpa ma tistax.

Jien imbagħad insir l-għannej

li nikteb ħafna versi b’nifsi maqtugħ

għax naf li l-pinna ma tlaħħaqx mal-ġiri tal-ħsieb

u quddiem għajnejja ma jifdallix għajr l-era ta’ ġismek

ħierġa bil-mod il-mod

mill-ilma ta’ xatt il-baħar

li qatt ma żort.

Alfred Grech

16.11.2019.

Aktar ’il-Bogħod.

Hekk ridt jien għax issa sirt tifhimni

U taf li dan il-vjaġġ waħdani fis-solitudni

Ta’ min jinħall irid minn kull ilġiem

Matul il-mixja twila

Ta farfett li tgħallem ir-ritmu

Fil-bandla tad-dwejjaq u tal-ferħ

U tal-waqtiet,

Meta mqar is-sema jiddendel

U s-sħab imissu l-ponot

Tal-qċaċet tad-dwejjaq

Tal-mewġ li jobrom

Tal-oċean li juri l-qilla tiegħu

Fuq blat li jirrifletti

Id-dawl ta’ xemx qed tinki.

Fil-ponta tal-ibgħat ponta

Dejjem hemm fanal li jwennes lill-baħħara

Li juri t-triq lil min jintilef.

Lilhinn minn hekk hemm xefaq

Li jrażżan ix-xewqat

U jmejjel il-ħolm ta’ min irid imur

Aktar ’il bogħod.

Alfred Grech

16/11/19 2019.