Noqgħodu Ngħoddu l-Passi,

Noqgħodu ngħoddu l-passi,

il-passi tagħna t-tnejn

u mbagħad nibdew nistaqsu,

u dawn jibdew minn fejn?

Noqgħodu ngħoddu l-passi

fir-ramel tad-desert,

u nkomplu mbagħad nistaqsu,

u jwasslu dawn sa fejn?

Sa tiġi l-ewwel mewġa,

jew jibda’ jqum ir-riħ,

u milli għedna kollu,

duħħan, jew trid tinsieħ.

Noqgħodu ngħoddu l-passi,

infittxu l-frak tal-ħġieġ

fix-xtajta ta’ ħajjitna,

u naħslu wkoll kull ħmieġ.

U niflu waħda waħda,

ir-ramel u l-bebbux,

f’dix-xtajta ta’ ħajjitna

u nemmnu f’dak li mhux.

Alfred Grech

30-08-2016

Lil

L-ikbar vjaġġ li qatt għamilt

Biex nasal s’għandek

Imbagħad flewni għajnejk

U tlajt il-ġenna,

Għax inti sirt taf kollox x’hemm ġo fija.

Ma ġara xejn, ma fhimtx

Iżd’inti ħadtli kollox,

Ħaddtli wkoll, il-baħħ fejn kont nistaħba.

Ma ġara xejn li ma fhimt xejn

Għad taqra dak li nikteb.

Kont tgħid li qiegħda tfittex dik il-mara,

Il-mara li ridt tkun fl-adoloxxejnza.

Xħin ġejt teħodli b’idi

Idejk ħassejthom silġa.

Ma nafx jekk bqajt sibthiex

Lil dik li kont qed tfittex.

Għaliex kull darba qed taħrabli?

Alfred Grech

24/08/2016

Kont Hemm Int Dakinhar.

Kont hemm int dakinhar

Gwardjana tal-konfini

Xħin jiena qbiżt fid-dlam.

Kont hemm int dakinhar

Tistenna jiġi l-għada

Biex bħallikieku

Tipprova t-teorija.

F’pitazz li nżomm fil-but

Miktub kien il-ġejjieni,

U inti tlabtni wegħeda

Li biha nirriskatta

Id-dejn li ma stajtx nifdi.

Imbagħad hawn tlaqtni waħdi

Ma dal kurrent li ġarrni

Lejn l-għada tas-sorpriżi.

Biex ta’ kull darba nikkonferma

Li xejn ma nbidel.

Alfred Grech.

23/08/2016

Li Kieku m’Għandix Lilek.

Li kieku m’għandix lilek timbuttani

Sa ħdejk bil-krozzi lanqas jien se nasal;

Li kieku m’hemmx int tbejjet r-rikordji,

Jien ħsiebek lanqas issa m’għadu jkolli.

U jgħaddi ż-żmien u nibda’ nħares lura,

U nibda’ nsaqsi jekk tassew kontx jiena

Li nbdilt daqshekk inkella kienx ħaddieħor

Li ferrex iż-żerriegħa tad-draguni

U hawn sibt ruħi jiena.

Alfred Grech

22/08/2016

Għannili għanja ġdida

Għannili għanja ġdida

U nħalli l-lejl jitkarrab,

Ħallini naqa’ f’ħoġrok

Għajjien daqs min imġarrab.

Ħallini nasal għandek

B’tal-jum il-piż imxabba',

Ma tkunx biss il-passjoni,

Għax tista’ tkun l-imħabba.

Mhux kliem vojt biss noffrilek,

Li jista’ wkoll joffendi,

Twassalni fejn twassalni

Jien xejn ma nippretendi.

Għannili għal darb'oħra

U nirkeb fuq id-dgħajsa,

Għad nerġa’ nibda nħobbok

U nagħmel kutrumbajsa.

Alfrred Grech

30/11/2014

Divin Jien Għad Nispiċċa.

Divin jien għad nispiċċa,

Xħin nirbaħ din id-dinja

Xħin naħrab lili nnifsi

Ġarraft ukoll il-binja.

