Tgħidux Li Jien Ribelli.

Tgħidux li jien ribelli,

imqar jekk ma naqbilx,

Jekk ħadd ma jrid jistaqsi

u għedewwa ma jagħmilx.

Tgħidux li jien ribelli

Inkella x’antikwat,

din hija l-fehma tiegħi

miniex żgur iffissat.

Għax issa mank tistaqsi:

jgħidulek għandek żball,

tkun biċċa ħomofobja,

ras iebsa ttrid tinħall.

Iridu t-tnejn jiżżewġu

u jsuru ta’ xulxin,

daqskieku żwieġ kwalunkwe

Għax hekk hu: X’waħda din!

Iridu t-tnejn jiżżewġu,

ħażin mintix favur,

il-ġeneru huwa wieħed,

u d-dinja tibqa’ ddur.

Mhumiex privileġġjati

għax jgidu l’għandhom dritt.

Minn fejn ġabuh nistaqsi,

bla nidħol f’xi konflitt.

Jekk kif tassew qed jgħidu,

dad-dritt minn fejn ġabuh?

Sal-lum ma kienx hemm liġi.

Dad-dritt lil min jafuh?

Għax dan bħal min jiftaħar

bil-ħafna drittijiet

kulħadd qed jippretendi,

u jsiru l-liġijiet.

’Mma jekk ma tkunx il-liġi,

-għax sirt minn kull kulur-

fuq liema blata soda

ser nibnu dan is-sur?

Għalhekk ħabib minn tiegħi

dad-ditt ma jeżistix,

sal-lum m’hemm ebda liġi.

Staqsejt, ma weġibtnix!

Għax jekk hu dritt tal-liġi

jispiċa mhu dritt xejn,

jekk għada jew pitgħada

tinbidel din b’kelmtejn.

U lanqas huwa sewwa

li l-ħtieġa ta’ ftit nies

malajr issir in-norma

u tiknes bħal kennies.

L-iżbal tal-Istat Malti

li jagħmel liġijiet

li ma jolqtux lill-kotra

u jsiru l-ħniżrijiet.

Għax argument imbażwar

li trid tkun inklussiv

ta’ kull min differenti

ukoll jekk sovversiv

ta’ dak li aħna nemmnu

ta’ dak l’hu aċċettat

ukoll kif in-natura

ordnat bla ma żbaljat.

Ħażin għall-Istat Malti

li jħaddan ġewwa fih

il-ħafna minoranzi

u jaqdi minnufih.

Iġibhom f’keffa waħda

u jqegħdhom fuq miżien

l-istess bla distinzjoni

ta’ min, jew x-xeta’ kien.

Alfred Grech

Imnarja 2017

Int Biss.

Int biss taf ja sirena ta’ wiċċ b’ieħor, kemm kont attur iddiżgrazzjat fit-teatrin tal-attaparsi, nagħmilha ta’ dak li qatt ma kont jew stajt inkun. Kemm kelli ngħix ħajjiet li qatt ma għexthom. Int biss taf għaliex illum titbissem quddiem daċ-ċirku penitenzjajru ta’ dnubiet mhumiex maħfura tal-logħba li jilghabu dawk kollha li jasbu li l-ħolqien hu biss il-mandra tad-dar tagħom.

Int biss, sirena tat-tamiet iż-żgħar, kull darba li tgħannili l-għanja siekta tal-għeġubijiet mistħajjla li dejjem ngħanni jien fl-uġih tas-sensazzjoni.

Int biss sirena tal-għanjiet minsija li tintasab fuq l-skoll ta’ ħajjti siekta, tgħanni l-agġjiet tal-gawwi li jobrox is-sisien bid-dwejjaq tiegħu, taf tgħidli kemm kien il-ħin mitluf meta lkoll ħsibna li nibnu xi monument li jibqa’. Imbagħad staqsejna dan kollu x’seta’ kien lil dawk li baqgħu iċċassati iħarsu lejn l-arloġġ u bqajna bla tweġiba.

Int biss sirena tal-awgurju t-tajjeb tfakkarni fit-turment ta’ ħbiberija mhix imwassla . . .

Int biss sirena tal-ambivalenzi li tajtni r-rima l-metru u l-konfini tal-ħsieb li dejjem jimraħ.

Int biss li sirt tafni sew, li tibgħat in-nebħiet fil bżieżaq tas-sapun jinfaqgħu f’wiċċi.

Int biss.

Alfred Grech

25/06/2017

Is-Sejba tas-Seklu.

