Sussulti u skossi fil vojt.

Sussultu u skossi fil vojt,

ta’ min qed jgħix il-ħmar il-lejl

fis-saltna tas-sokor bla rażan

ta’ dak li jidher biss minn barra,

Fl-inħawi fejn għexet il-muża

fil-fissuri ta’ rdumijiet il qodma

ta’ din l-art issa mraret

ta’ dan il-poplu li nesa’ l-għeruq tiegħu.

fid-dezert ta’ ħemda tibki

l-artifiċjalita’ ta’ dak li jilma

li saħansitra sar itenni

l-mewġiet u l-ondati ta’ duħħan

fl-isfidi li jagħmluħ bżieżaq tar-ragħwa

xħin jiltaqa’ mal-baħħ u x-xejn.

Dan l-għajjat li jtarrax

u jfixkel l-għeliem li jridu juru t-triq

it-triq ta’ dak li huwa sostenibbli

li xejjen u xekkel u xeblek

kull talba kul tama li jiżraq

minn fost id-dlamijiet dawl ġdid

fil grif tal qoxra ta’ barra tar-ruħ

u tal-uċuħ laminati, tal-ġenn, tad-delirju

u tal-freneżija.

Issa intom allat minuri ta’ dil-quċċata

li qatt ma ġabet ruħha

ta’ dan il-kredu u dat-tagħlim li ħadd

li ħadd ma jemmen fih

għamiltu minn din l-art il bejta

tal-ħallelin,

ħallulna nitolbukom

imqar merżuq ta’ dawl u ftit tal-arja

sabiex nieħdu ftit tan-nifs

u nimirħu ftit fil-ħdura u fil-wesgħat

ta’ żmien il-ħaġar.

Alfred Grech

30/11/2018

U Hekk Hu.

U hekk hu, għaliex illum neħħejna

kull maskra li rabbejna

imqar dik tal-mistħija

u kull korazza ħoxna li fassalna

fil forġa tat-tqanqil sabiex nilqgħu

għall-ħbit tal-kotra tigdeb

jew tibża minnha nfisha.

Għax issa sirna nħarsu f’għajnejħ

kull mostru li kabbarna

fl-irkejjen ta’ ħwejjiġna

wild il-biża

u d-duħħan ta’ kull twemmin

li fiħ trawwamna

Neħħejna ċ-ċpar, in-nida u d-duħħan

u xħin l-arja ċċarat

ġejna wiċċ imb wiċċ

mal baħħ.

Alfred Grech

24/11/2018

Ikellmek il-Baħar.

Meta ma nkunx nafx x’naqbad ngħidlek

Ikelmek il-baħar.

Inti li titkellem bħal leħen ġej mis-sema

Mur aħtaf il-parċmina minn idejn

Is-sibilla tal-ilwien

Li tgħix bejn l-art u l-baħar.

Inti tista’ tibla l-kliem kollu

Li hemm minqux fuq kull mafkar

Fid-dlam tal-għalqa tal-mejtin

U l-istonku tiegħek qabar mimli

Iżda fuq xufftejk itiehem ħelu

Bħall-għasel.

Imbagħad trid mill-ġdid terġa’ lura

Fit-tbexbix ta’ għodwa mbiegheda

Riekba karru tal-fidda

Misjuq minn żiemel abjad

Biex tbassar il-ġejjieni.

Inti li bħali twelidt taħt in-nida ta’ sema mdardar

Tagħllimt timxi l-quddiem

Imqar mingħajr ma taf x’hemm jistennik.

Alfred Grech

23/11/2018

Slavery

Beacause we are all born

Into slavery indentured and made to work

By the bosses who provide us

With the wages and the income

By those masterminds called clients

Who pull the invisible string.

We are all born into slavery

And all brought up to think

That this is the only way

That humanity can survive.

Look at the birds of the air

They neither sow nor reap nor gather into barns

And yet your heavenly father feeds them . . .

Consider the lilies of the field how they grow

They neither toil nor spin yet I tell you

Even Solomon in all his glory was not arrayed

Like one of them.

Who then has fabricated

This cage in which we are

All born into slavery?

Alfred Grech

22/11/2018

143.

