Ma Jibqa’ Xejn.

Imbagħad inħoss is-seħer

Bħal meta ngħaddi qribek

U nxomm ir-riħa tas-seħer

Tal-infinit.

Imbagħad noqgħod fuq il-mambar

Tal-profeta waħdi u għarwien

Inkella nimxi  fuq ir-rigi

Ta’ versi li qatt ma nkitbu.

Tibzax u taqtax qalbek tfittixni

Lili għad issibni fl-ispazji

Fejn qatt ma kont tistenna

Għax jien ferrixt matul il-mixja kollha

Waqtiet minn ħajjti

Bħal petali ta’ ward matul il-purċissjoni

Biċċiet li lewwnu u libbsu

Dak kollu li qed taħseb fuqi.

Xħin timxi bi dritt

Mal-binarji li fassalt

Fuq sħab l-għanjiet minn tiegħi

Tintebaħ li meta nitlaq

Ma jibqa’ xejn

Għajr rima skiet

Qalb l-għajjat tal-folla.

Alfred Grech

06/03/2020.