Isolament.

Hemm iżolament li jġennen lin-nies

Hemm firda suspettuża

Għaliex tlifna l-kuntatt

Ma dawk li huma tagħna

Ma qrabatna

Ma dawk li huma qribna

U hemm il-biża’

Li l-għasiesa tas-saħħa tagħna

Naqsu sew minn dak li kiellhom jagħmlu.

Hemm ukoll l-istramberiji

F’dak kollu li jingħad

Bħal min jitlaq għal rieħu

U ħadd ma jista’ jzommu.

Imqar it-riħ qed jonfoħ melodija

Mqansħa.

Taħseb ukoll fl-agħar li jista’ jiġri

U tibża titkellem dwaru

Bħal ħsieb li jaħrablek

Qabel jimmażrak

Mat-tektika tal-arloġġ

Mat-taħbit tal-qalb.

Int tista’ tistaqsi li trid

Għax kull teweġiba fiha nfisha mistoqsija

U tista’ wkoll  tgħaddi ż-żmien

Mingħajr ma tistaqsi.

Issa li bdejt tibiegħed

U tinħeba f’dik l-art li tmiss mal-oċean

Li tmiss ma-xefaq

Issa tibda inti wkoll tintebaħ

Lil lihinn minn fejn tmur tinħeba x-xemx

Hemm biss il-baħħ.

U kollox jibda jsir

Bhal dik ix-xbieha li tittradixxi

Biex twaqqa’ n-nies fin-nasba.

Alfred Grech.

12/03/2020.