Hekk biss jien nista’ nirbaħ

Il-jien u s-saram tiegħu,

Sirt naf li ma kontx jiena

Bit-toqol li jġib miegħu.

Hekk biss jien nista’ negħeleb

Id-dnub u s-sens ta’ ħtija,

Xħin nitlef din ix-xbieha

U l-maskra li nqum biha.

Ta’ dak li nġorr fuq dahri,

Li kien jew il-ġejjieni,

Insir malajr profeta

Ta’  dak li jagħmlek ħieni.

Bħal nemlu jgerrem ġebla

U jibqa’ bla jibdielu,

San-naħħa l-oħra jinfed

Bla jsaqsi, dan x’jiswielu.

Alfred  Grech

19/08/2016

Le Din Mhijiex Biss Spinta.

U din mhijiex biss spinta kwalunkwista,

Li nżid il-ġugarelli ma li għandi,

Li nżid il-ħjut stirat f’tapezzerija,

U nagħmel kwadru sħiħ mudell ta’ ħajjti.

Din hija mbuttattura sa fejn tasal,

Is-saħħa tad-destin għal fuq ix-xifer,

Il-molla li tiskatta l-enerġija

Ta’ dak li jagħmel lili ngħix ta’ bniedem.

Le din mhix lista twila inkella lilek

Inżommok fuq l-idejn daqskieku oħti.

Mhijiex il-makna għaddejja ta’ moħħ ħieles

Biex ninsa’ lill-kullħadd minbarra lilek.

Alfred Grech

17/08/2016

Il-Ħajja Fossa.

Il-ħajja fossa kbira t’ilma qiegħed

Folla ta’ nies li lanqas mhi qiegħda hawn.

Dak li nistaqsu llum staqsejna ‘l-bieraħ,

U llum insejna dak li kellu jkun.

Il-ħajja qed timbotta minn kull naħħa,

Titfana l-isfel jew tifana ’l-fuq.

Ma nafx għaliex tlajnieha din it-telgħa,

Għax rajna lill-oħrajna: hekk għandu jkun.

Il-ħajja narrattiva fiha nfisha,

Għal-lum ma jimpurtax jekk nieqfu hawn,

Għada nibdluh biex nagħmlu l-istess ħaġa,

Dak li għamilna llum.

Alfred Grech

17-08-2016

Ġwenħajja tqasqas.  

Ġwenħajja tqasqas kieku taf li nħobbok

U tibqa’ tħares lejja

Bħal ħmar li baqa’ jdur

U tistaqsini

Għadnix dak l-anġlu jtir

Fi żmien il-kaċċa.

Kieku kelli nħallik int timbuttani

Minn fuq l-irdum għal isfel

U tgħidli l'għadek tħobbni

Għax bqajt inħares lejk.

Jekk għad xi darba nħobbok

Inħobbok differenti

Ngħannilek għanja ġdida.

Ismek jinfed l-infinit

U leħnek bħat-tvenvin tar-riħ

Bħall-bard li jxoqqni.

U jiena lanqas naf jekk intix tiegħi

Fil-ħolm,

Inkella xi oasi

Fid-desert tas-sensazzjoni.

Alfred Grech

31/10/2014

Jien Naf li Kemm il-Darba Ridt Niltaqgħu.

Jien naf li kemm il-darba ridt niltaqgħu

U jien staqsejt sa fejn għad trid twassalni,

Dit-triq li tidher tixbaħ lill-kull waħda

Li ġiet qabilha. Għidli ftit hux bħali

Tistenna terġa’ u tagħmel mistoqsija

Mistoqsija li għandha minn tas-sewwa

Jew dak li ma jidhirx xħin terġa’ lura.

Għax jista’ jkun ukoll li jekk niltaqgħu

Jinfetaħ il-kanċell ta’ ġenna ġdida

U hekk għal dak li jista’ jkun, niltaqgħu.

Alfred Grech

16/08/20116

Mhux Dan Inkun Irrid.

Mhux dan inkun irrid

Li nieħu ħsieb ta’ ħdejja,

U lanqas ħsieb tal-kotra

Għax tibqa’ dik għaddejja.

