Issa li Leħinna.

Issa li leħinna weħel fi griżmejna

u l-għannej sabi ruħu waħdu

jleflef fir-raġġi aljenanti

tal-imrieżaq.

Issa li l-leħħa m’għadiex tgħaddi

mill-ħitan ħoxnin tal-kranju

biex tibgħat il- messaġ

li hawn ukoll qed ngħixu.

Issa ntbaħt ukoll

li int mhux lili tħobb

iżda l-għanja li toħroġ minn ġox-xquq imtarrfa

ta’ dan il-kjażmu abbissali

li tmis il-pern tar-ruħ.

U tifhem? Xi trid tifhem?

Ma tifhemn qatt u xejn,

kullħadd bil-fjamma tiegħu

dad-dawl xegħelnieh għalxejn.

Issa inti wkoll titniegħes u titmelles u titmiegħek

mal-fwar qaddis tal-fwieħa ferriħija

tal-poeżija ta’  bla ħjiena u ma tagħmel ebda ħsara.

Inti terġa’ lura tiġi bħalma ġejt f’żernieq il-għodwa

riekba fuq żiemel bajda.

Alfred Grech

25/02/2018

LII

Il-kliem ta’ das-sgriet f’widnejn il-gawwi

Jitmasħan mat-telfien ta’ qalb li weġġgħet;

Jisseqqer fuq il-mewġ ta’ baħar qawwi

Tifnieħ ta’ kull filgħodu x-xemx li feġġgħet.

Għad-dell qadim ta’ maqdes fuq il-mitbaħ,

Marsus hemm ġewwa kalċi għaraq talbi,

U hemm jien noqgħod nishar sa xħin jisbaħ

Fid-dalma tad-dulur li jinfed qalbi.

Jekk tħares lejja sew jien mimli tbajja,

Inġorr dat-toqol kollu ta’ bla fejda,

Ħwejjeġ li kibru miegħi kollha rqajja

Frix il-liżar ta’ ħajjti fuq il-mejda.

Quddiem il-baħar qiegħed qisu ħġieġa

Miż-żnied tas-skiet inqabbad il-ġiġġieġa.

Alfred Grech

04/06/2012

Tiddejjaq.

Tiddejjaq tisfida l-allat t’olimpu

Għax tibża’ mir-rabja tagħhom.

Inti bħal dik li tistenbaħ u tintebaħ

Li issa mhux il-waqt,

Inkella trid toqgħod tistenna ftit ieħor

Bil-bieb imbexxaq jew minn wara l-persjana.

Għalkemm iss’ ilek ħajjtek kollha

Tistenna u taf li qed tistenna għalxejn

Xorta waħda bqajt ma ntbaħtx

Li sadnittant, iż-żmien għaddej.

Alfred Grech

21/02/2018

Issa li waħdi bnejt dan is-Santwarju.

Issa li waħdi bnejt dan is-santwarju

Li ħadd mhu qed iżur, li ħadd ma jara,

Inħoss li l-mewt m’għadiex xi barranija

Għax issa xejn ma fadal x’nista’ nara.

U issa ħadd ma fadal għal min nilqa’

Inħbejt fejn ħadd ma jersaq, bla pressjoni,

Bnejt ermitaġġ fis-skiet ta’ ġewwa fija

Fejn fih nirtira waħdi bla pensjoni.

Il-bogħod mill-għagħa tal-folla, eremita;

Jekk għadek int ma ntbaħtx bl-assenza tiegħi

Ma ġara xejn għax għadu ħadd ma ntebaħ,

U nista’ wkoll nistiednek tiġi miegħi.

Alfred Grech.

20/05/2012

L.

Fit-tarf tal-jum id-dawl inin fil-ħila.

L-għajnejn bħal jiċċassaw fil-baħħ warrani,

U dak li kien ħafif, issa bi tqila,

F’daqqa jidher il-bogħod, isir barrani.

Fit-tarf tal-jum qaddis min jisma’ talbek?

Jintemm fl-irkejjen, bogħod fejn qatt ma rajtu,

Jew jidwi r-ritmu tqil taħbit ta’ qalbek

U tisma’ dak f’widnejk li qatt ma smajtu.

Sakemm tal-lejl il-ħemda ssir qawwija,

U jsiru dellijiet l-iħirsa għatxana,

Għaliex fid-dlam titneħħa kull mistħija,

U l-qalb fix-xejn tas-skiet araha tistagħna.

