Il-Lejla Ma Ġejt Xejn.

U nibqgħu nittamaw li għad xi darba

lnsibu jiena u int l-imkien u l-waqt.

f’xi lejl ta’ skiet bla qamar u bla kwiekeb

ninfexxu nħarsu t-tnejn f’għajnejun xulxin.

Iżd’inti mhux lakemm tiftiehm miegħek,

inkella taqbdek f’wegħeda u tgħid xi trid,

fittixtek fl-isqaqien tar-raħal kollu,

jew taħt id-dawl inemnem tal-fanal.

F’dil-lejla ta’ bla kwiekeb u bla qamar,

stħajjiltek li trid tkebbes il-fuklar,

hawnhekk iltqajna t-tnejn għal-kemm il-darba,

illum id-dawl fuq wiċċek qed jisfar.

Ħassejtni bħallikieku kont xi għama

ifittex il qawsalli qalb ir-raxx,

il-lejla ma ġejt xejn u xejn ma ġara,

u bqajt ma kebbistlix imqar musbieħ.

Alfred Grech

31/10/2018

Ninxteħtu Bilqiegħda.

Ninxteħtu bilqiegħda fuq l-għatbet il-bieb miftuħ tal-inċertezzi,

ta’ xemx li qatt ma tinżel wara x-xefaq għax jiltewa

u nimxi ma xulxin f’pellegrinaġġ li jrid jgħaddina minn bieb għall-ieħor

tferfer ġwenħajtk bħall-anġli tas-smewwiet

bejn ibħra u sema li ma jiltaqgħu qatt.

Bħal l-pendlu mbagħad indur jien fuqi nnifsu biex

nurik li d-dinja tassew tonda.

Jien għad niltaqa’ miegħek  max-xatba ta’ lilhinn

għaliex il linja li tifrida hija l-linja

ta’dak li jidher u dak li ma jidhrix

isserraħ fuq l-ixfar iktar il-bogħod minn kull konfini

li jħawwad il-ġejjieni

biex jerġa’ mbagħad jistrieħ fuq xtut indifferent

bħal meta wieħed joħlom it-tifkririet inkella l-biża’

ta’ dak li jista’ jiġri.

Id-dell li nħallu jiena u int ikun id-dell rifless mal-ħitana tal-infinit

u mfisser biss bis-sillabi mislufa

minn kull kelma mistħajjla

fit-tifkiriet tal-bieraħ

u tħabbir ta’ dak li jista jiġri.

Alfred Grech

27/10/2018

L-Għaliex.

Hu biex nirrendi mingħajr sugu

u ta’ bla saħħa dit-tnehida li jien

nikteb b’dan l-ilsien li mank jinftiehem

Imħallat mal-ilwien ta’ qawsalla artifiċjali

ilwien ġodda, frott ta’ moħħ

u qalb titniegħed

ilwien artifiċjli jidwi ħsejjes

tal-eklissi ta’ univers magħluq ġo kaxxa

ta’ żmien li qatt ma beda

eternita’ mnaqqxa u ċirkoskritta

fl-ispazju u fi-żmien.

Din hi t-tnehida li ma tinstemax

pennellata li titħassar

berqa li tintesa.

Għalhekk jien naqbad dil-pinna

u nħarbex dawn il-versi.

Alfred Grech

27/10/2018

139.

Int għedtli ma nibżax għaliex jum ieħor

Biżżejjed jaħli d-dieq u l-ħell tal-bieraħ.

M’għadnix inħares il-quddiem biex nirbaħ

Battalji, insir eroj jew oqsma ġodda.

Int għedtli ma nibżax iżd’hi tal-biża

Dil ħajja, nistradaw kapriċċ ħaddieħor.

Jgħidulna x’għandna nagħmlu u x’għandna ngħidu,

Fit-tajjeb, fil-ħażin, kif se jkun l-għada.

Inqbadt ġol-ingranaġġ u tibqa’ tgħidli

Biex qalbi ma naqtax għax tajtni l-mezzi,

Maqbud f’dal-paradoss jew f’din l-għanqbuta

Li ħloqt biż-żmien u żmien qed jiġri bija.

Ma jafx jekk in-nuqqas fir-ritmu hux tiegħi

Inkella l-univers qed jgħaġġel aktar.

