What DoYou Feel_

What do you feel when you meet me?

I feel th shivers up my spine and my hands start to tremble

because I know that I have trodden

where no one esle has yet.

I want to speak to you

but my lips cannot utter what I want to say.

And when I stammer you aready undestood.

What do you feel when I look into your eyes.

I find myself looking into the depth of an ocean

and see what no one else could see

and know immediately

that your silence want to speak to me

the unspeakable.

Alfred Grech

30/12/2018

Parousia

Jien nerġa’ niġi lura għal darb’oħra

indoqq ir-ritirata , u bħal bebbuxu

li jidħol ġo qoxortu u fih innifshu

sabiex fis-skiet tal-kamp nissemma noqgħod

għall-ħsejjes tal-ħlewwiet u tal-isfidi

u ruħi ma nagħtix b’mirbuħ nintelaq iżda

maż-żiffa li ftit ftit fit-tarf tressaqni

f’idejja n-nar divin li sraqt mill-għolja

tal-allat u b’dik il-leħħa ta’ berqa

f’idejja nkompli nikxef is-sigrieti

u l-ħiliet li bħaż-żubruni jitilgħu

minn qiegħ l-abbiss bħaż-żejt li jgħum f’wiċċ l-ilma.

U jiena nkun dak l-anġlu li nażżarda

ngħid li ma nobdix, lanqas mhu se nservi.

U hekk insir mhux jien iżda x-xintilla

mill infinit li ma jobdix il-mixi

lejn tmiem tal univers fi tranżizzjoni.

Hekk insir naf tassew min jiena, jiena

u għall-liema mistoqsija rrid inwieġeb,

u hemm fis-skiet tar-ruħ naf nirrispondi

għall-leħen li jikkmanda.

Alfred Grech

30/12/2018

Matutin.

Il-matutin tiegħi ikun innu għalik

Ja sibilla ta’ bla wiċċ u ta’ bla sura

Li tiġi kull filgħodu biex tnessini

Il-ħolm qalil tal-bieraħ.

Il-matutin tiegħi ikun għalik

Sieħba eterna li tħobb miegħi togħdos  fl-infinit

Imqar jekk jien ma ngħidlek xejn

U xejn ma nippretendi

Mingħandek.

L-għanja tiegħi ta’ filgħodu

Hi bħal kori tal-għasafar

Li tibqa tidwi bħalma jidwu l-innijiet

Ta’ bla kliem u melodija li kull darba

Terġa tqajjem mill-imwiet

ewrieħ l-eroj antiki

u jien nħossok hawn maġenbi

tishar f’dawk il-jiem tas-swied il-qalb

u l-biki.

Alfred Grech

29/12/2018

Kemm Inħobb Indur Fil-Vojt.

Kemm inħobb indur u nimxi fil-baħħ

għaliex b’hekk lanqas naf fejn jiena sejjer

għaliex b’hekk lil  kull min nara

u ma kull min niltaqa’ jidher ġdid u frisk

u jħalli togħma ġdida.

Kemm inħobb indur fil-vojt

l-aktar xħin kulħadd ikun qed jgħidli

li għalxejn jien qed indur

li għalxejn jien qed nissielet

li għalxejn neħodha magħhom

li għalxejn it-tentazzjoni li nistaqsi

għax x’tiskopri ma hemm xejn

lanqas hemm x’titsa’ żżid iżjed

m’hemm xejn li tista’ tagħmel

u li mhu se nasal qatt.

Għaliex hemm l-iljunfanti, hemm  l-iġganti

l-ippoppotami ta’ stonku kbir

u l-kukkudrilli li jibilgħu.

Kemm inħobb indur mingħajr ma naf fejn sejjer

għax kollox jidher ġdid

imqar jekk qatt ma nasal

imqar jekk qatt ma nsib

dak li lilu tlaqt infittex.

Inkun dort dawra mad-dinja

u fejn kont insib li bqajt

fejn baqgħu l-oħrajn kollha,

iżda ntant inkun tgħallimt

kemm tassew hi kbira d-dinja

u togħoġobni l-passiġġata.

Alfred Grech

27/12/2018

Taqax Fl-Iżball

Taqax fl-iżball li taħseb

Li dawk qiegħdin iħossu li tħoss inti,

xħin tperreċ il-ġmiel tiegħek fuq il-perċa diġitali

U taħseb li kulħadd għalik jixxennaq.