F’kull nifs li tieħu ’l-ġewwa fuq l-imħadda

Tindaf ir-ruħ mit-trab tal-jum li għadda.

Alfred Grech

26/04/2012

Xħin Tiġini t’Tentazzjoni.

Xħin tiġini t-tentazzjoni

li nċempillek biex niltaqghu

ma tkun xejn għajr frustrazzjoni,

qishom bżieżaq qed jinfaqgħu.

Kalamita li qed tiġbidni

biex niltaqgħu għal darb’oħra,

ma tkunx ħlief is-sensazzjoni

biex mill-“issa” naħraba ħarba.

Għar minn vizzju li jindara

biex mill-ġdid fejn konna qabel,

għall-irdoss ta’ dak li nafu

mal-imgħoddi mxekkel b’ħabel.

Ta’ kull darba f’moħħi taħbat

naħrab ħarba ta’ tfittxija,

mal-kurrent taż-żmien li jgaħddi

u nintilef fit-tnissija.

Alfred Grech.

17/02/2018

Il-Lejla Għannaqni.

Il-lejla ngħannqek waħda mhux minħabba

Il-kesħa, iżda minħabba l-bżieżaq t’arja pura

Li joktru ġewwa fija u qatt ma jaslu.

Jinfaqgħu mhux fil-wiċċ

Iżda minħabba r-rassa tad-dwejjaq u tan-niket.

Il-lejla ngħannqek miegħi mhux għaliex

Inħoss il-morsa tas-solitudni qed tissikka

Inkella għaliex ninħtieġ il-ħolm sabiex inderri

Iżd’għaliex tassew irrid li ngħaddi minn ġol-wied

Ta dell il-mewt u inti tkun is-sieħba tiegħi.

Għalhekk il-lejla rrid mingħandek biss tgħannieqa

Mingħajr ma tlissen kelma waħda

Mingħajr il-ħtieġa ta’ xi ħarba.

Ersaq lejja u għannaqni

Flimkien immissu l-kwiekeb

U nilgħabu mistoħbija mal-qamar qalbu sewda

Li jaf bid-dnubiet kollha tagħna li għad irridu naħfru

Lil xulxin.

Jekk ma tgħannaqnix il-lejla

Kif ser niftakrek għada.

Alfred Grech

Jum San Valentino 2018

U Issa Ma Ngħarfekx.

U issa ma ngħarfekx

imqarr jekk terġa’ tiġi

għax darba nqtajt minn miegħek bdejn ngħum

fil-baħar ta’ bla xefaq.

Ma nafx fejn irrrid nasal

m’hawnx kwiekeb li juruni

xħin qtajtli l-kurdun, infamt u mort għal rasi.

Tgħallimt kif ngħix mal-lpup

tgħallimt il-ħażen tagħhom

nirgħa’ bħal kukkudrilli

nistagħad fl-għadira magħhom.

Staqsejt kull mistoqsija

bil-logika l’għallmuni

tkellimt ukoll b’ilsienhom

u lanqas qed ninftiehem.

Issa li qed nerġa’ nersaq lejk

inħossni nerġa’ negħereq

f’dak-baħar ta’ bla xefaq

fl-immensita’ minn tiegħek.

Alfred Grech

13/02/2018

Jannar.

F’dal ġranet ta’ Jannar ta’ xitwa skomda

imdendla stalaktiti bħalma sħab

jiddendel ma sema ndifferenti

ir-ruħ tistenna għalxejn il-fidwa ta’ fewġet il-grigal

biex tgħid li mhix f’sikkitha.

Ħalliel iż-żmien li jiżloq bla jrodd lura

mal-blat żellieq tal-eżistenza 

u jisirqilna mqar ix-xewqat tal-innoċenza.

Kif, għidli kif naħtfu ftit tad-dija­?

Għax aħna li twelidna verġni

għodosna wisq ġol-iskwallur

ta’ devozzjoni mgħawwġa u mhix imnebbħa.

U x’jagħmel il-poeta li jsib ruħu

itambar l-istess tnabar illi jqajjmu mill-imwiet?

Kif ser ifisser li fin-nebħ hemm dina ġdida

li ma tintlaħaq qatt fl-istorbju u fl-affluwenza?

