Hekk Sabiħa l-Ħajja.

Hekk sabiħa l-ħajja

Mingħajr it-tvenvin u ż-żarżir

It-tinwiħ u twerdin tal-vetturi

Tat-tħaddim tal-magni travolġenti

Li jnesuna s-sabiħ

Ta’ dak li għalih qed ngħixu.

Hekk sabiħa l-ħajja,

Mingħajr in-nugrufun u tniġġiż

F’dak kollu li nibilgħu jew li nisimgħu

Biex f’daqqa waħda ntbaħna

Kemm hija bnina l-arja pura.

Hekk sabiħa l-ħajja

Mingħajr il-ġiri u l-qtugħ in-nifs

It-tfexfix sabiex twassal u tasal fil-ħin

Inkella jittimbrawkx għażżien

U dejjem tasal tard.

Hekk sabiħa l-ħajja

Mingħajr l-iskadenzi tat-termini

Li trid tlaħħaq magħhom

U bla ma taħseb minn qabel xi trid tgħid

Hekk kif tgħix kif int imdorri

Fuq il-ponta tax-xafra li taqta’.

Hekk sabiħa l-ħajja

Meta kulħadd, kbir u żgħir

Għani u fqir jinsab imdendel

Mal-ħajta tal-għanqbuta

U jekk dik tinqata’ hemm l-abbiss

Il-bir bla qiegħ.

Hekk sabiħa l-ħajja

Għaliex hekk u hekk biss

Irridu nieqfu u nidħlu mill-ġdid fil-fosdqa

U nistaqsu lilna nfusna

Min aħna?

Alfrred Grech

17/03/2020