Alfred Grech

26/10/2018

Dan li ma niftiehmux.

Dan li ma niftiehmux

Nuqqasijiet li jirrikorru

Huma x’aktarx l-iżbalji

Li trid tagħmel biex tibda tifhem.

Ikunu dawk li jagħtu bidu

Għal ħajja ġdida.

Imwaħħla f’moħħi wkoll

Kull fissazzjoni tiegħek.

Jien nagħmlek l-isbaħ mara li qatt ħlomt

U hekk trid tkun

Biex tibda ssaltan

Fis-saltna tiegħi.

Alfred Grech

25/10/2018

Aħna Nitniehdu.

Aħna li sirna barranin imqarr fi djarna

għax is-sistema belgħet kollox

għax sirna fqar mingħajr ma ntbaħna

għax hemm il banek jaħkmu kollox

u rqadna f’dawl il jum

għax hemm min jieħu ħsiebna

u jieħu ħsieb ħwejjiġna.

Aħna li twelidna fl-għaks imwaħħar

li ma jaf xejn mill-għerf modern u l-ġid virtwali,

li drajna fil-ħelsien tal-ħsieb u l-kelma

tal-beraħ tal-widien u tal-għelieqi

ma nifilħux il-madmad tas-setgħana

u l-arroganza tal-anonimat sottili,

ta’ dawk il ħafna rjus isuqu l-merħla

ta’ dawk li jridu lilna jgħallmu

x’għandna ngħidu, x’għandna naħsbu

u x’għandna nagħmlu bi ħwejjiġna.

Aħna ma naduraw lill ebda alla falz

lill-ebda naqxa u l-ebda xbieha

ta’ li hemm fis-sema ‘l fuq

u ta’ li hemm fl-art minn taħt

jew ta’ li hemm fl-ilma ta’ taħt l-art,

ma nitmejjlux quddiemhom

wisq inqas quddiem dawk li jseħħfu l-flus

jisolħu sa l-insetti

u jdawwru r-rota tal iħirsa

f-ekonomija diġitali tisparixxi

tintefaħ bħal bużżieqa

ta’ bla isem, li tħaddan lilha nfisha

xi ħadd bi ħamar il-lejl

la jara u lanqas jisma’.

Aħna noħorġu fil-miftuħ

interrqu l-vija sagra

għaliex ma nifilħux it-toqol

tar-radda tal-moħriet

tas-sikka dejjem tobrox

tal-morsa dejjem tagħfas

tal-par għajnejn li qatt ma jorqdu. . .

Aħna nitniehdu.

Alfred Grech

24/10/2018

Mhux Il-Bogħod li Jifridna.

Jien noħlom il-jiem fejn xejn ma jiġri,

u lilek li tagħllimni

l-għerf sieket ta’ kull meta nisfa’ waħdi.

Mhux il bogħod li hemm jifridna,

iżda l-mixja li tissejjaħ vjaġġ fittizju,

il passi tar-riġlejn li qiegħdin biss f-moħħi

Hemm biss it-tokki tal-arloġġ

jew is-sekondi li jressquni lejk

jew lejn ix-xefaq.

Ix-xefaq mhuwiex evanexxenti,

ma tilħqu qatt

xi darba rrid immissu

mhux b’idejja.

Kif u meta ma nafx

lanqas naf  xhemm lil hin minnu

int tlaqt malajr bla klien

u bla ma biss sellimtli.

Alfred Grecj

23/10/2018

U Għadhom Jgħidu.

U għadhom jghidu : l-ekonomija ghad trid tikber

U din kemm sejjra tikber?

Din l-art l-art li kemm kemm tidher fuq il-mapep

 issa saret l-art tal-iġganti, l-art tal-meravilji, l-art tal-ħrejjef.

U dawk l-oħrajn jagħżlu l-miżien biex ma jkun hemm ċaqlieq bla ħtieġa.

Għax issa bdejna nbiegħu lilna nfusna, dak li hu tagħna

biex nagħmlu l-flus,

F’din l-art fejn tista terdgha l-ħalib u l-għasel

U ntenn għal kemm il-darba li l-ekonomija għada tikber

Issa li ftaħna l-bibien ta’ djarna

U sSirna multikulturali.

