Kull darba li tgħidli biex naqbeż.

Kull darba li tgħidli biex naqbeż:

Jien nerġa’ lura.

Kull darba li tnewwili jdejk

Jiena nitħajjar.

Il-passi li mexjin lejn fejn se jwassluna?

Aħna li drajna l-marċ,

U r-ritmu tal-katuba,

Nisfuljaw dan l-univers,

Bħalkieku kien xi warda.

U l-għada jrid għajnjena biex jinqara.

Min jaf ma xiex nitlaqgħu waqt li nimxu

Għax hemm il-kukkudrilli f’qiegħ ix-xmara.

Alfred Grech

16-08-2014

Stennejtek.

Jien lilek stennejtek

Fuq l-irdum tat-tqanqiliet,

Fil-bogħod li bdejt inkejjel

Bejn dak li xtaqt u dak li seta’ kien

Bejn qabza’u oħra ta’ kull waqt

Kif hekk ħassejtniu drabi oħra..

Jien stennejtek

Fuq qċaċet il-mewġiet li  b’ritmu għami

Bdew jisfidaw il-ġebel għoli

Ta’ dak li jien kont naf iddekretat minn qabel.

U jien ma kelli ebda għażla

Ħlief ngħix dil-ħajja wisq ugwali

Bit-tama li dix-xitwa tgħaddi

U tgħaddi malajr.

Jien ġrejt warajk

Tul is-sqaqien ta’ swied il-qalb

Tul il-wesgħat ta’ delużjoni

Ta’ dak li kont qed twegħedni

Li ma kiern xejn għajr maltempata

Li għada għaddejja.

U issa li r-rebbiegħa ma tfattxatx

U t-tieni miġja tiegħek għada mbegħeda,

Tgħid għad ikun il-baħħ

Ta’ meta nkun fi ħdanet li jsalvani?

Stennejtek, u fuq li stennejtek.

Alfred Grech

30/07/2016

Hawn Għadni.

Hawn għadni, mintix tara,
Hawn għadni fuq din l-art,
Niġġieled ma min jiġi
Nitmiegħek ġo l-iskart.

Hawn għadni, hawn niġġerra,
Fejn qabel iġġerrejt
Fit-toroq tal-irħula,
Imm’issa nħossni għajjejt.

Inħoss li f’din  il-gżira
Din l-art li naf tassew,
Titbiegħed qegħeda minni
Ma ħbiebi li ntesew.

U baqa’ jien f’dir-roqgħa
Imdewda bid-dubbien
Intenni litanija
Ta’ dak li seta’ kien.

Alfred Grech
07/08/2015

Tiftakar kemm il-darba?

Tiftakar kemm il-darba
Infittxek ġejt bil-lejl,
Interraq dawn it-toroq
Fil-wisa’ ta’ bla kejl?

Tiftakar kemm il-darba
Inffittxek ġejt mill-qrib,
Fuq l-għolja mqaddsa Tiegħek
Imqar xi xrar insib?

Tiftakar kemm il-darba
Dil-wegħeda trid isseħħ,
Għajnejja qlajt inħares,
Fil-beraq qed ileħħ?

Illum għamiltu żmieni
Għax xewqti ma qtajtiex,
Bilfors irrid nammetti
Li ħsibt li kien, mhuwiex.

Għax dort id-dinja kollha,
U dortha dawra mejt
Jekk jien kont naf xi darba
Mnejn tlaqt, illum insejt.

Alfred Grech

27/07/2016

Mhux kliem jorbotni mieghek

Mhux kliem jorbotni mieghek,

Mhux leħen, mhux il-ħoss,

M’hemmx ritmi għaġġelija

Kull xħin nistkenn għar-rdoss.

Hemm fewġa ta’ fl-għaxija

F’das-skiet ma jaqta’ xejn

Tqanqila tfisser tewba

F’dix-xibka tagħna t-tnejn.

Ma nafx kif ser infisser,

Għax kliem hawnhekk ma jgoddx,

Jgħodd seħer il-misteri

Imqajjem, ma torqodx.

Hawnhekk tgħodd biss it-telqa,

Li tkeċċi wkoll kull ħsieb,

Iċ-ċaħda tal-Jien kburi,

Jistenna wara l-bieb.

29/07/2016

Issa li ħarsti mielet.

Issa li ħarsti mielet

Malajr qabadni n-nagħas,

Kif ngħidlek x’għandi f’qalbi,

U dak li jweġġa’ r-ras?

Issa li lanqas nobsor,

Issa ma jimpurtax,

Darb’oħra ħares lejja

U għidli jekk taqrax

X’inhu li qed iħeddel

Il-mixi fuq quddiem

Is-serħ tal-moħħ il-biża’

Li nista’ ngħix fis-sliem.