Għax mhux dan ħlief duħħan

Jissarraf fi kburija.

Li bih il jien jinċensa,

Jimtela’ bil-foħrija.

L-inċens li bih infaħt

L-allat tal-karta pesta,

U dawk ta’ fuq il-mambar

Li bihom jagħmlu festa.

Mhux dan li jien fittixt

Li jkolli pożizzjoni,

Biex nara lil ta’ taħti

Bħal nemel f’purżissjoni.

Alfred Grech

13/08/2016 

Il-lejla Ġie Jħaddanni

Il-lejla ġie jħaddanni

Il-bogħod ta’ bejni u bejnek,

Għax naf l’għalkemm nitmattar,

Ma nasal qatt sa fejnek.

Il-lejla ġie jifridna

Għaliex m’għadniex flimkien,

Għalhekk in-nuqqas tiegħek

Mhux biss fl-ispazju u żmien.

Int mort lil hinn mix-xefaq,

Fil-baħħ tal-infinit,

Lil hinn minn dik ix-xatba

U ż-żmien sar issa ftit.

Alfred Grech.

12/08/2016

Miniex Jien Wieħed Minnkom.

Miniex jien wieħed minnkom,

U magħhkom ma niġix,

Il-bieb iftħuli beraħ,

Jien minnu ma ngħaddix.

Jekk tiġu lili tfittxu

U hawn ma ssibunix

Tgħarfuni mid-dell tiegħi

’Mma lili tqisunix.

Tgħiduli l-issa waslet,

Nighdilkom, mhux il-ħin,

U nibqa’ dejjem sejjer

Ħabibi ma nafx min.

Jekk nieqaf waħdi naħseb,

Imdendel ma kull ħsieb,

Irrid li min jarani,

Ma jkunx xi ħadd mill-ħbieb.

Bħaż-żmien li ma jridx jgħaddi,

Fil-ġuf tal-infinit,

Il-mewt biss illużżjoni,

Li tiġri ta’ tikwit.

Alfred Grech.

11/08/2016

Niġi ’l-Hawn Jekk Niġi Bżonn.

Jekk inħares ġewwa l-mera

Tgħidu kemm jien vanituż,

Jekk ngħidilkom jien x’qed naħseb

Tgħidu kemm jien prużuntuż.

Jekk jien nobdi bla ma ngerger

Tgħidu: Laqgħqi u ma jiswiex,

Jekk nimmuta u ma mgħidx kelma

Tridu tafu dan għaliex.

Kull kif nagħmel qatt ma nogħoġob,

Sew fid-daħk u sew fl-ilfieq,

Kif xi darba nista’ noqgħod

Ngħix fil-paċi kif nixteiq?

Nibda’ ngħix aħjar għal rasi,

Niġi ’l-hawn jekk niġi bzonn,

Ma mmissx magħkom jew nitħallat

U ma naqla’ qatt bil-ponn.

Alfred Grech

10/09/2016

Niġi ’l-Hawn Jekk Niġi Bżonn.

Jekk inħares ġewwa l-mera

Tgħidu kemm jien vanituż,

Jekk ngħidilkom jien x’qed naħseb

Tgħidu kemm jien prużuntuż.

Jekk jien nobdi bla ma ngerger

Tgħidu: Laqgħqi u ma jiswiex,

Jekk nimmuta u ma mgħidx kelma

Tridu tafu dan għaliex.

Kull kif nagħmel qatt ma nogħoġob,

Sew fid-daħk u sew fl-ilfieq,

Kif xi darba nista’ noqgħod

Ngħix fil-paċi kif nixteiq?

Nibda’ ngħix aħjar għal rasi,

Niġi ’l-hawn jekk niġi bzonn,

Ma mmissx magħkom jew nitħallat

U ma naqla’ qatt bil-ponn.

Alfred Grech

10/09/2016

Tibnu Torri, Tibnu Ieħor.

Hekk biddiltu wiċċ il-gżejjer,

Ma ħallejtu xejn kif kien,

Bil-misħuta ekonomija

Tikkapparra kullimkien.

