Hekk Biss.

Hekk biss tista’ tirbħilhom lill-allat

Mhux bil-wegħeda tal-ġejjieni

Jew bit-tama ta’ ferħ ġdid

Iżda billi tixxaħxaħ fid-dija ta’ kull waqt

Fis-sħana tax-xemx tisreġ;

Billi tirkeb il-mewġa

U titqarben bis-seħer tal-mara

Li għandek f’idejk u li laqtitek

Bid-daqqa ta’ ħarta u ħalliet

Il-marki tat-takkuna fuq il-ġilda ta’ ġismek.

Hekk bis tista’ tirbħilhom lill-allat

Bl-isfida tal-ġrajja tiegħek

Li tiżboq saħansitra dik tal-univers.

Alfred Grech

19/05/2020

Tbatija.

Meta l-piż jitqal iżżejjed

U ma tafx għa xhiex qed tgħix,

Meta r-ruħ tmil u titmattar

Tibda ttir mar-riħ bħar rix;

Meta titlob u tintebaħ

Illi Alla m’għadux hemm

Kull qaddis bid-diadema

Tistaqsiħ jismax bil-kemm,

Lill-uħux u l-baħħ jirbombja

Fil-wesgħat tal-univers,

Tibda’ ssejjaħ u tistenna

Xi tweġiba b’mod invers.

Iżda nafu li dan kollu

Huma qlajja u ħmerijiet

Għax is-sewwa u dak li nafu

Huma ġrajja li għaddiet.

Mhemm xejn għajr dak li fil-qratas

Moħħna f’għamla ta’ skultur

Jew fin-naġra li naġruna

U iss sirna bħal mutur.

Alfred Grech

18/05/2020.

Ħawwadtuna.

Ħawwadtuna u xebbajtuna

Din li nagħlqu u ma nagħlqux,

Biex l-imbierka ekonomija

Tibqa’ għaddejja u ma negħrqux.

Hemm minn baqa’ għaddej biex jaħtaf

U ma waqqfu l-ebda ħajt

U ħaddieħor baqa’ mdendel

Qisu kwadru hemm mal-ħajt.

U bl-iskuża tal-imxija

Għax li tgħid ma jiswa’ xejn,

Baqa’ jkisser, jisraq, jirkeb

U ma ġara qisu xejn.

U bl-iskuża tal-imxija

Għax ħaddieħor immutat

Ġejna qisna f’gaġġa waħda

Għal kull xejn tkun immultat.

Ma jafux x’ser jaqbdu jagħmlu

Lanqas jafu x’inhu dan

Kif se jżommu din l-imxija

Kemm se jdum dan ir-randan?

Biex min jgħum kien qed f’wiċċ l-ilma

Beda għereq u taħ ġenn,

U min kien isoff u jerdgħa

Baqa’ jġawdi u sab il-kenn.

Alfred Grech

16/05/2020

Jien Noqgħod Hawn Infaħħrek.

Nistaqsi meta jkun hemm dak in-nar

Dik it-taħrika li ma tħallinix noqgħod b’sabri

Biex il-ġiri ma jkunx tqil

Wara d-dellijiet oskuri ta’ war nofsinhar

U nerġa’ lura d-dar miblugħ

Nilgħab mal- ġugarelli ta’ moħħi

Ma nafx liem’alla kien laqgħatni

Bil-velġġa velenuża.

Illum naqilbu l-folja u nibdew

Kapitlu ġdid biex inħarsu lejn ix-xefaq

Qisu l-bieraħ qatt ma kien

U qatt ma taf it-trab li jtir mar-riħ

Fejn ser jispiċċa, bħalma lanqas taf

Kemm se ddum din il-ħarifa tagħna.

Issa telaq dak is-seħer

U hekk intemm episodju ieħor

Ta’ dan ix-xeneġġjat li jħallik miblugħ

Bl-inkonsistenzi tiegħu.

U mill-ġdid nerġgħu nagħmlu bandla

Fejn inti tkun minn fuq

U jiena noqgħod isfel.

Xejn ma jkun ġara

Jien noqgħod hawn infaħħrek.

Alfred Grech

15/05/2020

Tifkiriet.

Imqar jekk nitlef is-seħer taż-żmien

Id-dehera bikrija tibqa’ mċappsa żlieġa mal-ħġieġ

Opak tat-tifkira daħna titlajja

Jew tisseqqer fuq l-irmied u l-ġamar

Tal-imgħoddi  bħal feniċju.

Il-biża’ tal-iskanatament jisserpeġġja

Fuq il-blugħa tas-sorpriża

Għaliex jekk ma tgħaddix minnu

Lanqas taf xi jfisser il-wied tad-dmugħ.

Kwadri ta’ waqtiet mgħoddija

Imdendla mal-ħitan evanexxenti.

Bħal bżieżaq tal-arja li jitilgħu

Mid-dlamijiet ta’ qieġħ il-baħar

Vulkani fl-oċean biex jinfaqgħu f’wiċċ l-ilma.

Ħallihom hemmm bħall- kwadri mal-ħitan

Fis-sensazzjoni ta’ waqtiet

Li jgħaddu.

Alfred Grech

14/05/2020

Ħadulna t-Toroq Tagħna.

Ħadulna t-toroq tagħna

Ħadulna l-istendard

Ħallewna nħarsu ċassi

Hemm barra għar-riħ u l-bard.

Ħadulna t-toroq tagħna

Telgħulna fuq il-bjut,

U niżlu fuq ir-ramel

U ħadu wkoll ix-xtut.

Ħadulna t-toroq tagħna

Rabbew kuraġġ ta’ sur

U b’hekk serrħulna rasna

l-ekonomija ddur.

Ħadulna l-pjazez tagħna

Daħlulna wkoll fid-djar

Dan kollu taf x’ifisser

Imqar jekk ma kontx ħmar.

Iħarsu lejn in-numri

U dak li jġib is-suq

l-ekonomija tikber

imqar bil-ftit li dduq.

U ħadd mhu qed jistaqsi

Jekk din ir-roqgħa t’art

Tiflaħx tkun hekk imkasbra

Mimlija kollha skart.

Serqulna l-monumenti

U saħansitra d-din

U dak li lili u lilek

Jagħmilna lkoll Maltin.

Alfred Grech

13/05/2020.

Jekk Niġri Wara l-Friefet.

Jekk niġri wara l-friefet

Jew naqbad xi werżieq,

Jew naħfen bejn idejja

Ballun li ttiħ bis-sieq.

Inqajjem xi tqanqila

Ta’ tifkiriet li tlift

Waqtiet li ngħaddu minnhom

Li lil ħaddieħor slift.

Inkun qed nerġa’ lura

U żmien m’għadux li kien

Immiss is-sema b’idi

U l-fjuri tal-widien.

Fil-logħoba tat-tfulija

Intajjar il-ħamiem,

Jew nofoħ xi bużżieqa

u nibqa’ ngħix fis-sliem.

Alfred Grech

12.05.2020.