U meta ser teħodni l-barra minni

Nnifsi,  jew tħawwilni f’dawk l-ambjenti

Fejn nista’ ngħix mill-ġdid imwieen minnek

Disorjentat kemm trid ġo ġungla folta

Maġenb il-barranin li lanqas nagħraf?

U kont ukoll immut jew nisparixxi

Li ma kontx naf l-hemm int li qed tmexxini

Tgħallimni l-ewwel passi ta’ tarbija

Il-bogħod mill-abitat li konna drajna

F’dal vjaġġ fid-dlam f’dil mixja solitarja.

Inti mbagħad mingħajr ma taf tkun tista’ ttenni

Dak kollu li bassart jew tirrepeti

Is-sewwa li ma tafx kif ser tfissirli.

Lilek, jixraq tassew li nsir inħobboka.

Alfred Grech

22/11/2018

Notturn.

F’nofs dan il-baħar bla konfini

Min jaf liema waħdi hija inti

Mill-kwiekeb qed ipetptu

Li trid turini t-triq tal-wegħediet fiergħa.

Jiena negħereq jekk nintebaħ

Li mintix hemm.

Idejk li ssoltu jmellsu  saru

rogħoda waħda

Imbagħad nisimgħu lill-xulxin

Imqar fis-skiet etern

Għalkemm ninsabu l-bogħod

Nisabul qrib

Għaliex il-bogħod hu biss fil-moħħ

Għal min bla fidi.

U l-moħħ ma jċedi qatt

Għas-skiet u t-tqanqiliet.

Int tkun taf jien x’irrid mit-ton ta’ leħni.

Alfred Grech

20/11/2018

Naħal.

X’nitilfu, xħin nitilfu

lin-naħal invażat,

ir-riħa tal-kull warda

taż-żghar ivvelenat?

Għax smajna mill-esperti

Bexxejna kullimkien,

u blajna l-pestiċiji

Ma baqa’ xejn kif kien.

Bħal massa li trid timraħ

f’ambjent ikkastigat,

u tgħix ġol-barumbari

maħnuqa, u kollox fgat.

X’nitilfu xħin bħan-naħal,

indakkru ma nistgħux

bil-bio-inġinerija

għax nemmnu u ma narawx?

Imbagħad tassew xħin jitlaq

in-naħal fejn hu l-frott,

sabiħ u naturali

u t-togħma li trid trodd?

Bil-bio-inġinerija

kull ġuf fertilizzat

u kollox diġitali

għax sar sintetizzat.

Alfred Grech

18/11/2018

Tul It-Telgħa Tal-Kalvarju

U ma tafx x’inħossu konna

meta naslu f’nofs it-telgħa,

inti ġġebbed, jiena ngħejja

bir bla qiegħ ma jridx jintela’?

Ma nafux għandniex inkomplu

bdejna ngħidu: Issa xbajna,

xejn ma tagħmel differenza

hekk jew hekk, għax issa drajna.

U ma tafx kif konna drajna

bla ma nafu għal xhiex ġejna,

sibna ruħna ma ħaddieħor

bla ma nafu fejn poġġejna?

Hekk ħassejna t-tnejn li bqajna,

hekk kull darba li niltaqgħu

int turini ħaġa b’oħra,

jien il bżieżaq li jinfaqgħu.

Hekk ħassejna bosta drabi

xħin jinfetaħ is-siparju,

Għax kien baqa’ ferm x’nitgħallmu

tul it-telgħa tal-kalvarju.

Alfred Grech.

16.11.2018

Fejn Hu Tmien It-Trejjqa.

Fejn hu tmiem it-trejqa

F’din l-għera f’das-skiet

X’sar minnha l-imghażqa

X’sar minnu l-moħriet.

Ma baqa’ xejn x’tagħmel

Inkella fejn tmur

Mank baqa’ ftit ħdura

Fejn tiġri u ddur.

Għax kollox inbena

Jew  ġie żviluppat

Hekk ried is-suq ħieles,

jekk mhux simulat.

Din ekonomija

Li dejjem tiżdied

U tibqa’ tintefaħ

eżatt bħama bdiet.