Il-fuq hemm sema evanexxenti

fl-għabex tal-eklissi ta’ bla xefaq

fejn jitwieżnu u jisparixxu bħall-iħirsa,

l-allat li kkastigawna.

Alfred Grech

12/02/2018.

Xi Jġiegħel tqum?

Xi jġiegħelek tqum filgħodu u toħroġ barra

minn taħt i-friex tisfida l-ħajja assurda

taħt sema ġriż, fir-riħ, taħt xita nieżla

tinxteħet mal-kurrent ta’ nies għaddejja

bħal wied li jgħaddi jkarkar mal-bankina

u tbiddel il-burdata

ta’ qtugħ in-nifs, t’insuffiċċjenza?

Inkella ma tqum xejn u toqgħod hawn

għar-rdoss tal-fehma rikorrenti

li xejn mhux ġdid, li xejn mhu xejn u xejn mhu se jinbidel

li għad xi darba ssib għall-mistoqsija

tweġiba, li hekk u hekk biss int taf tgħix il-ħajja?

Xħin jerġa’ jiġi l-lejl u ssib li xejn ma nbidel

għajr-iż-żmien li bħall-kurrent ikarkar mal-bankina

baqa’ għaddej

u din ukoll mhix illużżjoni

hi l-eżistenza.

Alfred Grech

10/02/2018 

Bħal Qamar Int Bla Nikta.

Bħal qamar int bla nikta

Li jitla’ mill-abbissi

Ta xefaq bla tifsira

Għarwiena tifrex l-għera ta’ sbuħitek

Fuq mewġ il-baħar.

Int bħal baħrija li ġġib l-aħbar it-tajba

Inkella bħall-għasfru tal-malawgurju

Iżżommni fuq ix-xwiek

U żżurni kull xħin trid u xħin jiftillek

Iġġorr il-profeziji.

Minn wiċċek rajt tinħasad

Ir-rima tal-imħabba

Bħal kieku xi sorpriża

Stampata mal-ħabbata tal-bieb ta’ barra

U fuq il-ħġieġ tat-tieqa

Joħroġ id-dell tal-agunija.  

Bejn il-palm ta’ jdejk marsusa

Hemm warda li trid twarrad

Bħal meta jien nintilef bejn ħaltejn

Ta’ mistoqsija li qatt ma xtaqt nistaqsi.

Bħal fidil jien nerġa’ ninżel għarkubtejja

Hawn quddiemek

Fuq it-tapit tal-labar u tal-ward

Stordut bil-bjuda tal-ġilda tiegħek.

Alfred Grech.

O9/02/2018

Inħares Lejk.

Inħares lejk bl-istess għajnejn

Bħal kieku kont tarbija.

Inqum filgħodu nistennik

U nerġa mmur mal-bqija.

Inħares lejk bl-istess ajnejn

Bħal meta l-ewwel darba,

Bħal-leħma li tiġik imnejn

Ma tafx u  taħrab ħarba.

Inħares lejk bl-istess għajnejn

Bis-seħer deludenti,

Bħal warda li qatt ma titbiel

Bqajt friska u sorprendenti.

Inħares lejk bl-istess għajnejn

Bħal meta nħares f’mera

Li taqleb il-polarita’

Tas-sewwa li jintwera.

Alfred Grech

07/02/2018

M’Jiniex Dak Li Qed Tara.

M’jiniex dak il-waħdieni li qed tara

U lanqas ma jien dak li tkellmu fuqi

Għax dawk ma jafu xejn u lanqas inti

Ma qiegħda tara sewwa. Għax inbidel

Il-kopjun, inbidlu wkoll l-atturi,

U jekk tistsaqsi lili jien min jiena

Miniex żgur dak li taħseb li qed tara.

U dak li tara lili qiegħed nagħmel

Hu biss ix-xeneġġjat f’dan it-teatru

Li sibtni qed ġo fih bla ġejt mistoqsi.

Għalhekk, jekk trid xi darba toqrob lejja

Trid l-isfel tħares f’dan il-bir bla ħerża

U jekk ssib li l- qiegħ ma wiċċek jaħbat

Malajr tintebaħ. Dak li qed tarani

Nagħmel, dak, mhux jiena, u ma nafx lanqas

Min jista’ jkun li qed jimpusturani,

Jagħmilha attaparsi li kont jiena-

l-attur li f’żaqqa waħda nesa l-parti tiegħu.

