Il-Bieraħ Kont Narak Tassew Sabiħa.

Il-bieraħ kont narak tassew sabiħa,

Illum m’għadnix. Sirt bħal ħaddieħor.

Il-bieraħ int għalija kont misteru

Illum m’għadekx, għax drajtek.

Il-bieraħ deherli li kont naf x’irrid mingħandek

Illum ma nafx daħalli d-dubju.

Il-bieraħ kont bdejt nemmen li kont tgħidli

Illum m’għadnix għax forsi nbdilt.

Bqajna hawnhewkk it-tnejn li aħna

Fuq xatt il-parodija,

Għax nafu li jekk nagħmlu xi pass falz

Nitilfu kollox.

Alfred Grech

09/01/2017

XII.

Dawk li twemminhom ma jinħtieġx id-difna

Iserrħu l-art mill-ġabra ta’ kull biċċa,

Tal-Ħajja u mewt, u mewt u ħajja ż-żifna

Kulħadd f’tad-dellijiet is-saltna spiċċa.

Għalhekk kull mafkar kif ukoll kull qabar,

Hu biss tifkira għal min f’dil-ħajja baqa’;

Jistrieħu dawk li llum qiegħedin fis-sabar,

Ma jiġri xejn jekk l-art u s-sema’ taqa’.

Mill-fdal, sisien tal-arkeoloġija,

Tal-eqdem żminijiet nitgħallmu l-ġrajja,

Tinbena fuqhom ħafna teorija,

B’hekk sirna nafu kif imxiet il-ħajja.

Li kieku dawk li ġew m’emmnux f’ħajja’oħra

Kitbet l-imgħddi kien ikun xort’oħra.

Alfred Grech

02/10/2011

Jekk Trid Tieqaf Tistaqsi.

Jekk trid tistaqsi tieqaf

Jekk lili ma tafnix,

Minn bejn is-sħab tittawwal,

U bqajt ma tgħarafnix.

Hekk trid issir taf lili,

Mhux trossni ġo kexxun,

U l-għelm li twaħħal fuqu,

Ikun kull kif ikun.

Miniex oġġett li tmissu,

Inkella li tpinġih,

Li tagħġnu qisu tafal

U tagħmel li trid bih.

La mmur u lanqas niġi,

La qiegħed hawn ‘qas hemm,

U tista’ tpoġġi sebgħek

U tħossni ma naf kemm.

Jien lanqas kont il-bieraħ,

U għada ma tafnix,

Jekk ftaħt għajnejk tistaqsi,

Jekk rajtni m’għaraftnix.

Lil hinn minn dak li tara,

Jew dak li jista’ jkun,

It-toqol ta’ kull ħtija

Mingħajr ma tkun mgħejjun.

Lil hinn mill-biża’ t’għada

U l-għadab tal-ħelsien,

Jekk tfittex ftit is-sewwa,

Issibni kullimkien.

Alfred Grech

06/01/2017

105.

Min jaf, min jaf jekk jibda’ jgħid il-gawwi

Li jirgħa fuq il-mewġ ta’ baħar delli;

Min jaf jekk jista’ jiftaħ ħalqu ċ-ċinju

U jgħid kif kien it-temp tal-ewwel safra.

Min jaf ix-xemx fil-kjaroskur ta’ lejla

Kif tislet minn tal-jum ix-xrar ta’ tama,

Kemm dubbji, kemm stennija u ħolm li ntefaq

Fuq dahar ix-xorti tilgħab dil-partita.

Jispiċċa kollox, kollox jerġa’ jibda’,

Fuq din il-ġostra li tissejjaħ ħajja,

Bħal meta taqa’ l-borra u d-dalma tinżel,

U għada terġa’ titla’ x-xemx timbotta,

U terġa’ tagħti spinta ’l-dil partita

Biex terġa’ ddur darb’oħra mal-arena.

Alfred Grech

05/01/2017

Għad Inqumu.

Idilliku dan ngħas li nqumu minn,

U ma jkollniex iċ-ċpar ta’ fuq għajnejna,

Ix-xkiel li bih xekkluna mbagħad liġġmuna

Bil-qtar tar-ruh li trid tisfida l-beraħ,

Bibien is-sotterran u l-ħabs tal-moffa.

Ma jkunx l-irqad li jnissi l-fewġa friska,

Il-kamla li qed tgerrem bla tintebaħ,

Ma jkunx in-ngħas li għad irid ibiegħedna

Bil-ftit il-ftit miż-żelqa li niżolqu

Ġol-kjażmu tal-abbiss li qed jimmarka

Deklin ineżorabbli fl-apataija.

Ikun biss xħin dan moħħna jatrofizza,

Ġisimna bla ma nafu li sar mummja

Li ruħna trid tistejqer u trid toħroġ

Mill-gradi u ma tistax għax l-anqas ġisem

M’għandha. Imbagħad? Imbagħad ikun tard wisq.

Alfred Grech

04/01/2017

Imm’Aħjar Ma Niltaqgħux.

Imm’aħjar ma niltaqgħux

Għaliex ninqabdu f’xi ħolma żbaljata

U jaqbdu magħana ix-xakalli

U jaqgħu l-kwiekeb mis-sema.

Ikun aħjar li t-tnejn li aħna

Nibqgħu moħbijin fil-bosk fejn hemm moħbija

Dawk tal-vista qasira

U nibqgħu mingħalina qed indommu

Il-ħajja ta’ kuljum.

Ikun aħjar li nibqgħu mitlufin

Fir-rassa ta’ dil-merħla qed tfittex

Lill-alla tal-inkredulita’,

Fejn la hemm ferħ u lanqas niket

Fejn ma nżidu xejn mal-korollarju

Ta’ ġrajja ġa mitkuba.

Mingħajr ma naqsmu xejn mid-dwejjaq ta’ xulxin

Biex għada jkollna l-premju li wegħeduna.

Għax f’din in-nassa jiena waqajt

Bħalma waqgħu dawk ta’ qabli;

Nitlaq jien, ħaddieħor floki.

Imm’aħjar ma niltaqgħux

Għaliex jekk tassew iseħħ das-seħer

Din għad tista tkun il-ħrafa.

Alfred Grech

03/01/2017

Iżda’Aħjar Li Ma Ltqajniex.

Izd’aħjar li ma ltqajniex. . .

Kelli f’moħħi li niltaqgħu

Biex turini kemm taf tilbes,

Biex turini kif tħossha mara

Meqjusa ta’ sultana.

Kelli f’moħħi li niltaqgħu

Biex tħallini nkebbes dak il-bosk li jrid jinħaraq,

Il-munzell ħuxlief

Jistenna lil min ikebbsu.

Kelli f’moħħi li niltaqgħu,

Iżda kienet tkun oħra

Minn dawk ix-xeni teatrali

Ta’ reċtar spontanju

Kull meta ma nsibux

Il-vizzju li jnessina

Il-loppju li jraqqadna

Biex naħarbu l-mistoqsija.

Kelli f’moħħi li niltaqgħu . . .

Iżd’aħjar li ma ltqajniex.

Alfred Grech

02/01/2017