Waqtiet 1

Jien dal waqtiet naqbadhom

Bħal bżieżaq tas-sapun,

Li jġibu ferħ u dwejjaq,

Inkun kull fejn inkun.

Jien dal-waqtiet naqbadhom

Li jaħbtu ta’ kulljum,

Jinfaqgħu ġewwa wiċċi,

Ninsiehom bla ma ndum.

U minnhom għanja nagħmel

U nqum minn bejn l-imwiet,

U xejn ma jibqa’ minnhom

Għajr ftit ta’ tifkiriet.

U nerġa’ nħares lura

U nerġa nibda nduq

Il-ħlewwa li jħalluli,

U nogħola ’l-fuq ’l-fuq.

Alfred Grech

28/02/2017

Ħa Noqgħod Hawn bi Kwieti.

Ħa noqgħod hawn bi kwieti,

Ma nisma’ rrid lil ħadd,

Jirbombja dan l-istorbju

Tal-boloħ, ta’ bla għadd.

Ħa noqgħod hawn niċċassa,

Hawnhekk fil-baħħ tad-dlam,

Mingħajr ma nħares barra

Biex nifhem sew id-dramm.

Irrid li xejn ma nagħmel,

Ħa norqod bla ma nqum,

M’għandix għal xiex nitħarrek

Jew nibża’ li se ndum.

M’għandix għalfejn inħaffef

Fil-ġiri ta’ kulljum

Dan hu tal-ħajja balzmu

Li kellu jsir, mitmum.

Alfred Grech

27/02/2017

Għaliex Bqajt Naħseb Fik.

Għaliex bqajt naħseb fik,

U l-mewġ kien ġarrni miegħu?

Kontrina ma kien ħadd

U ż-żmien kien għamel tiegħu.

Għaliex ma bqajtx fik naħseb,

tfixkilt fid-direzzjoni,

Għax ħlomt il-ħolm tal-ħajja

U l-baħħ tad-distrazzjoni.

Sewqan perikoluż

Matul il-kors tal-ħajja,

Dit-triq tal-ħafna ksur

Li fiha bqajt nitlajja.

Għaliex ma bqajtx hawn ħdejja

Fix-xkiel ta’ din il-ġrajja,

It-tnejn inġorru t-toqol

Id, f’id tilgħin it-tlajja.

Alfred Grech

26/02/2017

Malinkonija tal-Poeta.

Din hi l-evanexxenza tar-ruh.

Filwaqt li l-ksieħ idallam it-turment tax-xemx mistħija,

Ir-riħ qed jonfoħ il-malinkonija tal-poeta

Li jħobb itenni l-bieraħ mimli biża’

Li jwelled it-tferfir ta’ kull filqgħodu.

Il-ksieħ tassew jinġazza,

Id-distrazzjonijiet tar-ruħ li twieldet fl-ereżija.

Imma hemm irdum fil-ħemda dellija

Li qiegħed biex jisfida  kaskati jgħannu innu ta’ mistħija.

Il-poeta jibqa’ hawn, osservatur estrem

Tal-jien ikkastigat jiġġielet f’nofs l-arena.

Dan hu desert li jifga’ saħansitra l-beraħ tal-enimmi.

Dan huwa ħabs fis-sotterran tar-ruħ.

Il-poeta jibqa hawnhekk fuq dan il-palk

Bejn it-tektik ta’ kull nanosekonda

Fl-eternita’ ta’ numru ma jgħaddx;

Jissemma’ għal kull ħoss mill-bogħod

Li jidwi s-skiet tal-ħemda

Ta’ din l-evanexxenza skonsolanti.

Alfred Grech

25/02/2017

Fid-Dawl ta’ Filgħaxija.

Fid-dawl ta’ filgħaxija

Maaxl-kwiekeb qed jintfew,

Id-dmugħ ġa beda jġelben,

Waqtiet li jintesew.

Għal wiċċ ir-rih li jinfed

Kull ħarsa u kull tbissim

Iġorrok ma kull ħolma

Jerħik mingħar tislim.

U tista’ tqatta l-paġna

Li tkun ħażżist ħażin,

U terġa’ tikteb oħra

U tkun mal-Magħżulin.

Alfred Grech

18/01/2016

Mal-Bieb tal-Kamra.

