Jien Għadni Nistennik.

Jien għadni nistennik li tiġi

riekba ż-żiemel tal ġwienaħ bajdan

tintilef ġewwa s-sħab ta’ xi tifkira.

Stħajjilt li smajt il-għana fgat li ġej minn wara l-kwinti

imbagħad il bikja solitarja ta’ lupu mġewwaħ.

Tibqax iddur u tfittex fuq ix-xefaq

lil hinn mix xefaq hemm il-baħħ

hemm biss il-preċipizzju,

għax għad tispiċċa teħel fit-tajn t’għadira mdardra.

Il-ferħ ta’ ġenn li jtik  

ikun il-mess tal-kordi

ġewwa sidrek minn dak li ħabbek.

Lili ma ħallejtli ebda munita li tissaraf

fuq din l-art.

Forsi għad issir tad-deheb f’xi pajjjiż ieħor.

Alfred Grech

31/05/2018

Inti Li Ta’ Kull Darba.

Inti li ta’ kull darba tistaqsini,

Int ma jonqsok xejn għajr it-tmellisa

Li tħalli l-marka tagħha għal dejjem.

Int taf sew li dak li lilna t-tnejn irid jgħaqadna

Ikollu s-sens ta’ telf u sens  tal-biża,

U dak li lilna t-tnejn iżommna minn xulxin imbiegħeda

Velenu  nixorbuh kull  filgħaxija

Sabiex ninsew li għada xorta jisbaħ.

Int sirt taf bħali

Li din il-logħoba tal-imħabba

Hija wiegħda li żżomm ħajja

Fuq il-ħjut li tħit il brimba,

Hi biss akrobazija aljenanti

Biex nagħmlu bħalma jagħmel qed ħaddieħor

Biex inżomm l-fjamma ħajja.

U jiena kont ekwilibrista sa mill-bidu

Li nogħoġob lil kull naħħa tal-udjenza

Int ridt li tkun fit-tarf tal-mina u hemm se tibqa’.

Irrid inżomm idejk waqt li qed naqdef

U ħafna drabi jkun in-nuqqas tiegħek

Li jġiegħelni nimla l-baħħ fl-abbissi ta’ ruħi.

Alfred Grech

31/05/2018

Int Tiġi.

Int tiġi bħalma tiġi ż-żiffa

tqajjimni minn din nagħsa fonda,

imbagħad tħallini xejn ma jibqa’ għal dejjem

bħal ħolm li kont qed nibda’ noħlom.

Int tiġi u titlaq qisu xejn ma kien

u tħalli r-rimma tiegħek

il-fwieħa, balzmu, t-tifkiriet,

li għadni negħereq fihom

Alfred Grech

30/05/2018

Inti M’Għadekx Tagħrarfni.

Inti m’għadekx tagħrafni

għax issa taf li l-ħin iġġebbdu u tnaqqsu  kemm trid int,

u li l-iskużi li ġġorr miegħeh pjattoformi minn fejn taqbeż

fid-dagħbien li jrid jaħbik.

Jien għalija mhux biżżejjed

il pajżaġġ tal-ħafna kliem,

li jdewwed ġewwa rasi u jnaqqasli ħafna s-smiegħ.

Imbagħad tintebaħ li tinsab f’dinja

li qatt m’emmina fiha

diversa milli jgħidu dawk li mingħalihom  

għadhom mal-ħajjin.

Iż-żmin jibqa’ nviżibbli biss

għax inti tħobb ittawwlu kif jiftillek

u lili tiġi tgħidli xi ħraf’oħra biex nikkwieta.

Alfred Grech

29/05/2018

F’Dix_Xemx Trikkarga l-Qilla.

F’dix-xemx tikkarga l-qilla

tat-tiben irrumblat,

tfajliet bħat-tentazzjoni

mal-ġenju tal-allat.

Il-qilla tax-xemx tisreġ

fuq saqaf ir-razzett

tan-nies antika tagħna

għad-dell tal-parapett.

Kif għadna stupefatti

bl-ispjaġeġ misgħudin,

il-ġmiel tas-sardinelli

u l-friefet ta’ kull ħin.

Mal-weraq li jitliegħeb

u jolfoq bħal miblugħ

hekk kif iż-żiffa tinbxu

fil-flieli bħal fil-qlugħ.

Tqaxxarna minn ħajjitna

li ngħixu f’dal-wesgħat

biex nisrhu ma urieżaq

u l-firmament stuprat.