X’se jsir minnu l-bidwi

jekk l-anqas biss l-art

ma fadal fejn jaħdem

li baqa’ biss blat.

Xejn aktar xi jpartat

Xejn aktar xi jbiegħ

Sa ruħu mar jirhan

Tar-kollox mar-riħ.

U meta se jħallas

Li xtara bid-dejn

Min ser jagħtiħ lura

Ii zergħa għalxejn.

Min se jdawwar lura

Dir-rota li bdiet

Hekk tkisser u tfesdaq

F’din l-għera f’das-skiet?.

Alfred Grech

14/11/2018

Il-Laqgħa Tagħna.

Il-laqgħa tagħna ħabta u sabta

Bħal terrimot li jgħeżżeż

Vulkan li jirrimetti minn ġol vixxri

Il-lava taħraq ta’ tqanqiliet u episodji.

Il-ġmiel tiegħek jissorprendi

Jew jiżboq  dak tal-mara mitoloġika

Bint l-allat u nofsha bniedma

U wiċċek reġa’ xegħel il-ħmura ta’ filgħodu.

Jien nibqa’ l-vagabond infittex trejjqa ġdida

U inti l-kewkba ta’ filgħodu

Tirrifletti l-biża’ tiegħi.

Alfred Grech

13/11/2018

142.

Fejn naħsbu li sejrin sabiex inġeddu

dal-ħmar il-lejl li ta’ kuljum qed ngħixu

u nirkbu l-ferrovija li twassalna

lilhinn mill-istazzjoni tal-eqreb raħal?

U dan żvilupp sejjħulu sostenibbli

bla xkiel ta’ xejn, bla sogħoba u bla ma nafu

li f’daqqa waħda sibna l-baħħ, waqajna

bħall  anġli li rvillaw fl-abbiss ta’ dejjem

Għaliex triduna nirkbu l-ferrovija

jekk ma nafux fejn din għad trid twassalna?

Għax kull stazzjon mhuwiex ħlief tappa zejjda

li għad twassalna trid lilhinn mix-xefaq

Filwaqt li nafu jekk din l-illużjoni

s’hawnhekk wasslitna t-tmiem mhu qatt se jasal.

Alfred Grec

13/11/2018.

Remembrance Day  2018

Ħalluhom lil dawk li minghalihom

ifejjqu l-ġrieħi tat-tifkira u jserrħu l-kuxxjenza tagħhom

iqiegħdu l-ward mal-monumenti

biex ifakkru dak iż-żmien

meta l-kanuni kollha mmutaw. . .

għax il-kanuni ma mmutawx

għax għadhom jiġġerrew u jsibu kenn

dawk l-imsejknin li jaħarbu mit-tiġrib

u mit-tiġrif ta’ djarhom u dak kollu li

jafu u li hu għażiż għalihom.

U ma joqgħodux dawk

ixerrdu d-dmugħ tal-kukkudrilli

iġeddu t-tifkira ta’ min ħalla ħajtu

ghat-twemmin, għal artu jew għal kull skuża battala

li bellgħawlhom is-setgħana,

dawk li jibgħatu l-ħrief għal qatla.

Lil mejtin mhux it-tifkira iżda l-ħalfa

li ninżgħu il madmad tas-setgħana

ma nobdux

ma nservux

ma npaxxux

u nirvellaw

kontra kull min ikeskes

bniedem kontra ieħor.

Alfred Grech

11/11/2018.

Verġni Vestali.

Mill-maqdes tal-poeżija toħroġ inti

verġni vestali

bint il beraq

kull meta tqum il-ħtieġa

li s-seher tal-essenza jbiddel f’kelma

l-agunija ta’ dir-ruħ.

Fil ġuf tat-trasparenza

fejn ir-ruħ tindifen mingħajr mafkar

fl-abbiss etern tal-eżistenża,

hemmhekk fejn tibda l-mixja lejn ix-xefaq

fis-solitudni tal-merżuq li jdawwal

fanal li juri t-triq għal min ibaħħar

bir-reqqa ta’ ħarstu

fid-dalma tqila ta’ kull lejla

ta’ bla qamar u bla kwiekeb.