Għaliex ġejt iddisturbajtni

Xħin kont waħdi, kkonċentrat

Int ġejt u fxiltli l-boxxla

Qisek wieħed iddisprat.

Kun af ħaġa ħabib tiegħi,

Min bi kwietu hekk ħallieħ,

Għax jekk darba dħalt f’dinjietu

Ħadtlu aktar mill-mistrieħ.

Għax jekk wieħed jixbaħ lili,

Joqgħod waħdu jkun irid

Ma jridx min jidħollu f’ħobbu

Ma jridx min taħwid iżid.

Għalhekk int, jekk hemm xi drabi

Il-leblieba għad tiġik,

Biex tħabbatli, u l-bieb tiftaħ,

Aħseb ftit. Tieħix għalik.

Alfred Grech.

26/10/2011

Jiena.

Jiena li b’dawn il-versi ninbni qiegħed

Piramida li tibqa’ għal wara mewti.

Jien, li norqom u ninseġ fuq it-tila

Ta’ ħolm u tixbieħat biex xi ftit ninsa’

Li din biss illużżjoni u mhi xejn aktar,

Ibbalzmat u marsus ġo dawn il-versi

Li għandhom mil-lampik ta’ fwar in-niket,

Uġih ta’ min irid ta’ kull filgħodu

Jibda mill-ġdid. Iġerbeb ġebla għat telgħa!

Jiena li b’dawn il-versi li qed nikteb

Nagħti xhieda ta’ ruħ imbarazzata,

Li għadni bħal ħaddieħor qiegħed nagħraf

Li dan mhu xejn għajr xejn u mhu xejn aktar,

U ħolm li qatt ma kien u li tmiss b’ idek.

Jiena li b’dawn il-versi rrid xi darba

Ninsa’ minn fejn għaddejt, minn fejn ridt ngħaddi

Wara li tkeċċejt minn fuq olimpu,

U nieżel bqajt nitgerbeb daqs Hefestu,

Tiġini t-tentazzjoni nibqa’ ngħanni,

U nikteb, u ngħanni għall-dejjem ta’ dejjem.

Din hija t-tentazzjoni ta’ kull darba

Li nqum u nibda nħoss in-nuqqas tiegħek,

U wara li nintebaħ, niġi f’tiegħi

Int tgħid li jien kattiv u ta’ qalb iebsa.

Alfred Grech

22/02/2017.

ien Hu x-Xejn..

Jien hu x-xejn illi qatt ma jitkellem,

Li narak hekk mitluf ġewwa l-ħsieb.

Jiena r-ruh illi qatt ma tispiċċa

Fis-silenzju nħabbatlek mal-bieb.

Jiena s-serħ kull xħin tfittex li taħrab

Mill-istorbju tal-folla u l-għajjat,

Xħin lin-nervi tintona mar-ritmu

U ssib ruħhek ankrat fuq il-blat.

Jien l-ispirtu tal-għana ferrieħi,

Niġi ninbxek bla ħin u bla waqt.

Jien nimliliek in-nifs bl-arja pura

U npinġilek qawsalla kif xtaqt.

Jiena l-leħen ta’ spirtu ferrieħi,

Jiena r-ruh illi l-mewt ma tafhiex,

Jiena l-qawwa li timla’ kull ħlejjqa,

U jekk taqta’ ma nafx tarahiex.

Jiena l-għana li jgħannu l-poeti,

Jiena l-leħħa ta’ berqa bla ragħad,

Xħin wasalt lanqas taf fejn kont sejjer,

Ix-xintilla li ntqajjmek mir-rqad.

L-illużżjoni ta’ dak illi seta’,

’Mma fid-dinja u fil-fatt qatt ma kien,

Jew li kien, iżda telaq u ntesa’,

Jew xandruh bħal aħbar kullimkien.

21/02/2107

Hawnhekk.

Hawnhekk malajr inħoss li jien barrani,

Nistona, u xejn ma noqgħod mad-dintorni,

Relitt ta’ żmien il-qedem li jispikka,

Kulħadd madwari jdur, qatt ma raw bħali.

Għalik għad nerġa’ nqum mir-raqda twila

Dir-raqda tal-bellus u ħolm tal-pannu,

U ma niktibx għalik biss poeżija,

Inti li llum qed tħossok il-mirbuħa.