U taħt dal-mistiċiżmu

poeta fqir plebew

itenni skuntentizzi

mal-ħlejjaq li stagħnew.

Alfred Grech

29/05/2018.

Sinfonija ta’ Ruħ Li Trid Tinħall.

Iss’għid kif tħossok

xħin toħroġ minn ġol ilma fietel

bħat-twelid ta’ Afrodite,

u jiena nħares lejk għaddejja minn fuq il blat iniggeż

daqskieku kont reġina tiela’ t-taraġ imperjali.

U hekk inkun narak ukoll mingħajr nuċċali

b’għajnejja nudi sabiex xejn ma jaħrabli,

taħt xemx li qiegħda tnin

u taħbi u tostor magħha

xħin tmur tinħeba wara x-xefaq,

il-misteri u d-dnubiet ta’ matul il-jum.

Iżda din mhijiex l-aħħar tislima

fis-skiet inkanexxenti.

Din hija sinfonija ta’ ruħ li trid tinħall

minn kull irbit, ta’ kull ma tagħllmet

u mix-xkiel ta’ fejn sabet ruħha u ma min qed tagħmilha.

Din hija t-tila ta’ Penelope

li tinseġ ħjut iż-żmien u terġa’ tiftoq.

Jien għadni qed inbaħħar

fil-ħolm tal-oċean u l-miti,

u l’aqwa ħolma tiegħi tibqa’ dik

li għad hemm inti tistennieni.

Hemm int li ma tafx u ma tagħrafx

it-tul u t-toqol tal-assenza,

għaliex int wild l-allat li dakkruk

bl-imħabba eterna, l-imħabba li ma tmutx.

Int issa qiegħda tinsġ fuq it-tila

il-qerq tal pretenednti

il ġrajja umana tiegħek

biex imbagħad terġa’ tiftoq

u terġa’ tibda tinseġ.

Iżda jien, li nibqa’ għaddej nivvjaġġa

bejn Xilla u Karibdi,

bejn l-iskolji tal biża li se nfalli, is-sens tan-nostaġija

u x-xewqat li qatt ma twettqu,

bejn ġejjieni skonoxxut u l-periklu tas-seduzzjoni

għad nerġa’ lura għal ghandek

liebes ta’ tallab

biex ngħaddi miċ-ċensura

u minn kull prova li tagħmilli.

Alfred Grech

Dwejra 27/05/2018

Jien Ma Rridx Nikkonvinċik.

Jien ma rridx nikkonvinċik,

għax jiġi żmien li jiena stess

inbiddel il-verżjoni,

u inti li tinsab hemm fuq bħal kewkba

tirradja l-inkadexxenza vesprina

tistagħġeb u tiskanta għaliex

inkun inbdilt u sirt daqshekk efimeru.

Jien nitlob li inti tibqa’ hemm fuq kewkba rubina

turini t-triq tan-nebħa u ta l-ilwien

u tibqa’ tiddi bla mittiefsa,

Imqar jekk aħna t-tnejn nissimulaw

ġo did dinja, tal-falluti

u s-simulakri.

Alfred Grech

27/05/2018

Hawn Wisq Ankri.

Hawn wisq ankri fil bir tat-tifkiriet

biex nistgħu nerġgħu aħna ngħumu ħielsa,

għax int ridt tibqa’ hawnhekk fuq din il ħerża

inkullata mat-tmien ta’ dak li tara u li tisma’

u dak li jittrasmettu s-sensi kiebja,

u qatt ma trabbi l-ġwienaħ tar-rewwixta.

Jien ridt inbaħħar imqar lilhinn mix-xefaq,

lilhinn mill-eqreb għolja nkandxxenti,

biex nara fejn tassew hemm tarf id-dinja.

it-tarf li huwa wkoll il-preċipizzju

ta’ dak li qed naraw, immissu u nisimgħu.

Int ridtni nibqa’ hawnhekk ngħodd il-minuti

nissemma għall-kantaliena l’issa drajna

ta’ dik li int tgħidilha esperjenza

ta’ dik li int tgħidilha ferħ il-ħajja.

Iżda dik mhi xejn, bħal neta tagħtas,

faqqiha ta’ bużżirqa tas-sapun,

Imbagħad!Imbagħad xejn aktar.

Alfred Grech

25/05/2018

U Le Ma Kinetx Żejjda

U le ma kinetx żejjda,

ma kienet żejjda xejn.

ġie r-riħ u ntfiet ix-xema

Bqajna hawn biss aħna t-tnejn.

