Ridtek Tħares Ftit f’Għajnejja.

Ridtek tħares ftit f’għajnejja

Ridtek tħares ftit fl-abbiss

Jew tistaqsi l- mistoqsija

U taqrani kif imiss.

Ridtek tħares ftit f’għajnejja

Ridt nistaqsi jien min jien,

Bdejt inħoss is-sħana tiegħek

Kollox reġa’ għal li kien.

Ridt inħossni biċċa minnek,

Ridt nintilef fl-univers,

U ridt ngħum fil-baħar tiegħek

Ridt inħossni ftit divers.

Jiena deherli li ħassejtek

Issefsifli fil-widnejn;

Kont imnebbaħ, kollox sewwa,

Xħin ħassejtni bejn ħaltejn.

Ridt ninġarr mar-rima tiegħek,

Ja sibilla, fejn tmur int;

U ridt nisma’ x’tista’ tgħidli

Sforz il-heġġa, sforz l-istint.

Ridt inħares fija nnifsi

Jekk hux din il-verita’;

Jew inkella hemmx xi maskra

Biha nsib l-identita’.

Alfred Grech

09/08/2018