Imqar li kienet mod ieħor minn kif ħsibtha

milli nqgħod infittex f’wiċċ kull mara

il-wiċċ efimeru tiegħek.

u jisbaħ għada u ngħid li rrid nibda ngħix mill-ġdid

għax din mhix ħajja;

Li ndur ma kull xaqliba għax il ġenb l-ieħor

tkun tara aħjar aħjar minn din in-naħħa;

Il-ferħ li nissorprendi lili nnifsi

u nibda nmmen l-hemm mod ieħor kif tista’ tgħix;

li nkun naf li hemm ninfa li tista’ tbiddel kollox.

Din hi s-sejba tas-seklu, is-sejjħa ta’ xewqati.

Alfred Grech

11/06/2017

Le Ma Rridx Immur f’Dawk il-Praterji.

Le ma rridx immur f’dawk il-prateriji riżervati

ta’ min ifitexx qiegħed il-kwiekeb f’lejl ta’ qamar kwinta,

fir-ripetizzjoni ta’ mogħodiet li fejnkont nintilef,

li minnhom kont għaddejt għal kemm il-darba

li minnhom jgħaddu biss il-bhejjem tax-xogħol

fejn kont nitfixkel  fil-ħofor, fit-tumbati

u mnalla kont insib il-ħuxlief li jikber mal-ħitan tas-sejjieħ

Le rrid noqgħod hawn, għax issa rrid intenni

imitazzjoni tal-għanja li daqqitli ta’ kittieb li naf kif jaħseb,

ta’ xbieha li rajt fi kwadru ta’ pittur li lanqas nafu.

Irrid li noqgħod hawn ħa nisma’ ż-żaqżieqa tal-kanċelli

qed jingħalqu u t-tisbita tal-persjana kull meta trid turini

li hemm int tissindakani.

Irrid li noqgħod hawn ħa nisma’ tal-iriwefen daħqa muta

inkella tar-riħ ġwejjed it-tnehida

fis-skiet ta’ dal-waqtiet jitolbu skuża

lil kull min mhuwiex lest illi jiffoka

fil-waqt tal-issa.

Hekk nibqa’ ngħix għal-dejjem

Alfred Grech

18/06/2017

Tassew Li Ridt Niltaqgħu?

Tassew li ridt niltaqgħu,

Nitilgħu fuq il-bejt biex ngħoddu l-kwiekeb?

Xħin kont nirranka għalik int reġa’ bdielek.

Biddilt u għalik ilbist misteri ġodda.

Xħin kont insuq fit-triq

Tfixkilt fil-ħsieb ta’ moħħi.

Int bqajt tweġiba għalija li tistenbaħ

Kull filgħodu,

Man-nifs taż-żiffa ġġor it-toqol tagħha

Fil-ġuf ta’ lejl li għadu qatt ma twieled

U tnaqqax fil-penombra tad-dell tiegħi

Ix-xbieha tiegħek.

Int bħal bebbuxu,

Erġajt dħalt ġo qoxortok

Biex qatt ma terġa’ toħroġ.

Tagħtini x’naħseb li kienet biss  ta’ darba

U għaliex il-le mhux minn qaddisek.

Ma tkunx kollok kemm int xħin trabbi l-ġwienaħ

Għalhekk ma togħola qatt ’l-fuq

Jew jekk ittir malajr trid terġa’ lura.

Imbagħad staqsejt ukoll hix dit-triq

Li trid twassalna sas-santwarju.

Alfred Grerch

16/06/2017 

Qed Ngħixu s-Skiet.

Qed ngħixu s-skiet tal-wied imdawwar b’xefaq,

Ta’ ħondoq b’għatu sħab mid-dawl imdellel.

Imdawwar dawra mejt gwarniċ il-ħajja,

Li jwaqqaf il-bogħod minnu l-ħars tal-bqija.

Ix-xefaq dawra mejt iżid jistieden

Il-ftuħ ta’ kuriduri u ta’ fruntieri,

Lilhinn minn dan il-blat tal-oċeani

U hemm ukoll fil-baħar għana msikket

Li tul dawn il- miljuni ta’ snin wasal

Fuq wiċċ il-blat imxier bil-kliem tiegħu

U hemm ser jibqa’ żmien bi żmien itambar

Fis-skiet taż-żmien għal dejjem sa minn dejjem

Alfred Grech

31/01/2012

Għax Trid Tippossjedini?

Għax trid tippossjedini?

Għax lili ma tafdax,

Għax taf li jien ninbidel

U ntenni ma nerġgħax.

Għax taħseb l’għad nitilqek

U lura ma nerġgħax?

Għax int ukoll tinbidel,

L-istess int ma tibqax.

U bħali bdejt int tibża’

Mill-bidla ta’ li fors

Isseħħ f’kullħadd u fina

Bl-uġieħ u bir-rimors.

Mhux miegħi trid tiggranfa

Mingħajr ma taf għalfej’,

Il-ġdid fiħ il-misteru

U l-biża’ ta’ li ġej.