Niktiblek poeżija wara l-oħra,

Inti li sfahjt bla tama u tlif is-sabar,

Imqarr bil-passi ta’ fekruna noqrob

Sa nasal ħdejk bid-dawl tas-solitudni.

Alfred Grech

20/02/2017

115.

Int tibqa’ f’dad-deżert mingħajr konfini,

Il-bogħod min-nies tad-dinja u kif jaħsbuha,

Ħajjiet ikkuntemplati u ta’ passjoni,

Taħdit li drajt nisimgħu fuq l-imħadda.

U xorta bqajt int l-oasi tal-ħlewwa,

L-għarix fejn tista’ ssib il-kenn kull xewqa,

Għajnejja jħarsu lejk bħal ta’ poeta.

Mat-tifkiriet int tibqa’ hemm inkullata.

Ta’ wċuħ li darba dawwlu mogħodijietek,

Filwaqt li jien imdawwar b’din il-ħemda

Ta’ estasi li ttenni litanija,

Fil-ħemda li tinfirex qalb il-weraq,

Miksura biss mill-ġwienmaħ qed iperpru

U kollox bħal filmat li konna rajna.

Alfred Grech

18/02/2017

Għajnejk Gwarniċ.


Għajnejk gwarniċ f’pitazz
nofs wiċċek bid-dell fuqu
mhux tħares lejja fiss
miftuha beraħ
qed tħares fejn hemm ix-xejn
hemmhekk fejn m’hemm xejn x’tara;

Jew qiegħeda taħseb
li dak l’għaddej minn moħħi
hu ferrovija
l’għad trid iġġorrna t-tnejn
lilhinn mill-kwiekeb.

Jekk għadek bejn ħaltejn,
ma jimġurtax, jien nibqa’ hawn nistenna.



Alfred Grech
20/12/2015

Mingħajrek.

Mingħajrek ma stajtx noqgħod

Ukoll jekk id-distanzi ta’ bejnietna

Żdiedu,

U int m’għadekx tidhirli

Liebsa l-mant tal-kwiekeb.

Mingħajrek ma stajtx noqgħod,

Ukoll jekk x’minn daqqiet

Idoqqu smajt l-iżveljarin,

Taħkimni qed nistaqsi lili nnifsi

Hawnhekk jien sewwasew

X’ġejt nagħmel.

Mingħajrek ma ngħaddix,

Ukoll jekk m’inti xejn

Ħlief vizzju seduċenti.

U nibqa’ nistaqsik tasseww

Int min inti.

Alfred Grech

17/02/2016

Oqgħod Hemm.

Oqgħod hemm

Ma dawk il-ħwejjeġ l-oħra

Li ma nifhimx

U għid kemm trid li lili

Ma tafx kif qed tarani.

Oqgħod hemm,

Hawnhekk le tersaq

Hawnhekk hu għalqa għammiela

Fejn jinbtu ħafna dubbji.

Oqgħod hemm

Ma dak li lanqas tmissu

Biex lili jiġu jġorru x’imkien ieħor.

Oqgħod hemm

Tkun int il-mistoqsija

Ma dawk il ħafna

Li qatt ma stajt inwieġeb.

Għax issa wkoll ninsab f’taqbida

Ma dak li lanqas nara.

Alfred Grech

16/02/2017

Xi Minn Daqqiet.

Xi minn daqqiet jien naħsbek illużżjoni

Inkella jien ninbidel f’elf haġ’oħra,

Biex nilbes għal waqt wieħed dik il-maskra

Li taqbel mal-kuluri tal-qawsalla.

Biex nersaq lejk xi ħaġa qed tiġbidni

Imm’inti ta’ kull darba tinbuttani

U jiena nerġa’ lura nirrifletti

X’inhu li jġiegħlni ngħidlek bla ma nfissru.

Alfgred Grech

15/02/2017

Daqskemm Ninsab il-Bogħod.

Daqskemm ninsab il-bogħod

Daqshekk inħossni mbiegħed

Inħoss li mhux qed hawn

Ta’ taħti qed jitriegħed.

Daqskemm inħossni waħdi,

Daqshekk tonqosli l-ħtieġa,

Ninqasam f’elf mitt biċċa

U nidher minn ġol ħġieġa.