Alfred Grech

10/11/2018

141.

Int tista’ wkoll  tinħeba wara skuża

Itella war l-kwinti kull xenarju,

Tbiddel u taħrab, taħtaf lil min jiġi

Inkella bla ma jaf sab ruħu qribek.

Dan mhuwiex l-anġlu li mis-sema waqa’

Għax issa bla ma trid sirt priża tiegħu

U mhux bħal meta ħin bla waqt f’dal wileġ

Iltqajt ma dak jew dik u f’daqqa waħda

Bdejt ġrajja ġdida ta’ tbissim u dwejjaq.

Għax ftaħt bla ma ħabbatt, bqajt dieħla ġewwa

Għax b’ġismek qiegħda hawnhekk mhux iżda b’ruħek

Bħal mostru daħal fik, ma tafx x’ser tagħmel

U mhux lakemm issib min jimxi miegħek

U mhux lakemm issib min jiġi jfittxek.

Alfred Grech

09/11/2018.

Taqta’.

Taqta’ daqs xafra misnuna

Li tinfed il-laħama il-ħaj

Kull darba li tagħmel ħielsa minn kull tebgħa

n-nuqqasijiet tiegħi

Il-ferħa li tagħtini meta siekta

Għaliex jgħaddi mill-kurituri mudlama

Ta’ kranju qadim

Il-ħsieb li għad xi daba terġa’ togħdos

U ma terġax titla’ fil-wiċċ

Turini wiċċ b’ieħor għax int min int

Għax int tinbidel

Għax inti mara

Għax taħt il-ġilda bajda li tmelles l-ilma ġieri

Hemm ruħ u qalb ta’ tigra feroċi.

Jien qatt mhu se nitilfek

Għax nibqa nfittxek dejjem

U naf fejn nieħdok miegħi

Meta mkiegħi ma tkunx.

Jien nitbennen ta’ kuljum f’ħoġor l-allat

Inkebbes ħolma u nħalliha taqbad

Fil-masġar tiegħek.

Alfred Grech

08/11/2018

U Int Bqajt Ma Tkellimtx.

Is-sens tiegħi tal-avventura

wassalni s’għandek.

Il-bieraħ ittawwalt f’għajnejn il-lupu

u int bqajt ma tkellimtx.

Stennejt imqar ftit attenzjoni

iżd’inti ma bagtħtt li ebda nvit.

Illum inħossni qed nittawwal f’bir bla qiegħ

kif jiena mdorri nagħmel

iżd’inti lanqas  tfajtli xrara dawl

tal-kwiekeb qed jitbiegħdu.

Illum li qomt mill-ġdid minn bejn l-imwiet

intbaħt li dak tal-bieraħ ma kienx minnu.

Alfred Grech

07/11/2018.

Mit-Torri tal-Ivorju.

Mit-torri tal-ivorju

U mill-gardjoli tal-kranju

Nittawwallek u nibagħt raġġ dawl li jinfed

Sal-ħsibijiet u sax-xewqat

Li juri li l-art fil-qrib

Iżd’inti tibqa’ dik il-mara misterjuża

Ma tinqabadx u ma tħallix traċċi

Tad-dellijiet mnejn tgħaddi.

Jien nista’ nkun mhux ħati

Ta’għemili jew tat-twemmin li bih twebbilt

Jew tal-misteri

Għax int kapaċi tbiddel il-wiċċ t’anġlu

F’wieħed ta’ medusa.

U jien nibqa’ mbagħad

Trafiss fil-ħarsa tiegħek.

Alfred Grech.

07/11/2018

Buffuri.

Aħna lsiera u lanqas nafu.

Ma tlifna xejn

lanqas irbaħna

hemm barra l-weraq qed jittajjar

iżda l-buffuri tar-riħ hawn ġew qiegħdin

ġo fina

Int tħares lejja u xejn ma tgħidli

is-skiet jitkellem waħdu

għax ghandu t-tifsir tiegħu

elokwenti daqs it-talb.

Imblajt mill-vortiċi

il vortiċi huwa l-baħħ li fiħ nintilef

u l-ħsibijiet li ma jċedux.

Alfred Grech

05/11/2018