Alfred Grech

10-01-2012

F’Dal-Ġranet Mitbiela.

F’dal-ġranet mitbiela ta’ xitwa mitwija

Tħares għalxejn fuq wiċċ żernieq iżernaq

Biex tiraq ftit tad-dija.

Għodosna wisq fil-ħmieġ u l-iskwallur

Ta’ devozzjoni mhix imnebbħa

Biex nintebħu li hemm barra hemm dinja oħra

Fir-rifuġju tal-midinbin li jmur jinħeba

Taħt sema zvinturat li jiżvanixxi wara x-xefaq.

Is-sentinelli tar-ronda u tal-ħolm ikrah

Bħal Ħuna l-Kbir jogħdsuna f’ħalq l-abbissi

Tax-xejn li bħal kull ħaġa sar jiġġebbed.

Irridu nqumu minn dan-ngħas li jġorrna miegħu

Li jġorrna mal-kurrenti ta’ kulljum fuq friex imħarbat;

In-nagħas ta’ ferrovija fuq binarji

Ma jwasslu għal imkien, u lanqas tiġi lura.

Jien issa nibda nfittex illi naħrab

U ma nkunx hemm xħin tergħu issejjħuli

Biex lanqas inkun xhud ta’ li jiġri,

Infittex is-serħan alluċinanti

Fid-duħħan ta’ narrattiva li tistordi.

Jien bqajtx hawnhekk fil-ksieħ ta’ lejl u xitwa efimera

Waqt li l-oħrajn mitlufa fil-bankett

Għax kienu jgeddsu u mingħalihom daħlu l-ġenna.

Il-ġenna qiegħeda hawnhekk

Xħin tagħmel xewqa.

Alfred Grech

05/02/2018

136.

Jien naf li qatt ma tista’ tiġi miegħi

għalkemm se tibqa’ hawnhekk ittambar f’moħħi:

is-seħer qatt ma kien kif qed toħolmu

kull meta xxidd il-maskra ta’ ħaddieħor.

Inkella billi rkibt il-ferrovija

u mingħalik b’daqshekk fewwaħt il fewġa.

Il-ħofra li ħallielek kif timliha,

bid-dmugħ tal-kukkudrilli u tar-rimorsi?

Biex attaparsi tagħmel bħal ma jagħmlu

u mingħalik b’daqshekk qrobt lejn il-ġenna.

Il-ħin għaddej u qatt ma ġġibu lura

għax tkun qed tmur kontrik u f’dak li temmen

tkun toħloq simulakru fejn tistaħba

imbagħad tintebaħ f’waqt kemm kont imqarrqa.

Alfred Grech

04/02/2018

Dan Jista’ Jkun Jum Ieħor.

U dan jista’ jkun jum ieħor

Fejn xejn ma jiġri

U jinżel is-siparju fuq it-toqol ta’ qalb imnikkta

Imxebba, mxekkla u mnaqqra mill-użura

Ta’ kull ferita.

Dan jista’ jkun jum ieħor

Fejn ma titgħallem xejn

Fejn jerġa’ jinżel l-istar tal-amneżija

Tal-parassiti li jgħixu minn fuq min qed jitħabat.

Da jista’ jkun jum ieħor

Fejn tintebaħ li għadek fil-kanal

Fuq il-bninarji primordjasli li fuqhom konna tlaqna

U jwasslu f’tarf ix-xfer.

Alfred Grech

01/02/2018

Xejn Mhu Għal dejjem.

Biex nislet l-għerf tal-inċertezzi,

Fid-dell dubjuż ta’ kull akkuża

Tifsira nagħti lil din ħajjti

U ngħix biex naqbad ma kull skuża.

Paraliżżat ma kull dilemmi

Fewġiet il-mewt fuq wiċċ imnikket,

F’żernieq li tfixkel l-għada mistħi

Bil-ħoss tal-mewġ tal-blat imnikket.

Bħal vagabond għad dawl tal-kwiekeb

Tixxejjer minn fuq warda għall-oħra,

Kemm tista’ ddum mingħajr ma tixba

U tibda tfittex serħ band’oħra.

F’dan l-univers xejn mhu għal dejjem

Ma sbieħ kul għoda tibda ssellem.

Għabra fl-għajnejn għax xejn ma jibqa’

Mill-firmament li qed jitkellem.

Alfred Grech

31/01/2018