X’se jsir minnha aħna li nemmnu li aħna maltin u għawdxin?

 Ma jimpurtax, l-aqwa li  ferrovija tibqa sejjra u żżid il ġiri l-quddiem

Biex ngħidu li aħna fost l-ktar pajjiżi sodi.

Lanqas  jimporta li l-ferrovija ntliet sa snienha,

Lanqas jimporta li hawn aktar barranin

Jew nies li ma jafux minn fejn se joqghodu

Jimporta li żdide l-opulenza

Għax baqgħu jibnu u baqgħu jibnu

Għax hawn vetturi aktar min-nies

Din hija art  li tisħtħi tgħid x’jisimha

Għax il-bixkilla ntliet u l-bċejjeċ bdew jaqgħu fl-art

U la żwiemel u lanqas in-nies tas-sultan

Ma setgħu iqiegħedu flimkien il-biċċiet.

Tgħotor, fl-ambjent, l-għoli tal-kirjiet u fl-affluwenza

U hekk issa Malta Tagħna tħejji ruħu għal ġejjieni billi tistenna

l-bagalja li jġorr il-ministru tal-finanzi

U bdejna nemmnu wkoll dil-ħrafa

Ma nieħdu minn ta’ ħadd u nagħtu lil-kullħadd.

Għax issa għandna żżejjed.

Alfred Grech

22/10/2018

Bħal-Raxx It-Tqanqiliet.

Bħal raxx it-ttqanqiliet

li jinxfu fuq il-ġilda

u jiena ħsibt li nġedded

it-teatrin tal-bieraħ.

Beraq u sajjetti

mingħajr ma tasal qatt

il-maltempata

mingħajr ma jqum ir-riefnu.

Stennejtek kemm il-darba

int bqajt ma ġejtx

bqajt itaqqabli rasi

bit-torturi ta’ dak li naf.

Xħin tixxotta l-bettiegħa

tobrox il qiegħ għalxejn

għax lanqas dmugħ ma jibqa’.

La spejgazzjoni u lanqas naqal.

Il-fdal hu biss irmied

ta’ kull tqanila riċiklata

ta’ sensazzjoni li għadda żmienha

li ma titkebbes qatt

għax tibqa’ dik li hi

Tifkira.

Alfred Grech

21/10/2018

Kif Inti?

Kif inti? –qaltli-

Jien ukoll ma niflaħx nerfa’

It-toqol tal-baħħ u x-xejn,

Bil-ktajjen ma riġlejja

Li xekklu lilna t-tnejn.

Jien għadni kif kont qabel

-Weġibtha-

Mal-għadu aggressiv,

l-inkomprensjoni, l-għamad

Nissielet impulsiv,

Dil-bestja feroċi li daħlet ġol-imħuħ

Dan l-annimal li qiegħed jiggranfa

jinvadi imkejjen sagri

jisraq dak li mnhux tiegħu

u jaħkem il-merħla lluppjata.

Qaltli: Wegħedni

Li fis-sahra u fit-tnissija

Ta’ min mar jgħix f’ħin ieħor

U mhux issa,

Tibqa’ tiftakartni.

Alfred Grech

Ż19/10/2018

Is-Sens tal-Ħajja.

Xħin tibda tmur għar-ritmu

U lanqas sibt ir-rima,

U tibqa’ ddur u tagħqad

U titlef it-tbissima,

Xħin lanqas biss il-weġgħa

Ma tħoss u xejn mhu f’waqtu

U taħsbek miexi f’ħolma

U xejn ma jkun kif xtaqtu.

Xħin timxi bla ma tħossha

Ir-rifsa xħin titlajja,

Tistaqsi hux qed titlef

Tassew is-sens tal-ħajja.

U taħseb hux f’kull weġgħa

Ewwilla hemmx tifsira,

Fil-forġa n-nar isaffi

U jnessi kull tifkira.

Xħin lanqas tibqa’ temmen,

Li fuqu kont isserraħ,

Li wasslek f’tarf in-niżla,

Mhemm xejn li jista’ jferraħ.

Issir hekk taf il-għala

U din tagħlima kbira:

Mhux int il-ħajja tifhem

Il-Ħajja ttik tifsira.