Alfred Grech

28/07/2016

Tu Sei.

Tu sei quella che volevo

Non per quello che si vede …

Il corpo e solo una coperta

Di quello che sta dentro.

E’ li che voglio essserci

Perche’ ti posso comprendere

Perche’ dentro sono pochi

Che possono leggere

E mi vergogno

Quando non posso guardarti

Diritto negl’occhi

E dirti quello che

Voglio dirti.

Alfred Grech

26/07/20165

Mitluf.

Bħal meta tfittex skuża

U mbagħad ma tagħmel xejn

Bħal meta tkun mistieden

U lanqas taf għalfejn.

Bħal meta tibqa’ mbellaħ

U lanqas taf għaliex,

U lanqas kelma waħda

Ma tlissen u għal xiex.

Bħal meta taqta’ xewqtek

Met’anqas għadu jgħodd

Dak kollu li xtaqt jiġri

U l-ebda bir ma jrodd.

Jien hekk minn dejjem nafni

Mitluf ġo labirint,

Hu agħar li jkolli nagħżel

Li jegħeleb hu l-istint.

Kien żmien fejn xtaqt xi anġlu

Talinqas juri t-triq,

Fanal f’tal-lejl id-dalma

U nasal fejn nixtieq.

U sibt li wara kollox

Dan hu tassew ħelsien

Li xi daqqiet tiżbalja

U tispiċċa fl-isqaqien.

Tistaqsinix liem’hija

It-triq, għax jien mixgħuf,

Għax jien inħossni bħalek,

Għax jien ukoll mitluf.

Alfred Grech

26/07/2016.

Fuq Ix-Xurbebb.*

Hawnhekk il-barka t’Alla,

Il-qawwa tal-ħolqien,

Il-fwieħa li tinfirex

U timla kullimkien.

U tista’ tibqa’ sejjer

Mal-blat ta’ kull kulur,

Max-xifer ta’ rdum għoli,

U tista’ tibqa’ ddur.

Hawnhekk spettaklu ieħor

Jinbidel ta’ kuljum,

Il-ħoss qalil tal-baħar

Fis-skiet bin-nifs miżmum.

Hawnhekk ir-ruħ tittajjar

Il-bogħod mill-ħafna ġenn

Ta’ nies ma tafx x’ser tagħmel,

Hawnhekk hawn ftit tal-kenn.

Hawnhekk sar kollu tiegħi,

Safejn trid twassal l-għajn,

Passaġġi ġol-għelieqi

Li jsallbu mal-oħrajn.

Hawnhekk ħadd mhu se jlumek

U tista’ tgħid li trid,

Xi serp minn taħt xi blata

Jiskappa bħal għafrid.

Hawhekk il-beraħ jifrex,

Hawn kollox qed għal kwiet,

Hawn m’hawnx minn jista’ jaħtaf

U jitfa’ biss fil-bwiet.

U lanqas min ipatti

Għalxen, jew għax kattiv,

Il-ħsejjes infernali,

Bl-istorbju awdjoviżiv.

Hawnhekk id-dinja tieqaf

Hawnhekk jirrenja s-sliem,

Hawnhekk m’hawnx min qed jirfes,

Hawn kalma kullimkien.

Hawn biss iż-żiffa tmelles,

Ir-riħa tal-busbies,

Il-paċi tan-natura,

Hawnhekk il-bogħod min-nies.

Hawnhekk jien nerġa’ niġi

Għax jiena ma rrid xejn

Ħlief noqgħod ftit bi kwieti,

Għax ngħaġġel m’hemmx għalfejn.

Alfed Grech.

25/07/2016

* Ix-Xurbebb huwa pajżaġġ sabiħ li jagħmel parti minn Kercem, raħal twelidi.

Tfittxija.

U dit-tiftixa kollha

Xi darba għad turina

Is-sejba li m’hawnx bħala

Għal dak li qed jifnina.

Infittxu bla ma nafu

Infittxu bla ma nsibu

Infittxu, inkomplu nfittxu

Nitilfu  dak li nġibu.

Ħajjitna kollha nfittxu

Mingħajr ma biss mifhmuha

Dil-ħajja bla ma nafu

Xi darb’għad nitilfugħa.

Infittxu, nkompli nfittxu,

F’kull post li fih fittxejna

Quddiemna u manka nilmħuha,

Hemm kienet qabel ġejna.

Alfred Grech

23/07/2016

Inti Li Kemm il-Darba.

Inti li kemm il-darba

Għasarthom bħal lumija,

Biex ħadt li ridt mingħandhom

Imbagħad spiċċaw mal-bqija.