U le ma kienetx żejjda

dak kien biss inċident

li jiġri meta d-dgħajjsa

tintelaq mal-kurrent.

U bqajna hawn weħidna

fid-dlam tal-lejl u l-ksieħ,

infittxu l-baħħ tal-bieraħ

u l-fejjda minnufih.

Alfred Grech

24/05/2018

M’Għandi Xejn Xi Ngħidlek Aktar

M’għandi xejn xi ngħidlek aktar,

u inqas ma ċċempel iktar aħjar.

Ħlejt wisq ħin nipprova nifhem

fuq liema skala trid tintona.

Tistaqsinix kif jien magħmul

għax jiena wkoll tad-demm u l-laħam

u dak li nfisser mhux bil-kliem

għaliex kull xħin nitkellem

niġbed lura nifs ir-rih u nerġa’ nonfħu,

u kull bewsa li nnewwillek

tqaxxarlek saħansitra l-ġilda.

Għalhekk tistaqsinix għaliex dufrejja twal

għaliex nigriflek imqar ruħek,

u meta tiġi biex tassew tħaddanni

tkun taf imbagħad min jien.

Alfred Grech

24/05/2018

‘

Xi jfisser Dan Kollu.

X’ifisser kien għalik u għall allat t’olimpu

Dal ġiri kollu ndur bħal qisni kont drogat?

Warajk insus msaħħar bi sbuħitek

Dak  ġismek kien perfett, immakulat.

Xi jfissru dawn il-ħafna kutrumbajsi

Li inti u jien għamilna mqabbda ma xulxin

Iż-żmien li ħlejna f’ dil-kummiedja kollha

Fejn ser tispiċċa?  Bżieżaq mifqugħin.

Xi jfisser dan fi ħdan il-kalendarju

Tal-univers li għandu minn taż-żmien

Jekk xejn ma baqa’ minn dil-melodrama

Ħlief il-memorji li jindifnu magħna

U ż-żifna li żfinniha

Int u jien.

Alfred Grech

23/05/2018.

Ghax f’Daqqa t’Għajn Stajt Nara l-Univers.

Kif nistgħu nibqgħu aħna

marbutin bi ktajjen inviżibbli,

Int tgħid li tafni sew u li tifhimni

u jiena mank biss għadni naf x’irrid?

Kif nistgħu jiena u int inżomma ħajja

dil-fjamma tnin u tnemnem bħal musbieħ

u l-qbil li hemm bejnietna jista’ jibqa’

la jaf il-ktiba, u għandu minn tar-rih

misjuq mid-direzzjoni għamja tagħna t-tnejn?

Kif tista’ tneħħi l-biża li se tiżloq,

għax f’dawn l-inħawi għadek qatt ma ġejt,

kif ser nikkonvinċik b’hekk biss għad nistgħu

intiri bħal għasafar fuq il-bejt.

Kif nistgħu aħna naqbżu dan ix-xefaq

ta’ dak li nafu, mmissu jew naraw,

ta’ l-univers li mhu xejn għajr konfini,

ta’ dawn il-ħafna ġesti li ’ssa ndraw.

Hemm biss il-ħarsa tiegħek u t-tbissima,

Għax f’daqqa t’għajn stajt nara l-univers.

Alfred Grech

23/05/2018

Ġejt Inħabbat.

Ġejt inħabbat il-bieb tiegħek

F’nofs ta’ lejl għax tagħni ġenn

U bdejt nagħmel kutrumbajzi

Forsi tiftaħġ, forsi tħenn.

Ridt narak u ridt inbusek,

Noqgħod ħdejk għal ftit tal-ħin.

Iżda bqajt ma ftaħtx int biebek

Nies iħarsu, għaddejjin.

Drabi oħra bħal sorpriża,

Kont nitfaċċa minn x’imkien,

Int sabiħa u attraenti,

Xħin tinħasad miskin jien.

Jiena lest li nibqa’ niġi

Taf li jiena kkumnplikat

U l-agħar ħaġa li tiġrili

Jekk inkun antiċipat.

Naf li bagħttni kemm il-darba

Mmur nixxejjer, mhux għalxejn,

Iżda fl-aħħar qabel jidlam

Qisu lanqas biss kien xejn.

Mhux xi raġel bih innifsu,

Inti trid jipperswadik,

Imma raġel illi jafek,

U li jħossu mimli bik.

Alfred Grech

23/05/2018

Ftit Hemm, Jekk Hemm.