Daqskemm ninsab il-bogħod,

Daqshekk is-sensazzjoni.

Fuq xifer fejn tispiċċa

Kull firda u distinzjoni.

Daqskemm ninsab il-bogħod

Daqshekk inħossni qribek,

Għalkemm jien ma nafekx,

’Mma naf li ser insibek.

Daqskemm ninsab il-bogħod,

Qed tikber id-distanza,

Bejn dak li hu magħruf

U dak li jtik speranza.

Daqskemm ninsab il-bogħod

Qalb ħafna nies distinti,

Iċċarrat dak li star,

Tistaħba wara l-kwinti.

Tkun taf x’hemm fuq il-palk,

Min huma wkoll l-atturi,

F’teatru tal-assurd,

Fejn tara biss bravuri.

15/02/2017

114.

Is-skiet hu ftit diffiċli biex togħmodu.

Fis-skiet issib tweġiba għall-mistoqsija.

Jien nimxi b’pass ta’ nemlu biex nitakar

U noqgħod nirrifletti fuq li tgħidli.

Hemm jinbqgħu dawk id-djar li fihom għexna

Ukoll jekk għad biż-żmien jibdew jiġġarfu.

Dak kollu li għamilna jibqa’ mħażżeż

X’imkien fil-baħħ fejn għadek tista ssibu.

U jekk jien naħrab ħarba biex nistaħba,

Ikun biex ngħix kulljum bħal qisni f’ħolma.

U kemm il darba nbiddel il-bandiera,

Biex nara kif inhi x-xaqliba l-oħra

U t-taraġ  hekk nitilgħu, tarġa, tarġa.

Nixtarr mistoqsijiet li kont tagħmilli.

Alfred Grech

14/02/2017

113.

Xħin ma tibqax int lili tirrifletti.

Noqgħodu ma nistgħux fuq qoxra waħda.

Għalhekk ukoll x’aktarx li qatt ma ltqajna.

Jien noqgħod kont niċċajta għax ridt inbiddel.

Imm’ ara ftit, għax baqa’ xejn ma nbidel.

Tista’ tmut, għax il-ħajja bla tifsira,

’Mma lilek irrid nieħdok bil-bagalja

Li ġġor miegħek; għalkemm il-valiġġi

Xi minn daqqiet insibhom tqal iżżejjed.

Xħin konna għal għonq it-triq it-tnejn li aħna

Deherli li kien għalxejn; xħin bdew iċapċpu

Jiena intlift: kien kollox milli jidher.

Int sabiħa xħin jiena nkun nixtieqek,

Imbagħad issir duħħan jew bħahom kollha.

Alfred Grech

13/02/2017

Quando Non Mi Rifletti Piu’

E’ quando tu non mi rifletti piu’

che noi non possiamo stare insieme.

O forse, ecco perche’, non ci siamo mai incontrati.

Facevo tutti quei scherzo, perche’ volevo cambiare Marcia,

Ma vedi? Purtroppo nienete e’ cambiato.

Si puo’ morire anche

perche’ la vita non ha piu’ senso.

Ma io devo prenderti con il bagaglio che porti,

anche se’ le tuo valigge diventano spesso pesanti.

Quando camminavamo insieme

avevo l’impressione che tutto e’ stato inutile,

e che anche quando mi applaudino

tutto sembrava meno chiaro.

Saresti diventata anche bella come gli altri

fino a quando io ti volevo.

Alfred Grech

12-02-2017

112.

Imdendel kollox b’ħajta tal-għanqbuta

Bħall-ħajja li t-tnejn sibna ruħna fiha.

Tiġini t-tentazzjoni li nċempillek

Għax ma din il-melodija rabat qalbu

L-għannej. Imbagħad fil-ħemda naħrab ħarba,

Biex niġbor kull tqanqila f’din ir-rabta.

Fit-tul, fit-tul ir-raqda tal-poeta

U bħaż-żernieq l-irxoxt minn qalb il-weraq.

Tinfirex ma kull pass tas-sebħ ir-riħa

Fi twapet bla kulur ta’ dan il-wileġ..

U jien ma ngħidlek xejn għax nibqa’ mbellaħ,

U jiena xorta waħda nibqa’ nħares

Lejn dehera  alluċinanti u indiskreta

U nibda nħoss il-bews ġej fuq xuftejja.