Imbagħad xi darb’ ejja u oqgħod għedli

Lil min it-tnejn li aħna bla ma nafu

Sfidajna,

U jekk xi ħaġa tibqa’,

 għidli biss jekk  jiena kont ir-riħ għalik

Minn liema naħħa kont qed njonfoħ

biex inqanqal il-kalma tiegħek apparenti.

Inti li tislet ix-xintilli minn qalb il-beraq

Bħal xabla li taqta’ b’ żewġt ixfar

Kull meta l-ħarsa tiegħek toqrob lejn is=sema

Fis-skiet ta’ kull filgħodu ta’ bla rqad,

Tifhem li l-paċi m’għandhiex leħen

U l-armonina ma tmissiex

Iżda tigref ir-ruħ fis-sakra u tmlieha b’wiegħdet ifewwġu

Bħal min iħobb u lanqas jaf li hu maħbub.

Alfred Grech

26/12/2018

Intom Sbieħ.

Intom sbieħ ilkoll kemm intom

kwiekeb jiddu fil-ħolqien

fil-liwjiet u t-tondjaturi

dinja ssebħu kullimkien.

Intom anġli minn tas-sema

tgħannu l-ogħla innijiet

hekk ħalqitkom in-natura

u aħna nemmsu hawn fis-skiet.

Intom stilel tal-eklissi

mimlijien mistoqsijiet

jew misteri minn kull naħħa

li naħsbuhom stediniet.

Intom sbieħ ilkoll kemm intom

tkissru d-dwejjaq ta’ kulljum

magħkom naqsam xi xintilla

tagħmel berqa bla ma ddum.

Izda hej tgħidlix biex magħkom

għa żmien twil sabiex nistkenn

naqsam ħini jew ħidmieti

għax jaqbadni ferħ ta ġenn.

Intom sbieħ u mhemmx x’tgħid aktar

u mingħajrkom ma ngħixux

iżda mbagħad il ħajja magħkom

Daqs kalvarju u ma temmux.

Imqarr Jekk Trid.

Imqar jekk trid ittir mingħajr il-ġwienaħ

Maħdumin mir-rix u x-xema’

Xorta waħda ssib li għad trid tinfed

l-infinit

ittir sa tarf id-dinja u tiġi lura

u tifhem li ma sibt xejn ġdid.

Imqar jekk tiġi lura fl-eleganza

Xintilla ntuwittiva tal-ħolqien

Issib it-trasgressjoni li kapaċi tħoll il-ġebel

U minni tagħmel l-aqwa lsir.

Imbagħad jekk għad xi darba tħoss xi ħaġa

Ikun nar li jiena sraqt

U ġibtu hawn fid-dinja biex minnu ngawdu

Inti u jien.

Imbagħad għad taħlef li xi darba

Rajntni miexi fuq ix-xfar.

U ma jimporta xejn kemm ilek tafni,

Jimporta biss sal-lum x’sirt taf.

Alfred Grech

24/12/2018

Jien Neħodha.

Jien neħodha kontra tagħkom

li taħsbuha li m’hawnx bħalkom

u li tiġi tbiddlu d-dinja

u taqilbuha ta’ taħt fuq.

Jien neħodha kontra tagħkom

li tgħiduli li jien ċlejken

u li kontra l-prepotenti

jien ma nista’ nagħmel xejn.

Jien neħodha kontra tagħkom

kontra d-dinja u kullħadd

għax tassew ninsab imdawwar

mill-beżżiegħa u mill boloħ

imħuħ dojoq u nies qosra.

Alfred Grech

24.12.2017

Gaġġa.

Din hi l-gaġġa li sawwarna

Din hi s-sodda tas-serħan,

Ivvintaw mill-ġdid ir-rota

Iżda kollox kien duħħan.

Din l-imbierka t’inflazzjoni

illi magħha ma tlaħħaqx

hija l-mostru tas-suq ħieles

pjaga din, ma tingħalaqx.

Din l-imbierka t’inflazjoni

bdew jogħlew il-prezzijiet,

għalxejn bassru l-bosta esperti

qatt ma sservi, l-paga bdiet.

Bil-ftaħir li dejjem tikber

dana kollu bżar fl-għajnejn,

Dan il ġid u dan il-ħela

staqsi ftit, u dan minn fejn?