Ftit hemm, jekk hemm, li jistgħu jifhmu

kif minn ġewwa l-ermitaġġ ta’ ruħ imnikkta

joħroġ is-skiet immakulat

fejn stajt issib it-tweġibiet

biex tagħaraf l-eżistenza.

Tispiċċa titfarrak fuq is-sikek

tal-ġenn immaġinarju.

Jien ridt inkun l-imgħallem mhux ta’ li ktibt

iżda li nkaxkar għal warajja l-ġemgħa

li daqet ftit mill-għasel trasfiguranti.

Għax xħin immorru lura

għad-dell ta’ dak li mhux

insibu t-triq it-tajba lil hinn minn dak it-tajjeb

li lilna kienu jagħllmu

lilhinn mit-tajjeb u l-ħażin

il-ħelsien minn dawk l-iħirsa

bħad-dellijiet li għadna nfittxu.

Kif tista qatt tistaħba minn dik ix-xemx

li qatt ma tinżel,

inkella taqta’ qalbek ta kull darba li jgidulek

li xagħarek hu magħdud

jekk int trid tibqa’ tħallat

l-eternita’ max-xejn?

U toqgħod ta’ kull darba taqbeż it-tfixkil

li mhuma xejn għajr barrikati?

Jew inkella titfixkel f’kobba mħabba li t-truf tagħha

huma xejn għaj il-kontradizzjoni?

Xħin tibda tiela’ t-taraġ

issib li żlaqt mill-ġdid,

il-mira tispiċċalek u t-tweġiba ma ssibiex.

Jien ġejt infittex bħalek u bħalek ma sibtiex

hawn kienet kemm il-darba

is-saltna tas-smewwiet imm’issa għalxein

għax issa għebet jew għad trid terġa’ tiġi.

Imbagħad jekk terġa’ tiġi u tgħidli ma jiswiex

ifisser minn dan kollu

int għadek ma fhimt xejn.

Alfred Grech

22/05/2018

Dil-Ħmerija Qatt ma Ġrat.

Fuq kull naħħa fl-emisfera

Ma kontx jiena li ffissajt

Titla’ x-xemx u terġa tinżel

Bdejt ngħid dak li qatt ma rajt.

Fuq kull werqa tal-ħaxixa

Bħalma jagħmel ċentupied

Bdejt nitmattar u nixxabbat

Kienet ġrajja li ħalliet

l-effett tagħha profezija,

Kif ħarbattha b’nofs tal-kliem

Bdew jitramblu qishom blalen

Iktar beda jgħaddi ż-żmien.

Kwiekeb kbar u kwiekeb ċkejkna,

Nofs id-dinja ma fehmitx

Ir-raġuni kienet waħda

Lin-nofs l-ieħor ma ħamlitx.

L-univers għajjien f’ħidmiethu

Bqajt għaddej inkiss inkiss,

Stajt nintebaħ bl-ispettaklu

Jew ġibt ruħi kif imiss.

Bħal taż-żibeġ, tar-rubini

Infilati fiż-żernieq

Fuq il-labar filgħaxija

Sibt l-immensita’ tad-dieq.

U stajt ngħasar l-aħħar naqra

L-aħħar qtar ikkunsagrat,

Purċissjoni b’serbut nemel,

Dil-ħmerija kif qatt ġrat?

Alfred Grech

25/05/2018

IL-LEJLA ĠEJT INFITTXEK.

Il-lejla ġejt infittxek qalb il weraq u l-ħuxlief

paralizzanti fid-dawl tal-għabex

u naf li jekk tassew insibek, bil wisq inkun nissogra.

Il-lejla ġejt infittxek kontra l-fewġa

li tilgħab ma ħuġbejja u qalb is-siġar,

treżżaħna daqs li kienet fewġet il grigal.

Iżda lilek ma sibtekx ja kewkba siekta

li  tfeġġ kull meta trid fit-tard ta’ jum bla fejda

tisfida s-skiet ta’ vespri antikwati.

Illum intlift ma mewġ il-baħar qawwi

fil-qilla ta’ ġo sidri għax lilek ma lmaħtekx.

Imqar fis-skiet tax-xejn tal-ubbidjenża

fejn soltu tkun tistaħba biex taħsadni

u tneħħili dan it-toqol ta’ jum inutli ieħor

lilek ma sibtekx u stennejt bħal riħ ivenven

jerġa’ jqajjem dawk l-iħirsa tal-imgħoddi

midfuna fis-sepolkri li minn fuqhom

ngħaddu ta’ kulljum.