Alfred Grech

14/06/2017

Din Hija Biss Mogħodija Tturmentata.

Din hija biss mogħodija tturmentata

It-triq li għad twassalni trid għal għandek,

Li tgħaddi minn ġol ħofor u t-tumbati,

U ssib li mqar f’għajnejk għamlulek l’ għamad,

Trid toqgħod tmiss b’idejk minn kull fejn tgħaddi

Fid-dlam etern ta’ ruħ li liha nfisha

Tfittex bla taf fil-baħħ tas-sabar tagħha.

Dan huwa vjaġġ perikoluz li nterraq

Li minnu għaddejt id f’id għal kemm il-darba,

Li miegħek, iżda nibża’, ma rridx niżloq,

Irrid, ma rridx u  rrid ma nafx x’se nagħmel.

Nitolbok tersaq ‘l-hawn u żżommli jdejja,

Nitolbok togħbodnix jekk għad jibdielek

Inkella jekk issib li qed ninbidel.

Alfred Grech

14/06/2017

Issa li Għadda ż-Żmien.

Issa li għadda ż-żmien li tkun fatali

Tiżżejjen kemm tiżżejjen terġa’ taqa’

Fil-bir tal-inkuxxjenza primordjali

Fil-bir tal-imnikktin li għerqu f’demmhom.

Issa li għadda ż-żmien u bħal sultana

Kont tgħaddi minn quddiemi bla ma ssellem

U tgħid ma baqa’ ħadd jaħsibha bħali

Tilliska d-dud tal-baħar fis-sunnara.

Issa li għadda ż-żmien u xena nbidlet

U taf għal kemm il-tul dal-ħabel jasal

Għax din hi xafra taqta’ minn kull naħħa

Biex iktar ma ż-żmien jgħaddi s-senna tilfet.

Alfred Grech.

13/06/2017

Is-Sejjħa.

Dik l-għajjta minn ġol-ġungla hemm se tibqa’

Għalkemm ma tinstemax,

Is-sejjħa tal-abbiss.

Il-qabża li rrid nagħmnel

Fid-dlam tal-lejl, fil-kaos tiegħek.

Sibilla tad-duħħan efimerali,

Bil-ħarsa biss t’għajnek int taf tgħallini

U taf tjassarni.

Is-sejjħa minn ġod-dlam hemm għada tidwi

U jiena nħossni dgħajjef biex nifqilha

Bħas-sejħa tas-sireni ġġorni magħha

Mingħajr ma naf fejn sejjer.

Sejjer fid-dlam tal-ossessjoni

Imbagħad la toqgħodux sebajkom tippuntawli

Għax jien ninġarr mal-ħamla

U dak il-ħars t’għajnejk.

Int għandek ġewwa fik in-nar ta’ dejjem

In-nar divin

U lili qed jaħraqli imqar lil ruħi.

Alfred Grech

12/06/2017

Qisek Ruħ Mimlija B’Għira.

Qisek ruħ mimlija bl-għira,

Ma tridx taf, ma taranix,

U ma tridx tirrispondini

U sirt qisek ma tafnix.

Qisek dell li tlaqt għal-dejjem,

Jew il-ħsieb li ma tħabbarx,

Bħal idea l’issa nsejtha

L’issa żgur ma niftakarx.

Inti taf li niġi nfittxek

Fejn ħaddieħor ma jsibekx,

Fuq ix-xefaq ta’ dil-lejla

Ħalli ngħid li ma nafekx.

Jekk tixgħelli t-tama tiegħi

Bħalma tixgħel xi musbieħ,

U tħallini nimxi l-mixja

Hekk jien miexi kontra r-riħ.

Jekk tħallini nimxi l-mixja

Minn mogħodija fuq il-blat,

Tiskanatx jekk terġa’ ssibni

Fuq il-għolja tal-allat.

Jekk turini f’din id-dinja

Ta’ nuqqas u ta’ dnubiet,

Nibda ntir fuq il-mibgħeda

U l-ferment ta’ ġol-ibliet.

Qisni kewkba li bdiet tiddi,

Ħlief iddawwal din ma tafx,

Tibda tixgħel u tibbrilla

Tibda mbagħad biex ma tagħrafx.

Alfred Grech

09/06/2017

Għalkemm il-Darba Dorna Bħal Żugraga.

Għalkemm il-darba dorna bħal żugraga

Id-dawra ta’ dal-ġnien għad-dell tas-siġar

Id-dawra ta’ teatru grieg fejn inpaċpċu

Inkella nirreċ’taw bħal kull f’ traġedja

Bħal skola ta’ studenti f’passiġġata.

Għalkemm il-darba smajtha dit-tnehida

Ta fommok jaħli l-meraq taċ-ċirasa

Qanqiena li tfakkarni x’kelli nagħmel

Akkumpanjat bl-orkestra tal-għasafar.