Bellajtuha lil min jaħkem

Bellajtuha lill-kullħadd

Kif qed tħarrbru wiċċ id-dinja

U rispett ma ġġibu ’l-ħadd.

Bil-pupazzi tal-ispaga,

Tiġbuhielhom u jagħmew,

Għax il-kotra tibqa’ siekta

U l-Maltin bix-xejn jegħedew.

Ibnu torri, ibnu ieħor,

Donnu mhu qed jiġri xejn,

Xħin imbagħad filgħodu nqumu

U nintebħu, mbagħad għal xejn.

Tibnu torri, tibnu ieħor

Qiskom għandkom bir bla qiegħ,

Taħsbu l’ għandkom dritt minn Alla;

U dad-dritt minn fejn ġibieh?

Minn fejn ġibtu dritt li tħarbtu?

Tibnu u tgeddswu bħas-sardin,

Biex tiżdied il-konfużjoni

Fuq dil-blata! X’waħda din!

ALFRED GRECH

08/09/2016

Lil Sunta.

Hemm min jitla’ sal-quċċata

Jieħu gost għax elevat,

Hemm min jidħol f’monasteru

Biex jispiċċa kkunsagrat.

Min fid-dlam tal-lejl jinħeba

Jew jinħela jgħaddi ż-żmien

Min f’deżert issibu miexi

U ma jasal qatt imkien.

Hemm imbagħad minn lilna jixbaħ’

Illi l-ikraħ mas-sabiħ,

Jaf iħallat ħewwa l-borma

Qatt iż-żmien ma jagħmel biħ.

Alfred Grech

24/07/2016

Il-Ħajja.

Xi minn daqqiet hi blugħa,
Xi minn daqqiet ħmerija,
Bħal-werqa li tiżżeffen
Mar-riħ fix-xhur xitwija.

Il-ħajja minnha nfisha
Mhix ħlief anomalija,
Ma tfisser xejn u tfisser
Il-mewt sa mill-fisqija.

Għax xħin ma tkux hawn inti
Inħoss il-firda tiegħek,
Kull meta tmur u titlaq
inkun se niġi miegħek.

Kull bniedem ġrajja weaħda,
Li nerġgħu intennuha
Imbagħad mill-ġdid ninsewha
Għax kollox safa frugħa.

Alfred Grech
27/07/2015

Jien Sibt Ruħi.

Jien Sibt ruħi f’dil-quċċata,

Tlajt hawn fuq bla ma xxabbatt,

Lanqas biss ma rajtek ġejja

Dħalt hawn ġew bla ma ħabbatt.

F’daqqa waħda sibtek ħdejja

U għal ftit kont naħsbek waħx,

Moħħ imdallam, qalbi waqfet,

U ħassejtni ma niflaħx.

Int bħal ħsieb li jiġi f’daqqa

Int bħal berqa mill-punent,

Xħin niftakar l’inti ġewwa

Ġrejt warajk inutilment.

Ġejt illum infittxek waħdi,

Għelm warajk ma ħallejtlix,

Bqajt nistenna solitarju

Kemm iddum ma tkellimnix?.

Alfred Grech

05/08/2016

Ejj’Noħolqu Moviment.

Ejj’noħolqu moviment

Ejj’ noħolqu mewġa lbira.

Ejja ngħumu mal-kurrent

Anke ‘kk din mhix ħlief għadira.

Ejja nrewwħu bħal farfett,

Biex noħolqu ftit pressjoni,

Tkun kaġun mill-bidu nett

Tal-oħrajn il-konfużzjoni.

Ejja nġnġu l-ideat

U noħorġu b’waħda kbira’,

Dan ikun bħal Kolp ta’ Stat

Nistgħu nieħdu biss tkaxkira.

Ejj’nilgħabu wkoll bl-imħuħ

Ejja nagħmlu maltempata,

Nilluppjaw in-nifs tar-ruħ

U nsejjħula biss xalata.

Ejj’noħolqu wkoll partit

Biex inwegħedu wkoll bil-mija,

Inxekklin mingħajr aptit

Din mhix ħlief demolrazija?

