31 ta’ Marzu.

Doċli, mansa u tissubixxi

Id-daqqiet tal-frosta,

Ħekk sirt ikkalpestata

F’idejn l-manigoldi ta’ bla qalb.

Għax issa drajtu s-swat

U l-istupru pperpetwat

U leħen ma baqgħalekx sabiex titniegħed

Għax min iweġġek għandu l-flus

U joffrik fuq il-mitbaħ tad-debħa

U l-għassies li għażilna biex iħarsuk

Kienu ġifa u bla sinsla

Jew konna aħna li ħsibniehom

l-invinċibbli.

Issa mhux aktar tibqa’ tfakkar l-ħelsien tiegħek

Mill-barrani O Malta tiegħi

Iżda mill-madmad tal-ħajjiena ta’ġewwa

Li għasruk u serqulek dik li huwa l-aktar għani għalik,

Ġmielek, serħek u sliemek.

Illum u f’dan il-jum mhux aktar

Il-ħelsien li konna nafu

Trid tfakkar

Iżda ddoqq il-qnienen tal-kampnari

Biex kulħadd iqum min-ngħas

U tibda l-gwerra tal-ħelsien

Mill-għadu ġewwieni li issa daħal taħt il-ġilda.

Alfred Grech

31/03/2020.

Meta l-Art.

Meta l-art issejjaħ

Is-sema jwieġeb

U jista’ jkun ukoll

Li l-bżieżaq tas-sapun

Li nonfħu flimkien

Ma jkunu xejn għajr waqtiet qosra

Iżda għandom mill-ilwien tal-qawsalla.

Lewn il-fidda xfar għajnejk

U jkellmunu bil-brillanti.

Inti għandek il-muftieħ ta’ kull xewqa

U l-univers jitbissem

Sabiex ħielsa tasal kull kelma li tlissen

Sa topgħla ’l-fuq mis-sħab

U tinbidel f’poeżija.

Alfred Grech

31.03.2020

Onfoħni.

Kemm tiflaħ ippumpjani

Kemm tiflaħ onfoħni

Bħalissa ninħtieġek daqs ir-riħ

Biex immattar ġwenħajja.

Kemm triq ippumpjani

Bħal bużżieqa li f’ħin

Jew f-ieħor għad trid tinfaqa’,

Imbagħad xħin terġa’ tiġi ħdejja

Tista’ tistaqsi sewwasew

Fejn kont sa ftit ilu.

Kemm tiflaħ ejja ħabbat,

Jekk issib il-bieb miftuħ

Idħol ġewwa

U għidli jekk qatt sibtx kenn

Kull meta jitla’ l-ajru.

Alfred Greh

30/03/2020

Kwarantina

Qed jgħidulna nibqgħu ġewwa

għax hemm barra hemm il-waħx,

għax hemm mostru lanqas jidher,

għax hemm għadu ma taraħx.

Qed jgħidulna nibqgħu ġewwa;

qed jgħodulna toħorġux,

u m’għandniex għalfejn niltaqgħu,

ma xulxin ma nitħalltux.

F’daqqa waħda kollox waqaf,

in-negozju w il-kummerċ.

Dawk li kellhom f’moħħom jagħmlu

ħafna flus kemm marru żmerċ!

Izda dawk li qatt ma jixbgħu

baqgħu xorta għaddejjin

mingħalihom xejn ma jista’

lilhom jolqot; Imkabbrin!

Iżda l-dawk ħadd ma waqqafhom

fost il-ħsara u t-tħarbit

jagħfu jbagħbsu, jagħfu jxaħħmu,

għax subgħajhom tal-qarnit.

 U min messu fis waqqafhom

baqa’ jtenni l-istess żball;

xejn ma ntebaħ bli qed jiġri:

Blokka silġ malajr tinħall.

Għax kif tajjeb jgħid il-Malti,

fl-aħħar tasal nhar ta’ Ħadd,

għax xħin theżżeż il kolonni

ma Sansun imut kullħadd.

Alfred Grech

29.03.2020.

Humpty Dumpty

U meta jiġġarraf it-torri

u kollox jaqa’ borġ

aħna noqgħodu hekk inħarsu

u nitpaxxew bid-destin ta’

Humpty Dumpty.

Aħna li qatt ma doqna

mis-sehem tar-regħba u tal-affluwenza

u qatt ma dħalna fiċ-ċenaklu

biex jieklu magħom

għax aħna zgħar wisq.

U meta tinfaqa għad dil-bużżieqa

aħna ma jkollna ebda kliem li jqawwi l-qalb

għax aħna konna minn tal-ewwel li għednielhom

li l-ebda bużżieqa ma tista’

tibqa’ tonfoħha għal-dejjem.

Alfred Grech

28/03/2020.

Dan Huwa Skiet.

Dan huwa skiet tal-iħirsa

Dan huwa baħħ li jisfronda

Xefaq li jitbiegħed

Konfini li jitwessgħu.

Aktarx li konna fuq is-sħab

Tal-allucinazzjoni

Bħal anġli li qatt ma ntebħu

Bid-daqq tat-trombi.

Dan huwa skiet li jwennes

Dan huwa baħħ li jirbombja

Xefaq li jintilef

Konfini li joħonqu.

Dan huwa żmien ta’ riflessjoni

Ninkinaw ġenuflessjoni

Bal-bebbux li jikkonfondi

Serbut nemel tilef triqtu.

Dan huwa żmien fejn għad

Irrid nqattgħu l-karti

U nerġgħu nibdew mill-ġdid.

Alfred Grech

27/03/2020

Ma Jiswiex.

Ma niswiex aktar mit-tiben

Li jittajjar maż-żiffet il-grigal

Kull meta taqra’ dawn il-versi.

Kliemek bħal ħmar il-lejl

Li jintesew kull waqt li tlissen

Kull xħin nistembaħ

Biex imbagħad nibqa’ nistaqsi lili nnifsi

Min tassew qed jgħid is-sewwa.

Hsiebi bħal peprin tlellex

Fis-sirda ta’ novembru

La jberrdu u lanqas isaħħan.

It-tqanqiliet ta’ ruħi

Imperriċhom fuq xi siġra

Għall mira tal-kaċċaturi.

Għadni nsammar fuq iċ-ċimblu

Nistagħad għal seħer in-nota

Li trid xi darba tagħmilni qaddis.

Kien hemm żmien li kont nonfoħ

F’imnifsejk u tieħu l-ħajja.

Alfred Grech

25/03/2020.