Għalkemm il-darba ġejna ħawnhekk nitnikkru

U kemm il-darba hawnhekk għad nerġgħu niġu.

Nistaqsu jekk nafekx kif int taf lili

U nħossu li t-tweġiba t-tnejn tajnieha

Biex nerġgħu niġu hawn u nirrepetu

l-istess tidwira.

Alfred Grech

10/06/2017

.

Għax hekk hi l-poeżija

M’għandhiex fuq min tistrieħ

U lanqas għandha leħen

Li j’thiha ftit tal-ġieħ.

Awturi mhux magħrufa

Dak kliemha ġej mill-bogħod

Fil-baħħ tad-diwi tagħha

Jirtogħod, jirtgħod, jirtogħod.

Nifisha hu tjubija

Għalkemm turment ir-ruħ

Fi klima ta’ passjoni

Qalb ġnien ta’ ward ifuħ

Ma ssibx min iperriċha

Għaliha m’hemmx il-qliegħ

Fuq karta mqatta mħażża

Tirtema’, ttir ma riħ.

Bħal-għanja li tintilef

Bla ma jismagħha ħadd,

Bħal ruħ l-imħabba titlob,

Bħal dejn li jrid jintradd.

Poeti fqar mitlufa

Ixandru li trid tgħid

Stħajjiltni wieħed minnhom

Sirt vittma ta’ li ngħid.

U għaliex jien wieħed minnhom

Għannej tal-verita’,

Tgħannieqa u bews mqanqla

Sinċier fil-karita’.

Poeti zgħar minsija,

Il-ġesti tagħna żgħar

’Mma kbira l-fidi tagħna

Fil-ħlewwa u kemm fl-imrar.

Alfred Grech

03/06/2017

U Issa Li Minn Fuqna.

U issa li minn fuqna għaddiet dil mewġa

ta’ nugrufun, tinġis u riħa soffokanti

it-tnehida li toħroġ minn fomna mihijiex għajr

sospir ir-ruħu mifluġa

li sfat il-vittma tar-rambaġġ, fejn lanqas tieħu nifs ma settgħet

il-poeżija.

Issa li fuqna reġgħet waqgħet is-sirda ta’ filgħaxija

in-nida tissenjala l-miġja ta’ sajf ieħor

noqgħodu ftit għal kwiet f’dil kantuniera

biex nagħżlu sewwasew x’irridu

u naħsbu u nitħassbu fuq dak kollu li għedna u li għamilna

sabiex naraw jiġix xi raġġ selvaġġ li jitxuxtana.

Jien lest li kollox naħfer

u ninsa li hemm intom takkużawni.

ninsa u naħfer.

Alfred Grech

02/06/2017

Aħjar Imxejt Fit-Tul.

Aħjar imxejt fit-tul, biex nagħmel xi ħbieb ġodda

U lanqas noqgħod hawn, bħal moribond fis-sodda.

Hekk nagħmel ħafna ħbieb, aħjar mis-seminarju,

Nistudja bħal qassis bla nitlef il-binarju.

Mhux nara ħafna nies u kollha b’fehma waħda,

U ’mnalla li tgħallimt tal-wegħeda nsib iċ-ċaħda.

U jidħlu u bla ma taf minn ħajjtek saru biċċa,

U rajt kif fehmthom qsamt, bla taf fejn ser tispiċċa.

U jirrabjaw għalik jekk int ma tagħmilx bħalhom,

U jħarsu bl-ikraħ lejk mal-bewsa li titfagħlhom.

U jirrabjaw għalik jekk int ma taqbilx magħhom

U jħarsu bl-ikraħ lejk ’kk ma tkunx in-naħħa tagħhom

Kulħadd bħal donnu jaf kif jgaħallem lil ħaddieħor

U baqa’ ma tgħallimx kif jista jgħin lill ieħor.

Alfred Grech

02/06/2017

Ieqaf Hemm.

Ieqaf hemm u ’l-quddiem tħarisx aktar,

Fuq din l-għolja li fuqha ’ssa tlaqjt.

Ieqaf hemm u ’l-quddiem tħarisx aktar,

Għax fejn kont int sibt ruħek erġajt.

Dan terren ta’ tħarbit u ta’ ħofor,

Fejn trid temmen u tħalli warajtk,

Kull tagħlim kull sistema kull drawwa,

Għax fid-dlam ta’ daċ-ċpar dħalt minn rajk.

U tistaqsi jekk hix din il-logħoba,

U tistaqsi tassew x’inhu l-għan,

U tistaqsi jekk fl-aħħar mill-aħħar

Hemmx xi ħsieb jew hux kollox bla pjan

Alfred Grech

01/06/2017