Nafu żgur li qiegħdin ngħixu

bil-jiem tagħna magħdudin

kolp ta’ baħar, suq jikkraxxja

jaqa’ kollox, x’waħda din!.

Issa qalu m’hawnx biżżejjed

lil min jistgħu jimpjegaw

u biex tkompli ddur ir-rota

barranin qed jinvitaw.

Iżda din l-ekonomija

li trid tikber, iffissaw,

u tintefaħ bħal bużżieqa

għad tinfaqa’ ’ssa taraw!

U ngħid jien f’dal-pajjiż ċkejken

daqs qaqoċċa iffullat

x’għaqal hu li lill barrani

tagħti sehem xħin kollox fgat?

Alfred Grech

22.12.2018

145.

Ikun fiż-żminijiet li konna nħossu

Kullħadd u d-dinja kollha kontra tagħna

U bqajna m’għamilniex il-pass li kellna

Nagħmlu, jew tlifna t-triq li kellna nimxu.

U bqajna ma ntbaħniex x’hemm wara l-kwinti

Inkella x’jista hemm lil hinn mix-xefaq.

Intom li ridtu tidħlu ġo dil-gaġġa

Għax ridtu serħ il-moħħ malajr intbaħtu

Li b’hekk titbegħedu kontu minn dix-xtajta

Minn fejn qed nimbarkaw l-esploraturi

Ta’ kull xefaq jew quċċata fejn għadu

Ħadd ma rifes. Għax ridtu tgħixu,

Ixxamplati, patrizi dekadenti

Fin-nausea tagħkom stess u fl-affluwenza.

Alfred Grech

21/12/2018

Dan Tagħna.

Dan tagħna se jibqa’ thewdin ir-ruħ

ta’ ħmar il-lejl li qatt ma stenbaħ

għax ngħidu li se nagħmlu u qatt ma nagħmlu

dak li ngħidu, nixxenqu biex niltaqgħu

taħt is-sigra, taħt il lampa f’tarf it-triq

iżda qatt ma naqbżu ċ-ċint

tal-bitħa tagħna nkella l-ħadid tal-ġnien

ta’ quddiem id-dar li jżommna bħal ħabsin

imgħarrqa fit-thewdin ta’ ruħ mixgħufa

u fl-għamad tal-konfini tal-abbissi li fassalna

aħna stess fit-taqlibiet u l-baħħ jirbombja ta’ moħħna

u nibqgħu ngħidu l’hemm futur qed jistenniena.

Dan tagħna huma biss xewqat moħbija

u magħsura li ngħiduhom lilna nfusna

fil-biża l-hemm xi ħadd li qed jismagħna

għaliex dawn mhumiex xewqat li ttennihom

fid-dawl tax-xemx jew taħt qamar li qed jibki

għalkemm nafu jappartjenu lill kull wieħed

u kull waħda.

Issa xħin nixjieħu nkella nixbgħu

ntennu l-litaniji inti tħobbni

jien inħobbok u mingħajrek ma ngħaddix

nitgħallmu mantri ġodda bl-istess ritmi

u bl-istess rima iżda jidhru aktar friski

għax mhumiex il-ħlejjaq tagħna

iżda huma l-aħħar maskri tal-uċuħ

ta’ nies il qedem imlibbsin is-sorpiżi

u l-istupur tan-nies moderni.

Alfred Grech

20/12/2018

Aħna Niktbu l-Istorja.

Aħna niktbu l-istorja

Kull meta ninkinaw

Quddiem l-allat t’olimpu

Bla ma nikkundnnaw,

Il-ħniżrijiet li jagħmlu

Bl-iskuża tal-progress

X’ħin jagħmlu mandra sħiħa

Mhu xejn dan ħlief rigress.

U ħadd m jrid ftit jaħseb

U moħħom ma jużawħx

Li ta’ kull pied li jibnu

Għax l-għada ma jarawħx.

Għall dejjem qed iħarrbtu

Għal għada u għall li ġej

Għall kull ġenerazzjoni

Taħsibħa mhemmx għalfej.

Imqar għad fi gżiritna

Insiru barranin

Bl-influs tal-ħafna razez

Ġejjin, dejjem ġejjin.

Insiru miljunarji

Ftit ftit inbiegħu l-art

X’ser jibqa’ minn pajjiżna

Għajr flus inkella skart?

Alfred Grechj

19/12/2018

F’Jum Sant Ivo.

