Int Biss.

Int biss iżżomm iż- żmien fir-radda tiegħu

Fuq dan il-karużel idur mistħajjel

F’binarji fejn iridu għad jingħaddu

L-eoni ta’ kull żmien li qatt ma beda.

Int biss iżżomm in-nifs, iżżommni nagħaqad

Dawrien ta’ rota ddur taġ-ġifġifogu

Sabiex ma nħoss it-toqol taż-żmien jagħfas

It-toqol illi jgħawweġ dahar il-bhima

Tal-ħin għaddej fir-riti u ċerimonji

B’kuruna t-tnejn f’idejna nirrepetu

Iż-żibeġ bla kulur ta’ mantra antika.

Int trid iżżomm il-mixi bla jieqaf

T’arloġġ li kull ma jmur inaqqar pawsa

Bħas-susa tas-sekondi fejn jintradmu

Tamiet u qtiegħ il-qalb, kull sensazzjoni

Tal-bhima li milwija taħt it-toqol

Trid tbus it-trab tal-art fejn għad tindifen.

Int biss, jew l-illużżjoni li kull għada

Ikun aħjar mill-lum, jew din il-mixja

Trid twassal għal spettaklu fejn jinfaqgħu

Il-bziezaq tas-sapun u  l-miti kollha.

Ma jibqa’ xejn għajr id-dawrien tar-rota

Iddur bla skossi u taħli lilha nfisha.

Insib serħan fil-mixi ineżorabbli

Tal-ħinfejn nibqa’ moħbi l-istennija

Alfred Grech

15/08/2017