Bqajt ma ġejtx, u jien bħal werżieq disaapuntat

erġajt lura ħalli nagħmel tewba ġdida biex ix-xewqa

li xi darba għad tirxoxta issir notturn ieħor.

Jien naf li l-ġonna ta’ Mejju mhumiex tassew mimlija ward

għaliex bħali hawn bil bosta li qed jemmnu

fil-magħmul ta’ Mejju mirjieħ.

Alfred Grech

21/05/2018

Nistaqsu.

Nistaqsu lil xulxin jekk għadniex

inħossuna xxurtjati li qiegħdin

nitwieżnu b’dawn il krozzi inużwali

tas-sistema nkella hijiex din is-sistema

li nessietna kif nieqfu aħna stess u weħidna fuq saqajna

jew għax drajna dawn il-krozzi tal-għażżiena

u bil-bsaten li juruna bħal nies għomja

fejn immorru għax għalmuni li bill-krozzi

u bil-bsaten biss insibu t-triq it-tajba.

Nistaqsu  jekk hawnhekk wasalniex fejn kellna naslu

jew jekk b’xi skerz tad-div’nita’

dorna dawra kantuniera minflok oħra

u sibna ruħna fi triqat f’universi parallelli.

Nistaqsu jekk il-mod li bih għallmuna

kienx il-mod li bih jassruna

kienx il-mod li bil-kappestru li libbsuna

rajna ’l-bogħod u rajnja sewwa mbagħad intbaħna

li din żenga ta’ bla ħruġ.

Nistaqsu lilna nfusna jekk fid-dwejjaq tal-miżerja

hemmx il-ħalfa li xi darba għad neħilsu mill-imgħoddi

li jtaqqalna li xi darba se jfejjaqna  mil gerħat

u t-tbenġiliet ta’ ħejjieni li bil-frosta qed isuqna

flok immutu mewta kiesha tal-assenti

fl-affluwenza tad-distopja.

Nistaqsu lilna nfusna jekk għandniex

ukoll nistaqsu f’ ta’ kuljum hemm l-immanenza

ta’ kuljum il-konswetudni hemm in nibta tar-ribelli li hu jien

u hija inti ghax fil-bogħod li hemm bejnietna hemm il-baħħ

tal-univers li ma kienx u hemm il-muta ta’ kull wieħed

u kull waħda li ma jafx u ma jifhimx.

Nistaqsu lilna nfusna jekk il-fond tal-qiegħ ta’ ruħna

hemmx il weġgħa li tirbombja jew viżjoni okulari

esperjenza awrikolari  ta’ li jiġi u jirrifletti u jirbombja

ġewwa s-skiet li hemm ġo fina

resonanza li tispiċċa toħloq dinja

ta’ li tara u li tisma’.

Alfred Grech

20/05/2018

Min Se Jwaqqaf Din il-Pinna?

Min se jwaqqaf din il-pinna

Min se jwaqqaf dawn il-vrus,

Min se joħnoq dina l-għanja

Jew iħarbex dawn il-ħżuż?

Taċ-ċensura? L-injoranti?

Imħallfin ma jifhmu f’xejn?

Min se jagħmel is-sarima,

L-issikkar, għaliex? Għalfejn?

Kemm il muża ġejja l-lejla?

Il-kitarra ma taqtax,

Jien intambar u niżvoga

Nibqa’ mtarrax, ma narax.

Għal min jaf irabbi l-ġwienaħ,

M’hemmx fruntieri u mħemmx ħitan,

Jibqa’ jogħla, jibqa’ jidwi

Sa ma jkeċċi mqar xitan.

Lilek ngħanni u nerġa’ nikteb

Lilek ngħanni għax taf kif tmur

Int li bħali drajt ir-ritmi

U taf tbiddel il-kulur.

U taf togħla, tmiss il kwiekeb,

Terġa tinżel tmiss il-qiegħ,

Ħadd ma jdejjqek, ħadd ma jżommok

Terġa’ togħla minnufih.

Ejja miegħi, min se jżommna,

Min se jqasqas il-ġwenħajn?

Dawk li baqgġu hemm iseksku?

Dawk fil-qatta’ ma l-oħrajn?

Ejja miegħi f’din il-firxa

Taħt is-sema kull kulur

 Jista’ jkun li qatt ma naslu,

Imma d-dinja tibqa’ ddur.

Hawn qiegħdin fl-istratosfera,

u tistaħba ma tistax,

l-arja rqiqa, l-għanja tidwi

Poeżija ma taqtax.

Alfred Grech

12/05/2018