Miniex.

Miniex il-ħajt tal-kenn li qed taħsibni

iżomm l-irjieħ u l-qilla tal-kurrenti,

Miniex il-blata samma li trid fuqha

tfassal is-swar u tibni l-pedamenti.

Miniex qaddis li lilu tista’ titlob

quddiemu u taghmel wiċċek sfiq,

lanqas xi anġlu li lilek jista’ juri

mnejn għandek tgħaddi, jew issib it-triq.

Minflok jekk tħares lejja x’tista’ tara?

Xi vagabond li jterraq solitarju,

ħassieb li baqa’ qatt ma sab tweġiba

għall-mistoqsija mat-telgħa tal-kalvarju.

Jien biss għannej li saħansitra l-leħen

tilef, u dan iktar ma jgħaddi ż-żmien,

jien biss is-seħer f’dak li kont qed taħseb

li moħħok pinġa u silet minn x’imkien.

Alfred Grech

07/03/2020.