Alfred Grech

04/08/2016

Tmellisa.

Maż-żiffa ta’fl-għaxija,
Fid-dlam ta’ lejl bla qamar
Ir-rima ma kull kewkba
Issir bħan-nar bla ġamar.

Tmellisa li bħal vleġġa,
Tal-ħolm is-seħer tqajjem,
Ġenbejk mikxufa beraħ
U x-xewqa ta’ min sajjem.

U terġa’ taħt il-lożor
Bin-nifs li x-xitwa tbiegħed,
Is-sider tiela’ u nieżel
U leħen qed jitriegħed.

U tħossha dik id-dehexa,
Tmellisa biss ħafifa,
Mal-weraq ta’ xi siġra
Li tinża’ fil-ħarifa.

Bħall-warda li trid teħhles,
Mill-petali ta’ fuqha,
Tintebah bil-maġija
U tgħodos biex idduqha.

Alfred Grech
26/12/2105

Il-Kliem Ħiemed.

Int li ma tħossx in-nifs ta’ qalb il-friegħi

Kif tista’ tifhem lili xħin nimmuta

Kull xħin idejh ħaddieħor jibda jxejjer

Kull kelma titlef tibda l-lewn u s-sura?

Kif tista’ inti qatt fi ħdanek tilqa’

In-ngħas imwiegħed qabel filgħaxija,

Il-qtar tal-kwiekeb jaqgħu f’nofs Awwissu

Fid-dell ta’ sema jerħi bla ma jibqa’.

Bħal jiem li dehru spazju bla konfini

Bħal petali f’wiċċ l-ilma qatt ma jegħrqu

Bħar-riħ l-għeliem iqaċċat mill-għekiesi

Għad-dell ta’ baħar jordom is-sigrieti.

U jgorru fuq il-mewġ ta’ xefaq sieket

Il-kliem li qatt ma nkiteb, il-kliem ħiemed.

Alfred Grech

31/08/2014

Fuq ġismek qed jintilfu.

Fuq ġismek qed jintilfu u f’għajnejk jiżfnu

Elf orbita bla xuxa tal-kometi

U fuq xufftejk iz-zokkor t’għanja muta

Fil-baħħ tax-xejn li d-diwi jirrepeti.

Imm’int l-imħabba taħsel fl-impossibbli,

Fis-skiet li qatt ma nstema’ tgħaddi fewġa,

Il-qamar qed jistrieħ, riġlejk miġbura,

Il-moħħ għajjien jintelaq ma' kull mewġa.

Fi ħdan il-bews etern ta’ baħar sieket,

L-imgħoddi bħal musmar fl-injam imwaħħal,

Ħadid mal-bieb li jsakkar kull tifkira,

Ma' daharna t-tnejn kull xili jibqa’ mkaħħal.  

Kull xewqa tiġi u tmur li m’għandix x’nambi,

F’widnejna jibqgħu jidwu ħsejjes strambi.

Alfred Grech

21/08/2014

Ħallejtek tiġri u timnraħ.

Ħallejtek tiġri u timraħ

Xħin xtaqtek kont fil-qrib

Emmint dak li kont għidli

U f’dak li xtaqt insib.

Imdendel kont minn xagħra,

U qatt ma kont kurjuż

Nistaqsi x’kont qed tagħmel

Li kien tassew dubjuż.

U sirt ekwilibrista,

Niggranfa ma grampun,

Nitgħawweġ u nitkaxkar,

Mirfus taħt iż-żarbun.

Noxxilla mbagħad bħal pendlu,

Ta’ ħsiebek il-konfuż,

Niżżerżaq fuq żurżieqa

Ta’ lsienerk malizzjuż,

Imbiddel il-bandiera,

Indur daqs xi pinnur,

Kull meta jitla’ l-ajru

U tbiddel il-kulur.

Imbagħad xħin xbajt nistenna

Għax inti bqajt ma ġejtx,

Xi ħadd fetaħli moħħi

U fhimt, biex bqajt m’ għalejtx.

Alfred Grech

03/08/2016

Għax issa lanqas naf.