Alfred Grech

11/02/2017

Jekk Dawk Li Qed Jistaqsu.

Jekk dawk li qed jistaqsu

Jibgħatu għad għalik.

Taħsibx li għad bi kwietek

Xi ħadd ser iħallik.

Jekk dawk li qed jistaqsu

Ifittxu l-verita’.

Ix-xempju tal-ġustizzja,

Inkella għall–kurżita’.

B’morali kwalunkwista,

Inkella mal-kurrent,

Ta’ ġurnalisti skomdi

Tgħallmuh id-dramm bl-amment.

Fuq dawn in-nies iserraħ,

Dawk li jinterrogaw,

Il-qawwa tas-setgħana

Li magħhom ninnamraw.

Alfred Grech

10/02/2017

Jekk Taqbeż Minn Fuq Ix-Xifer.

Jekk taqbeż minn fuq ix-xifer, hemm il-baħħ

Ja mara tat-tempesti;

Jekk l-arpa ma tmissiex, l-oħrajn ma jistgħu qatt

Iduqu ftit mill-benna li tinżel bħal għasel fuq ix-xuftejn..

Ikraħ l-ajru u mdallam is-sema

U l-baħar inkurlat qed jgħażżaż sninu.

Imm’inti tibqa’ ttir fil-glorja tiegħek

Bil-ġwienaħ ta’ gawwija li tisfida l-art u s-sema,

U terġa’ lura.

Għoli, għoli wisq il-preċipizzju

U kbir wisq il-kjażmu l-hemm jifridna.

Xħin il-mixja lejn x’imkien issir hi d-destinazzjoni

Inħoss li nkunu tlifna,

U jkun baqgħalna biss is-sensazzjoni.

Meta nibda nħares lejk bħalma jħares lejk ħaddieħor

Inti tintilef fil-misteru. . .

U jien inkun tlift il-ġlieda tal-mewt u ħajja.

Alfred Grech

09/02/2017

Il-Bogħod Li Hemm bejnietna.

Mhix qed tasallek sa mniffsejk

Dir-riħa li mhi xejn għajr perċezzjoni,

Biex tislet minn ġo ħobbna s-sentimenti

U s-skiet ta’ dejjem?

Jien issa priġinier fi ġnien li ħloqtli,

U gbart il-ward li sibt sabiex infewwaħ

Kull rokna ta’ ħajjitna.

Int sirt tas-swied il-qalb il-werqa

Tittajjar fuq il-wileġ u l-praterji.

Il-qamar libes libsa u qed jindokra

S-sensazzjonijiet li tlifna

U l-kwiekeb qed jiddandnu u ma jindunawx

Bil-bogħod li hemm bejnietna.

Kull kantuniera tfisser tappa ġdida

F’dil-mixja l’għad trid twassal x’imkien ieħor

Lil hinn mix-xifer.

Kull leħħa dawl li tidher qed naħsbuha

Il-beraq tal-allat; id-dawl tad-dinja.

Hekk jien nixtieqek bħalma lmaħtek,

Ma tinqabadx . . .

U taf tiskappa n-nasses kollha tan-nassaba.

Kull xħin inħares lura magħad nintebaħ

Li l-bogħod li hemm għax konna nimxu.

Alfred Grech

08/02/2017 

Oħorġu Għidu ’l-Poplu.

Oħorġu għidi ’l-poplu

Feħemuh kif issibuh,

Għidulu kif tagħmlulu,

Tmexxuh bla ma turuh.

Għidulu kif issalbu

Qaddejja tal-Istat,

Toħorġu mbagħad tiftaħru

Kull ħtieqa kif tkun ġrat.

Qaddejja tal-ġusrizzja

Li ssibhom kullimkien,

Toħorġu ’l-far mit-toqba,

Fin-nassa ’l-min kien kien.

Għidulu lil dal-poplu,

Għidulu minnufih

Biex jibqa’ jemmen fikom

U jorqod fil-mistrieħ.

Li temmnu fil-miljuni,

U tfasslu kull proġett,

B’xi wiegħeda alluċinanti

Li tħalli wkoll l-effett.

Oħorġu għidu ’l-poplu,

Min intom sewwasew

Ilbistu l-ġild ta’ nagħġa

U bqajtu lpup minn ġew.