Alfred Grech

17/10/2018

Jien Stennejtek.

Jien stennejtek u inti bqajt ma ġejtx

mort fil-waqt u mkien li fteħemna.

Int jista’ jkun li ntift fil-weraq idur

maħtuf minn riefnu

fit-triq li t-tnejn terraqna.

Jien stennejtek u int bqajt ma ġejtx

għax jista’ jkun li l-mormoriji tiegħi dejjquk,

għax jista’ jkun li smajt il-melodiji

li daqqejt u dort u reġa’ bdielek.

Jien issa qiegħed hawn

nagħmel dak li ndrajt nagħmel

nibgħat it-tislijiet lil dak li jkun

u nistieden li min jgħaddi.

Alfred Grech

16.10.2018

X’Int Tħares?*

Inħares lejn il-kwiekeb

għax qiegħed ġol-gandott

għaliex minn ġol-perjani

jidħol biss

dawl iffiltrat.

Bibien ir-ruħ mitbuqa

quddiem dan il-flaġell

quddiem dan il-massakru

l-aljenazzjoni ta’ dak li jaqbel

u dak li jifunzjona.

Il-qalb imbagħad

għad tmut fir-resħa

għax tidhra mqar

is-swat.

Alfred Grech.

15/10/2018.

*Bi Tweġiba għall-poeżija li ġġib l-istess isem ta’ Goelle Galea.

Din l-Arja Ndefinita.

Kull darba li bexxaqna l-persjani

sfidajna  d-dellijiet

bil-velu tal-imgħoddi

biex żgur ma ningħarfux.

Ħlief arja umda

u xita qliela ma nduqux

kul xħin nittawlu barra.

Ir-riħ imewweġ l-imwieġ

tan-nifs li jidħol fina

tal-fwieħa tar-rand u tal-mertqux

tas-sagħtar li jikber f’art imwarrba.

F’din l-għodwa

ta’ għaġeb u stupur

ta’ arja ndefinita

ma qed jiċċaqlaq xejn

fit-trufijiet tal-ħajja.

Alfred Grech

14. 10. 2018.

Nixtieq.

Nixtieq li nasal lilhinn minn fejn ħallejtni

maġenb l-assenza tiegħek

nibni mafkar u ninżel għarkubtejja

ngħodd l-iħirsa ta’ bil-lejl

inkella frak il ħġieġ

ta’ wara l-ħabta.

Int tkebbes xrara u titlaq l-hemm

f’dawk il waqtiet ta ġenna eterna.

Jien nibqa’ hawnhekk biex nonfoħ

il-bżieżaq tas-sapun quddiem il bieb ta’ darek

u noqgħod nikkunempla

it-teptip tal-kiekebfl-isfond ta’ sema nnawfragat

fuq skolji diġitali.

Fil- baħħ imbagħad insib it-tweġibiet

li kont nistenna,

imqar jekk tkun intlift

fil-kuriduri twal u dojoq

tar-rutina ta’ kuljum.

Alfred Grech

12/10/2018

Tithonus.

U hekk tista terġa’ tqiegħdni

mal-imbeċilli li ħasbuk ġenju

fuq naħħet il-lemin ta’ fejn ħallejtni

bil-miżien il-ġdid tal-ħaqq

f’din l-era ta’ġustizzja feminili,

jew tibni niċċa ġdida

fejn tikkunserva l-inċens tat-tifkiriet

bil venerazzjoni tal-fwejjaġ infernali

bir-riħa ta’ min jiskonta.

Int tista’ wkoll tinsieni

fin-naħħa tax-xellug tal-lvant iżernaq

inkella tibża’ tersaq lejn in-nar

li qatt ma jnixxef l-għatx

għax taf li wiċċ il-baħar jirrifletti

is-sliem ta’ qamar ħiemed.

Il-mewġ irodd lix-xtajta

il-bews ta’ grigalata

u l-bżieżaq arja li ma felħux

it-toqol tal-abbissi.

Imqar fid-dalm ral-lejl jien nittawwallek

mal kurutiuri twal xħin tippassiġġa

bla direzzjoni

tiskonta l-piena.

Alfred Grech

10/10/2018.