Jien dak li nerġa’ niġi nfittex

dir-roqgħa art fis-skiet u l-ħemda

fejn jikber il-ħaxix u x-xemx għad tasal

il-bogħod mit-tinġiż tal-arja

fejn ma nismax il ħsejjes  tar-rombli jqarrmċu tal-magni.

Għiduli fejn hu dan l-imkien?

Jien inkun l-aħħar wieħed li nitbekka

il-ħerba ta Ġerusalemm

f’din l-art ħanina li tnixxi l-ħalib u l-għasel

li tfarrket mill-barbari maltin

sabiex minn dan il-bini kollu li jinbena

m’għadx jibqa imqar ġebla fuq oħra.

Imbagħad ma jiswa’ xejn

li bħal groqqa għad trid tiġi

u terġa’ tiġbor il-flieles tagħħa.

Imbagħad għad niġi hawn

xħin ninżel minn ġos-sħab

u nimraħ f’dad-deżert uman

ta’ bla qalb u ta’ bla ruħ

il-ħabs li ħolqu l-istess maltin minn jeddhom,

ma’ dawk li s-sewwa jaħarbuħ

u jgħixu ġol-bużżieqa tas-sapun

tal-ekonomija dejjem tikber

għajjiena le xebgħana

mitluqina għalina nfusna

għax ma baqax fejn għad nimirħu

għajr l-oqsam artifiċjali

tal-iskrin u tat-tastiera.

Alfred Grech

17/12/2018

 

Lethe.

Biex dħalna f’din nixxiegħa

mal-bżieżaq qed itiru,

jew raxx ta’ mewġ il-baħar

jinfaqgħu malli jsiru.

Biex dħalna f’fin ix-xmara,

u mxejna mal-kurrent,

nixobu l-istess l-ilma.

jew  nirtu s-sentimenti.

U kbirna u ssaħħaħna,

u sirna rġiel u nisa

ftit, ftit, immaturajna

u ġrejna wkoll fil-wisa.’

U sirna bla ma nafu,

dak kollu li llum aħna,

fuq bastiment vaganti

li rkibna bla ma ntbaħna.

Alfred Grech

15/12/2018.

144.

Nimxuha din it-triq mingħajr ma nħarsu

Lejn kull naħħa u bl-għamad fuq għajnejna

Għaliex kull fejn se tħares hemm medusa

Bil-vleġġa tagħha ssamrek u ssir ġebel.

Minn dan il-wied tad-dmugħ irridu ngħaddu

Mingħajr werrej li juri fejn trid tasal,

Għaliex sal-lum kull min it-trieq uriena

Għallatna, jew daħħalna ġewwa żenqa.

Irridu nitilgħuha din it-telgħa;

Telgħin mingħajr sejħiet traxxendentali

Mingżajr l-ispirazzjoni ta’ xi anġlu

Inkella qaddisin jipproteġuna.

Għax bqajna ma nafux sal-lum fejn huma

Il-mogħodijiet li jwasslu għat-tnissija.

Avvent.

Illum terraqt it-toroq dojoq tiegħek

ja belt mimlija tifkiriet taċ-ċokon tiegħi,

tal-innoċenza li taf biss -sewwa ħieni

fil-miġja tal-milied u fid-dlam tax-xitwa.

Illum imxejt fit-toroq dojoq tal-mandraġġi

fejn hemm ihufu l-anġli tal-imgħoddi,

 il qalb ittrapjantata fl-iskeletri

qawmien mill-ġdid, avvent is-sena kollha.

is-seħer li jien rajt f’għajnejn ħaddieħor.

Izda xejn mhu jiġri

stupefatt mid-dawl ipetpet

tal-kwiekeb imdendla mat-twieqi

u tat-toroq battala mill-imħabba

lejn xulxin taħt il-mantell

tal-iħirsa tal-imgħoddi.

L-ebda leħen ma jwassal is-seħer

inkella jwieġeb għas-sejħa ġewwinija

għajr dak li jqanqal it-tifkira tal-imgħoddi

jew l-ħsejjes ta’l-ispots pubbliċitarji

ifixklu l-għanjiet tal-Milied.

Hawnhekk it-toroq fit-tellieqa ma xulxin

bħan nisa f’xi konkors ta’ sbuħija

min minnhom jiddandan l-aktar

min minnhom jiġi l-ewwel.

Alfred Grech

12/12/2018