Alfred Grech

07/02/2017

Dan Hu Traġitt.

Dan hu traġitt fid-dlam minn ponta s’oħra,

Jew taraġ illi nżiltu kemm il-darba,

Dan huwa vjaġġ li jiena qatt m’għamiltu

Dan hu diskors ta’ min ried jaħrab ħarba.

Għad jgħaddi ż-żmien u jibqa’ biss tifkira

Ta’ dan l-uġigħ, il-qtigħ il-qalb u s-saħna

Ta’ dak il-ħin fid-dell tas-simulakru,

Biex forsi nsiru nafu żgur min aħna.

Min aħna ma nafux! x’għallmuna nafu,

X’għallmuna biex fin-niċċa nsibu postna,

Għall-ordni nobdu qisna nagħaġ fil-merħla,

Ninġarru mill-kurrent kull min ġie fostna.

Alfred Grech

06/02/2017

Għalhekk Dil-qalb Ma Tista’ Tħobb Qatt Aktar.

Għalhekk dil-qalb ma tista’ tħobb qatt aktar,

Għaliex iġġorr it-toqol tal-valiġġi

Ta’ vjaġġatur li kull ma jmur jitbiegħed

Mill-ħsejjes ta’ kulljum imprevedibbli.

Għalhekk dil-qalb ma tista’ tħobb qatt aktar,

Għax għadha ġġorr l-imgħoddi fuq spallejjha

Għax l-imħabbiet ta’ qabel kienu vojta,

Għax dak li deher sabih u trasparenti

Ftit wara deher li ma kien xejn ħlief żlieġa.

Għalhekk dil-qalb ma tista’ tħobb qatt aktar,

Għaliex il-biża kbir li tista’ tfalli,

U tidħol fil-binarji tar-rutina

Li tifga l-ġenju, u s-seħer tas-sorpriża.

Għalhekk dil-qalb ma tista’ tħobb qatt aktar,

Inħarqet kemm il-darba fuq gradilja

U kienet kemm il-darba hi stess il-vittma

Ta’ twemminha. tal-ħares stess li ħolqot.

Għalhekk dil-qalb ma tista’ tħobb qatt aktar,

Għaliex l-aljenazzjoni qed tnessiha,

Għaliex m'obdietx is-sejħa tas-sibilla,

Għaliex l-għannej infexx fil-melodija

Biex jisma’ s-skiet tal-infinit u l-ħemda.

Alfred Grech

05/02/2017

Għax Jista’ Jkun.

Għax jista’ jkun li ħadt għalik xħin tlaqt bla ma sellimtlek,

Inkella għax ma żammejtyx l-appuntament li kellna.

Kun af li dħalt fis-saltna tas-silenzji,

Fejn post ma hemm għal ħadd, ħlief għal min jaħfer.

Int sirt dik l-emozzjoni li mank tħossha,

Li dak li jkun irid bil fors juriha,

Bħal meta tmur xi funeral u s-sogħoba li tkun qed turi

Mhuwiex tassew li tkun qed tħossha.

U jista’ jkun li hekk aħjar,

Għax jekk ma tafx fejn inti sejra,

Tintilef ma tistax.

Bħal dik id-dagħjjsa ta’ bla qlugħ u ta’ bla mqadef.

In-nawfragat ikun ser jagħmel xi skoperta.

Waqt li kont miexi f’dawn it-toroq intriganti

Ħassejt mill-ġdid ir-riħa tat-tfulija

Jidhirli wkoll x’imkien bdejt nisma’ leħnek

U ntbaħt li l-innoċenza qiegħeda tħares

Mill-kwadru ta’ kull tieqa.

Staqsejtni jien x’qed nagħmel!

Jien mhu qed nagħmel xejn li hu ta’ fejda,

Xtaqt nagħmel dak l’għalih mhux ser nitħallas,

Għax issa l-waqt. Għax issa kull ma għandi.

Alfred Grech

04/02/2017

Twelidna Lkoll Ilsiera.

Twelidna lkoll ilsiera

U nieħdu ħafna żmien

Sabiex ix-xibka nqattgħu

Li ddawwar kullimkien.

Ix-xibka tifrex ħafna

U b’morsa tal-ħadid,

Ixxekkel moħħ kull wieħed

U tobdi bla ma trid.