Għax issa lanqas naf

Jekk moħħi hux jiċċara

Għax nemmen jekk irrid

U nimxi bla ma nara.

U issa lanqas naf

Dan kollu x’jista’ jfisser

Sirt qisni sakranazz

Nirtogħ'd indur u nkisser.

U issa lanqas naf

Kont ċar daqs dawl il-qamar

Li jiżfen fuq il-mewġ

Musbieħ il-lejl bħal ġamar.

U issa sar il-ħin

Kif nagħmel, nerġa' lura

Fi nżul ix-xemx inin

U sema qed jiskura?

Alfred Grech

20/08/2014

Ma rridx nippossedik.

F’għajnejk hemm l-oriżżont

Fejn għad irrid immur,

Xħin ngħum go dan l-abbiss

Taħt sema bla kulur.

Inħossni naqta’ n-nifs

F’dal-baħar misterjuż,

Hawnhekk ma ġejt kont qatt

Nilgħaba tal-gużtuż.

Niskopri bla ma naf

It-truf tal-infinit,

Fl-imħabba li trid trodd

It-telf bil-ftit il-ftit.

Interraq bla kumpass,

X’imkien fejn qatt ma mort,

Mingħajr bla biss ma naf

Insib li d-dinja dort.

U hekk ma tliftek qatt,

Xħin titlaq inħallik,

Ittir u tmur fejn trid

Ma rridx nippossedik.

Alfred Grech

02/-8/2016

Xħin ngħid li jiena ħieles

Xħin ngħid li jiena ħieles . . .

Bħal xewqa li tkun tfawwar fuq ix-xifer

Bħal berqa li taħrablek xħin taħkimha

Bħal ħsieb mingħajr ħitan li l-ħin skadielu

Bħal dak li ma ltaqax mas-sieħba tiegħu

Għax setgħet tibqa’ xbieha ċellulari.

U jiena x’ġejt infittex

F’dal-beraħ ta’ bla żiffa?

Ġejt infittex ftit tas-skiet

Ġejt infittex lili nnifsi

Ġejt infittex ftit tan-nifs

Ġejt infittex il-ħelsien

Ġejt inrabbi ġwienaħ goffi

Biex nittajjar mal-ħolqien.

Hawnhekk jibqgħali l-wisa’

Fejn nista’ noqgħod ħdejk

Int, li għalik dal-versi saru

Bħat-tajra ta’ bla isem.

Xħin ngħid li jiena ħieles int fejn tkun?

Ma tkun imkien. Ma tkunx qed tistennieni,

Ma tafx fejn jien u lanqas tiġi miegħi

Fuq nifs is-sħab imċarrat.

Xħin ngħid li jiena ħieles. . .

Niddendel mal-kwiekeb u niżra’ l-waqtiet

Nissemma lill-baħar itenni din l-għanja

Li tidwi ġol-għerien.

Xħin ngħid li jiena ħieles. . .

Int lanqas biss tarani

Nittajjar fuq kull warda

U neħles minn kull xkiel. . .

Xħin ngħid li jiena ħieles. . .

Sa ninża' kull ma nkun liebes.

Alfred Grech

Ta’ Slima, 17-08-2014

Mas-sebħ il-weraq dehru aktar dgħajfa.

Mas-sebħ il-weraq dehru aktar dgħajfa,

L-uġih fl-irmied iwennes wiegħeda tqila,

L-istar taċ-ċpar, delitt li mhix fi żmienu,

Sirt hekk inġorr it-toqol  ta’ triq tiwila.

In-nar f’għajnejk ibejjet żrieragħ għomja,

Imferrxa biex jintrifsu fil-mogħdija,

Il-qamar ma telax u dehru l-kwiekeb,

Daqs tal-iħirsa s-sens tan-nostalġija.

Xħin bkiet il-qalb, l-ilwien bdew jidhru eħfef,

In-nifs tas-sħab, tnehid ta’ ruħ imsikkta,

Il-qtar tal-ħsieb inibbet ħolm jistona,

Fejn hemm nuqqas ta’ qbil fuq art iknikkta.

Afred Grech

15-08-2014