Inti li kemm il-darba

‘L-fuq mis-sebgħa sema

Għollejthom kemm il-darba,

Ħallejt in-nar jinħema.

Sal-ġenna fl-art wegħedtielhom,

Imbagħad ħallejthom jaqgħu

Mingħajr m’hemm xejn jilqagħhom

Bħal bżieżq li jinfaqgħu.

Inti li kemm il-darba

Għedtilhom ser tinbidel,

Li mhux ser tidneb aktar,

Imbagħad spiċċajt fiż-żibel.

Inti li kemm il-darba,

Il-ħsieb bħal ferrovija,

Ħarist u rajt fil-mera

Waqajt għall-istmerrija.

Inti f’salib it-toroq

Staqsejtha kemm il-darba

Liem’ hija t-triq it-tajba

U sibt li kienet ħarba.

Inti li jista’ jkollok

Is-saħħa u l-burdata,

Tixxabbat ma ħajt wieqaf

Sa togħola sal-quċċata.

Issib li ruħek ħarġet

Bdiet togħola ‘l-fuq mill-ġisem,

Għalkemm tinsab fil-merħla,

Tinħtieġ il-lejl biex tifhem.

Alfred Grech

21/07/2016.

F’das-Skiet li Qed Jaħfinni.

F’das-skiet li qed jaħfinni,

Inħossok tersaq qrib,

Fil-baħħ fejn trid tintilef

Fis-serħ li rrid insib.

Fil-firxa bla konfini,

Fl-eternita’ bla waqt,

Nagħarafha l-għanja tiegħek

Fix-xejn li jmut dalwaqt.

Għad-dawl ta’ qamar kwinta,

Fil-ħemda ta’ bil-lejl,

Jien negħereq ġo ferħ għami,

Fl-immensita’ bla kejl.

M’għandix bżonn tabernakli,

M’għandix bżonn ta’ xi nvit,

Tinsab int hawn maġenbi,

U jien ninħall ftit, ftit.

Il-bogħod mid-daqq tat-trombi,

Is-skiet iwelled ħoss,

Il-bogħod minn għajn ma tara,

Qed nara bla ma nħoss.

Għax inti, inti kollox,

U kollox mhuwa xejn,

U dak li mmiss b’idejja,

Turini mnejn sa fejn.

Alfred Grech

20/07/2016

Jien Nibqa’ Nistenniek.

Min jista’ jisfurzak?

Għalkemm jien hawn nistenna,

Int waħdek trid issib,

It-triq minn hawn għal ġenna.

Jien nibqa’ nistenniek

Sa jibda jagħmel bija

In-nagħas u dlam il-lejl,

U norqod daqs tarbija.

Ħadd minna m’għadu jaf

Il-forom li għad tieħu,

U f’xiex tinbidel għad

Bl-ilwien li għad jisbieħu.

Jonqosni noqgħod hawn

Hawnhekk ngħix ġo din-niċċa

Sakemm tħabbatli l-bieb

U s-seħer dlonk jispiċċa.

Inrabbi par ġwenħajn

U nfassal direzzjoni,

Għax nilmaħ dawl fil-bogħod

U nrabbi wkoll viżjoni.

U wara nkun hekk tlaqt

Fil-baxx tal-apparenza,
Il-fdal li nkun insejt

U l-qxur tat-trasparenza.

Alfred Grech

18/07/23016

Hawnhekk.

Hawnhekk jintilef kollox

Ukoll il-ħars battal ta’ min iddejjaq

Jintilef il-kliem żejjed

L-għażliet bla gost ta’ xejn

Hawnhekk jintilef kollox

F’dan l-ispazju ta’ sema mimli

Kwiekeb u qamar kwinta

Jintilfu wkoll ix-xefaq

U l-barrieri ta’ bejnietna

Hawnhekk stajt nagħmel qabża

U ma jilqagħni xejn u ħadd

Għajr l-infinit.

Alfred Grech

15/07/20126

Li Għad Immut u Xejn ma Jibqa’.

Li għad immut u xejn ma jibqa’,

Lili dal-ħsieb qed idejjaqni,

L-imħabba wkoll għad tisparixxi,

Iifisser dan, li ż-żmien seraqni.

Serbut ta’ nemel fuq bankina,

Kulħadd bil-pass u r-ritmu tiegħu,

Kulħadd mifxul fi trieqtu miexi,

U dan hu kollox li jġorr miegħu.

U miexi jien u miexi magħhom,

U bħalhom sfajt fuq xatt ir-ramla,

Ninkines bħalhom, nibqa’ sejjer,

Ma kull kurrent, minġarr mill-ħamla.

Alfred Grech.

14/07/2016