Biex toħroġ minn ġo morsa

Ta’ ħafna liġijiet,

Tat-taxxi u tal-morali,

U ħafna ħmerijiet.

Biex tibda taħseb b’moħħok,

U tagħmel affarik,

Tgħidx kemm trid taħraq andar,

U l-għejja tagħmel bik.

Biex tibda taħseb b’moħħok,

Tkun taf il-verita’,

Ma tkunx il-perċezzjoni

Li ttik is-sigurta’.

Ta’ kliem imqit u żibel,

Tgħajjir u tfih ta’ tajn,

Il-wirt ta’ min jaħkimna,

Biex nagħmlu bħall-oħrajn.

Sakemm għad hemm il-ħajja,

U għadna mal-ħajjin,

Ħa nidhru nagħmlu bħalhom

Ħa nibqgħu magħfusin.

Alfred Grech

03/02/2017

Il-Lejla Rġajt Ma Ġejtx Infittxek.

Il-Lejla rġajt ma ġejtx infittxek

Taħt il-fanal tal-katuniera,

Fid-daħla tal-isqaq mudlam

Li jagħti għal ġol baħħ ta’ ruh qed tfittex

Il-bandla tagħha.

Il-lejla ma ssammajtx għaż-żiffa għaddejja

Minn taħt it-tieqa tħabbar l-agunija,

Iż-żiffa ġejja, ġejja u qatt ma tasal;

Għaliex għalkemm għal ftit,

Sbuħitek tibqa’ għall dejjem.

Il-lejla jien stajt qbadt ma waħda ġdida,

U qagħadt ninnamra magħhha bla ma nindem,

Mingħajr biss ma tintebaħ fejn kont qiegħed.

Għax inti minn għalik li qiegħed hawn

Li noqgħod nistenniek taħt din it-tieqa.

Imm’issa naf li f’ħin jew f’ieħor int tintebaħ

Li dan mhuwiex ħlief ħabs ta’ ruh marida.

Min fejn xi daba rridu t-tnejn noħorġu.

U dak ikun iż-żmien li inti l-inqas

Tkun tistennieni. . .

Imbagħad tkun dik tassew il-melodija

Li rrid ngħannilek.

Alfred Grech

03/02/2017 

Mhuwiex Għax Ma Nħobbokx.

Mhuwiex għax ma nħobbok, li rġajt ġejt lura,

Mhuwiex għaliex b’għemilek ħadt għalija,

Iżd’hu għaliex hekk f’daqqa waħda ntbaħt li konna

Dieħlin it-tnejn bħal ferrovija ġewwa mina,

Jew sqaq mudlam li fih jien kont il-darba,

Weħilna fil-binarju

Tal-ħajja ta’ kuljum u tar-rutina.

M’hemm xejn daqshekk li huwa soffokanti

Għalija, kull xħin nintebaħ, illi għada

Se nerġa’ nqum filgħodu u nerġa’ nagħmel

Kull pass l’għamilt illum l-għamilt il-bieraħ.

U x’minn daqqiet, nixtieq il-faraġ tiegħek

Migħajr ma mmissek.

Alfred Grech

02/0202017

Jekk Din Mijiex Ħlief Passeġġjata.

Jekk din mhijiex ħlief passeġġjata

Dan jista’ jkun il-vjaġġ tan-nostalġia,

Jekk mhuwa xejn ma jimpurtax

Inkun qed ngħaddi ż-żmien bħal ħafna drabi.

Inkun qtajt il-biljett biex nibqa’ barra.

Dan hu pajżaġġ idilliku fi ħrafa

Li nafu sew u fiħ trabbejt sa mit-tfulija.

Din hi veduta li tgħallimt u li għajnejja

Jistrieħu fuqha.

It-tqanqiliet taż-żiffa mill-grigal

Iqajjmu freneżija,

Nixtieq nibgħatlek bewsa fuq kull mewġa

Imm’inti tibqa’ hemm bla ma tifhimni.

Dal-ħsejjes huma ħsejjes li tant drajthom

Tal-qniepen qed isejjħu lill-fidili.

U jekk qed tistqsini jien min jiena.

Ma jiena xejn, irrid li noqgħod hawn bi kwieti . . .

Imbagħad bdiet nieżla x-xita u sfratta kollox.

Alfred Grech

31/01/2016